CALLARI TEMA | ¿QUIQUINBA TRABAJOHUANGA CUSHIJUSHCACHU CANGUI?
¿Shinllita trabajanataca alicachinchichu?
Alexca cosascunata apashpami trabajan. Paica pensarinmi: “Ima horashi cashnapacha trabajanataca saquisha. Ushashcata na trabajana cashpaca alimi causaiman” nishpa.
Shujcunapash shinllita trabajanataca na gushtanllu. Aaron shuti mecanicoca ninmi: “Ashtaca gentecunaca yanmi, shinlli trabajopi trabajanaca pinganaimi can. Gentecunaca ali trabajota taringacamanllami shinlli trabajoman yaicun” nishpa.
Ashtaca gentecunaca ninmi, ñucaca nimamanda na shinlli trabajopica trabajashachu nishpa. ¿Imamandata chai gentecunaca shina nin? Huaquingunaca televisiongunapi ricushpa, radiocunapi uyashpami cushilla, tucui ali cosascunahuanlla causangapaj munan. Pintashpa, arreglashpa trabajaj Matthew shuti jarica ninmi: “Gentecunaca yanmi, imapi trabajanata na atinajcunallami shinlli trabajoman yaicun” nishpa. Escuelata cuidashpa trabajador Shane shutipash ninmi: “Gentecunaca manapash ashtacata trabajashpatami ali ganangapaj munan” nishpa.
Shinapash ashtaca gentecunaca shinllita trabajanatami gushtan. 25 huatacunata charij Danielca construccionbimi trabajan. Paica ninmi: “Shujcunata ayudana munaihuan trabajashpaca ninandami cushijurin” nishpa. 23 huatacunata charij Andrepash ninmi: “Trabajashpallami cushilla, ali sintiririn. Ashatalla trabajashpaca na cushilla causarinllu. Ashatalla trabajanaca aburridomi can” nishpa.
¿Imamandata Danielpash, Andrepash shinlli trabajopi trabajashpapash cushilla can? Paicunaca Bibliapa consejocunata catishpami cushilla caita ushan. Bibliaca shinllita trabajanata, trabajohuan na aburrinata, imapi trabajashpapash imashina cushilla canatami yachachin.
Shinaca, imapi trabajashpapash cushilla cangapaca Bibliapa huaquin consejocunata ricupashun.