¿Imashinata ñuca concienciataca yachachi ushani?

Concienciaca ¿imahuanda igual can?

• Shuj mapa nishca dibujohuan

• Shuj espejohuan

• Shuj amigohuan

• Shuj juezhuan

Concienciaca cai chuscu yuyaicunahuanmi igual can, imamanda igual cashcataca cai temapimi ricupangui.

• Concienciaca ¿imata can?

• ¿Imamandata canba concienciataca yachachina cangui?

• ¿Imashinata canba concienciataca yachachi ushangui?

• Huaquin jovengunaca ¿imata nin?

Concienciaca ¿imata can?

Concienciaca shungu ucupi nali cajta, ali cajta ricuchijmi can. Concienciaca mandashcata shungupi escribishcashna cashcatami Bibliapica yachachin (Romanos 2:15). Concienciata ali yachachishpaca, imatapash nali rurashcapi pensarichun, shinallata imatapash ruragrijushpa aliguta rurachunmi ayudan.

• Concienciaca shuj mapa nishca dibujoshnami can. Ama llaquipi urmachun imata rurana cashcatami ricuchin.

• Concienciaca shuj espejoshnami can. Quiquin imashinapacha cashcatami ricuchin.

• Concienciaca shuj ali amigoshnami can. Ali consejocunatami cun, shinallata ali causaita charichunbashmi ayudan. Pero ima nijta cazunami cangui.

• Concienciaca shuj juez shinami can. Nalita rurashca cajpimi, nalitami rurashcangui nin.

¿Imatata yachajupanchi?: Concienciaca minishtirishcami can 1) ali decisiongunata japingapaj 2) nalita rurashca cashpa alita rurangapaj.

¿Imamandata canba concienciataca yachachina cangui?

Bibliapica ninmi: “Ali concienciahuanmi causana canguichi” (1 Pedro 3:16, La Biblia. Traducción del Nuevo Mundo [TNM]). Concienciata nali yachachishca cajpica chaita ruranaca dificilmi can.

“Ñuca taitamamacunaman maiman rijushpaca siempremi llullan carcani. Callaripica ñuca concienciaca nalimi sintichin cahuarca. Pero jipamanga nalita rurashca cuentaca na sintirinllu carcani” (Jennifer).

Jenniferca paipa concienciata cazushpami paipa taitamamacunaman llullajushcata villarca. Shina rurashpaca ña na llullashpa catingapaj munashcatami ricuchirca.

Caita yuyapai: Jennifertaca ¿Ima horasta concienciaca nali sintichi callarina carca?

“Ishcai shunguhuan causanaca llaquimanmi apan. Callaripi concienciata na uyashpa nalita rurashpaca, jipamanga shuj nali cosascunatapash rurai callarishunllami” (Mateo).

Huaquin gentecunaca paicunapa concienciatapash na cazunllu. Chaimi Bibliapica paicunaca juizupash tucurishcashnami can nin (Efesios 4:19). La Nueva Versión Internacionalca cashnami nin: “Paicunaca pingaipash tucurishcami can”.

Caita yuyapai: ¿Nalitalla rurashpa causajcunaca paicunapa causaipica ashtahuan alichu causan? ¿Ima llaquicunapita urmaita ushan?

¿Imatata yachajupanchi?: Ali concienciata charingapaca ali yuyaitami charina canchi, shinami “alita, nalitapash yachai ushajcuna” tucushun (Hebreos 5:14).

¿Imashinata canba concienciataca yachachi ushangui?

Ali concienciata charingapaca imatapash pactachina nishcataca pactachinami cangui. Huaquin gentecunaca shujcunapa yachachishcacunatami catin:

• paicunapa familiapa yachachishcacunata

• jovengunapa yachachishcacunata

• rijsishca rijsishca gentecunapa yachachishcacunata

Shinapash Bibliapa yachachishcacunami ashtahuan ali can. Bibliaca Taita Dios yarichishpa, escribichishca cajpimi ñucanchitaca ayudan (2 Timoteo 3:16).

Huaquin ejemplocunata ricupashun.

BIBLIAPA YACHACHISHCACUNA: “Tucuita aliguta rurangapaj munashpami, chaita ruranata yariajlla causanajunchi” (Hebreos 13:18).

• Examengunapi ama copiangapaj, taitamamacunaman ama llullangapaj, ama shuhuangapaca ¿imashinata cai yachachishcacunaca canba concienciapica ayudaita ushan?

• Concienciapi tucuita alita rurangapaj munajushpaca ¿imashinata cai yachachishcacunaca cunan punllacunapi, shamuj punllacunapipash ayudaita ushan?

BIBLIAPA YACHACHISHCACUNA: “Huainayamandaca anchurichi” (1 Corintios 6:18).

• Pornografiata o shuj huarmihuan shuj jarihuan nara cazarashpallata puñungapaj tentaciongunata charishpaca ¿imashinata cai yachachishcacunaca canba concienciataca ayudaita ushan?

• Canba conciencia huainayana juchamanda jarcarichun ayudajpica ¿imashinata cunan punllapillata, shamuj punllacunapipash ayudaita ushan?

BIBLIAPA YACHACHISHCACUNA: “Tucuicunahuan aliguta causashpa, caishuj chaishuj llaquirishpa, perdonarishpa causaichi” (Efesios 4:32).

• Huauquipanicunahuan o shuj amigohuan imagupipash na de acuerdo cashpaca ¿imashinata cai yachachishcaca ayudaita ushan?

• Shujcunata perdonashpa causachun, llaquishpa causachun canba conciencia ayudajpica ¿imashinata cai yachachishcacunaca cunan punllacunapi, shamuj punllacunapipash ayudaita ushan?

BIBLIAPA YACHACHISHCACUNA: Jehová Diosca “ninandapacha llaquichingapajlla munaj runataca, tucui shunguhuanmi millanayachin” (Salmo 11:5).

• Peliculacunata, telepi programacunata ricushpa o videojuegocunata pugllagrijushpaca cai yachachishcacunaca ¿imashinata ayudaita ushan?

• Nali peliculacunata, nali videojuegocunata ama pugllachun canba conciencia ayudajpica ¿imashinata cai yachachishcacunaca cunan punllacunapi, shamuj punllacunapipash ayudaita ushan?

SHUJ JOVENGA NINMI: “Nali videojuegocunata pugllaj amigocunatami charircani, ñucapashmi chaita pugllan carcani. Chashna rurajujpimi ñuca taitaca chai nali pugllaicunataca na pugllachun munanichu nihuarca. Chaimi, ñuca amigocunapa huasiman rishpalla pugllan carcani. Pero ñuca taita tapujpica imatapash na villanllu carcani. Shuj punlla Salmos 11:5​ta liijushpaca nalita rurajushcatami cuenta japircani, chaimi chai videojuegocunata pugllanataca saquircani. Chaita ricushpami shuj amigoca chai videojuegocunata pugllanataca saquirca” (Jeremy).

Caita yuyapai: Jeremyca paipa concienciataca ¿ima horata cazui callarirca? Chaimandaca ¿imatata yachajunchi?

¿Imatata yachajupanchi?: Concienciaca can imashina cajta, shinallata quiquinba imacunalla importante cashcatami ricuchin. Canba concienciaca ¿imata nin?