CALLARI TEMA | BIBLIATA LIISHPA CUSHIJUPAI
¿Bibliata liinaca minishtirishcachu can?
Jovy shuti huarmica ninmi: “Bibliataca na intindita ushashachu yarcanimi” nishpa.
Queennie shuti huarmica ninmi: “Bibliata liinaca quillanaimi canga yarcanimi” nishpa.
Ezekiel shuti jarica ninmi: “Ashtaca ashtaca hojacunata ricushpaca liinatapash quillanayarcami” nishpa.
¿Nachu quiquinbash shinallata pensapashcangui? Bibliata liingapaj munajpipash ¿imacunapash jarcashcachu? Ashataca gentecunaca Bibliata liinapi pensarishpallatami aburririn. Shinapash Bibliata liishpa cushilla, ali causanata yachashpa, Bibliata cushijushpa liingapaj imata ruranata yachashpaca ¿imatashi ruranguiman? ¿Nacha Bibliapi imata yachachijushcata ricungapaj munapanguiman?
Huaquin gentecuna Bibliata lii callarishcamanda paicunapa causaipi imashina ayudashcata ricupashun.
20 huata yalita charij Ezekielca ninmi: “Pundaca, maiman rinata na yachashpa shuj ñanda japishpa yangata rijuj cuendami causan carcani. Shinapash, Bibliata liinami ñuca causaihuan imata ruranata yachachun ayudahuashca. Bibliapica tucui ñucanchi causaipami ali consejocuna tian” nishpa.
20 huata yalita charij Friedaca ninmi: “Ñucaca imagumandapash jaicamanda, yangata culiranllami carcani. Shinapash Bibliapi imata yachachijushcata liishpaca, yangata culiranata aguantanatami yachajushcani. Chaimandami tucuicunahuan ashtahuan ali llevarita ushashcani” nishpa.
50 huata yalita charij Euniceca ninmi: “Bibliata liinaca ñuca ashtahuan ali cachun, imapash nali costumbrecunata saquichunmi ayudahuan” nishpa.
Imashinami ricunchi, Bibliata liinaca ashtaca millón gentecunatami cushijushpa causachun ayudaita ushan (Isaías 48:17, 18). ¿Imacunapillata ayudai ushan? ali decisiongunata agllachun, ali amigocunata charichun, imacunamandapash ama yapata pinarishpa causachun, Tucuita Ruraj Diosmanda cabalta yachajuchunmi ayudan. Caita yachajunaca ashtahuan minishtirishcapachami can. Bibliapi yachachishcacunaca Taita Diosmandami shamun. Bibliapi yachachishcata ñucanchi causaipi pactachishpaca ñucanchillatami cushilla causashun. Taita Diosca siempremi alipa yachachin.
Shinaca Bibliata lii callarinami capangui. Cati temacunapimi Bibliata lii callaringapaj imata ruranata, Bibliata cushijushpa liingapaj imata rurana cashcatapash yachajupangui.