¿Imashinata shinllita trabajashpapash cushijushun?

SHUJ TRABAJO IMAMANDA ALI CASHCATAMI RICUNA CAN

Oficinapi trabajajushpa o imapash shinlli trabajopi trabajajushpapash ‘imata rurashcamanda japinatami’ yarina canchi (Proverbios 14:23). Trabajashca culquihuanmi ñucanchi minishtishcacunata randi ushanchi. Bibliapica Taita Diosca ninmi, ñucata sirvingapaj esforzarinajujpica cuidashami nishpa (Mateo 6:31, 32). Shina nishpapash Bibliapica trabajota mascashpa uchalla trabajachunmi animan (2 Tesalonicenses 3:10).

Shinallata trabajashpami ñucanchillata mantiniri ushanchi. 25 huatacunata charij Joshua shutica ninmi: “Ñucanchillata mantinirishpa, ñucanchi gashtocunata ñucanchillata paganaca alipachami can. Ñucanchi trabajo chaicunata pactachichun ayudajushpaca alimi can” nishpa

Ashtahuangarin trabajashpami ali sintirinchi. ¿Imamandata shina ninchi? Shinlli trabajoca na facilchu can, huaquinbicarin aburridomi can. Shinapash aliguta organizarishpa, shinllita trabajangapaj esforzarishpaca, quillanaitapash mishashcanimi yashpami ali sintirishun (Proverbios 26:14). Ñaupa temapi parlashca Aaronga ninmi: “Shinllita trabajashpaca shaijushcami chisharin. Tal vez pipash na ricushcangachu. Shinapash trabajashcanimi yashpami cushijuni” nin.

ASHTAHUAN ALI RURANGAPAMI ESFORZARINA CAN

Bibliapica alipacha trabajaj jarita, uchalla trabajaj huarmitaca ninandami alicachin (Proverbios 22:29; 31:13). Shinapash puñui jatari ñapash ali trabajador caitaca na usharinllu. Imatapash nali rurai ushashca trabajopi trabajanataca pipash na gushtanchichu. Tal vez ashtacacunaca paicunapa trabajota nali rurai ushashpa, ashtahuan ali rurangapaj na esforzarimandami trabajotaca na gushtanga.

Imapi trabajashpapash chai trabajota ashtahuan ali rurangapaj esforzarishpaca chai trabajotaca alicachishunmi. 24 huatacunata charij Williamga ninmi: “Ashtahuan ali trabajangapaj esforzarishpaca ali rurashcata ricushpami cushijurin. Jahua jahualla trabajashpa, trabajana cashcamandalla trabajashpaca cushijuitaca na usharinllu” ninmi.

¿IMASHINATA SHUJCUNATA AYUDAJUNI? NISHPAMI PENSARINA CAN

Ganajushca culquipillaca ama pensaripanguichu. Cashna tapuripangui: “Ñuca trabajoca ¿imamandata ali can? Ñuca rurashca trabajopi pipash na trabajajpi o nali trabajajpica ¿imashi pasanman? ¿Imashinata ñuca trabajohuan shujcunata ayudani? nishpa.

Ñucanchi trabajohuan imashina shujcunata ayudajushcata pensarinaca cushijuchunmi ayudan. Jesusca nircami, carajcunaca ‘carajpi japijcunatapash yalimi cushijun’ nishpa (Hechos 20:35). Ñucanchi jefecunata, clientecunata ayudajushpapash ñucanchi familiata o ayudachun minishtinajuj gentecunatami trabajashpaca ayudanchi.

Ñucanchi familia. Taita cashpa o mama cashpa paipa huahuacunata mantiningapaj esforzarishpaca ¿imashinata huahuacunataca ayudan? Pundapica trabajashpami Taita Dios mandashca shina huahuacunataca cuidai ushan, ropaguta cui ushan, maipi causanagutapash cun (1 Timoteo 5:8). Shinallata trabajashpami huahuacunamanga ali trabajanaca minishtirishca cashcata yachachin. Ñaupa temapi parlashca Shaneca ninmi: “Ñuca taitaca ali trabajanataca ninandami alicachin. Honradomi can. Imapipash trabajanllami. Ashtaca huatacunataca carpinteromi carca. Ñuca taitamandami maqui trabajopash ali cashcata, ñuca rurashcacuna shujcunata ayudajushcatapash yachajushcani” nin.

Ayudachun minishtinajun. Jesusta catijcunataca apóstol Pabloca nircami: “Cangunapaj maquihuanbacha trabajashpami, aliguta causana cangui. Shina causashpami, imagupash illajcunaman carangapaca charinguichi” nishpa (Efesios 4:28). Ñucanchi familiata mantini ushashpaca tal vez ayudachun minishtinajujcunatapash ayudai ushashunmi (Proverbios 3:27). Shinaca, shinllita trabajashpami shujcunata ayudajuimanda ninanda cushijurin cashca.

TRABAJANA CASHCAMANDALLACA NA TRABAJANACHU CAN

Paipa catijcunata yachachijushpaca Jesusca nircami: ‘Shuj kilómetro chaupitashna apajujpica, quimsa kilometrotashna ringui’ nishpa (Mateo 5:41). ¿Imashinata chai shimicunata pactachi ushapangui? Trabajana cashcamandalla trabajanapa randica quiquinba trabajota ashtahuan ali, ashtahuan uchalla rurangapami esforzarina capangui. Na importanteshnalla ricurijpipash aliguta rurangapami esforzarina capangui.

Ashtahuan ali rurangapaj esforzarishpaca, quiquinba munai ali rurashcamandami trabajohuanga ashtahuan cushijungui (Filemón 14). Bibliapica ninmi: “Imatapash ucha rurajcunaca, mandashpami causanga. Ashtahuangarin imatapash na ucha rurajcunaca, impuestota cushpa [“shinllitapacha trabajashpami”, NM ] causanga” nishpa (Proverbios 12:24). Ñucanchicunaca tal vez nunca na shinllitapacha trabajaj esclavocunashna cashunllu o imapash shinlli trabajopipash tal vez nunca na trabajashunllu. Shinapash jahua jahualla trabajashpaca tal vez shujcuna mandashcatalla rurashpami esclavocuna cuenda causashun. Shinaca ñucanchillata ali sintiringapaj munashpaca na quillanayachishpa, na jahua jahuallachu trabajana canchi.

SHUJ COSASCUNAPASH IMPORTANTE CASHCATAMI YARINA CAN

Bibliapi nishca shinaca uchalla trabajana, ashtahuan trabajanaca alipachami can (Proverbios 13:4). Shinapash na trabajopilla pensarishpa causanachu canchi. Eclesiastés 4:6​pica ninmi: ‘Ishcai maqui jundata ninanda trabajashpa shaijunapa randica, shuj maqui jundatalla trabajashpa, ashaguta samanami ashtahuan ali’ can nishpa. Shinaca ¿imatata yachajunchi? Huaquingunaca shillita, ushashca tiempota trabajashpapash na cushijunllu. Eclesiastés libropi nishca shinaca, chashna trabajadorcunaca huairata japingapaj munajuj cuendami can.

Bibliami ñucanchitaca trabajomanda aliguta pensarichun ayudan. Bibliapi nishca shinaca trabajangapaj esforzarina cashpapash, ima ashtahuan importante cashcataca yaipimi charina canchi (Mateo 6:33). Shinapash ¿imata ashtahuan importante can? Ñucanchi familiahuan, rijsicunahuan cana importante cashpapash, Bibliata liina, imata liishcapi pensarinami ashtahuan importante can.

Importante cosascunapipash preocuparishpa, trabajopipash preocuparijcunaca paicunapa trabajotaca alicachishpami causan. Williamga ninmi: “Ñuca punda jefeca shinllitami trabajan. Clientecunatapash cushilla, alimi tratan. Shinapash huasiman tigrashpaca paipa familiapi preocuparinatapashmi gushtan. Paipa religiondapash alimi catin. Paitami cushillapacha causajta ricushcani” nishpa.