Cunanga shujcunatapashmi ayudaita ushapani

ÑUCAPA PUNDA CAUSAI:

Ñucaca Acul nishca pushtupimi nacirircani. Chai pushtuca Guatemala llactamandaca carupipachami can. Ñuca familiaca Mayas nishca cultura runa gentecunamandami shamun. Españolta parlashpapash ñucanchi runa gentecuna parlashca shimitapash yachajurcani. Ñucaca ñucanchi llactapurallata guerra macanajui tiai tiempopimi viñarcani. Chai guerraca 36 huatacunatami pararca. Chai guerracunapica ashtaca runa gentecunami huañurca.

Ñuca chuscu huatagucunata charij tiempopimi siete huatagucunata charij ñuca huauquica shuj bombahuan pugllajushcarca. Chai bomba tujyajpimi ñucaca ciego quidarcani. Cutin ñuca huauquiguca huañuparcami. Chai punllamandapachami ñucaca Guatemala llactapi ciegogucunapa escuelaman ri callarircani. Chaipimi braille shimita liinata yachajurcani. Chai escuelapi profesorcunaca ñucataca shuj huahuagucunahuan parlachunga na saquinllu carca. Huahuacunapash ñucahuan parlangapaca na munanllu carca. Imashpa chashna rurashcataca cunangaman na yachanichu. Siempremi ñucalla yalin carcani. Cada huatami ñuca mamapaman ishcai quillagucunata vacación rishpa cushilla yalin carcani. Chaitami siempre shuyan carcani. Paica ninandami juyahuan carca. Shinapash ñuca mamitaca ñuca 10 huatagucunata charijpimi huañuparca. Paillami ñucataca ninanda juyahuan carca.

Ñuca 11 huatacunata charishpaca cutinmi ñuca llactapi causangapaj tigrarcani. Chaipica taitamandalla ñuca huauquipapimi causangapaj rircani. Chaipica tucuicunami ñuca ima minishtishcagucunapi ayudahuarca. Shinapash ñuca imashina sintirishcapica ni pipash na ayudaita usharcachu. Huaquinbica ninanda huacashpami Taita Diostaca ¿Imashpata ñuca mamitaca huañuna carca? ¿Imashpata ñucaca ciego quedana carcani? nishpami reclaman carcani. Huaquingunaca chai pasashcacunaca Taita Diospa voluntadmi can nishpami nihuan carca. Chaimi Taita Diosca millai, na juyaj cajta pensan carcani. Chaimandami ñucamandallata huañuchiringapaj munan carcani.

Ciegogu caimandami ñucapaca tucui difícil cahuashca. Huahua cashpaca tauca viajetami violai tucushcani. Pipash na cazuta rurahuangachu pensaimandaca chashna llaquichishcacunatapash ni pimanbash na villashcanichu. Ni pipash na ñucahuanga parlanllu carca. Chaimandami llaqui llaqui sintirishpa pihuanbash na parlangapaj gushtan carcani, ni pihuan na confianllu carcani.

BIBLIAMI ÑUCA CAUSAITA CAMBIASHCA:

Ñuca 13 huatacunata charishpa escuelapi cai tiempopica shuj punllaca recreopi cajpimi shuj Testigo cusahuarmicuna shamushpa Jehová Diosmanda parlahuarca. Ñuca escuelamanda profesorami ñucata llaquimandaca ñucata visitachun nishpami paicunaman nishcarca. Bibliapica ciegogucunapa ñavigucunapash pascaringami. Huañushcacunapash causaringami nijunmi nishpami paicunaca villahuarca (Isaías 35:5; Juan 5:28, 29). Paicuna Bibliamanda parlajpi uyanataca ninandami gushtan carcani. Pero shujcunahuan parlajuna costunbreta na charimandami mejor upalla uyan carcani. Shina upalla quidajpipash paicunaca juyaihuanmi Bibliamanda yachachingapaca cutin cutin visitahuan carca. Shinapash ñuca huasiman chayamungapaca paicunaca caru carutami shamun carca.

Ñuca huauquica pobrella gentegucuna cashpapash limpio aliguta mudarishca gentegucunami can nishpami villahuarca. Paicunaca huaquin regalogucunata carashpami ñucata juyashcata ricuchin carca. Paicuna ciertopacha Jesusta ali catijcuna cashcataca seguromi carcani.

Braille shimipi publicaciongunahuanmi Bibliataca yachajun carcani. Bibliapi imata yachajujushcataca intindinmi carcani. Pero na tucuitaca cri usharcanichu. Ñucapaca Taita Dios ciertopacha ñucamanda preocuparijta, shinallata shuj gentecunapash ñucamanda preocuparijta crinaca dificilmi carca. Taita Dios imamanda llaquicuna tiachun saquishcata intindishpapash Taita Diosta shuj juyaj Taitata cuenda ricungapaca dificilmi cahuarca.a

Bibliapa yachachishcacunaca asha ashami ñuca yuyaitaca cambiashpa rihuarca. Ñucanchicuna sufrijujta ricushpaca Taita Diospash ninanda llaquiyajtami yachajurcani. Taita Diosta sirvijcuna llaquichi tucushcamanda parlashpami Bibliapica “ñuca agllashca gentecuna llaquita apanajujtaca alimi ricurcani. Paicunapa ninan llaquicunataca ñucami yachani” nin (Éxodo 3:7). Jehová Dios shuj juyaj Taita cajta ali intindishpami Jehová Diostalla sirvisha nishpa huata 1998​pica bautizarishpa Testigo de Jehová tucurcani.

Bautizarishcamanda shuj huatagupillami Escuintla shuti llactapica ciego gentegucunapa shuj cursota rurarcani. Chai llactapi shuj congregacionmanda huauquica ñucapaca Acul llactapi congregacionman rinaca difícil cashcatami cuenta japirca. Acul congregacionman ringapaca caru carutapachami rina carcani. Imashnami ñucata shuj cusahuarmi Testigo Bibliata yachachingapaj shamun carca. Chashnallatami ñucapash chai ñangunatallata purina tucurcani. Tandanajuicunaman facillla ri ushachunmi chai huauquiguca chai llactapi Testigocunapa shuj huasigupi mingarichun ayudahuarca. Chai familiaca cunangamanmi ñucataca paicunapa propio familiatashna cuidahuan.

Ashtaca viajecunatami shuj shuj huauquipanicunaca ñucataca ninanda ayudahuashca. Testigo de Jehovacuna ciertopacha Jesusta catinajushcataca seguromi capani (Juan 13:34, 35).

IMA BENDICIONGUNATATA CHASQUIPASHCANI:

Llaquilla sintirinapa randica cunanga cushillami sintirini. Ciegogu cashpapash Jehová Diosta tiempo completopi sirvishpami shuj gentecunapash Bibliamanda yachajuchun ayudai ushani. Shinallata ñuca congregacionbipashmi huaquin responsabilidadcunata charipani. Shuj congregaciongunapi discursocunata cuchunbashmi invitahuan. Shinallata Jatun Tandanajuicunapi discursocunata cui ushashcamandapash ninandami agradicipani.

Huata 2010​pica El Salvador llactapi Escuela para Evangelizadores del Reinomandami graduarircani. Chai escuelapi yachajushcacunaca huauquipanicunata ashtahuan sirvingapami ayudahuashca. Chai escuelapimi Jehová Dios ñucata ninanda valichishcata, juyashcatapash ricurcani. Jehová Diosca paipa munaita pactachingapaca tucuicunatallatami utilizai ushan.

Jesusca “carajpi japijcunatapash yalimi carajcunaca ninanda cushijun” nircami (Hechos 20:35). Cunanga ciertopachami cushilla causapani. Pundacunapica shujcunataca na ayudai ushashachu nishpami pensan carcani. Pero cunanga shujcunatapashmi ayudaita ushani.