Taita Diosmanda ali villaigucuna nishca folletohuanga ¿imashinata yachachishun?
Cai folletomi gentecunata cutin visitachun, Bibliamanda yachachichun ayudanga
1. “Shunguta cuidashunchi” nishca Quimsa Punlla Jatun Tandanajuipica ¿ima mushuj folletota gentecunata cutin visitangapaj, Bibliamanda yachachingapaca chasquircanchi?
1 “Shunguta cuidashunchi” nishca Quimsa Punlla Jatun Tandanajuipica, Taita Diosmanda ali villaigucuna nishca mushuj folletotami cushijushpa chasquircanchi. Cai mushuj folletoca Exige folletopa cuendami llujshirca. Cai mushuj folletoca Exige folleto shinallatami Bibliamanda yachachi callarichun ayudanga. Shinallata na yapa letracunata charinllu. Exige folletoca Taita Dios mandashcashna causachunmi gentecunataca ayudan carian. Chaimandami chaira yachajuj gentecunapaca shinlli carca. Cutin cai mushuj folletoca Bibliapi ali villaicunata aliguta intindichunmi ayudan (Hech. 15:35).
2. ¿Imamandata Ali villaigucuna nishca folletoca llujshirca?
2 ¿Imamandata shuj mushuj folleto llujshichun minishtircanchi? Mundo enteropi huauquicunaca ninajurcami, gentecuna aliguta uyashpa, Enseña librota yachajungapaj munachunga shuj fácil yachajuna publicaciondami minishtinchi nishpa. Ashtaca gentecunaca ñapash yachajunalla publicacionhuanmi yachajungapaj munan, librohuan yachajungapaca na munanllu. Ashtahuangarin, uchilalla folleto caimandaca ashtaca shimicunamanmi traducinalla can.
3. Shuj publicaciongunahuan ricujpica, cai mushuj folletoca ¿imashinata can?
3 Cai folletoca ¿imashinata can? Ñucanchipa ashtaca publicaciongunaca gentecunallata japishpa, liishpa intindinallami can. Shinapash cai mushuj folletoca shuj publicador intindichichunmi minishtin. Chaimandami cai folletota saquishpaca shuj o ishcai parrafocunata yachachinalla canchi. Ashagulla caimandaca huasi pungupillata o trabajo pushtupillatami yachachinalla canchi.
4. ¿Imashinata cai folletoca Bibliapa textocunamanda yachachichun ayudanga?
4 Ñucanchi publicaciongunapica parrafocunapimi respuestacunaca tiajun. Shinapash ashtaca gentecunaca Bibliapi ricuchichunmi munan. Chaimandami cai mushuj folletopica ashtaca respuestacunataca Bibliapa textocunapi tarita ushanchi. Huaquin textocunallami Bibliamanda copiashca tianajun. Bibliapi liishpami gentecunaca Diospa Shimita yachajunajushcata cringa (Is. 54:13).
5. ¿Imamandata publicadorcunaca aliguta prepararishpa yachachina can?
5 Cai folletopica huaquin textocunatallami aliguta intidichijun. Shinallata cai folletoca gentecuna tapujpi publicadorcuna aliguta prepararishpa yachachichunmi ayudan. Chaimandami cada leccionba aliguta prepararishpa yachachina can. Aliguta yachachingapaca na yapata parlajunachu canchi. Textocunata ñucanchillata aliguta intindichingapaj munashpapash yachajujcunallata chai textota imashina intindijtami uyana canchi. Aliguta pensarishpa, aliguman tapuchishpami gentecunataca textocunata ali intindichun ayudana canchi (Hech. 17:2, Traducción del Nuevo Mundo).
6. a) Taita Diospipash Bibliapipash na crij gentecunataca ¿imashinata cai folletohuan ayudashun? b) Huasin huasin villachijushpaca ¿imashinata cai folletohuan ayudashun? c) Huasin huasin villachijushpaca ¿imashinata cai folletohuan yachajungapaj munanguimanllu nishpa ayudashun? d) ¿Imashinata cai folletohuanga revisitacunata rurashun?
6 Imashinami Bibliamanda yachachingapaj publicaciongunataca shuj quillacunapipash saquinchilla, shinallatami cai folletotapash saquinalla canchi. Huasi dueño llujshijhuan cai folletomanda yachachingapaj munashpaca yachachinallami can. Ashtahuangarin, imashinami Quimsa Punlla Jatun Tandanajuipi yachajurcanchi, cai folletoca cushijushpa gentecunata cutin visitachunmi ayudanga (página 5-7pi recuadrocunatapash ricupangui).
7. ¿Imashinata cai folletohuanga yachachina capanchi?
7 ¿Imashinata cai folletohuan yachachishun? Primeroca yanalla letracunapi numerashca tapuitami liina canchi. Jipaca parrafotami liina canchi. Chai jipami liipangui nishca textocunata Bibliapi mascana canchi. Tapuicunata rurashpami chai textocunata aliguta intindichun ayudana canchi. Nara cati tapuiman yalishpallatami, cutin yanalla letracunapi numerashca tapuita liina canchi. Callari visitacunapi shuj o ishcai tapuicunatalla yachachishpaca alimi canman. Tiempohuanmi asha asha tucuilla lecciondaca yachachita ushashun.
8. a) ¿Imashinata Bibliamanda shuj textotaca liina capanchi? b) ¿Imamandata shina rurana capanchi?
8 Liipangui nishca textocunami yanalla letracunahuan tiajuj tapuicunataca contestan. Bibliamanda shuj textota liijushpaca na ninachu canchi, “apóstol Pablo”, “profeta Jeremiasca” ninmi nishpa. Shina ninajunapa randica, “Taita Diospa Shimica ninmi” o “Bibliapica cashnami nirca” nishpami yachachina canchi. Shinami Bibliamanda yachajujcunaca na gentecunapa pensamientocunata yachajunajushcata intindinga.
9. ¿Parrafocunapi tucuilla textocunatachu liina capanchi?
9 Shinapash ¿tucuilla textocunatachu liina canchi o liipangui nishca textocunatallachu liina canchi? Tucuilla textocunami parrafopi yuyaicuna, Bibliamanda cashcata ricuchin. Shinapash Bibliamanda yachajujcuna na ashtaca tiempota charijpi, o yachajunajushca temata na gushtajpi, o nali lii ushajpica liipangui nishca textocunatalla liishpaca alimi canman.
10. ¿Ima horata Enseña libroman yalinalla capanchi?
10 ¿Ima horata Enseña libroman yalina canchi? Ña unaillaguta Bibliata yachajujujpica publicadormi ricuna can, Enseña libroman yalinalla cashcata o Ali villaigucuna nishca folleto tucuringacaman yachachina cashcatapash. Enseña librohuan yachachi callarijushpaca ¿capítulo 1mandachu yachachi callarina canchi? Bibliamanda yachajujcunaca cada unomi shuj shuj can. Huaquingunaca alimandami Enseña libropa huaquin temacunataca yachajuita ushan.
11. ¿Imamandata cai mushuj folletohuanga aliguta yachachina capanchi?
11 Cai nali mundopica nali noticiacunallami tian. Shinapash ñucanchicunaca Diospa Reinomanda, ali causai tianamanda villachina jatun bendiciondami charinchi (Mat. 24:14; 2 Ped. 3:13). Shinami, Diospa Shimita uyajcunapash cashna nita ushanga: ‘¡Ali villaita villangapaj jahua urcuta calpashpa shamuj runaca juyaillamari! Paica casilla ali causaimandapash quishpirinamandapashmi villan. Sionbi causajcunamanbash: “¡Cangunapa Taita Diosmi mandagrin!” nishpami villan’ (Is. 52:7). Shinaca yacunayachinshna causajuj gentecunamanga cai mushuj folletohuan Taita Diospa ali villaicunamanda yachachishpa samachishunchi.
[Epigrafe de página 3]
Taita Diospipash Bibliapipash na crij gentecunataca ¿imashinata ayudashun?
● Huaquin llactacunapi gentecunaca Taita Dios o Biblia nijta uyashpallatami na uyangapaj munan. Chai llactacunapi gentecunahuanga gobiernocunamanda, familiacuna ali causanacunamanda, shamuj punllacunapi ali causanacunamandami parlana canchi. Taucalla viajecunata parlashca jipa, Taita Dios cierto tiashcata, Bibliapi confiana cashcata ricuchishca jipami Ali villagucuna folletotaca ricuchina canchi.
[Epigrafe de página 4]
Huasin huasin rishpaca ¿imashinata villachina canchi?
● “Ashtacacunaca ninmi, Taita Diosca ¿imatashi gentecunataca ruranga? nishpa. ¿Nachu chaita yachangapaj munapanguiman? Tapupasha: Gentecuna sufrijujta ricushpaca ¿imatashi Taita Diosca ruranga? [Contestachun saquipangui.] Cai folletomi chai tapuitaca quiquinba Bibliapillata yachajuchun ayudanga. [Folletota saquishpa, callari leccionba punda parrafota liishpa Jeremías 29:11tapash liipangui.] Imashinami caipi ricupangui ¿nachu Taita Diosca gentecuna ali causachun munashca? [Contestachun saquipangui.] Cai folletota saquipasha. Cutinba shamushpami Taita Dios tucui llaquicunata imashina tucuchinata yachajupashun.” Gentecuna tiempota charijpica cati parrafotapash liishpa, chaipi quimsa textocunatapash liinallami canchi. Cati tapuita contestangapaj shamupashami nishpa arreglocunata rurapangui.
● “¿Nachu tucuicunallata llaquicunapi cashpaca Taita Diosta mañapashcanchi? [Contestachun saquipangui.] ¿Taita Diosca tucui oraciongunatachu alicachishpa uyan, o huaquin oraciongunataca nalicachishpachu uyan? [Contestachun saquipangui.] Chai tapuimanda Bibliapillata yachajuchunga cai folletomi ayudanga. [Folletota saquishpa lección 12pa punda parrafota yachachipangui. “Liipangui” nishca textocunatapash ricuchipangui.] Taita Diosca paita mañashpa paipaman quimirichunmi munan. Shinapash Taita Diosman quimiringapaca Taita Diostami aligutapacha rijsina canchi. [Lección 2ta ricuchishpa chaipi subtitulocunatapash ricuchipangui.] Chasquingapaj munajpica folletota saquishpa, cati tapuita Bibliahuan contestangapaj shamupashami nishpa arreglocunata rurapangui.”
● “Ashtaca gentecunaca shamuj punllacunapi ima pasanatami yachangapaj munan. Shinapash imatata nipanguiman ¿jipa punllacunapica ali causai tiangacha? [Contestachun saquipangui.] Bibliapica shamuj punllacunapi ali causai tiangami nishpami cushichin. Ricupai Bibliapica cashnami nin.” Folleto saquishpa, cai último paginapi tapuicunatamandaca maijandata yachajungapaj munapanguiman nishpa ricuchipangui. Chai jipaca chai tapuipa paginaman rishpa imashina yachajunata ricuchipangui. Cati tapuita yachajungapaj arreglocunata rurapangui.
[Epigrafe de página 5]
¿Imashinata gentecunataca Bibliamanda yachajungapaj munanguimanllu nishpa ayudashun?
● “Bibliamanda yachajungapaj munapanguimanllu nishpami gentecunataca visitanajupanchi. Cai folletoca 15 lecciongunatami charin. Cai folletomi cai tapuicunapa respuestacunata Bibliapi maipi mascanata ricuchijun. [Folletopa callari paginata, shinallata folletopa último paginata ricuchipangui.] ¿Nachu ima horapash Bibliata yachajungapaj munapashcangui? [Contestachun saquipangui.] Cai folletoca jahuallami Bibliamandaca yachachin. [Lección 3ta mascashpa, tapui 3pa callari parrafota yachachipangui. Jipamanga Apocalipsis 21:4, 5ta liipangui. Uyangapaj munajpica cati parrafotapash chaipi textocunatapash liipangui.] Folletota saquipasha, shuj lecciongutallapash yachajushpaca alimi capanman. Munajpica shuj punllagu tigramushallami punda leccionda yachajupangapaj. Shuj hojagullami can.”
[Epigrafe de página 5]
¿Imashinata revisitacunata rurashun?
● “Antsicarin caipi capashcangui. Cunanga tauca cosascunamanda Bibliahuan yachajuchunmi cai folletota apamuparcani. [Folletota saquishpa último paginapi tapuicunata ricupai nipangui.] Cai tapuicunamandaca ¿maijandata yachajungapaj munapanguiman? nishpa tapupangui [Contestachun shuyashpa gentecuna agllashca leccionda mascapangui.] Bibliapi ima nijta yachangapaca cai folletota imashina yachajunata ricuchipasha.” Shuj o ishcai parrafocunata, liipangui nishca textocunatapash ricuchishpa imashina jahualla yachajunata ricuchipangui. Folletota saquishca jipaca tigramushami nishpa arreglocunata rurapangui. Shuj leccionda tucuchishca jipaca, cunanga maijan lecciondata yachajungapaj munanguiman nishpa tapupangui, o callari leccionmandapash yachachinallami can.