Na causashpa catingapaj munajpi

Estados Unidos llactapi causaj Sallya shuti huarmigupi yuyapashun. Paica shuj jatun acapana tiajpimi imapash illaj quedarca. Chaimandami “cai llaquitaca ñana aguantai ushashachu yarcani. Tauca punllacunatami imatapash na rurangapaj munashpa llaquilla carcani” nin.

Familiamanda pipash huañujpica ninandami llaquiripanchi. Australiamanda Janice shuti huarmigupa ishcai churicuna huañujpica paica ninandapachami llaquiyarca. Chaimi nirca: “Ninandapacha llaquiyashpami, ñana ushashpa Taita Diostaca ‘ñanapacha ushanica, huañushparapashmi ali caiman’ nishpa rogarcani” nin.

Cunanga Danielpi yuyapashun. Paipa huarmi paita traicionashcata villajpica huañungashnami sintirirca. “Pai traicionarcanimi nishpa villahuajpica, shungupi shuj jatun chugrita charishcashnami sintirircani. Culira, llaquillami tauca quillacunata shina sintirijurcanilla” nin.

¿Quiquinbashchu cai llaquicunata chimbapurajupangui?

• Acapanacuna, shinlli tamiacuna tiajpi

• Familiamanda pipash huañujpi

• Cusa o huarmi traicionajpi

• Millai ungüicuna japijpi

• Yapata llaquilla sintirishpa yalijujpi

Quiquinbash cai llaquicunata chimbapurajushpaca cai Villajun revistapi temacunami, ñaupaman catichun ashtacata ayudanga.