Taita Diosca ¿Pita Can?
Ashtaca gentecunaca Taita Diospi crinchi nishpapash, Taita Diosca pita can nishpa tapujpica, shuj shuj yuyaicunatami nin. Huaquin gentecunaca, Taita Diosca shuj millai, nali juez shinami gentecuna imapi pandarijta ricushpa castiganata gushtan nin. Shujcunaca, Taita Diosca shuj juyaj Diosmi, imata rurajpipash siempremi perdonan nin. Cutin shujcunaca, Taita Diosca gentecunataca ricuna cashcamandallami ricun, gentecunapica na preocuparinllu ninmi. Shuj shuj yuyaicuna tiashcamandami ashtaca gentecunaca, Taita Diosta rijsitaca na usharingachu nin.
Taita Diosmanda yachajunaca minishtirishcami can. Taita Diosmanda yachajushpaca ashtahuan ali, cushillami causaita ushapangui (Hechos 17:26-28). Taita Diosmanda ashtahuan yachajujpica, Taita Diosca ashtahuanmi quiquindaca juyashpa, ayudashpa catinga (Santiago 4:8). Paimanda ashtahuan yachajushpaca para siempremi causaita ushapangui (Juan 17:3).
¿Imashinata Taita Diostaca rijsi ushapangui? Quiquinba shuj alipacha amigopi pensaripai. Paihuan alipacha amigo tucungapaca, tal vez paipa shutitarami yachai chayaparcangui. Jipaca pai imashina cashcata, imata gushtashcata, imata na gushtashcata, imacunatalla ruran cashcata, imata rurangapaj munashcatapashmi yachai chayapashcangui. Chaimi alipacha amigocuna tucuchun ayudashcanga.
Taita Diostapash shinallatami rijsi ushapangui. Cai tapuicunamanda yachajunami Taita Diosta rijsichun ayudanga:
TAITA DIOSCA ¿IMA SHUTITA CAN?
¿IMASHINATA CAN?
¿IMATATA RURASHCA?
¿IMATATA RURAGRIN?
TAITA DIOSTA RIJSINACA ¿IMAPITA AYUDAN?
Cai revistaca, cai tapuicunamanda Biblia imata nijta yachachunmi ayudanga. Cati temacunapica Taita Dios pi cashcata yachachun, paipa amigo tucushpa quiquinba alipallata cashcata cuenta japichunmi ayudanga.