¿Yachaparcanguichu?

Punda tiempocunapica ¿imatallata mayordomocunaca ruran carca?

BIBLIATA escribishca tiempocunapica mayordomocunaca shuj huasita, dueñopa tucui charishcacunata cuidashpami causan carca.

Joseca Jacob runagupa churimi carca. José Egipto llactapi esclavoshna cashpaca paipa amopa huasipimi mayordomoshna sirvishpa causarca. Chaimi paipa amoca “tucui ima charishcatapash, Josepaj maquipi churarca” (Gen. 39:2-6). Jipa punllacunapi José runagu Egipto llactapi shuj mandaj tucushpaca, paipashmi paipa huasita cuidachunga shuj mayordomota churarca (Gen. 44:4).

Jesús cai Alpapi causashca tiempopica, tauca pambacunata charijcunaca pueblocunapimi causan carca. Chaimi paicunaca mayordomocuna paicunapa pambacunata, trabajadorcunata ricuchunbash saquin carca.

Mayordomoshna sirvichunga ¿imashinata agllan carca? Apostolcunapa punllacunapi causashca Columella shuti estudiashca jarica nircami: “Mayordomoshna agllai tucungapaca shuj esclavoca alita ruraj, alipacha experienciata charij cashcatami ricuchina can. Shinallata mandajushpaca shujcunata alimi tratana can, imatapash nishpa ani anica na tratanachu can” nishpa. Shinallata nircapashmi “shuj mayordomoca shujcunata yalimi yachani nishpaca na pensanachu carca. Imagutapash siempremi yachajungapaj munana carca” nishpa.

Bibliapi mayordomo nishpaca congregacionbi shujcunata ayudana cashcatami intindichin. Por ejemplo, apóstol Pedroca Jesusta ali catijcunataca nircami mayordomocunashnami ‘shujcunatapash aliguta rurashpa’ ayudana canguichi nishpa (1 Ped. 4:10).

Jesuspashmi shuj mayordomomanda parlaj chimbapuraita churarca. Chai chimbapuraica Lucas 16:1-8​pimi escribishca can. Jesús pai rey tucushpa imashna tigramunata parlashpami cashna nirca: ‘Aliguta cazushpa, aliguta yarishpa sirvij’ esclavotami churasha nishpa. Cai esclavoca Jesusta ali catijcunamanmi minishtirishca punllapipacha espiritual micunata tucurimui punllacunacaman cushpa catina can (Mat. 24:45-47; Luc. 12:42). Publicaciongunata paicuna llujchishcamandaca ninandami agradicipanchi. Shina llujchishpami mundo enteromanda Jehovata sirvijcuna ashtahuan crishpa catichun ayudanajun.