CALLARI TEMA | ORACIONDA RURANACA ¿ALICHA CAN?
¿Imamandata Taita Diosca mañachun munan?
Taita Diosca paipa amigo cachunmi munan.
Amigopura parlarinaca ashtahuan ali llevarichunmi ayudan. Taita Diospash paihuan ali amigo tucuchun munashpami nin: “Ñucata mañanguichi. Ñucapajman shamushpa mañajtaca, ñucapash uyajushami” nishpa (Jeremías 29:12). Taita Diosta mañashpaca paimanmi ashtahuan quimirishun. Paipash ñucanchiman “quimiringami” (Santiago 4:8). Bibliapica ninmi: ‘Mandaj Diosca paita mañajcunata ayudangapaca ladopimi’ can nishpa (Salmo 145:18). Taita Diosta cutin cutin mañashpaca paihuanmi ali amigocuna tucushun.
‘Mandaj Diosca paita mañajcunata ayudangapaca ladopimi’ (Salmo 145:18).
Taita Diosca ayudangapaj munanmi.
Jesusca nircami: ‘¿Maijan runata cangunapa huahuagu shuj tandaguta mañajpica rumita caranguichiman? Piji aichaguta carahuai nijpica, ¿maijanda culebrata caranguichiman? Cangunaca nalicuna cashpapash, huahuacuna mañajpica imatapash aligutami caranata yachanguichi. Jahua pachapi cangunapa Taitacarin, paita mañajcunamanga ¿nachu alicunata caranman?’ nishpa (Mateo 7:9-11). Imashinami ricunchi, Taita Diosca ñucanchicunata cuidangapaj, ayudangapaj munashpami paita mañachun munan (1 Pedro 5:7). Llaquicunata charishpacarin paipa ayudata mascachunmi munan. Bibliapica ninmi: ‘Ima illajpipash na chaitalla yariashpa causanachu canguichi. Ashtahuangarin, Taita Diosmanmi imatapash villashpa ninanda mañana canguichi. Tucui imamandapash pagui nishpa mañaichilla’ nishpa (Filipenses 4:6).
Gentecunaca Taita Diosta minishtinchimi.
Gentecuna imashina portarijta investigajcunaca, ashtaca gentecuna Taita Diosta mañanata minishtijtami cuenta japishca. Ateocuna, agnósticos nishcacunapashmi Taita Diosta mañan.a Imashinami ricunchi, tucuicunami Taita Diospaman quimirinata minishtinchi. Jesuspash nircami: “Diosmanda yachajungapaj, paicunapaj shungupi ninanda munajcunaca, ninandami cushijun” nishpa (Mateo 5:3). Chaimandami cushilla sintiringapaca Taita Diosta mañariana canchi.
Taita Diosta mañashpaca ¿imashinashi sintirishun?
a Huata 2012pi Centro de Investigación Pewca nircami, Estados Unidosmanda 11% ateocuna, agnósticos nishcacunaca cada quilla shuj viajellapash Taita Diosta mañanmi nishpa.