3 Problemacunata aguantachunmi ayudan

Huaquin problemacunamanda pacajuita o arreglaitaca na ushanchichu. Huaquinbica shuj familia huañun, o imapash nali ungüimi japin. Shina pasajpica aguantaitallami aguantana tucun. Shinapash ¿imashinata Bibliaca ayudan?

UNGUSHCAPACHA CASHPA

Rosaca ninmi: “Ñucaca ungushcapachami cani. Ninandami nanan. Ñana pundashna imatapash rurai ushanichu. Bibliata, Bibliamanda publicaciongunata liijushpaca, na aliguta intindi ushajushpami preocuparin carcani. Shinapash Mateo 19:26pi shimicunami ñucataca ayudahuarca. Chaipica nijunmi: ‘Taita Diospaca, tucui ushanallami’ can nishpa. Nanaimanda liita na ushashpapash Bibliapa, Bibliapa grabaciongunatamia uyai callarircani. Shinami Taita Diosmanda yachajushpa catita usharcani” nin.

Pundashna ñana rurai ushashcamanda llaquirijujpica 2 Corintios 8:12pi shimicunami paitaca animan. Chai textopica nijunmi: ‘Maijanbash tucui shunguhuan carangapaj munashpa, imagutapash carajpica Diosca chasquinmi. Ashtahuangarin imatapash na charishpata carachunga, na mañanllu’ nishpa. Chai textomi paitaca ashaguta rurai ushajpipash Taita Diosca cushijushpa ricujujta intindichun ayudarca.

SHUJ FAMILIA HUAÑUJPI

Ñaupa temacunapi parlashca Dianaca ninmi: “Ñuca ushiguca 18 huatagucunata charishpallami huañuparca. Ninanda llaquirishpami, cunangarin imashinata causashayari yarcani” nishpa. Paica nircapashmi: “Salmo 94:19pi shimicunami ñucataca ayudahuarca. Chaipica Salmo librota escribij runaguca Taita Diostaca nircami: ‘Ñuca shungu ucupi ashtaca yuyaicunahuan musparijujpica, can cushichishcacunami, ñuca almatapash cushichihuarca’ nishpa. Jehová Diostaca mañanmi carcani, imapash ruraicunapi ocuparishpa alillata sintirichun ayudahuayari” nishpa.

Dianaca shuj gentecunata ayudangapaj voluntaria tucushpami ninanda cushijurca. Tiempohuanga ashtahuan alillata sintirishpami nirca: “Huahuacunaca shuj tizagu faquirijpipash, chai tizagutaca ocupashpa catinllami. Ñucapash faquirishca tizagushna sintirishpapash shuj gentecunata ayudai ushashcamandami ali sintirircani. Bibliapa textocunahuan shujcunata animashpaca, chai textocunahuan ñucatapash Jehová Dios animajushcatami cuenta japircani. Shinallata, Bibliapimi llaquicunata charishca gentecunapa ejemplota mascarcani. Paicunaca Taita Diosta cutin cutin mañan cashcatami yachajurcani. Shinallata, ayudata chasquingapaj munashpaca, Bibliata liina cashcatami intindircani” nin.

Bibliaca yalishca tiempocunapi na pensarishpa shamuj punllacunapi pensarichunmi Dianataca ayudarca. Paica Hechos 24:15pi shimicunata liishpami ninanda cushijun. Chaipica nijunmi: ‘Huañushcacunataca Taita Dios causachinatami cushijushpa shuyajuni’ nishpa. Dianaca huañushcacunata Jehová Dios causachinata tucui shunguhuan crishpami nin: “Ñuca ushiguhuan, ñucanchi jardinbi cutin tuparishpa purijushcata ña ricujushnami yarihuan. Chaipica pai nacirishca punllapi ninanda cushijushcashnami sintirisha. Ñuca ushiguhuan ima punlla tuparinataca, jahua pachapi tiajuj ñuca Taita Diosca alimi yachan” nishpa.

a Chashna grabaciongunaca Internet jw.org direccionbimi tian.

Jatun llaquicunapi cajpipashmi Bibliaca ayudan

¿IMASHINATA TAITA DIOSCA AYUDAITA USHAN?

Bibliapica ninmi: “Mandaj Diosca, tucui yuyaihuan paita mañajcunata ayudangapaca ladopimi. Paita manllajcuna, imata munashcataca pactachingami. Shinallata paicuna caparishpa mañashcatapash, uyashpa quishpichingami” nishpa (Salmo 145:18, 19). Shinaca ayudahuai nishpa mañajpica ¿imashinata Taita Diosca ñucanchita uyashcata ricuchin?

FUERZATAMI CUN

Problemacunamandami shaijushca, llaquilla sintirinchi. Taita Diosta sirvina munaipash na tianllu (Proverbios 24:10). Shinapash Jehová Diosca ‘shaijushcacunamanbash, ushai illajcunamanbashmi ashtaca ushaita’ cun (Isaías 40:29). Apóstol Pabloca ashtaca llaquicunatami aguantarca. Shinapash nircami: ‘Na ñucanchimandalla ushaita charishpapash, Taita Diosmandami ninan ushaita charinchi’ nishpa (2 Corintios 4:7). Taita Diosca imashinami apóstol Pablotaca espíritu santohuan ayudarca, shinallatami ayudahuai nishpa mañajpica quiquindapash ayudanga (Lucas 11:13).

ALI YACHAJUSHCA CACHUNMI AYUDAN

Bibliapi shuj consejota intindita, pactachita na ushajushpaca ¿imatata rurana capangui? Discípulo Santiagoca nircami: ‘Cangunapurapi ali yachaita maijanbash na charishpaca, Taita Diostami mañana canguichi. Paica carangapachami. Pimanbash na mitsashpami ashtacata caranga’ nishpa (Santiago 1:5). Mañashca jipaca Bibliatami liina capangui, imata yachajushcatapash pactachinami capangui (Santiago 1:23-25). Shina rurashpami Bibliapa consejocunaca alipacha cashcata cuenta japipangui.

TRANQUILO SINTIRICHUNMI AYUDANGA

Jatun llaquicunapi cajpipashmi Jehová Diosca tranquilo sintirichun ayudanga. Bibliapica ninmi: ‘Ima illajpipash, na chaitalla yariashpa llaquilla causanachu canguichi. Ashtahuangarin Taita Diostami ninanda mañana canguichi. Tucui imamandapash pagui nishpa. Casilla ali causaitaca, Taita Diosmi caramunga. Chashna aliguta causanataca, pipash na yachajui ushanalla cajpimi, cangunapa shungutapash, yuyaicunatapash, Cristo Jesushuan shujlla tucushcamanda huacaichijunga’ nishpa (Filipenses 4:6, 7). Shinaca, Jehová Diosta mañapai, tranquilo sintirichun ayudahuai nishpa.

Quiquinba problemacuna na ucha tucurijpica na pensanachu capangui, Taita Diosca na uyahuanllu nishpa. Problemacuna na ucha tucurijpica Jehová Diosllatami aguantashpa catichun ushaita cunga (1 Corintios 10:13). Ashtahuangarin, Bibliapica ninmi, shamuj punllacunapica tucui llaquicunami tucuringa nishpa.