Ancianocunaca ¿imashinata pecadota rurashcacunataca juyaihuan, llaquishpa ayudaita ushan?

1. Pecadota rurashcacunapaca ¿ima oportunidadta tian?

CHAISHUJ temapica Corinto congregacionbi shuj grave pecadota rurajpi huauquicuna imata rurashcatami yachajuparcanchi. Pecadota ruraj na arripintirijpica congregacionmanda llujchi tucushcatami ricuparcanchi. Shinapash cai temapa textopi nishcashnaca shuj pecador arripintirichun shuj ayuda tiashcatami ricupanchi (Rom. 2:4). Ancianocunaca pecadota rurashca huauquita o panitaca ¿imashinata arripintirichun ayudaita ushan?

2, 3. Shuj amigo pecado graveta rurashcata yachashpaca ¿imatata rurana capanchi?

² Shuj amigo shuj pecado graveta rurashcata yachaj chayashpaca ¿imatata rurana capanchi? Callaripica paitaca ancianocunahuan parlachunmi animana capanchi. Shinami ancianocunaca paitaca ayudaita ushanga (Is. 1:18; Hech. 20:28; 1 Ped. 5:2).

³ Shinapash pecadota rurashca huauqui o pani ancianocunahuan na parlangapaj munajpica ¿imatata rurana capanchi? Paicunata juyaimandami ancianocuna ayudachunga ñucanchicunallata villana capanchi. Pecador nali cosascunata rurashpa catijpica Jehová Dioshuanga ñana ali amigo cashpa cati ushangachu. Shinallata congregaciondapashmi nalipi quidachinga. Villana na fácil cajpipash, Jehová Diosta y pecadorta juyaimandami ancianocunamanga villana capanchi (Sal. 27:14).

ANCIANOCUNACA PECADOTA RURASHCA HUAUQUITA O PANITACA ¿IMASHINATA AYUDAN?

4. Ancianocunaca pecadota ruraj huauquihuan o panihuan tandanajushpaca ¿ima yuyaihuanda tandanajun?

⁴ Shuj pecado graveta rurajpica ancianocunaca paicunapuramandami quimsa ancianocunata pecadota rurashca huauquihuan o panihuan tandanajuchun agllan. Y cai quimsa ancianocunataca comité de ancianos nishpami rijsipanchi.a Anciano huauquicunaca humildecuna caimandami pecador huauquita o panita arripintirichun ayudangapaj munashpapash paicuna cambiachun na obligai ushashcataca ali yachan (Deut. 30:19). Huaquin pecadota rurashcacunaca, Jehová Diospa consejotaca na chasquingapaj munangachu (Gén. 4:​6-8). Chaimandami ancianocunaca pecadota rurashcata ayudangapaj munashpapash, rey David arripintirishcashna na tucui pecadorcuna arripintirinataca ali yachan (2 Sam 12:13). Shinapash ancianocunaca pecador arripintirichun ayudangapaca tucui usharishcaguta rurangapami esforzarin. Ancianocunaca pecadorhuan tandanajushpaca ¿imatata yaipi charina can?

5. Ancianocuna juchata rurashca huauquihuan o panihuan parlangapaj tandanajushpaca ¿ima consejotata yaipi charina can? (2 Timoteo 2:​24-26; dibujota ricupangui).

⁵ Ancianocunaca shuj huauqui o pani juchata rurashpa pandarishca cajpipash, paicuna Jehová Diospa ñaupapi ninan valishca cashcataca alimi yachan (Luc. 15:​4, 6). Shinaca ancianocunaca pecadota rurashca huauquihuan o panihuan tandanajushpaca paicunata tacuringapalla, nali tratangapalla o ima pasashcata tapuchingapallaca na tandanajunllu. Ashtahuangarin ancianocunaca cai huauquihuan o panihuan tandanajushpaca, apóstol Pablo cushca consejotami yaria cana can (2 Timoteo 2:​24-26​ta liipangui). Shinaca ancianocunaca juyaihuan, pacienciahuan llaquishpa ayudangapami esforzarina can.

6. Ancianocunaca pecadota rurashca huauquihuan o panihuan nara parlashpaca ¿imatata ruran? (Romanos 2:4).

⁶ Ancianocunaca shuj pecadota rurashca huauqui o panihuan nara parlashpallatami Jehová Diospa ayudata mascan. Ancianocunaca Jehová Diospa ejemplota catishpami, pecadota rurashca huauquita o panitaca juyaihuan, llaquishpa tratangapaj esforzarin. Shinallata apóstol Pablo nishca shimicunata yuyarishpami: ‘Llaquimanda arripintirichun ayudangapaj munan’ (Romanos 2:4​ta liipangui). Ancianocunaca Jesuspa instrucciongunata y paipa ejemplota catishpami congregaciondaca aliguta cuidana can (Is. 11:​3, 4; Mat. 18:​18-20). Pecadota rurashca huauquihuan o panihuan parlangapaj agllashca ancianocunaca, paicunahuan nara parlashpallatami paicunata arripintirichun ayudangapaj Jehová Diospa ayudata mañan. Paicunaca pecadorta ayudaita ushangapami Bibliapi textocunata y publicaciongunapi informaciongunata mascan. Shinallata ancianocunaca juchata rurashca huauqui o pani imamanda juchata rurashcata, imashpa shina comportarishcata ali intindi ushangapami Jehová Diosta mañan (Prov. 20:5).

7, 8. Pecadota rurashca huauquihuan o panihuan tandanajushpaca ancianocunaca ¿imashinata Jehová Diospa ejemplota catin?

⁷ Ancianocunaca Jehová Dioshna pacienciata charishcatami ricuchin. Punda tiempopi pecadorcunata Jehová Dios imashina tratashcatami yaipi charin. Por ejemplo, Jehová Diosca Caindaca pacienciahuanmi tratarca. Juchata rurajpi ima cosascuna pasanatami advertirca. Shinallata pai cambiajpi paipa ñaupapi cutin ali ricurinatami nirca (Gén. 4:​6, 7). Jehová Diosca profeta Natanda utilizashpami Davidtaca consejarca. Pai shuj chimbapuraita utilizashpa consejajpimi Davidca arripintirirca (2 Sam 12:​1-7). Shinallata Jehová Diosca israelitacunata ayudangapaca “cutin cutinmi” profetacunata cachan carca (Jer. 7:​24, 25). Jehová Diosca israelitacuna paicunapa munai arripintirichunga na shuyarcachu. Ashtahuangarin paimi arripintirichun ayudarca.

⁸ Ancianocunaca Jehová Diospa ejemplota catishpami pecadota rurashca huauquita o panita ayudangapaj esforzarin. 2 Timoteo 4:2​pi nishcashnaca ‘pacienciahuanmi’ pecadota rurashca huauquita o panitaca ayudan. Ancianocunaca pecadota rurashca huauquita o panita ayudangapaca pacienciahuan, aliguman, juyaihuanmi tratana can. Paicuna nali tratajpica ancianocuna cushca consejotaca na cazungapaj munangachu. Shinallata arripintiritapash na arripintiringapaj munangachu.

9, 10. Ancianocunaca pecadota rurashca huauquita, panitaca paicunallata nalita rurashcata cuenta japichunga ¿imashinata ayudaita ushan?

⁹ Ancianocunaca pecadota rurashca huauqui o pani imamanda chai pecadota rurashcata yachangapami esforzarin. Por ejemplo, ancianocunaca pecadota imamanda rurashcata yachangapaca cai cati yuyaicunatami yaipi charin. Por ejemplo ¿estudio personalta ruranata, villachinata, Jehová Diosta mañanatachu saquishca? ¿Asha ashachu nali munaicuna paipa shungupi mirashpa catichun saquishca? ¿Nali amigocunamanda, nali diversiongunamandachu nali cosascunata rurai callarishca? ¿Paipa nali decisionguna Jehová Diosmanda caruyachun saquishcataca alichu intindin?

¹⁰ Ancianocunaca pecadota rurashca huauquita, panita imamanda pecadota rurashcata paicunallata cuenta japichunmi huaquin tapuicunata rurashpa ayudaita ushan. Ancianocunaca aliguman, respetohuanmi minishtirishca informaciondalla tapuchina can (Prov. 20:5). Shinallata profeta Natán Davidta ayudashcashnami ancianocunaca ejemplocunata utilizashpa pecadortaca ayudaita ushan. Y pecadota rurajca por primera vez ancianocunahuan tandanajushpallatami paicunapa nali rurashcacunamanda nali sintirishpa talvez arripintirita ushan.

11. Jesusca pecadota rurashca gentecunataca ¿imashinata tratarca?

¹¹ Ancianocunaca Jesuspa ejemplota catingapami esforzarin. Por ejemplo, Jesusca Saulotaca: “Saulo, Saulo ¿imamandata ñucataca catiriashpa llaquichihuajungui?” nishpami tapurca. Jesusca cashna tapushpaca, paillata nalita rurajushcata cuenta japichunmi ayudarca (Hech. 9:​3-6). Cutin Apocalipsis 2:​20, 21​pica: ‘Jezabel huarmimandami’ parlan. Paimanga: “Arripintirichunmi tiempota curcani” nircami.

12, 13. Pecadota rurashca huauqui o pani arripintirichunga ancianocunaca ¿imatata rurana can? (Fotocunata ricupangui).

¹² Jesuspa ejemplota catij ancianocunaca pecadota rurashca huauqui o panica na arripintiringachu yashpaca na ñapash pensarinllu. Huaquingunaca primera vez ancianocunahuan tandanajushpallatami arripintirin. Cutin shujcunaca arripintiringapaca ashtahuan tiempotami minishtin. Chaimandami ancianocunaca paicunahuanga huaquin viajecunata tandanajunata minishtin. Paicunaca primera vez ancianocunahuan tandanajushca jipami Jehová Diosta perdonahuai nishpa mañaita ushan (Sal. 32:5; 38:18). Chaimi ancianocunahuan cutin tandanajushpaca cambiangapaj munashcata ricuchita ushan.

¹³ Juchata rurashca huauqui o pani arripintirichun ayudangapaca ancianocunaca juyashcata, paicunamanda ciertopacha preocuparishcatami ricuchina can. Pecadota rurashca huauqui o pani arripintirichun ayudangapaj rurashca esfuerzocunata Jehová Dios bendiciachunmi ancianocunaca mañan (2 Tim. 2:​25, 26).

14. Pecadota rurashca huauqui o panica ¿ancianocuna ayudashcamandallachu arripintirin?

¹⁴ Pecadota rurashca huauqui o pani arripintirijpica ninandami cushijupanchi (Luc. 15:​7, 10). Shinapash pecadota rurashca huauqui o panica ¿ancianocuna ayudajpillachu cambiashca? Na. Apóstol Pablo nishcashnaca Jehová Dios ayudajpimi paicunaca arripintirishca (2 Tim. 2:25). Shinaca Jehová Dios ayudajpillami paicunaca nali ruraicunata saquishpa cambiaita ushan. Apóstol Pabloca juchata rurashcamanda arripintirijcunaca huaquin beneficiocunata chari ushashcatami nirca. Paicunaca Bibliapa mandashcacunata ashtahuan aliguta intindishpami nalita rurajushcata cuenta japishpa Diablopa trampamandapash jarcarin (2 Tim. 2:26).

15. Pecadota rurashca huauqui o pani arripintirijpipash ancianocunaca ¿imatata rurashpa catina can?

¹⁵ Pecadota rurashca huauqui o pani arripintirijpipash, ancianocunaca cai huauqui o pani, espiritualmente shinlli tucushpa, Diablopa trampacunamanda jarcarishpa, Jehová mandashcashna causachun ayudangapami paitaca visita de pastoreota rurashpa catinga (Heb. 12:​12, 13). Shinallata ancianocunaca cai huauqui o pani ima pecadota rurashcataca na yangata pimanbash villangachu. Shinapash congregacionmanga ¿imatata villanga?

‘TUCUICUNAPA ÑAUPAPIMI CORREGINA O CENSURANA CANGUI’

16. Apóstol Pabloca ‘tucuicunapa ñaupapimi corregina o censurana cangui’ nishpaca ¿picunamandata parlajurca?

¹⁶ (1 Timoteo 5:20​ta liipangui). Pabloca Timoteomanga pecadota rurashca huauquita o panitaca ‘tucuicunapa ñaupapimi’ corregina o censurana cangui nircami. Shina nishpaca na tucui congregacionman villana cashcataca nijurcachu. Ashtahuangarin pecadorllata villashca huauquipanicunaman o paicunapacha pecadota rurashcata ricushca huauquipanicunamanlla villana cashcatami nijurca. Paicunamanga pecadota rurashca huauquita o panitaca ñami ayudashpa censurashcanchi nishpami villaita ushan.

17. Shuj huauqui o shuj pani pecadota rurashcata congregacionbi yachaj chayajpica ancianocunaca ¿imatata rurana can? ¿Imamandata shina rurana can?

¹⁷ Huaquinbica shuj huauqui o shuj pani pecadota rurashcata huauquipanicuna yachaj chayajpi o jipaman yachaj chayana cajpimi, ancianocunaca congregacionbica chai huauquita o panitaca censurarcanchi o corregircanchimi nishpa villana can. Apóstol Pablo nishcashnaca ‘shujcunapash pecadopi’ ama urmachunmi ancianocunaca shina ruran.

18. Shuj menor de edad huauqui o pani pecadota rurajpica ancianocunaca ¿imatata ruran? (Fotota ricupangui).

¹⁸ Menor de edad huauqui o pani shuj pecadota rurajpica, ancianocunaca ¿imatata ruran? Menor de edad huauquihuan o panihuan y paipa taitamamacunahuan parlachunga, ancianocunaca ishcai ancianocunatami agllanga.b Cai ishcai ancianocunaca taitamamacunataca paipa churita o ushita arripintirichun ayudangapaca ¿imacunatata rurapashcanguichi? nishpami tapunga. Menor de edad huauqui o pani paipa taitamamapa ayudata chasquijujta yachashpaca, cai ishcai ancianocunaca paicunahuan shuj comiteta rurana ñana minishtirishca cashcatami dicidita ushan. Taitamamacunamanmi Taita Diosca huahuacunata juyaihuan corregina responsabilidadtaca saquishca (Deut. 6:​6, 7; Prov. 6:20; 22:6; Efes. 6:​2-4). Shinallata ancianocunaca menor de edad huauqui o pani, paipa taitamamacunapa ayudata chasquijushcata o na chasquijushcata yachangapami minishtirishca viajecunata paicunahuan parlanga. Shinapash menor de edad huauqui o pani na arripintirishpa na cambiangapaj munajpica ancianocunaca chai menor de edad huauquita o panitami shuj comiteta ruranata dicidinga. Y chai comitepica paipa taitamamacunapashmi cana can.

“JEHOVÁ DIOSCA NINANDA JUYAJ, LLAQUIJ TAITA DIOSMI CAN”

19. Pecadota rurashca huauquita o panita tratashpaca ancianocunaca ¿imashinata Jehová Diospa ejemplota catishcata ricuchin?

¹⁹ Jehová Diosca ancianocunamanmi nali ruraicunamanda congregacionda limpio charichun responsabilidadta cushca. Chaimandami comitepi sirvij ancianocunaca congregación nali ruraicunamanda limpio cachun ricurian (1 Cor. 5:7). Shinapash ancianocunaca juchata rurashca huauqui o pani arripintirichun ayudangapaca tucuita rurashpami esforzarin. Shinami ancianocunaca Jehová Dioshna ‘ninanda juyaj, llaquij’ cashcata ricuchin (Sant. 5:11). Apóstol Juan ima nishcata ricupashunchi: “Ñuca huahuagucunalla, ama imapash pecadota rurachunmi cai shimicunataca escribijupani. Pero pecadota rurashpaca, shuj ayudadortami charipanchi. Chai ayudadorca Taita Diospa ladopimi can. Chai ayudadorca Jesucristomi can. Paica alita rurajmi can” (1 Juan 2:1).

20. Cati temapica ¿imatata yachajupashun?

²⁰ Huaquinbica pecadota rurashca huauqui o panica na arripintiringapaj munanllu. Chai casocunapica congregacionmanda llujchinami tucun. Shinapash ancianocunaca pecadota rurashca huauquita o panita congregacionmanda llujchina tucujpica ¿imatata ruran? Cai yuyaitaca cati temapimi yachajupashun.