Cushilla ricushcamandami Bibliata yachajui callarirca

FILIPINAS llactapica shuj jatun pushtutami ishcai joven huarmigucunaca rinajurca. Shina rinajushpami predicación publicapi shuj panigu shayajujta ricurca. Cai paniguca Helen shutimi carca. Cai panigu cai joven huarmigucunata ricushpaca cushi cushimi ricurca. Shinapash cai ishcai jovengucunaca yalishpa rircallami. Shinapash imamanda cushi cushi ricushcatami pensarinajurca.

Jipamanga cai ishcai joven huarmigucuna huasiman tigranajushpami Testigo de Jehovacunapa Tandanajui Huasipica jw.org letracuna tiajujta ricurca. Chaimandami paicunaca chai panigupa villachina cochepi chai letracunallata tiajushcata yarirca. Chaimandami busmanda uriajushpa ima horas tandanajuicuna tiajta ricungapaj shayarirca.

Jipamanga cai ishcai joven huarmigucunaca shuj tandanajuimanmi rirca. Tandanajuiman chayashpaca chayai na chayaimi Helen paniguta ricurca. Helen paniguca cushi cushimi shayajurca. Chaimandami paicunaca cai paniguta ricushpaca ñapash rijsirca. Helen paniguca ninmi: “Chai joven huarmigucuna ñucapaman quimirijpica ashata preocuparircanimi. Imatapash nalitaimanmi rurashcani yashpapash pensarcani” nishpa. Shinapash chayamushpaca cai ishcai joven huarmigucunaca ima pasashcatami panigu Helenmanga intindichirca.

Cai huarmigucunaca tandanajuipi canataca ninandami gushtarca. Shinallata Tandanajui Huasita limpiajpica paicunapashmi ayudarca. Chai punllamandami chai ishcai joven huarmigucunamandaca shujca tandanajuicunamanga na faltashpa rin. Bibliamandapashmi yachajui callarishca. Shinaca imashinami ricupanchi, cushilla ricushcamandami Bibliataca yachajui callarirca.