Aliguta portarishunchi

1. Jatun tandanajuicunapica ¿imamandata aliguta portarina, aliguta mudarina capanchi?

¹ Cada huatami Quimsa Punlla Jatun Tandanajui tiajpica shujcunaca ñucanchi imata rurajta, imashina portarijta ricun. Chaimandami Diosta sirvinajushcata ricuchingapaj aliguta portarina, aliguta mudarina canchi (Lev. 20:26). Shinaca Quimsa Punlla Jatun Tandanajuipi, Internacional Jatun Tandanajuipipash ¿imashinata aliguta portarishpa, aliguta mudarishpa ñucanchi Taita Diostaca jatunyachita ushanchi? (1 Ped. 2:12.)

2. ¿Imashinata Diosta sirvijcuna cashcata ricuchita ushapanchi?

² Diosta sirvijcuna cashcata ricuchishunchi. Ñucanchicunaca juyarinchimi shujcunatapash aligutami tratanchi. Cutin cai mundopi gentecunaca na chaita ruranllu (Col. 3:10; 4:5; 2 Tim. 3:1-5). Chaimandami hotelpi, restaurantecunapi trabajajcunataca na ucha atindijpipash respetohuan na culirashpa ali tratana canchi. Costumbre cajpicarin ñucanchita atindishcamandaca asha culquiguta paicunaman cunallami canchi.

3. Taitamamacunaca ¿imatata rurana can?

³ Taitamamacunaca hotelpi, restaurantecunapi, jatun tandanajuipi cashpapash paicunapa huahuacunataca aligutami ricuriana can (Prov. 29:15). Shuj hotelpi trabajajca cusahuarmi Testigocunataca nircami: “Quiquingunataca alicachinchimi. Quiquingunapa huahuacunaca aligutami portarin, tucuicunatami respetan. Caipi trabajajcunaca tucuicunami cangunamandaca alicachishpa parlan. Tucui semanacuna canguna caipi cajpica alimi sintirinchiman”.

4. Jatun tandanajuiman rishpaca ¿imamandata aliguta mudarina capanchi?

⁴ Aliguta mudarishunchi. Jatun tandanajuiman rishpaca aligutami mudarina capanchi. Cai mundopi gentecunashnaca na maipash cachun ropata churajunachu canchi (1 Tim. 2:⁠9). Shinallata hotelman chayajushpa, hotelmanda ña rinajushpa o tandanajushca jipa maipi purigrishpapash pinganayai o maipash cachun ropataca na churajunachu canchi. Shinami tarjeta de solapata churajushpaca cushilla sintirishun, oportunidad tiajpica na pinganayachishpami Diospa Shimimandapash villachishun. Shinaca aliguta mudarishpa, aliguta portarishpaca shujcunapash Diospa Shimimanda yachajuna munaita charichunmi ayudashun. Shina rurashpami Jehová Diostapash jatunyachishun (Sof. 3:⁠17).

Huata 2014 Quimsa Punlla Jatun Tandanajuipa villaicuna

◼ Jatun tandanajuipa horario. Tandanajuica quimsandi punllatami las 9:20ta callaringa. Shinapash pungucunataca las 8tami pascanga. Tandanajuita ali callaringapaca canticocuna uyarijpillatami ña tiarina canchi. Viernesta, sabadotaca las 4:55tami tucuringa. Cutin domingotaca las 3:50tami tucuringa.

◼ Internacional Jatun Tandanajui. Huaquin llactacunapica Internacional Jatun Tandanajuicunami tianga. Betelmanda huauquicunaca mashna asientocuna, parqueaderocuna, hotelcuna minishtirijta ricushparami congregaciongunata o shuj llactamanda huauquicunatapash invitan. Internacional Jatun Tandanajuiman na invitajpipash yangata rijpica yapata jundashpa na pactangachu. Quimsa punlla jatun Tandanajuiman imamandapash na ri ushashpaca, Internacional Jatun Tandanajuimanga na rinachu capanchi.

◼ Parqueaderocuna. Carrocunata ñucanchillata cuidajuimandaca na cobranajushunllu. Carrocunataca imashina chayashcapimi churashun. Parqueaderocunaca uchillami can. Chaimandami shujlla carropi pactajcunaca shujlla carropi rishpa ali canman. Discapacitadocunapa nishca partecunapica paicunata apaj carrocunatallami churana can.

◼ Asientocuna. Pungucunata pascajpica ñucanchi munashca asientocunata japingapaca na musparishpa calpanachu canchi. Ashtahuangarin shujcunapimi preocuparina canchi. Shinami Diosta sirvijcuna cashcata ricuchishpa Diosta jatunyachishun (Juan 13:34, 35; 1 Cor. 13:4, 5; 1 Ped. 2:12). Asientocunataca ñucanchihuan causajcunapa, ñucanchihuan carropi rijcunapa o ñucanchihuan Bibliata yachajujcunapallami japina capanchi. Mayorcunapa, ungushcacunapa sillacunaca na ashtacacuna tianllu. Chaimandami huaquinbica na tucui familia paicunahuan tiarita ushanchi. Shinaca mayorcunalla, ungushcacunalla, paicunata ayudajcunalla chai sillacunapi tiarichunmi saquina capanchi.

◼ Micuna. Chaupi punlla micunata randingapaj llujshijunapa randica ñucanchillatami micunataca apana capanchi. Shinapash jatun mangacunapi, jatun bolsocunapi, vidrio cosascunapica na apanachu capanchi. Asiento ucupi pactana cosascunapillami micunataca apana capanchi.

◼ Contribucionguna. Jatun tandanajui tiashcamanda agradicishcata ricuchingapaca obra mundial nishca cajacunapimi contribuciongunataca churana canchi. Chequepi cungapaj munashpaca Testigos de Jehová nishpami churana canchi.

◼ Jambicuna. Doctor mandajpi jambicunata ufiajushpaca jambicunataca apashpami rina canchi. Jatun tandanajuipica ñucanchi minishtijushca jambicunataca na charingachu. Diabetes ungüita charishpa jeringuillacunata utilizana cashpaca, jeringuillacuna peligroso cashcamandami utilizashca jipaca na maicunapipash yangata shitanalla canchi. Jatun Tandanajui Huasipa basurerocunapi, mingarishca huasicunapa basurerocunapi o hotelcunapa basurerocunapipash jeringuillacunataca na shitanachu canchi.

◼ Zapatocuna. Taco zapatocunata churajuimandaca tucui huatacunami llaquicuna tiashca. Chaimandami rejillacunapi, gradascunapi ama urmangapaca ali agllashpa zapatocunataca churajuna can.

◼ Sordolla gentecuna. Jatun tandanajuipa programataca FM bandapimi sordollacunaca chai localpillata uyai ushanga. Uyangapaj munashpaca shuj uchila radiotami pilacunahuan, audifonocunahuan apana can.

◼ Huahuacunata apana cochecuna. Huahuacunapa cochecunataca na apanachu can. Shinapash, asientopi churashpa huahuacunata tiachinalla sillacunata charishpaca apanallami can.

◼ Perfumecuna. Jatun tandanajuicunata ruraj huaquin ucucunapica huaira maita yaicunaca na tianllu. Huaquingunaca alergiacunata o imapash ungüicunatami charin. Chaimandami paicunapi preocuparishpa na yapata perfumeta o coloniata churarina canchi (1 Cor. 10:24).

◼ Sírvase visitar (S-43) hoja. Jatun tandanajui punllacunapi gentecunahuan Bibliamanda parlashpa ashtahuan yachajungapaj munajpica, Sírvase visitar hojapimi paipa shutita, direccionda anotana canchi. Chai hojataca Departamento de Publicacionesmanmi cuna can o jatun tandanajuimanda tigrashca jipami chai hojataca congregacionbi secretarioman cuna can.

◼ Restaurantecuna. Restaurantecunapipash ali portarishpami Jehová Diospa shutita alabanchi. Jesusta ali catijcuna cashcamandaca aliguta mudarishpami rina capanchi. Costumbre cajpicarin ñucanchita atindishcamandaca asha culquiguta paicunaman cunallami canchi.

◼ Servicio voluntario. Ayudangapaj munashpaca, Departamento de Servicio Voluntarioman rinallami canchi. Nara 16 huatacunata charijcunapash ayudanallami can. Shinapash paicunataca taitamamacuna o shuj huauquimi ricuriana can.