Jehová Diospa shutica ñucanchipaca importantepachami can

1, 2. Jehová Diospa shuti Jesuspa importantepacha cashcataca ¿imashinata yachapanchi?

JESUSPACA Jehová Diospa shutica importantepachami can. Jesusllami Taita Diospa shutita rijsichingapaca ashtacata esforzarirca. Imashinami chaishuj temapi ricuparcanchi, Jesusllami Taita Diospa shutimanda huañungapaj y Taita Dios tucuita ali rurashcata ricuchingapaca dispuesto carca (Mar. 14:36; Heb. 10:​7-9). Jesusca mil huatacunata mandashca jipami, paipa Taitapa shuti santificado cachunga, mandana autoridadta paipa Taitaman tigrachinga (1 Cor. 15:​26-28). Jesusca Jehovapa shutimandaca tucuitami rurarca. Shinami Jesusca, Jehová Diosta ninanda juyashcata ricuchirca.

² Jesusca Jehová Diosmanda parlangapami cai alpamanga shamurca (Juan 5:43; 12:13). Shinallata paipa Taitapa shutitami paipa discipulocunamanga ali ali rijsichirca (Juan 17:​6, 26). Gentecunaman yachachishpaca Jehová Diospa ali yachaihuan yachachishcatami ricuchirca. Cutin milagrocunata rurashpaca Jehová Diospa poderhuan rurashcatami Jesusca ricuchirca (Juan 10:25). Paipa discipulocunamanda mañashpami Jehová Diostaca: “Quiquinba shutimandami paicunataca cuidapangui nipani” nirca (Juan 17:11). Imashinami ricupanchi, Jesuspaca Jehová Diospa shutica importantepachami can. Shinaca cristianomi cani nishpapash, Taita Diospa shutita na yachashpa y paipa shutita na utilizashpaca ¿ciertopachachu cristiano can?

3. Cai temapica ¿imatallata yachajupashun?

³ Ciertopacha cristianocunaca Jesuspa ejemplota catingapami esforzaripanchi. Chaimandami Jehová Diospa shutica ñucanchipapash importantepacha can (1 Ped. 2:21). Cai temapica Taita Diospa ‘Gobiernomanda ali villaicunata’ villajcuna Taita Diospa shutita charishcatami yachajupashun (Mat. 24:14). Shinallata Jehová Diospa shuti ñucanchipapash importantepacha cashcatami yachajupashun.

‘PAIPA SHUTITA CHARICHUNMI SHUJ LLACTATA AGLLARCA’

4. a) Jahua cieloman ña tigragrijushpaca ¿imatata Jesusca paipa discipulocunamanga nirca? b) ¿Ima tapuitata yachajupashun?

⁴ Jesusca jahua cieloman ña tigragrijushpami paipa discipulocunataca cashna nirca: “Taita Diospa espíritu santota chasquishpami, cangunaca ushaita charinguichi. Chaimi cangunaca Jerusalenbi, tucuilla Judea llactapi, tucuilla Samaria llactapi y mundo entero llactacunapipash ñucamanda villachinguichi” nirca (Hech. 1:8). Shinaca na solo Israel llactapi gentecunallachu ali villaigucunataca uyana carca. Sino tiempohuanga mundo enteropi gentecunami ali villaigucunata uyashpa, Jesuspa discipulocuna tucuna oportunidadta charina carca (Mat. 28:​19, 20). Shinapash Jesusca: ‘Ñucamandami villachinguichi’ nircami. Shina nishpaca mushuj discipulocunaca ¿Jesusmandallachu villachina carca o Jehová Diospa shutitapashchu ali ali rijsina carca? Chaita yachangapaca Hechos capítulo 15​tami ricuita ushapanchi.

5. Jehová Diospa shutita rijsina importante cashcataca ¿imashinata Jerusalenmanda apostolcunapash y ancianocunapash ricuchirca? (Dibujotapash ricupangui).

⁵ Huata 49​pimi, Jerusalenmanda apostolcunapash y ancianocunapash tandanajurca. Chai tandanajuipimi na judío gentecunapash cristianocuna tucungapaj imata rurana cashcata parlarca. Tandanajuita tucuchingapami Jesuspa discípulo Santiagoca cashna nirca: “Taita Diosca na judío gentecunatapash yarishpami, paipa shutita charichunga paicunapuramandaca shuj llactata agllai callarishca. Chaitami, Symeonga [Pedroca] ñucanchimanga villashca” nircami. Paipa shutita charichun nishpaca ¿pipa shutimandata parlajun? Profeta Amospa profeciamanda parlashpami Santiagoca cashna nishpa catirca: “Quidashca gentecunaca gulpi llactamanda gentecunandimi Jehová Diostaca tucui shunguhuan mascanga. Chai gentecunaca ñuca shutita villachijcunami canga. Cashna cosascunata ruraj Jehová Diosmi shina nishca” nircami (Hech. 15:​14-18). Shinaca Jesuspa mushuj discipulocunaca Jehovamanda yachajushca jahuapash Jehová Diospa shutimandapashmi villachina carca. Mushuj discipulocuna Jehovapa shutimanda villachijpimi, gentecunaca paicuna Jehovapa shutipi villachinajujta cuenta japina carca.

6, 7. a) Jesusca ¿imacunamandallata cai alpamanga shamurca? b) Ashtahuanbachaca ¿imamandata Jesusca cai alpaman shamurca?

⁶ Imashinami ña yachajuparcanchi, Jesuspa shutica “Jehová Diosca salvanmi” nishca significadotami charin. Jehová Diosca, paipi y Jesuspi feta charijcunata salvangapami Jesustaca utilizarca. Jesusca paipa causaita cushpa gentecunata salvangapami cai alpamanga shamurca (Mat. 20:28). Jesús paipa causaita cushcamandami, gentecunaca pecadocunamanda perdonai tucun y para siempre causana oportunidadtapash charin (Juan 3:16).

⁷ Shinapash ¿imamandata gentecunaca Jesús paipa causaita cushpa pecadocunamanda salvachun minishtirca? Imashinami chaishuj temapi yachajuparcanchi, Adán y Evami jardín de Edenbica Jehová Diosta na cazushpa, para siempre causana oportunidadta chingachirca (Gén. 3:​6, 24). Diablopash Jehovamandaca llullacunatami nirca (Gén. 3:​4, 5). Jesusca Adán y Evapa huahuacunata salvangapaj shamushpapash, ashtahuanbachaca Jehová Diospa shutita santificangapami shamurca. Jesusca paipa Taitapa shutipi shamushpa y paipa Taita tucui ima munashcata rurashpami, paipa Taitapa shutitaca santificarca.

8. Jesuspa discipulocunaca ¿imacunatallata intindina carca?

⁸ Judiocunapash y na judiocunapash Jesuspa discipulocuna tucushpaca Jehová Diosmandalla salvari ushashcatami intindina carca (Juan 17:3). Shinallata paicunaca Jehovapa shutipi rijsi tucuna cashcatapashmi intindina carca. Ashtahuanbash salvaringapaca Jehová Diospa shutita santificana cashcatapashmi Jesuspa discipulocunaca intindina carca (Hech. 2:​21, 22). Shinaca Jesuspa ali discipulocunaca Jehovamanda y Jesusmandapashmi yachajuna carca. Chaimandami Jesusca Juan capítulo 17​pi rurashca oraciondaca cashna nishpa tucuchirca: “Quiquinba shutimandaca ñami paicunamanga yachachipashcani. Yachachishpapash catisharami. Chaimi quiquin ñucata juyashcashnallata paicunapash shujcunata juyanga. Shinallata ñucapashmi paicunahuanga shujllashna casha” nircami (Juan 17:26).

‘CANGUNAMI ÑUCAMANDA TESTIGOCUNA CAPANGUICHI’

9. Ciertopacha cristianocunaca Jehová Diospa shutimandaca ¿imatata pensapanchi?

⁹ Imashinami ricupashcanchi, ciertopacha cristianocunapaca Jehová Diospa shutita santificanaca importantepachami can (Mat. 6:​9, 10). Ñucanchipaca Jehová Diospa shutimi ashtahuan importantepacha can. Y chaitaca ñucanchi ruraicunahuanmi ricuchina capanchi. Jehová Diospa shutita santificangapaj y Diablo llulla cashcata ricuchingapaca ¿imatata rurana capanchi?

10. Isaías capítulo 42​manda 44​camanga ¿imatata yachachijun? (Isaías 43:9; 44:​7-9; fototapash ricupangui).

¹⁰ Isaías capítulo 42​manda 44​camanga Jehová Diospa shutita santificangapaj ñucanchicuna imata rurana cashcatami yachachijun. Chai capitulocunapimi Jehová Diosca yanga dioscunata adoraj gentecunataca, cangunapa dioscuna ciertopacha tiajpica pruebacunata ricuchichi nin. Shinallata Jehová Diosca shuj juiciopi cuendami, yanga dioscunata adoraj gentecunataca cangunapa dioscuna tiashcata ricuchingapaca testigocunatami presentana canguichi nin. Shinapash yanga dioscunata adoraj gentecunaca nipi na paicunapa dioscuna tiashcataca ricuchita ushashcachu (Isaías 43:9; 44:​7-9​ta liipangui).

11. Isaías 43:10-12​pica ¿imatata Jehová Diosca paipa sirvijcunataca nin?

¹¹ (Isaías 43:​10, TNM-S;a 43: 11, 12​ta liipangui). Jehová Diosca paipa sirvijcunataca “cangunami ñucapa testigocuna capanguichi” y “Ñucallami, Mandaj Dios cani” nircami. Shinallata Isaías 44:8​pica “ñucamanda ashtahuan shuj Taita Diosca na tianllu” nircami. Ñucanchicunaca paipa llacta caimandami Isaías 44:8​pi Jehová Dios imata nishcataca apoyapanchi. Shinallata ñucanchi parlocunahuan, ñucanchi ruraicunahuanmi Jehová Dios ciertopacha Taita Dios cashcata y Jehová Diospa shuti ashtahuan importante cashcatapash ricuchipanchi. Ñucanchi causaihuanbashmi Jehová Diosta tucui shunguhuan juyashcataca ricuchipanchi y aunque Diablo jarcaicunata churajpipash Jehová Diostaca tucui shunguhuanmi cazupanchi. Chai cosascunata rurashpami Jehová Diospa shutita santificashpa ayudapanchi.

12. Isaías 40:3​pi, Isaías 40:5​pi profeciacunaca ¿imashinata pactarirca?

¹² Profeta Isaiasca Isaías 40:3​pica, “Mandaj Diosman ñanda alichipaichi” nircami. Chai profeciaca ¿imashinata pactarirca? Chai profeciaca Jesús, Jehovapa shutipi shamuchun y Jehovapa shutipi parlachun Juan Bautista ñanda pascajpimi pactarirca (Mat. 3:3; Mar. 1:​2-4; Luc. 3:​3-6). Shinallata profeta Isaiasca Isaías 40:5​pica, ‘Mandaj Diosca, punchapambami ricuringa’ nircami. Chai profeciaca ¿imashinata pactarirca? Chai profeciaca Jesús cai alpaman shamushpa paipa Taita imashina cashcata ali ali ricuchijpimi pactarirca. Jehová Dios imashina cashcata ali ali ricuchijpimi Jehová Dios cai alpaman shamushcashna carca (Juan 12:45).

13. ¿Imashinata Jesuspa ejemplota catita ushapanchi?

¹³ Jehová Diospa shutita santificashpami Jesuspa ejemplota catijushcata ricuchipanchi. Ñucanchicunapash Jesushnallatami testigo de Jehovacuna capanchi. Jehovapa shutitami charipanchi. Y Jehová Diospa alipacha rurashcacunatami gentecunamanga parlapanchi. Pero shuj ali testigo de Jehová cangapaca, Jehová Diospa shutita santificangapaj y Jesús imatalla rurashcatami shuj gentecunamanga parlana capanchi (Hech. 1:8). Jesusllami Jehová Diosmandaca ali ali yachachirca. Chaimi ñucanchicunapash paipa ejemplota catipanchi (Apoc. 1:5). Shinapash Jehová Diospa shuti ñucanchipa importantepacha cashcata ricuchingapaca ¿imatata ashtahuan rurai ushapanchi?

ÑUCANCHICUNAPACA JEHOVÁ DIOSPA SHUTICA IMPORTANTEPACHAMI CAN

14. 1 Corintios 1:31​pi nishcashnaca Jehová Diospa shutimandaca ¿imashinata sintiripanchi?

¹⁴ Jehová Diospa shutimandaca jariyashcami sintiripanchi (1 Corintios 1:31​ta liipangui). Jehová Diosca ñucanchicuna paimanda jariyajpica cushillami sintirin (Jer. 9:​23, 24; 2 Cor. 10:17). Jehová Diosmanda jariyana nishpaca pai ñucanchi Taita Dios cashcamanda orgulloso sintirinatami ningapaj munan. Jehová Dios santo Taita Dios cashcata y tucuita ali ruraj cashcata gentecunaman villachinaca ñucanchipaca shuj jatun bendicionmi can. Trabajopi cashpa, colegiopi cashpa, ñucanchi comunidadpi cashpa o maipi cashpapash testigo de Jehovami cani ninataca nunca na pinganayachinachu capanchi. Diabloca, Jehová Diospa shutita gentecunaman rijsichishpa catichunga na munanllu (Jer. 11:21; Apoc. 12:17). Diablopa llullacunata yachachijcunapash y Diablopash Jehová Diospa shutita gentecuna cungachunmi munan (Jer. 23:​26, 27). Pero ñucanchicunaca Jehová Diospa shutitaca tucui shungumi juyapanchi. Chaimandami Jehovataca “tucui punllacuna” alabapanchi (Sal. 5:11; 89:16).

15. Jehovapa shutita “cayana” nishpaca ¿imatata ningapaj munan?

¹⁵ Jehová Diospa shutipimi mañashpa catina capanchi (Joel 2:32; Rom. 10:​13, 14). “Mañana” shimitaca huaquin Bibliacunapica “cayana” nishpami traducin. Jehovapa shutita “cayana” nishpaca Jehová Diospa shutita rijsinatalla y utilizanatallaca na nijunllu. Sino Jehová Dios imashina cashcata rijsinata, Jehová Diospi confianata, imata ruranata yachangapaj Jehová Diospa ayudata mascanatami shina nin (Sal. 20:7; 99:6; 116:4; 145:18). Shinallata Jehová Diospa shutimanda y pai imashina cashcata gentecunaman villachinatapashmi shina nin. Shinallata “cayana” nishpaca gentecuna paicunapa causaipi cambiashpa, Jehová Diospa ñaupapi ali ricurishpa salvarichun ayudanatami shina nin (Is. 12:4; Hech. 2:​21, 38).

16. Diablo llulla cashcataca ¿imashinata ricuchita ushapanchi?

¹⁶ Jehová Diospa shutimandami sufringapapash dispuesto capanchi (Sant. 5:​10, 11). Shuj shuj llaquicuna ricurijpipash Jehová Diosmanda nunca na caruyashpami Diablo llulla cashcataca ricuchipanchi. Jobpa punllacunapipash, Taita Diospa sirvijcunaca ‘paicunapa causaimandaca tucui imata charishcata cunmanllami’ nishpami Diabloca llullarca (Job 2:4). Shina nishpaca gentecunaca paicunapa causaipi ali rijpillami Taita Diostaca sirvinga pero problemacuna ricurijpica Taita Diosta sirvinataca saquingallami nishpami Diabloca shina llullarca. Pero Jobca Jehová Diosmanda nunca na caruyashpami Diablo llulla cashcata ricuchirca. Ñucanchicunaca shuj shuj llaquicunata charishpa o Diablo ñucanchita desanimachijpipash Jehová Diosta sirvinataca nunca na saquishunllu. Jehová Dios paipa shutimanda ñucanchicunata cuidashpa catinataca seguromi capanchi (Juan 17:11).

17. 1 Pedro 2:12​pi nishcashnaca ¿imashinata Jehová Diospa shutitaca alabaita ushapanchi?

¹⁷ Jehová Diospa shutitami respetapanchi (Prov. 30:9; Jer. 7:​8-11). Testigo de Jehovacuna caimandaca ñucanchi ruraicunahuanmi Jehová Diospa shutita alabaita o paipa shutita mapayachita ushapanchi (1 Pedro 2:12​ta liipangui). Chaimandami imata nishpa o imata rurashpapash Jehová Diospa shutita siempre alabangapaj esforzaripanchi. Shinami aunque juchayucuna cashpapash Jehovapa shuti alabashca cachun ayudapanchi.

18. Jehovapa shuti importante cashcataca ¿imashinata ricuchipanchi? (Notatapash ricupangui).

¹⁸ Gentecuna ñucanchimanda imata pensajpipash Jehová Diospa shutita alabanami ñucanchipaca ashtahuan importante can (Sal. 138:2). ¿Imamandata shina nipanchi? Jehová Diosta juyaimandami pai gustashca cosascunata rurapanchi. Chaimandami huaquin gentecunaca ñucanchimandaca burlarin y critican.b Jesusca Jehová Diospa shutita alabangapaj munaimandami nali gentecunashna pinganaita huañungapaj dispuesto carca. Hebreos 12:​2-4​pi nishcashnaca shuj gentecuna paimanda imata pensanataca Jesusca “na pinganayachircachu”. Jesuspaca, Jehová Diospa voluntadta ruranami ashtahuan importante carca (Mat. 26:39).

19. Jehová Diospa shutita charimandaca ¿imashinata sintiripangui y imamandata shina sintiripangui?

¹⁹ Jehová Diosta sirvimandami orgulloso sintiripanchi. Ñucanchipaca testigo de Jehová canaca shuj jatun bendicionmi can. Chaimandami shuj gentecuna ñucanchimanda burlarijpi o criticajpipash na preocuparipanchi. Shuj gentecuna ñucanchimanda imata pensajpipash, ñucanchipaca Jehová Diospa shutimi ashtahuan importante can. Chaimi Diablo ñucanchita desanimachingapaj munajpipash Jehová Diosta alabashpa catingapaj decidido capanchi. Shinami ñucanchicunapash Jesushnallata Jehová Diospa shuti importantepacha cashcata ricuchipashun.