Ñucanchi concienciata ali yachachishunchi

1, 2. a) Concienciataca ¿pita curca? b) ¿Imamandata concienciata charishcamanda agradicina canchi?

GENTECUNATA Jehová Dios rurashpaca imatapash paicunallata decidichunmi rurarca. Chaipaca concienciatami gentecunamanga curca. Concienciaca ¿imata can? Concienciaca ima ali cajta, ima nali cajta ricuchunmi ayudan. Concienciata Jehová Dios cushpaca ñucanchicunata juyashcata, ali causachun munashcatami ricuchishca.

² Tucui gentecunami concienciata charinchi (Romanos 2:14, 15, liingui). Concienciata charimandami ashtaca gentecunaca Diospa mandashcacunata na rijsishpapash, nali ruraicunamanda caruyashpa alita ruranata mascan. Gentecuna concienciata na charijpica, cai mundopi causaica ashtahuan nalimi canman. Shinaca, Jehová Dios tucuicunata concienciahuan rurashcamandaca ninandami agradicina canchi.

3. Concienciata ali yachachishpa, cazushpaca ¿imashinata congregacionbi ayudanchi?

³ Ashtaca gentecunaca paicunapa concienciataca na yachachinllu. Shinapash, Jehovata sirvijcunaca ñucanchi concienciata ali yachachingapami esforzarinchi. Chaimandami Jehová Dios ñaupajpi ima ali cajta, ima nali cajta ricushpa ali decisiongunata agllanata yachajunchi. Ñucanchi conciencia ali yachajushca cachunga, Jehová Diospa mandashcacunata yachajunallaca na minishtirinllu. Chai mandashcacunata juyana, ñucanchipallata ali cashcata crinami minishtirin. Apóstol Pabloca nircami: “Na mapa shunguhuan aliguta yarishpa, na nij tucushpalla aligutapacha crishpa, shungumandapacha juyarinajuchunmi mandani” nishpa (1 Tim. 1:5). Ñucanchi concienciata ali yachachishpa, concienciata cazushpaca Jehová Diosta ashtahuan juyashun, paipi feta charishun, congregacionbipash tucuicuna alimi cashun. Ashtahuanbash Jehová Diospa ali amigo cangapaj munashcata, paita cushichingapaj munashcatami ricuchishun. Shinaca ñucanchi concienciata cazushpa o na cazushpapash ñucanchi imashina cashcatami ricuchinchi.

4. ¿Imashinata ñucanchi concienciataca yachachina capanchi?

⁴ Ñucanchi concienciataca ¿imashinata yachachina canchi? Chaipaca, Jehová Diosta mañashpami Bibliataca cutin cutin yachajuna canchi. Shinallata, imata yachajushcapi pensarishpami pactachina canchi. Yangata yachajuimandallaca na yachajunachu canchi. Bibliata yachajunaca Jehová Dios imashina cashcata, imata rurachun munashcata ashtahuan intindichunmi ayudan. Shinami, ñucanchi concienciaca asha asha Jehová munashcashna ali caita ushan.

5. ¿Imatata cai temapica yachajupashun?

⁵ Cai tapuicunapi pensarishunchi: Ali yachachishca concienciaca ¿imashinata ali decisiongunata agllachun ayudan? ¿Imamandata ñucanchi huauquipanicunapa decisiongunata respetana canchi? ¿Ima ali cosascunata rurachunda concienciaca ayudan? Cai temapica quimsa cosascunapi ñucanchi conciencia ali decisiongunata agllachun imashina ayudajtami yachajushun: 1) Ñucanchi saludpi, 2) samanapi, 3) villachinapi.

ÑUCANCHI SALUD

6. ¿Imapita ali decisionda agllana capanchi?

⁶ Ñucanchi salud ali cachunmi Bibliaca ali consejocunata cun. Bibliapica nishca shinaca, minishtirishcagutallami micuna, ufiana canchi (Prov. 23:20; 2 Cor. 7:1). Cai consejota catishpaca huaquin ungüicunamanda jarcari usharinmi. Shinapash huaquin ungüicunata, rucuyanataca na jarcai usharinllu. Huaquin ungüicunata jambingapaca doctorcuna, naturistacuna mandashca tratamientocunami tian. Ashtaca huauquipanicunami tauca viaje sucursalcunaman cartacunapi tapushpa cachashca, maijan tratamientocunatata Testigocunaca agllai ushanchi nishpa.

7. Ima tratamientota agllagrijushpapash ali decisionda agllachunga ¿imata ayudanga?

⁷ Huauquicunallata ima tratamientocunata agllana cashcata tapujpipash, sucursalcuna o congregacionbi ancianocunaca ima tratamiento ali cashcata agllashpa cuna derechotaca na charinllu (Gál. 6:5). Chaipa randica, Bibliapi consejocunata yarichishpami ali decisionda agllachun ancianocunaca ayudana can. Bibliapica mandanmi, Jesusta catijcunaca yahuartaca na micunachu canguichi nishpa (Hech. 15:29). Chaimandami, Jesusta catijcunaca jambiringapaj yahuarta, yahuarmanda llujchishca glóbulos rojos, glóbulos blancos, plaquetas, plasma nishcacunahuan tratamientocuna cajpica na chasquinchi. Shinapash glóbulos rojos, glóbulos blancos, plaquetas, plasma nishcacunamanda fracciones de sangre nishcata llujchishpami huaquin jambicunata ruran. Chai jambicunahuan tratamientota catinata o na catinataca, cada unomi paipa conciencia ima nijta cazushpa ali agllana can.a ¿Bibliapa ima shuj consejocunata tratamientocunata ali agllachun ayudan?

8. ¿Imamandata Eclesiastés 2:26​ta yaipi charinaca ali can?

⁸ Imatapash nara decidishpallatami Proverbios 14:15 consejopi pensarina canchi. Chaipica ninmi: “Na yachajushca runaca, imata nijpipash tucuita crinllami. Ashtahuangarin ali yachajushca runaca, imata rurangapapash aliguta yarinrami” nishpa. Huaquin ungüicunapaca na jambi tianllu. Chaimandami pipash cai jambica alimi can, caihuanga jambiringuipachami nijpica aliguta ricuna canchi. Bibliapica ninmi: ‘Taita Diosca paipa ñaupajpi aliguta causaj runamanga ali yuyaita, ali yachajunatami’ cun nishpa (Ecl. 2:26). Ali yuyaita charij huauquipanicunaca, paicunapa saludpi yapata preocuparishpa, paipilla pensarijunapa randica, espiritualmente ocupado canatami mascan (Filip. 2:4). Cunanbica cai nali mundopi causajuimandaca imamandapash irquiyanchillami. Shinapash, na cunganachu capanchi espiritualmente ali canami ashtahuan importante can (Mateo 6:33, liingui).

9. a) ¿Imashinata Romanos 14:13, 19​ca ñucanchicunata ayudan? b) Apóstol Pablopa consejota na catijpica ¿imata congregacionbica pasai ushan?

⁹ Ali yuyaita charishpaca, cai jambimi ali can nishpaca na shujcunaman ninajushunllu. Europa llactapi shuj cusahuarmica cai jambimi ali can, cashna micunacunatami micuna canguichi nishpami shujman shujman villajurca. Huaquingunataca crichircami. Shinapash, chai cusahuarmi nishcacuna na ashta ali cajta ricushpami taucacunaca culirarca. Chai cusahuarmica paicuna munashca tratamientota agllanallami carca. Shinapash congregacionbi tucuicunaman villashpaca, congregacionbi shujlla shina tandanajushca canatami peligropi churarca. Shinallata nali yuyaita charishcatami paicunaca ricuchirca. Roma llactapi Jesusta punda catijcunaca imata micunamanda, fiesta punllacunamandaca shuj shuj yuyaicunatami charirca. Chaimandami apóstol Pabloca cashna consejarca: ‘Shujca huaquin punllallatami ashtahuan alicachin. Shujca tucui punllacunatallami alicachin. Tucuicunallata imashna crishpa yarijushpapash chashnallata yarichun ninimi’ nishpa. Imashinami yachajunchi, ima decisionda agllagrijushpapash shujcunata ama nitijachingapami ali ricuna canchi (Romanos 14:5, 13, 15, 19, 20, liingui).

10. ¿Imamandata huauquipanicunapa decisionda respetana capanchi? (Callari dibujota ricupangui.)

¹⁰ Shuj huauqui o shuj pani imapash nalishnalla tratamientota agllashcata ricushpaca, na yangata juchachishpa, chaica nalichu can nishpaca na nijunachu canchi. Tal vez chai huauquipa concienciaca ‘narachari shinlli canga’ (1 Cor. 8:11, 12). Na cashpaca, ñucanchi concienciami Bibliapa mandashcacunata ashtahuan yachajunata minishtinga. Ima cachunbash, cada unomi ima tratamientota agllanataca ali ricuna canchi. Chai jipa ima pasajpipash cada unomi responsable canchi.

SAMANAPI

11, 12. Samajushpa imata ruranata ali agllangapaca ¿Bibliapa ima consejocunata ayudan?

¹¹ Jehová Diosca ñucanchicuna samashpa, cushilla yalina munaihuanmi rurarca. Rey Salomonga nircami: ‘huacangapapash, asingapapash tiempo tianmi’ nishpa. Shinapash yarinami canchi, samajushpa imatapash rurangapaj diverciongunaca na tucuicuna ali canllu (Ecl. 3:4). Shinallata samashpa o pugllashpaca na yapa tiempota yalinachu canchi. ¿Imashinata concienciaca ñucanchi cuerpopash ali, espiritualmentepash ali cachun ayudan?

¹² Bibliapica nishca shinaca, cazarashca jahua shujhuan causanata, mapa ruraicunata, shujcunapa ñaupajpi pinganayai ruraicunata, yanga dioscunata adoranata, brujurinata, macanajunataca millanayachinami canchi. Shinallata ñapash culiranata, caishuj chaishuj nali canata, envidianata, machanata, manllanayai fiestacunata ruranatapash saquinami canchi. Apóstol Pabloca nircami: “Chashna nalitalla rurashpa causajcunaca, Taita Dios mandajuj llactagupica, imagutapash na japingachu” nishpa (Gál. 5:19-21). Chaimanda tapuripashunchi: “¿Peligroso pugllaicunapi chapurijunirachu? ¿Mishanatalla yashpa, llactapa shutita alipi saquigapaj munaj pugllaicunata gushtanirachu? ¿Jarihuan huarmihuan pinganai cosascunata rurajta, machanata, brujería cosascuna ali cashcata shina ricuchij peliculacunata ama ricungapaj esforzarinichu?” nishpa. Cai cosascunamandaca ñucanchi concienciaca ¿imatata nin?

13. 1 Timoteo 4:8; Proverbios 13:20 textocunaca ¿imashinata ayudan?

¹³ Ali decisiongunata agllangapaj Bibliapa shuj consejocunata ricushunchi. 1 Timoteo 4:8​pica ninmi: ‘Cuerpo shinlliyachun pugllanaca alimi’ can nishpa. Ashtaca gentecunapash ninmi chaica ciertomi can nishpa. Shina cajpipash ¿pihuanbash tandanajushpa pugllanalla, ejerciciota ruranallachu can? Proverbios 13:20​pica ninmi: “Alipacha yachajushca runacunahuan tandanajuj runaca, alipacha yachajushcami canga. Ashtahuangarin shinlli shungu runahuan tandanajuj runaca, ninandami llaquichi tucunga” nishpa. Imashinami ricunchi, samanajushpa imata ruranata, pihuan tandanajunataca Bibliapa consejocunata catishpami ali agllana canchi.

14. ¿Imashinata shuj taitaca Romanos 14:2-4 textohuan paipa ushita ayudarca?

¹⁴ Shuj cusahuarmipa ejemplota ricupashun. Cusaca Christian, huarmica Danielami can. Paicunaca ishcai viñarijuj ushicunatami charin. Christianga ninmi: “Familiahuan Adorana Tutapi yachajunajushpaca diverciongunamandami parlarcanchi. Ima divercionguna ali cajta, nali cajtami ricurcanchi. Shinallata, pihuan llevarina cashcatapashmi parlarcanchi. Chaipimi ñucapa shuj ushica nirca: ‘Escuelapi shuj Testigocuna nalita ruranajujta ricushpami, nalita rurana munaita charini’ nishpa. Shina nijpimi, ñuca ushitaca intindichircanchi cada unomi ñucanchi concienciata cazushpa imata ruranata, pihuan llevarinatapash agllana canchi” nishpa (Romanos 14:2-4, liingui).

15. ¿Imashinata Mateo 6:33​ca ñucanchi tiempota ali ocupachun ayudan?

¹⁵ Caipipash pensaripai: Quiquinbaca ¿tandanajuiman rina, villachina, Bibliata yachajunachu ashtahuan importante can? ¿O samana, pugllanachu ashtahuan importante can? Jesusca nircami: “Taita Dios mandajuj llactagupi causanatara, imagutapash cashcatapacha rurashpa causanatarami, pundaca mascana canguichi. Shina causajpica, tucui chaicunata canguna munashcataca jahuan jahuan caramungallami” nishpa (Mat. 6:33). Quiquinba concienciaca ¿cai mandashcata cazuchun ayudanllu?

VILLACHANAPI

16. ¿Imamandata ninchi, ñucanchi concienciaca villana munaita charichunmi ayudan nishpa?

¹⁶ Ali yachajushca concienciaca nali cosascunata rurashpa llaqui apanamandami jarcan. Shinallata ali cosascunata rurachunmi ayudan. Chaimandami huasin huasin o maiman rijushpapash villachina munaita charichun concienciaca ayudan. Apóstol Pabloca ali concienciatami charirca. Chaimandami nirca: “Villanapachami cani. Ali villaita ñuca na villajushpaca, ¡aij imachari tucuiman!” nishpa (1 Cor. 9:16). Pablopa ejemplota catishpaca, villachingapami tiempota ali aprovechashun. Shina rurashpaca, ñucanchi concienciapi alimi sintirishun. Ashtahuanbash, shuj gentecunapa concienciapash ali ruraicunata rurachunmi ayudashun. Pabloca nircami: “Ali yuyaita japichunmi, [Diospa] Shimitaca na llullashpa villanajunchi” nishpa (2 Cor. 4:2).

17. Jacquelinepa conciencia ali cashcamandaca ¿imatata rurarca?

¹⁷ Jacquelineca shuj ali ejemplomi can. Pai 16 huatata charijpica, biología clasepica evolución nishcamandami profesorca yachachirca. Paica ninmi: “Imata yachachijujpipash siempremi ñucapash parlan carcani. Shinapash, evolucionmanda yachachijujpica ñucapa concienciata cazushpami chai yachachishcataca na apoyarcani. Chaimandami ñuca crishcacunamanda profesorhuan parlarcani. Paica na culirashpami nihuarca, gulpicunapa ñaupajpi cai Alpata pi rurashcata parlailla” nishpa. Jacquelineca paipa concienciata cazushpami cushilla sintirirca. ¿Quiquinba concienciapash shinallatachu can?

18. ¿Imamandata ñucanchi concienciata ali yachachina capanchi?

¹⁸ Jehová Diospa mandashcacunata pactachingapaj esforzarishpa catishunchi. Chaipaca ñucanchi concienciami ayudanga. Shinapash, ñucanchi concienciataca yachachinami canchi. Concienciata ali yachachingapaca Bibliata ali yachajuna, yachajushcapi pensarina, ñucanchi causaipi pactachinami minishtirin. Ali concienciata charinaca Jesusta catijcunataca ninandami ayudan.