Jehovami ayudanga ama manllaichu

1. Llaquicunahuan o problemacunahuan cashpaca ñucanchilla sintirijujpica ¿imashinata Salmo 118:5-7​pi shimicunaca ayudaita ushan?

IMAPASH problemacunata charishpaca ¿nachu huaquinbica ñucanchilla sintiripashcanchi? Ari. Shinapash casi gulpimi shina sintiripashcanchi. Punda tiempopi huaquin Jehovata sirvijcunapashmi shina sintirirca (1 Rey. 19:14). Shina llaquilla o problemacunahuan cashpaca: “Candaca na jichushachu, na saquishachu” nishca shimicunatami siempre yarina capanchi. Chaimi: ‘Ñucata ayudajca, Jatun Diosmi. Imatapash na manllashachu’ ni ushapashun (Heb. 13:5, 6). Casi huata 61​pimi Judea llactapi causaj huauquipanicunamanga apóstol Pabloca shuj cartaguta cacharca. Chai cartapi escribishcaca Salmo 118:5-7​pi nishca shimicunashnami carca (chai textota liipangui).

2. Caipica ¿imatata yachajugripanchi?

² Salmo librota escribij jarigushnami, apóstol Pablopash Jehová Dios paita cuidajujtaca seguro carca. Por ejemplo, Hebreo huauquicunaman cartata nara escribishpaca, apóstol Pabloca manllanayai huairahuan tamiajujpimi shuj barcopi rina tucurca. Paipa causaipash peligropimi carca (Hech. 27:4, 15, 20). Chai barcopi rijujpi, shuj viajecunapipashmi Jehová Diosca apóstol Pablotaca cuidarca. Cai revistapimi quimsa viajeta Jehová Dios apóstol Pablota cuidashcata yachajupashun. Jehová Diosca ¿imashinata apóstol Pablotaca cuidarca? Jesusta, angelcunata, autoridadta charij gentecunata, huauquipanicunatapash utilizashpami Pablotaca cuidarca. Pablota cuidashcata yachajunami, Jehovapa nishcacunapi ashtahuan confiachun ayudan. Shinallata ñucanchi imata mañajpipash Jehová Dios uyajujtaca seguromi capanchi.

JESUSPASH, ANGELCUNAPASHMI PABLOTACA CUIDAN

3. a) Apóstol Pabloca ¿imatashi tapurishcanga? b) ¿Imamandashi shina tapurishcanga?

³ Jerusalén templomanda llujchishpami apóstol Pablotaca paipa contracunaca casi huañuchirca. Chaica casi huata 56​pimi cashcanga. Cayandi punlla Sanedrín nishcacunapa ñaupaman Pablota apajpica cutinmi paipa contracunaca huañuchingapaj munanajurca (Hech. 21:30-32; 22:30; 23:6-10). Shina llaqui apajushpaca cashnami apóstol Pabloca tapuririanga: “Cai llaquitaca ¿ima punllacamanshi aguantaita ushasha?” nishpa. Ciertopachami ayudachun minishtijurianga.

4. Jehová Diosca ¿imashinata Jesusta utilizashpa Pablotaca ayudarca?

⁴ Pablotaca ¿picunallata ayudarca? Carcelpi churashca chai tutallatami Jesusca cashna Pablotaca nirca: “Ama manllaichu. Imashnami Jerusalenbi ñucamanda villajurcangui, chashnallata Roma pueblopipash villagrinapachami cangui” nircami (Hech. 23:11). Cai shimicunata uyashpaca Pabloca cushillami sintiririanga. Shinallata Jerusalén llactapi Diosmanda villachishcamandapashmi Jesusca felicitarca. Roma llactaman ali chayachun, chaipi villachichunbash ñucallatami ayudasha nircami. Jesuspacha chai shimicunata nijujta uyashpaca apóstol Pabloca tranquilomi sintiririanga. Shuj taita paipa uchilla huahuaguta cuidajujpishnami Pabloca sintirishcanga.

5. Pablotaca Jehová Diosca ¿imashinata ayudarca? (Callari paginapi dibujota ricupangui).

⁵ ¿Ima llaquitata apóstol Pabloca charirca? Jerusalén llactapi apóstol Pablota contracuna macashca punllamandaca ñami ishcai huata carca. Cunanga Pabloca Italia llactamanmi barcopi rijun. Shina barcopi rinajujpimi na yashcapi ushashca huaira jatarishpa tamiajpi barcopi rijcunaca tucuillamari huañugrinchi yarin ninajurca. Shina cajpipash Pabloca na manllashpami barcopi rijcunamanga cashna nirca: “Cunan tutami, Taita Diospaj angelca villahuarca. Diostami, ñucaca servishpa causani. Chai angelmi, cashna nihuarca: ‘Pablo, ama manllaichu. Cesarpajman chayagrinapachami cangui. Canda juyashpami, cai barcopi rinajuj runacuna huañunamandaca, Taita Diosca tucuillata quishpichisha nijun’ nihuarcami” nijurca. Pundapi Jesusta utilizashpa cuidasha nishcashnami Jehová Diosca, shuj angelta utilizashpa Roma llactaman chayachun Pablotaca ayudarca (Hech. 27:20-25; 28:16).

6. Jesuspa shimicunaca ¿imashinata ñucanchitaca ayudan?

⁶ Ñucanchicunatapash ¿pita ayudanga? Apóstol Pablotashnami ñucanchicunatapash ayudanga. Por ejemplo, Jesusca paipa catijcunataca: “Ñucami cai pacha tucuri punllacaman tucui punllacuna cangunahuan cani” nircami (Mat. 28:20). Cai shimicunaca ¿imamandata ali can? Huaquinbica ñucanchi causaipica na yashcapimi llaquicunata charipanchi. Por ejemplo, pipash ñucanchi juyashca familiamanda huañujpimi tauca huatacunata llaquilla sintiripanchi. Cutin huaquin huauquipanicunaca ña rucullagu caimanda imapash nanaicunata charishpami llaquilla causan. Cutin shujcunaca depresión o imamandapash yapata preocuparishpami llaqui llaqui causan. Shina llaquicunahuan cashpaca Jesuspa shimitami yarina capanchi. Jesusca: ‘Tucui punllacunami’ cangunahuan cani nircami. Cai nishcami llaquicunahuan cajpipash ñaupaman catichun ayudanga (Mat. 11:28-30).

7. Apocalipsis 14:6​pi nishca shinaca ¿imashinata angelcunaca ñucanchicunataca ayudanajun?

⁷ Ñucanchicunatapash Jehovapa angelcuna ayudanga nishcataca Bibliapimi yachajupanchi (Heb. 1:7, 14). Jehovapa Reinomanda ‘tucui llactacunapi causajcunaman, aillucunaman, shuj rimaita parlajcunaman, shuj shuj gentecunamanbash’ villachichunmi angelcunaca ayudanajun (Mat. 24:13, 14; Apocalipsis 14:6, liingui).

AUTORIDADTA CHARIJ GENTECUNAMI PABLOTACA AYUDARCA

8. Apóstol Pablota ama huañuchichunga ¿imashinata Jehová Diosca cuidarca?

⁸ Pablotaca ¿picunallata ayudarca? Imashinami ricuparcanchi, huata 56​pica Roma llactaman ali chayangui nishpami Jesusca apóstol Pablotaca nishcarca. Pero Jerusalén llactamanda huaquin judiocunaca Pablota imashna huañuchinatami parlarinajurca. Chaitami Roma llactamanda Claudio Lisias comandanteca yachaj chayarca. Chaimi Cesarea llactaman Pablo ali chayachun ashtaca soldadocuna cuidashpa richun mandarca. Cesarea llactaca Jerusalenmandaca 105 kilometrocuna carupimi carca. Chaipimi Félix gobernadorca: ‘Herodes rurashca jatun huasipi Pablota churashpa soldadocuna cuidachun cacharca’. Shinami Pablota ama huañuchichun cuidarca (Hech. 23:12-35).

9. Festo gobernadorca ¿imashinata Pablotaca ayudarca?

⁹ Huata 58​pimi Cesarea llactapi Pabloca prezo catirca. Cunanga chai llactapica Félix gobernadorpa randica Festomi mandajurca. Judiocunaca Jerusalén llactapi Pablota juzgangapaj apamupai nishpami Festo gobernadortaca roganajurca. Pero Festo gobernadorca na cachangapaj munarcachu. Festo gobernadorca cai judiocunaca chaupi ñambi Pablota japishpa ‘huañuchingapami paicunapura parlarinajun’ nishpami pensarianga (Hech. 24:27–25:5).

10. Festo gobernadortaca apóstol Pabloca ¿imata rurachunda mañarca?

¹⁰ Chai jipallami Cesarea llactapi Pablotaca juzgarca. Festo shuti runaca, Judiocunapa ñaupajpi ali quidangapaj munaimandami Pablotaca: “Jerusalenbimi imatalla rurashcatapash ali tapuchingapaj munani. ¿Chaiman ringapaj munanguichu?” nishpa tapurca. Apóstol Pabloca Jerusalenman tigrajpi Judiocuna paita huañuchinataca alimi yacharca. Shinallata paita ama huañuchichun imata ruranatapash alimi yacharca. Pabloca Roma llactaman chayashpa Diosmanda villachinami carca. Chaimi: ‘César tapuchihuachunmi’ munani nirca. Chaita uyashpami Festo gobernadorca consejota cuj jaricunahuan parlarirca. Chai jipami Pablotaca nirca: “Canga: ‘César ñucata tapuchihuachun’ ninguimi. Cunanga, Cesarpajmanmi rina cangui” nircami. Shinami Festo gobernadorca Pablota ama huañuchichun ayudarca (Hech. 25:6-12).

11. Apóstol Pabloca ¿imatata yarirca?

¹¹ Apóstol Pabloca Italia llactamanmi rigrijurca. Nara rishpallatami profeta Isaiaspa shimicunata yarishcanga. Chaipica pipash Jehovapa contra tucushpaca: “Imatapash yarinajuichilla, chaipash yangallatami canga. Ali parlanajuichilla, chaipash na chashnapacha pactangachu. Ashtahuangarin Taita Diosmi ñucanchihuan” canga nishcatami Pabloca yarijushcanga (Is. 8:10). Jehová Dios paita ayudajujta yachanami shuj shuj llaquicunata aguantashpa catichun Pablotaca ayudarca.

12. a) Julio soldadoca ¿imashinata Pablotaca cuidarca? b) Pabloca ¿imatata cuenta japishcanga?

¹² Pabloca Italia llactamanmi rirca. Pablo prezo cajpica Julio shuti romano soldadomi ama llujshichun cuidajurca. Cai jarica Pablotaca nali trataita ushanmanmi carca. Pero cai jarica ¿imatata rurarca? Julio soldadoca “Pablotaca ninandami llaquirca. Shina llaquishpami Pablotaca, pai ali rijsijcunapajman rijpi, imagutapash carachun cacharirca”. Tiempohuanga paimi Pablopa causaitaca salvarca. Shuj punllaca tauca prezo gentecunahuanmi barcopi rinajurca. Shina rinajujpimi barcoca ña pambari callarijujpi shuj soldadocunaca prezocunataca huañuchishunlla ninajurca. Pero Julio soldadoca ‘Pablo huañuchunga na munarcachu’. Chaimi pitapash na huañuchinachu canguichi nishpa mandarca. Apóstol Pabloca Jehová Dios cai soldadota utilizashpa paita cuidajushcatami cuenta japishcanga (Hech. 27:1-3, 42-44).

13. Jehová Diosca ¿imashinata autoridadta charij gentecunataca utilizan?

¹³ Ñucanchicunatapash ¿pita ayudanga? Jehová Diosca paipa munaita pactachingapaca paipa poderta utilizashpami maijanbash autoridadta charij gentecunata utilizanlla. Punda tiempopi rey Salomón jariguca: “Jatun mandajpaj shunguca, Mandaj Diospaj maquipica, uchilla larca yacucuna chaupirishpa rijunshnami. Paica, pai maiman munashcamanmi cachajun” nircami (Prov. 21:1). Cai shimicunaca ¿imatata ningapaj munan? Gentecunaca larca yacu maiman richun munashpaca alpata allachishpami yacutaca shujladota cachanlla. Shina cuendami Jehová Diosca paipa espíritu santota utilizashpa maijanbash autoridadta charij gentecunapa pensamientota cambiashpa, paipa munaita pactachita ushan. Shinami huaquingunaca Jehovata sirvijcunata ayudangapaj ali desiciongunata agllashca (Esdras 7:21, 25, 26​huan chimbapurashpa ricupangui).

14. Hechos 12:5​pi nishca shinaca ¿picunamandata Jehovataca mañanalla capanchi?

¹⁴ Ñucanchicunaca ¿imatata rurai ushapanchi? Ñucanchicuna tandanajushpa catingapaj, Jehovapa Reinomanda villachishpa catingapami, ‘jatun mandajcuna, shuj mandajcunapash’ ali desiciongunata agllachun Jehovata paicunamanda mañanalla capanchi (1 Tim. 2:1, 2; Neh. 1:11). Apostolcunapa punllacunapishnami, ñucanchicunapash prezo huauquipanicunata Jehová Dios cuidachun tucui shungu mañana capanchi (Hechos 12:5, liingui; Heb. 13:3). Punda tiempopica Jehová Diosca Julio soldadota utilizajpimi paica ‘Pablota ninanda llaquirca’. Shina cuendami ñucanchicunapash guardiapa yuyaita cambiapai nishpa Jehovataca mañanalla capanchi (Hech. 27:3).

HUAUQUIPANICUNAMI AYUDAITA USHAN

15, 16. Jehová Dios Pablota ayudangapaca ¿imatata rurarca?

¹⁵ Pablotaca ¿picunallata ayudarca? Roma llactaman rijujpica tauca viajetami Jehová Diosca Pablota cuidangapaca huauquipanicunata utilizarca. Huaquin ejemplocunata ricupashun.

¹⁶ Roma llactaman Pablo rijujpica Aristarco, Lucas huauquicunami cumbashpa rirca.b Paicunaca paicunapa causaita peligropi churashpami Pablota cumbashpa rirca. Shinapash Jesusca Pablomanga nishcarcami, Roma llactamanga alimi chayanguichi nishpa. Cai shimicunataca Aristarco, Lucas huauquicunaca na yachashcarcachu. Ña barcopi llaqui apanajushpami Jesús nishcataca yachaj chayarca. Cesarea llactapi Aristarcopash, Lucas huauquipash Pablota cumbangapaj barcoman vitsajta ricushpami Pabloca Jehová Diostaca pagui nishpa mañarca (Hech. 27:1, 2, 20-25).

17. Apóstol Pablotaca ¿imashinata Jehová Diosca ayudarca?

¹⁷ Tauca viajetami Pablotaca huauquipanicunaca ayudarca. Por ejemplo, Sidón puebloman chayajpica Julio soldadoca, Pablotaca pai ali rijsicunapaman richun, paicuna Pablota cuidachunbashmi saquirca. Jipamanga Puteoli llactapimi Pablopash paipa cunbacunapash shuj huauquipanicunahuan tuparirca. Chai huauquipanicunaca paicunahuan siete punllacunata quedachunmi paicunataca mañarca. Chai huauquipanicunaca Pablopa experienciacunata uyashpaca ninandami cushijushcanga (Hechos 15:2, 3​huan chimbapurashpa ricupangui). Chai huauquipanicunata visitashca jipaca Pabloca paipa cumbacunandi shuj llactacunamanbashmi rirca (Hech. 27:3; 28:13, 14).

18. Apóstol Pabloca ¿imamandata Taita Diosta pagui nishpa ninanda cushijurca?

¹⁸ Quimsa huatacuna huashamanga Roma llactapi causaj huauquipanicunamanmi apóstol Pabloca shuj cartata escribishpa cachashca carca. Chaimi Roma llactaman chayajushpaca chai escribishca shimicunata yarishcanga. Pabloca: “Tauca huatacunatami, cangunata ricuj shamungapaj munarcani” nishcarcami (Rom. 15:23). Shinapash apóstol Pabloca Roma llactaman preso chayanataca na pensashcangachu. Pablo Roma llactaman chayajujpica huauquipanicunaca paita tuparingapami shuyanajurca. ‘Paicunata Pablo ricushpaca, Taita Diosta pagui nishpami ninanda cushijurca’ (Hech. 28:15). Huauquipanicunata ricushpaca ¿imamandata apóstol Pabloca Taita Diosta pagui nirca? Apóstol Pabloca Jehová Dios huauquipanicunata utilizashpa cutin paita ayudajushcata cuenta japimandami shina nirca.

19. Huauquipanicunata ayudangapaca 1 Pedro 4:10 nishcashnaca ¿Jehová Diosca imashinata ñucanchicunataca utilizan?

¹⁹ Ñucanchicunaca ¿imatata rurai ushapanchi? Congregacionbi shuj huauqui o shuj panigu imapash ungüihuan cajta o shuj problemata charijta o pipash huañushcamanda llaquilla cajta yachashpaca ¿imatata rurai ushapanchi? Chai huauquita o paniguta ali shimicunata nishpa cushichingapaca Jehová Diostami ayudahuai nishpa mañaita ushapanchi. Shinallata imagutapash rurashpami ayudaita ushapanchi. Shinami paicunata animaita ushapanchi (1 Pedro 4:10, liingui).c Shina rurashcamandami paicunaca Jehová Dios nishca shimicunapi crishpa catinga. Jehová Diosca: “Candaca na jichushachu na saquishachu” nishcami. Cai shimicunapi huauquipanicuna confiashpa catijta ricushpaca ñucanchipashmi cushilla sintiripashun.

20. ¿Imashpata Jehová Dios ayudanapica tucui shunguhuan confiai ushapanchi?

²⁰ Apóstol Pabloshnami ñucanchicunapash cunan punllacunapica shuj shuj llaquicunata o problemacunata chimbapurana tucunchi. Shinapash Jehová Dios ayudanapi confiaimandami na yapata preocuparinchi. Jehová Diosca ñucanchita ayudangapaca Jesusta, angelcunata, autoridadta charij gentecunata, shinallata huauquipanicunatapashmi utilizaita ushan. Ashtacacunami Jehová Dios paipa espíritu santota utilizashpa ayudajtaca ricupashcanchi. Chaimi apóstol Pabloshna ñucanchicunapash tucui shunguhuan “ñucata ayudajca, Jatun Diosmi. Shina cashcamandaca gentecuna imata ruranatapash na manllashachu” ni ushapanchi (Heb. 13:6).