Jehovami ñucataca alpapi shitashcashna cashcamanda jatarichishpa respetohuan tratahuarca

Ñucaca huata y chaupigucamanga sanomi carcani. Pero huata 1967pimi shuj tutaca calenturahuan na ushajushcarcani. Cayandi punllaca ñuca chaquigucunaca débil debilgucunami cashcarca. Chaimi ñucataca Sierra Leona llactapi Freetown llactapa hospitalman apahuarca. Chaipi doctorcunaca, poliomielitis unguitami charin nishcarcami. Chai unguica contagioso unguimi cashcarca. Shuj virus juruca paralisista cunllami cashca. Ashtahuanbachaca nara 5 añosta charij huahuagucunatami afectan cashca. Fisioterapia shinajujpipash na mejorarircanichu. Ñuca changagucunaca ashtahuanmi debilyashpa rirca. Ñana puritapash usharcanichu ni jataritapash na jatari usharcanichu. Shina discapacidadta charijpimi ñucaca taitaca “chaupi ushitami” charini nin carca. Ñucaca ninanda mal sintirishpami causarcani. Alpapi llucashpallami cuyuri ushan carcani. Shinallami causana cani yanmi carcani.

Ashtaca sufrimientocunata charishca tiempo

Ñuca mamita y ñucaca pobrella sectorgupimi causan carcanchi. Chaipica tucuilla familiacunami pobre pobregucuna carcanchi. Gentecunaca juyahuanmi carca. Pero ñucaca, ñucata juyashpa charichunmi shuj taita munarcani. Huaquin gentecunacunaca, chai unguica na normalchu can. Ñucata dañota rurangapami pipash brujeriata rurashcanga ninmi carca. Cutin shujcunaca ñuca mamitataca ninmi carca, discapacitado huahuagucunata atindij pungupi huahuataca saquigri. Yapatami paihuanga sufrijungui. Chaipi saquishpaca ñana shinapachaca cuidajunguichu ninmi carca. Shinapash ñuca mamita nunca na saquihuarcachu. Siempremi paipaca ñucata aliguta cuidangapaj esforzarirca.

Ni shayarita ni puritapash na ushaimandaca, alatrarishpallami cuyurin carcani. Chaimi chugri chugri carcani. Ama yapata chugringapami, racu racu ropata churajun carcani y maquicunata ama chugringapaca, chancletacunatami maquipica churarin carcani. Jipamanga, maquicunapaca U formata charij tabla caspigutami ocupai callarircani. Shujlla pasoguta cuyuringapami, chai caspicunataca ñuca ñaupapi churashpa, chaicunapi apoyarishpa tucui fuerzahuan ñaupaman suchurin carcani. Chai jipami ñuca huasha lomogupi ashaguta doblarishpa ñuca chaquicunataca aisan carcani. Shujlla pasoguta cuyuringapami chai tucuita ruran carcani. Ñuca maquicunata, rigracunataca ninandami nanan carca. Ninanda forzarijuna caimandami huaquinbilla huasimandaca llujshin carcani. Ni escuelamanbash na rinllu carcani, ni shuj huahuacunahuan pugllaitapash na pugllanllu carcani. Ñuca mamita na ñucahuan cajpica, imashi tucusha yashpami ninanda pinarin carcani.

Taita Diostaca ayudahuai nishpami mañan carcani. Callecunapi caridadta mañashpaca na tiajushachu yanmi carcani. Taita Diosman quimirishpa paita sirvijpica, Taita Diosca na ñucatalla saquihuangachu yanmi carcani. Shina pensashpami huata 1981pica, ñuca huasi callepillata tiaj iglesiaman rircani. Juyaipami rircani. Sudorsapa, yahuarsapa, huacai huacaimi chayagrircani. Iglesiapi gentecunaca ricunmanmi quidahuarca. Nali sintichihuarcachu. Nisiquiera pastorpash na ali chasquihuarcachu. Ashtahuangarin, ñuca mamitataca, imashpata cai bancapi tiarichun saquircangui, cai bancaca ña pagashcallami carca nirca. Chaimi ñucaca nunca más na cai iglesiamanga tigramushachu yashpa pensarircani.

Jahua cielomanda Taitatami rijsircani

Punllacunaca jahua pisoman rishpa, ventana ladogumanda canllaman ima pasajujta ricujuna costumbretami charin carcani. Shinapash huata 1984pi, 18 añosta charishpaca, jahua piso cashpapash, patiomanmi uriajurcani. Chaipica nipipash na canata yachanllu carca. Chaipimi ishcai jaricuna huasin huasin predicanajujta ricurcani. Paicunaca ñucapaman quimirishpami, shamuj punllacunapi shuj ali causaigu tianata villahuarca. Na siemprechu shina causangui nishpami, Isaías 33:24​ta y Apocalipsis 21:3, 4​ta liishpa uyachihuarca. Chai jipami ¡Disfrute para siempre de la vida en la Tierra! folletota cuhuarca. Shuj cosascunatapashmi yachachingapaj shamushun nishpami rirca.

Tigramushpaca, cutin visitangapaj shamushpaca, chairalla chayamushca Pauline shuti misionera paniguta pushashpami shamushun nihuarcami. Cutin tigramushpaca, chai ñañaguta pushashpami shamurca. Shinami Pauline ñañaguta rijsircani. Paica ñuca mama cuendami tucurca. Paica ashtaca pacienciatami charirca. Cushilla, juyaihuanmi parlahuan carca. Ñucamandaca ashtacatami sacrificarirca. Ñuca imata minishtijushcataca pendientemi carca. Ñucapa mama propioca, chaishuj mamahuan Bibliata estudiai nishpami animahuan carca. Paulinemi ñucamanga liinata yachachihuarca. Shinallata, Mi libro de historias bíblicas librohuanmi, ñucata juyaj, llaquij Taitata rijsichun ayudahuarca. Ñucaca por finmi ñuca siempre mascajushca Taitata tarircani.

Bibliapi imata yachajujushcataca ninandami alicachin carcani. Ñuca huasi ladollapi testigo de Jehovacunapa shuj reunión tiajta yachashpami, chaiman ringapaj munarcani. Chai reunionga Estudio de Libro de Congregacióna nishcami cashcarca. Shuj punllaca, ñachu chai reunionman rita ushani nishpami Paulinetaca tapurcani. Chaimi paica ari rishunllami nirca. Chaimi caya semana martesca igual ringapaj pushangapaj shamuhuarca. Paica ñuca armashpa vistiringacamanmi shuyahuarca. Shuj personaca Paulinetaca taxipi pushahuai niyari nihuarcami. Shinapash ñucaca nircami: “Na, ñucapa caspigucunahuanllata chayagrishallami” nircanimi.

Huasimanda llujshijpica, ñuca mamita y vecinocunapash ñucamanda preocuparishpami ricunajurcalla. Patiota chimbajujpica, huaquin vecinocunaca “ama obligaichu” nishpami Paulinetaca caparinajurca.

Chaimi paica “Jay, ¿ringapaj munanguichu?” nishpa tapuhuarca. Chai ratopica Jehová Diospi confiashcatami ricuchi callarircani (Proverbios 3:5, 6). Paitaca nircanimi: “Ari ringapaj munanimi. Ñucami risha nishpa decidijuni” nircani. Chaimi vecinocunaca upalla quidarca. Ña portón punguman chayajujpica, tucuicunami cambiai callarirca. Ña por fin llujshijpica, tucuillacunami maquita huactashpa, cushijushca caparinajurca.

Chai reunionbi cashpaca cushijushcapachami carcani. Nipipash na millanayachishpaca ricuhuarcachu. Tucuicunami cushijushpa chasquihuarca. Na mal sintirijurcanichu. Chai punllamandami tucui martescuna reunionmanga rin carcani. Jipamanga shuj jatun reuniongunamanbash nachu ri ushani nishpami tapurcani. Ashtahuan jatunlla reuniongunataca testigo de Jehovacunapa Salón del Reinopimi ruran carca. Porbregu caimandaca ishcai vestidogucunatalla y ishcai chancletagutallami charin carcani. Taita Diospa llacta ñucata nunca na rechazanataca segurami carcani y na pandarishcanichu.

Salón del Reinoman ringapaca, calle tucuricamanmi rina carcani. Chai jipami taxita japina carcani. Chai jipami turigucunaca, paicunapa rigrapi marcashpa subidataca apan carca. Shinami Salón del Reinomanga chayan carcani.

Ña chaicamanga Jehová Dios ali ali cashcataca ñami ricushcarcani. Chaimi siempre paipaman quimiringapaj munarcani. Chaimandami reuniongunamanga rishpa catinami cani yarcani (Salmo 34:8). Tamia temporadapica, mutiyashca, turullami Salón del Reinomanga chayagrin carcani. Mashnata esforzarina cashpapash, Salón del Reinoman rinaca alipachami can.

Anuario de los testigos de Jehová para 1985 libropimi, ñucapa historiaca llujshirca. Chaita liishca jipami, Suiza llactamanda Josette shuti ñañaguca, ninanda llaquirishpa maquicunapa pedalcunata charij shuj triciclota carahuarca. Chai tricicloca ama turuyachunmi protectorcunata charirca. Huashamanbash de colores reflectorcunatami charirca. Huahuacuna ñucata yalijujta ricushpaca, shimipash pascariami ricunajun carca. Juyala triciclotami charingui ninmi carca. Ñana alpataca llucashpa “purinllu” carcani. Cunanga ñana pingaipata cuyurinichu. Shuj reinashnami sintirircani. Punda ñucata nalicachishpa ricunajushca gentecunaca, respetashpami ricui callarihuarca.

Ali alimi causai callarircani

Como na maijanbash jarihuan causan carcani y sencillo causaiguta charin carcanica, facilmi espiritualmenteca progresai usharcani. Triciclohuanga predicacionmanbash rinllami carcani. Shinami 9 de agosto de 1986pica bautizarircani. Bautizarishcamandapachami ñuca causaica cambiaitapacha cambiarca. Ashtahuan alimi causai callarircani. Cushilla, valiosami sintirircani. Ñucallatami shungu ucupica ali, segura sintirircani. Por finmi ñucata juyaj Taitata y ñucapi ciertopacha preocuparij gentecunatapash rijsircani.

Ñucata ninanda ayudashcamandami Jehová Diosmanga imaguhuanbash paganami cani yarcani. Chaimi, aunque talvez na ushashachu yajushpapash precursorado regularta japircani (Salmo 116:12). Shuj oracionda rurashpa Jehová Diosman parlashpami, precursoradotaca japishapachami yarcani. 1 de enero de 1988pimi precursora regular tucurcani. Chai punllamandapachami precursora regular cashcani. Precursora canaca shuj jatun bendicionmi cashca. Turiñañagucunaca, cushijushpami ayudahuan horascunata pactachichun. Jehová Dios paipa espíritu santohuan ayudajtaca claritomi cuenta japini (Salmo 89:21).

Precursora caimandaca ashtahuanmi cuyurin carcani. Chaimi ñucapa changagucunapash ashaguta mejorari callarirca. Huaquin tiempo jipaca, fisioterapiata y ejerciciocunata rurashpa ayudaringapaj yashpami shuj clinicaman rircani. Pero chaipi enfermeraca, ña ama imatapash ruraichu, ña asha tiempotallami causagringui nihuarca. Paipa cumba shuj enfermerapash lo mismotallatami nihuarca. Chaimi ñucaca ninanda desanimarircani. Huasiman chayashpaca, Jehová Diostami ama shina sintirijungapaj ayudahuai, imapash terapiata taringapaj ayudahuai nishpa mañarcani.

Predicacionmi ñucapaca alipacha terapia cashca. Predicashpami ashtaca ejerciciota rurajuni. Huaquin huatacuna jipaca, ñallami huañugringui nishca enfermerami Salón del Reino calleta yalijushcarca. Ñucata ricushpaca, todavía causajujta ricushpami manllarishpa quidarca.

Aunque ñucapa causai na fácil cajpipash, Jehová Diosta siempre sirvingapami esforzarini. Congregacionbica, ñuca cushilla cajta ricushpa, reunionguman ali hora chayajta ricushpami felicitahuan. Tucuillata saludangapaj, tucuillacunahuan parlangapaj tiempo pactachunmi ali horata rini.

Tucui ñuca causaipimi Jehová Dios ñucahuan ali ali cajta ricushcani. Paica ashtacatami bendiciahuashca. Quimsa personacunatami bautizarichun ayudashcani. Shujca Amelia shutimi can. Paica Escuela de Galaadpa clase 137manmi rirca. Ñucapashmi Escuela del Servicio de Precursormanga tauca viaje rishcani. Precursora canaca Jehová Dios carashca regalomi can. Jehová Dios ayudashcamandami cunanga cushilla, segura y valishca sintirini. Ñana pinganayahuanllu. Jehová Diosta sirvinajuj amigocunatami charini. Y na solo cai Freetown pushtupillachu amigocunataca charini. Sino cai llacta enteropi ashtahuangarin mundo enteropimi amigocunataca charini.

Taita Diosca ñana discapacitadocuna tiachun saquingachu nishca promesata uyashca punllamandaca, ñami 40 huatacuna yalishca. Pero chai promesami cunangaman fuerzata cushpa catihuan. Chai promesa ña pactarichunmi munani. Pero pacienciahuanmi shuyashpa catini. Porque ñuca Taita Diosca na jipayangachu (Miqueas 7:7). Pacienciata charimandami ashtaca problemacunata y pruebacunatapash mishai ushashcani. Ñuca minishtijuj ratocunapica siempremi Jehová Diosca ayudajuhuashca. Asijungapaj y cushilla cangapaca ashtaca razongunatami charini. Porque Jehovami ñucataca alpapi shitashcashna cashcamanda jatarichishpa respetohuan tratahuarca. Chaitaca nunca na yaitallapash yashcanichu.