INTERNETPI BIBLIOTECA Watchtower
INTERNETPI BIBLIOTECA
Watchtower
Quichua (Imbabura)
  • BIBLIA
  • PUBLICACIONGUNA
  • TANDANAJUICUNA
  • w21 abril págs. 20-25
  • Jehová Diosca paipa tucui sirvijcunatami juyan

Cai agllashca videoca nara tiapanllu.

Shuj jarcaimi tiapan, cunan horasca descargaitaca na ushapanguichu.

  • Jehová Diosca paipa tucui sirvijcunatami juyan
  • Jehová Diospa Reinomandami Villajun 2021
  • Subtitulocuna
  • Cai temamandallata parlajuj información
  • JEHOVÁ DIOSCA ÑUCATACA NA JUYANLLU NISHPA PENSANACA LLAQUICUNAMANMI APAN
  • PABLOPA CAUSAIMANDACA ¿IMATATA YACHAJUPANCHI?
  • ¿IMACUNALLATA ALI SINTIRICHUNGA AYUDAN?
  • JEHOVÁ DIOS JUYASHCATACA SIEMPRE YARIPASHUNCHI
  • Jehová Dios quiquinda juyashcataca seguromi cana capangui
    Jehová Diospa Reinomandami Villajun (Tandanajuipi yachajungapaj revista)—2025
  • Jehová Diostapash, shujcunatapash ashtahuan juyapashunchi
    Jehová Diospa Reinomandami Villajun 2023
  • Juyashpa causanataca na saquinachu capanchi
    Jehová Diospa Reinomandami Villajun 2017
  • Tucui shunguhuanmi Jehová Diosta juyapanchi
    Jehová Diospa Reinomandami Villajun 2020
Ashtahuan ricungapaj
Jehová Diospa Reinomandami Villajun 2021
w21 abril págs. 20-25

TEMA 17

Jehová Diosca paipa tucui sirvijcunatami juyan

‘[Jehová Diosca, TNM ], paipa agllashcacunahuanmi cushijun’ (SAL. 149:4).

CÁNTICO 108 Jehová Diosca nunca na saquinllu

CAITAMI YACHAJUPASHUNa

Shuj shuj llactamanda gentecunami cushijushca can.

Jehová Diosca paipa agllashcacunahuanga cushijushcami can. (Párrafo 1​ta ricupangui).

1. Jehová Diosca paipa llactata ricushpaca ¿imashinata sintirin?

JEHOVÁ DIOS paipa ‘agllashcacunahuan cushijushca’ cashcata yachanaca ñucanchitaca ninandami cushichin (Sal. 149:4). Jehová Diosca ñucanchicuna imashina cajta, imata rurai ushashcata ricushpami paihuan ali amigo cachunbash ayudan. Jehová Diosca paipa mandashcacunata cazushpa causajpica siempremi ñucanchihuan canga (Juan 6:44).

2. Huaquin huauquipanicunaca ¿imamandata Jehová Dios paicunata juyajtaca na seguro can?

2 Huaquinbica shuj huauqui o shuj panica cashnami nita ushan: “Jehová Dios paipa organizacionda juyajtaca yachanimi. Shinapash ñucata juyajtaca na seguro canichu” nishpa. ¿Imamandata huaquin huauquipanicunaca cashna pensaita ushanman? Huahua cashpa shinlli causaita charishca panigu Oksanab ima nijta ricupashun. Paica ninmi: “Jehovata sirvingapaj bautizarishpa, precursora tucushpaca cushijushcami carcani. Shinapash 15 huatacuna jipaca, yangamandami imacunatapash yarishpa llaquiyan carcani. Shinallata Jehová Dios ñucata ñana juyajtashnami sintin carcani” ninmi. Huahua cashpa shuj shinlli causaita charishca Yua shuti shuj precursora panigupashmi cashna nin: “Jehová Dios ñucata ricushpa cushilla cachunmi ñuca causaipica paitalla sirvinata dicidircani. Pero Jehová ñucata juyajtaca na seguro carcanichu” ninmi.

3. Cunanga ¿ima tapuicunatata yachajugripanchi?

3 Huaquinbica cai panigucunashnallatami ñucanchicuna Jehová Diosta juyashpapash, Jehová Dios ñucanchita juyajtaca na seguro caita ushapanchi. Cunanga Jehová Dios juyajta imamanda seguro cana cashcata, Jehová Dios ñucanchita juyajta na seguro cashpa imata rurana cashcatapashmi yachajugripanchi.

JEHOVÁ DIOSCA ÑUCATACA NA JUYANLLU NISHPA PENSANACA LLAQUICUNAMANMI APAN

4. Jehová Dios juyashcata na seguro cashpaca ¿imata pasaita ushanman?

4 Jehová Dios ñucanchita juyashcata seguro cashpaca ima llaquicunata charishpapash Jehová Diosta sirvingapami esforzarishun. Shinapash pai juyashcata na seguro cashpaca fuerza “illajmi” sintirishun (Prov. 24:10). Jehová Dios ñucanchita juyajta na seguro cashpaca desanimarishpami Diablopa trampacunapipash urmaita ushapanchi (Efes. 6:16).

5. Jehová Dios juyajta na seguro cashcamandaca ¿imata huaquingunataca pasashca?

5 Huaquin huauquipanicunaca Jehová Dios paicunata juyajta na seguro caimandami Jehovapi crinataca asha asha saquishca. James shuti anciano huauquica: “Betelpipash, shuj shimita parlaj congregacionbi sirvijushpapash ñucaca ‘Jehová Dios ñuca imata rurashcataca ¿alicachishpa ricunllu imashi?’ yashpami pensan carcani. Shuj punllacarin, ‘ñuca mañaicunatapash uyanllu imashi’ yashpapashmi pensarcani” ninmi. Tiempo completopi sirvij panigu Evapash cashnami nin: “Jehová Dios ñucanchicunata juyashcata na seguro canaca llaquicunamanmi apaita ushan. Jehová Diosta sirvina munaitapash ñana charirinllu. Sirvina cashcamandallami sirvirin” ninmi. Precursor y anciano Michael huauquiguca: “Jehová Dios ñucanchita juyajta na seguro cashpaca Jehová Diosmandaca asha ashami caruyarin” ninmi.

6. Nali yuyaicuna umaman shamujpica ¿imatata rurana capanchi?

6 Jahua lado parrafopi huauquipanicunapa parlashcacunami Jehová Dios ñucanchita juyashcata na seguro canaca, ñucanchitallata llaquiman apan cashcata ricuchin. Nali yuyaicuna umaman shamujpica ¿imatata rurana capanchi? Cashna yuyaicuna umaman shamujpica Jehovatami mañana capanchi. Jehová Diostaca, tranquilo sintiringapaj, ama shina ‘yuyaicunata’ charingapaj ayudahuai nishpami mañana capanchi (Sal. 139:23; Filip. 4:6, 7). Ñucanchicunaca punda tiempopi Jehovata sirvijcunapash, cunanbi shuj huauquipanicunapash chashnallata sintirishcatami yuyarina capanchi. Cunanga apóstol Pablopa causaimanda yachajupashunchi.

PABLOPA CAUSAIMANDACA ¿IMATATA YACHAJUPANCHI?

7. Apóstol Pabloca ¿ima llaquicunatata charirca?

7 Huaquinbica ashtaca cosascunata ruranata charimandami imata rurangapapash na pactanshna sintiripanchi. Apóstol Pablopashmi ashtaca cosascunata rurana cashcamanda preocupado sintirirca. Paica ‘tucui tandanajuj crijcunamandami’ preocuparin carca (2 Cor. 11: 23-28). Ñucanchicunaca huaquinbica na jambirinalla unguihuan caimandami llaquilla sintirita ushapanchi. Apóstol Pablopashmi chashnallata sintirirca. Apóstol Pabloca cashahuan “tujsinshna” nanaita charimandami llaquilla, imatapash na rurai ushanshna sintirirca (2 Cor. 12:7-10). Juchayujcuna caimandami imapipash pandarishpaca llaquilla sintiripanchi. Apóstol Pablopashmi shinallata sintirirca. Paica alita rurangapaj munashpapash nalita rurana munaicunarami shamun nishpami llaquirirca (Rom. 7:21-24).

8. Apóstol Pablotaca ¿Jehovata sirvishpa catichunga imata ayudarca?

8 Apóstol Pabloca ashtaca llaquicunata charishpapash Jehová Diosta sirvishpami catirca. ¿Imashinata paica ñaupaman sirvishpa cati usharca? Paica Jesús ñucanchi juchacunamanda huañushcata tucui shunguhuan crimandami ñaupaman cati usharca. Apóstol Pabloca ‘pipash [Jesuspi] crishpa, na chingaita chingagrinata’ o para siempre causaiguta chari ushanataca seguromi carca (Juan 3:16; Rom. 6:23). Apóstol Pabloca Jesús gentecunata salvangapaj huañushcataca seguromi carca. Shinallata gentecuna juchata rurashpa shungumanda arripintirijpica Jehová Dios perdonaj cashcatapash alimi yacharca (Sal. 86:5).

9. Gálatas 5:20​pi nishca shimicunamandaca ¿imatata yachajui ushapanchi?

9 Apóstol Pabloca Jehová Dios paita juyaimanda Jesusta paimanda huañuchun cachamushcataca tucui shungumi crirca. Apóstol Pablo cai shimicunapi crishcataca Gálatas 2:20​pimi ricuita ushapanchi (chai textota liipangui). Chaipica apóstol Pabloca, Jesusca “huañuchijcunaman japi tucushpami, ñucamanda huañurca” nijunmi. Jehová Dios paita juyashcataca Pabloca seguromi carca. Apóstol Pabloca: “Jehová Diosca ñuca huauquicunatami juyan. Ñucataca na juyahuanllu” nishpaca na pensarcachu. Chaimandami Roma llactapi huauquipanicunamanga: “Ñucanchi juchayuj cajpipash, Cristomi ñucanchimanda huañurca” nirca (Rom. 5:8). Shinaca Jehová Diosca tucuicunatami juyan.

10. Romanos 8:38, 39​pica ¿imatata yachajupanchi?

10 (Romanos 8:38, 39​ta liipangui). Apóstol Pabloca Jehová Dios juyajtaca tucui shunguhuanmi crirca. Chaimandami ‘Taita Dios juyajujtaca ñucanchimandaca, [imapash na] anchuchi ushangachu’ nirca. Apóstol Pabloca israelitacunahuan Jehová Dios ashtaca pacienciata charishcata, shinallata paihuanbash ashtaca pacienciata charishcataca alimi yacharca. Chaimandami shuj shimicunapi nishpaca: “Jehová Diosca paipa churitami ñucamanda huañuchun cachamurca. ¿Imashpata Jehová Dios ñucata juyajtaca na seguro cashayari?” nirca (Rom. 8:32).

Huaquin fotocuna: 1. Pabloca fariseo cashpami shuj huauquita prezo churachun mandajun. 2. Pabloca Jesusta catij tucushcamandami shuj joven huauquiguta animajun.

Jehová Diosca pundacunapi pandarishcacunataca na ricujunllu. Cunanbi, jipacunapipash paita sirvingapaj imata rurajushcatami ricun. (Párrafo 11​ta ricupangui).c

11. 1 Timoteo 1:12-15 nishcashnaca apóstol Pablo nali cosascunata rurashca cashpapash ¿imamandata Jehová Dios paita juyajtaca seguro carca?

11 (1 Timoteo 1:12-15, liipangui). Apóstol Pabloca Jesusta nara catij tucushpa nali cosascunata rurashcamandaca seguromi llaquiyan cashcanga. Chaimi tucuimandaca “ñucami [...] yali juchayuj cani” nirca. Jesusmanda nara yachaj chayashpaca Jesusta catijcunataca catiriashpa, prezomi churarca. Cutin shujcunatapash huañuchichunmi paica apoyarca (Hech. 26:10, 11). Caipi pensaripashun. Pabloca pundapi shuj cusahuarmita huañuchichun apoyashcapa shuj churitami rijsin. Paita rijsishpaca ¿imashinashi sintirin? Pabloca, pundacunapi nali cosascunata rurashcamanda ñana imatapash rurai ushashcataca alimi intindirca. Chaimandami Jesús paimanda huañushcata seguro cashpa cashna nirca: ‘Cunambica Taita Dios ninanda juyajpimi shina cani’ nishpa (1 Cor. 15:3, 10). Apóstol Pablomandaca ¿imatata yachajupanchi? Ñucanchipashmi Jesús ñucanchimanda huañushcata, pai huañushcamanda ñucanchicuna Jehová Dioshuan ali amigocuna tucuita ushashcatapash crina capanchi (Hech. 3:19). Jehová Diosca cunan punllacunapi o jipa punllacunapi ñucanchicuna imata rurajtami ricujun. Pundacunapi nalicunata rurashpa pandarishcacunataca na ricujunllu (Is. 1:18).

12. Imapapash na sirvij cuenda sintirishpaca ¿imashinata 1 Juan 3:19, 20​pi shimicunaca ñucanchicunataca ayudan?

12 Huaquinbica imapapash na sirvij cuendami sintiripanchi. Shinallata, “ñucanchitaca pipash na juyanachu can” nishpapashmi pensaita ushapanchi (1 Juan 3:19, 20​ta liipangui). Chaimandami: “Ñucaca yapa juchayujpachami cani. Jesuspa huañuipash na ñucataca quishpichi ushangachu” nishpami pensaita ushapanchi. Shina pensajushpaca ‘Taita Dios ñucanchi shunguta yali yachashcatami’ yarina capanchi. Shinallata Jehová Dios ñucanchita juyaimanda perdonajta yaringapapashmi esforzarina capanchi. Chaipaca cada punllami Bibliata yachajuna, cutin cutin Jehová Diosta mañana, ñucanchi huauquipanicunahuanbash tiempoguta yalina capanchi. Cai quimsa cosascuna imashina ayudajta ashtahuan ricupashun.

¿IMACUNALLATA ALI SINTIRICHUNGA AYUDAN?

13. Bibliata cada punlla yachajunaca ¿imashinata ñucanchicunataca ayudan? (“Bibliaca ¿imashinata huaquingunataca ayudashca?” nishca recuadrotapash ricupangui).

13 Bibliata cada punlla yachajuna. Bibliata cada punlla yachajushpaca Jehová Dios imashna cajta, ñucanchicunata ninanda juyashcatapashmi yachajui ushapashun. Bibliata yachajushcapi cada punlla pensarinami ñucanchi shungupipash, yuyaipipash pandacunata, ‘nalicunata’ ama pensajuchun ayudanga (2 Tim. 3:16). Kevin shuti anciano huauquica imapapash na sirvij cuendami sintirin carca. Paica ninmi: “Salmo 103​ta liina, chai shimicunapi yuyanami imashina Jehová Dios ñucata juyashcata, ñucamanda imata yuyashcatapash intindichun ashtacata ayudahuarca” ninmi. Párrafo 5​pi parlashca Eva paniguca ninmi: “Cada tutami Jehová Dios ñucanchita ninanda juyashcapi pensaringapaj esforzarini. Chaicunapi pensarishpami tranquila sintirini. Ñuca fepash ashtahuan mirashpami catin” nin.

Bibliaca ¿imashinata huaquingunataca ayudashca?

Shuj paniguca Bibliatami buspi liijun.
  • “Bibliata yachajujushpaca Jehovapi, shujcunapipashmi pensarishpa liini” (Michael).

  • “Bibliata liingapaj shuj ali programata charinami Jehová Dios ñucata juyashcata seguro cachun ayudahuan. Huaquinbica Bibliata liinata o yachajunataca quillanayanmi. Shinapash Bibliata liishpami Jehová Dios ñucata ‘juyanimi’ nijujtashna sintini” (Kevin).

  • “Salmos librotami liinata gushtani. Ashtahuanbachaca, Salmo 27​pi verso 1​manda 6​caman, verso 10​ta, shinallata verso 12​manda 14​camanmi cutin cutin liini. Liishca jipaca chaicunapimi pensarini” (Oksana).

  • “Cada punlla Bibliaguta liingapami esforzarini. Jipaca Taita Diosta mañangapami shuj tiempoguta surcuni. Bibliata liijushpaca ñuca imata minishtijushcatapachami yachajuni” (James).

  • “Bibliata yachajushca jipaca Jehová Diosman ashtahuanmi quimirini. Jehová Diosmi tranquilo sintirichunbash ñucataca ayudahuashca. Bibliamanda yachajunami Jehová ñucata nimahora na saquinata seguro cachun ayudahuashca” (Seiji).

14. Jehová Diosta mañanaca ¿imashinata ñucanchicunataca ayudan?

14 Jehová Diosta cutin cutin mañana (1 Tes. 5:17). Ali amigocuna cashpa catingapaca paicunahuan cutin cutin parlanami minishtirin. Jehová Dioshuanbash shinallatami can. Jehová Diosman ñucanchicuna imashina sintirijushcata, imata pensajushcata, imamanda preocuparijushcata parlashpaca Jehová Diospi tucui shunguhuan confiashcata, pai ñucanchita juyashcata seguro cachunmi ayudan (Sal. 94:17-19; 1 Juan 5:14, 15). Párrafo 2​pi parlashca Yua shuti paniguca: “Jehová Diosta mañajushpaca chai punllagupi ima pasashcamandallaca na parlanichu. Ashtahuangarin ñuca imashna sintirishcatami tucuita paimanga villani. Jehová Diostaca shuj jefetashnaca na ricunichu, chaipa randica shuj juyaj taitatashnami ricupani” ninmi (“¿Liipashcanguichu?” nishca recuadrota ricupangui).

¿Liipashcanguichu?

Acerquémonos a Jehová nishca librotaca ¿liipashcanguichu? Cai librota nara liishca cashpaca, quiquinba estudio personalpi liichunmi animapanchi. Estados Unidosmanda shuj paniguca ninmi: “Cai librota liina, liishcapi pensarinami Jehová Diosman ashtahuan quimirichun ayudahuashca. Cai librota yachajushpami Jehová Diostaca ashtahuan juyai callarishcani, shinallata ñucapa alipacha amigotashnami ricui callarishcani”.

15. Jehová Diosca cada unota juyashcataca ¿imashinata ricuchishca?

15 Ñucanchi huauquipanicunahuan tiempoguta yalina. Ñucanchi huauquipanicunaca Jehová Diospa carashcagucunami can (Sant. 1:17). Jehová Diosca cada unota juyashcataca huauquipanicunata cushpami ricuchishca. Huauquipanicunaca ñucanchi ‘tucui causaipimi juyashpa’ imagupipash ayudan (Prov. 17:17). Colosas llactamanda huauquipanicunaman escribijushpaca apóstol Pabloca paita ayudashca huaquin huauquicunamanda parlashpaca, paicunami ñucataca ‘ninanda cushichihuarca’ nircami (Col. 4:10, 11). Jesuspashmi paipa amigocuna paita ayudashcamandaca ninanda agradicirca. Jesustaca discipulocuna, angelcunapashmi ayudarca (Luc. 22:28, 43).

16. Ñucanchi huauquipanigucunaca ¿imapata ayudan?

16 Huauquipanigucuna ayudangapaj munajpica chai ayudata chasquipashunchi. Shuj huauquiman o shuj paniman ñucanchi problemacunamanda parlanaca Jehovapi na feta charishcataca na ningapaj munanllu. Ayudata mañanaca ñucanchipa alipallatami can. Párrafo 5​pi parlashca huauqui Jamesca: “Jehovata ali sirvinajuj huauquipanicunahuan ali llevarinami ñucataca ninanda ayudahuashca. Huaquinbica imapapash na sirvijshna sintirijujpica paicunaca ñucataca pacienciahuan uyashpami juyashcatapash ricuchihuashca. Shinami Jehová Dios ñucata juyashcata, ñucamanda preocuparishcatapash ashtahuan ricui ushashcani” ninmi. Shinaca, congregacionbi ali amigocunata charinaca minishtirishcapacha cashcatami ricupashcanchi.

JEHOVÁ DIOS JUYASHCATACA SIEMPRE YARIPASHUNCHI

17, 18. ¿Imatata seguro cana capanchi?

17 Satanasca Jehová Diosta sirvinata saquichun, nalicunata rurachun, Jehová Dios ñucanchita na juyashcata crichun, shinallata Jehová ñucanchita salvangapapash na munashcata crichunmi munan. Shinapash chaicunaca llullami can.

18 Jehová Diosca paita sirvijcunataca cada unotami juyan. Jehová Diospa mandashcacunata cazujpica, ñucanchicunatapashmi Jesustashna juyanga (Juan 15:10). “Jehová Dios na juyahuanllu” nishpa pensarijushpaca cai yuyaicuna ñucanchita mishachunga na saquinachu capanchi. Satanasmi cashna pensachunga munan. Chaipa randica Jehová Dios ñucanchicunapi ali cualidadcunata ricushcatami seguro cana capanchi. Jehová Dios ‘paipa agllashcacunahuan’, quiquinhuanbash cushijushca cashcatami yarina capangui.

¿IMATATA NIPANGUIMAN?

  • Jehová Dios ñucanchita juyashcata na seguro canaca ¿ima llaquicunamanda apaita ushan?

  • Apóstol Pablomanda, cunanbi Jehová Diosta sirvijcunamandapash ¿imatata yachajupanchi?

  • Bibliata yachajuna, Diosta mañana, huauquipanicunahuan tiempoguta yalinaca ¿imapata ayudan?

CÁNTICO 141 Causaica shuj jatun bendicionmi can

a Huaquin huauquipanicunaca Jehová Dios juyajtaca na seguro canllu. Caipica Jehová Dios tucuicunatallata juyajta, shinallata Jehová Dios ñucanchita juyajta na seguro cashpa imata rurana cashcatapashmi yachajupashun.

b Huaquin shuticunata cambiashcanchimi.

c CAI FOTOPICA: Pablo Jesuspa catij nara tucushpa tauca huauquipanicunata llaquichishcatami ricuchijun. Shinapash Jesús paimanda huañushcata intindishpaca huauquipanicunataca ayudashpa, animashpami catirca. Chai huauquipanicunaca Pablo catiriashpa llaquichishcacunapa familiacunami cashcanga.

    Quichua Imbabura publicacionguna (1993-2026)
    Llujshingapaj
    Caipi yaicupai
    • Quichua (Imbabura)
    • Cai informacionda shujcunaman cachangapaj
    • Configuración
    • Copyright © 2025 Watch Tower Bible and Tract Society of Pennsylvania
    • ¿Imashinata utilizana can?
    • Quiquinba datocunataca alimi cuidashun
    • Configuración de privacidad
    • JW.ORG
    • Caipi yaicupai
    Cai informacionda shujcunaman cachangapaj