Acapanacuna, shinlli tamiacuna tiajpi

Sierra Leona llactamanda, Andrewca ninmi: “Ñucanchica, callaripica ninan llaquillami sintirircanchi. Ushashcata tamiajpimi tucui imaguta charishcapash quilpashca quedarca. Imagupash illajmi quedarcanchi” nin.

Islas Virgenesmanda Davidca ninmi: “Jatun acapana tiashca jipa huasiman tigrajpica, huasitaca tucuchitapacha tucuchishcatami tarircanchi. Imata ruranatapash na atinashpami, manllarishca quedarcanchi. Ñuca ushiguca cungurishpami ninanda huacai callarirca” nin.

¿QUIQUINDAPASHCHU acapanacuna, shinlli tamiacunaca llaquichishca? Shina cashpaca paicunataca alimi intindipangui. Chai ratocunaca tal vez imatapash ruranataca na atinapashcanguichu, yapata pinarishpami ima pasajushcatapash na cringapaj munapashcangui, puñuitapash na ushapashcanguichu. Tauca gentecunami cai llaquicunata charishca jipaca shaijushca, desanimarishca ñana causashpa catingapaj munashca.

Cai llaquicunata charishca jipaca, tal vez fuerza illajmi sintiripashcangui. Huaquinbica causashpa catingapapash ñana munapashcanguichu. Shinapash Bibliapica jipa punllacunapi cushilla causaigu tianatami ricuchin. Cai causaigu tianapi imamanda confiai ushashcatapashmi ali intindichin.

BIBLIAPI IMA NIJTA YACHANAMI CUSHILLA CAUSACHUN AYUDAN

Eclesiastés 7:8pica: “Chairalla callaringapaj randica, imata ruranatapash ña tucuchinami ashtahuan ali” can ninmi. Quiquin shuj acapanapi, shinlli tamiapiman cashca cashpaca tal vez na causashpa catingapaj munapanguichu. Shinapash ñaupaman catingapaca esforzarinami capangui.

Jipa punllacunamanda parlashpaca Bibliapica ninmi: “Ima llaquimanda huacaipash na ashtahuan uyaringachu, llaquihuan caparinapash na uyaringachu” nishpa (Isaías 65:19). Cai shimicunaca Diospa Reino o gobierno cai Alpata shuj juyailla paraisoguman tigrachijpimi pactaringa (Salmo 37:11, 29). Acapanacuna, shinlli tamiacunapash ñana tiangachu. Cai llaquicunataca yaritallapash ñana yarishunllu. Chaimandami Isaías 65:17pica nin: ‘Punda ima tucushcaca, cungashcami canga. Yuyaimanllapash na shamungachu’ nishpa.

Caipi yuyapai: Ñucanchita Ruraj Taita Diosca ñucanchicuna “shuyanajushcatami caragrini” nin, chaitaca pai churashca gobiernopimi pactachinga (Jeremías 29:11). ¿Nachu caita yachanaca ñaupaman catichun ayudapan? Callari temapi parlashca Sally huarmiguca ninmi: “Diospa Reinopi o gobiernopi tiana ashtaca bendiciongunapi yuyanami, charishca llaquicunata huashaman saquichun, aguantashpa ñaupaman catichunbash ashtacata ayudahuashca” nin.

Diospa Reinopi ima bendiciongunalla tianamanda yachajuchunmi animapanchi. Cunanbi tiashca acapanacuna, shinlli tamiacunapash jipa punllacunapica ñana tiangachu. Bibliapi tiashca shimicunami cunanbi tiashca llaquicunata aguantashpa catichun ayudai ushapan. Chaipaca Bibliapa huaquin textocunata ricupashun.

Bibliapa cai textocunami ayudai ushapanga

Ali samapangui

“Ishcai maqui jundata ninanda trabajashpa, yuyaita shaijuchingapaj randica, shuj maqui jundatalla trabajashpa, ashaguta samanami ashtahuan ali” (Eclesiastés 4:6).

Huaquin estudiashcacunaca shuj jatun llaquita charishca jipaca “ashatalla puñunaca ashtahuan nali sintirichun, nali cachunllami ayudan” ninmi. Chaimandami shuj llaquita charishca jipaca ali puñuna, ali samanaca minishtirishcapacha can.

Imashina sintirishcata pimanbash parlapangui

‘Runapaj shungupi llaquilla canami, ñavita urai cumuchin. Ashtahuangarin alita rimashca shimicunaca, cushichinmi’ (Proverbios 12:25).

Shuj familiahuan o shuj rijsihuan parlapangui. Paicunami quiquinda uyashpa, cushichishpa, imagupipash ayudai ushapanga.a

Shamuj punllacunapi ali causaigu tianapi yuyapangui

‘Ñucanchica, jahua pachatapash, cai alpatapash mushujta rurasha nishcatami shuyanajunchi. Chaipimi, imatapash cashcatapacha rurashpa’ causanajushun (2 Pedro 3:13).

a Pipash ashtaca tiempota estrés nishcahuan, o imamandapash yapatapacha preocuparijushpaca shuj doctorpaman rinami ali canman.