¿Imashinata ali consejocunata tarita ushapanchi?

1. Ñucanchi causaipi ali richunga ¿imatata rurana capanchi? (Proverbios 12:​15, TNM-S; 15:22).

ÑUCANCHI causaipi ali richunga tucuicunallatami ali decisiongunata japingapaj munapanchi. Bibliapi nishcashnaca ali decisiongunata japingapaca shujcunapa consejotami mascana capanchi (Proverbios 15:​22, TNM-S;a 12:15​ta liipangui).

2. Jehová Diosca ¿imatata prometishca?

² Jehová Diosllami ñucanchimanga ali consejocunataca cuita ushan. Chaimandami ñucanchiman sabiduriata cuchun Jehová Diostaca mañana capanchi. Jehová Diosca cangunataca ‘ñuca ñavihuan ricuriashpami’ consejasha, nishpami prometirca (Sal. 32:8). Jehová Diosca ñucanchi minishtijuj horaspipacha consejocunata cungapaca pendientemi can. Shinallata ñucanchi causaipi chai consejocunata pactachichun ayudangapapash Jehová Diosca pendientemi can.

3. Cai temapica ¿ima tapuicunatata yachajupashun?

³ Cai temapica cai chuscu tapuicunatami yachajupashun: 1) Consejocunamanda beneficiaringapaca ¿ima cualidadtata minishtipanchi? 2) ¿Pita ali consejocunataca cuita ushan? 3) Consejota ciertopacha minishtijushcataca ¿imashinata ricuchita ushapanchi? y 4) ¿Imamandata shujcuna ñucamanda decidichunga na saquina capani? nishca tapuicunatami yachajupashun.

CONSEJOCUNAMANDA BENEFICIARINGAPACA ¿IMA CUALIDADTATA MINISHTIPANCHI?

4. Shujcunapa consejocunamanda beneficiaringapaca ¿ima cualidadtata charina capanchi?

⁴ Shujcuna cushca consejocunamanda beneficiaringapaca humildemi cana capanchi. Experienciata charij huauquipanicunapa ayudahuan ali decisiongunata japi ushashcataca reconocinami capanchi. Na humilde cajpica Jehová Diosca ñucanchitaca na ayudangachu. Shinallata na humilde cashpaca, Bibliata liijushpa chaipi consejocunata tarishpapash ñucanchi causaipi pactachingapaca na munashunllu (Miq. 6:8; 1 Ped. 5:5). Cutin humilde cashpaca Bibliapa consejocunata pactachingapami esforzaripashun.

5. ¿Imamandata Davidca orgulloso tucunman carca?

⁵ Rey Davidpa ejemplomanda imata yachajui ushashcata ricupashun. Davidca ashtaca ali cosascunata rurashpapash humildemi carca. Por ejemplo, nara rey tucushpaca, Davidca alipacha tocanata yachaj musicomi carca. Chaimi rey Saulca musicata tocachun, Davidtaca cayan carca (1 Sam 16:​18, 19). Davidta rey cachun agllashpaca Jehová Diosca paipa espíritu santotami curca (1 Sam 16:​11-13). Contracunata y Goliatta mishashcamandami gentecunapash Davidtaca alaban carca (1 Sam 17:​37, 50; 18:7). Shinapash Davidca nunca na orgulloso tucurcachu. Orgulloso cashpaca: “Ñucaca ashtaca cosascunatami rurashcani. Pipash consejachunga na minishtinichu” nishpami pensanman carca. Pero Davidca humildemi carca.

6. David shujcunapa consejota uyaj cashcataca ¿imashinata yachapanchi? (Callari paginapa dibujotapash ricupangui).

⁶ Rey tucushca jipaca Davidca, ali consejocunata cuj amigocunatami charirca (1 Crón. 27:​32-34). Davidca nara rey tucushpapash jaricuna o huarmicuna consejajpica siempremi uyangapaj dispuesto carca. Por ejemplo, Abigaíl huarmigu consejajpimi Davidca uyarca. Abigailca Nabal runahuanmi cazarashca carca. Nabalca orgulloso, malagradecidomi carca y shujcunatapash na respetanllu carca. Cutin Davidca humildemi carca. Chaimandami Abigailpa consejota uyashpa Nabalta huañuchinamandaca jarcarirca (1 Sam 25:​2, 3, 21-25, 32-34).

7. Davidpa ejemplomandaca ¿ima ishcai cosascunatata yachajupanchi? (Eclesiastés 4:13; fotocunatapash ricupangui).

⁷ Davidpa ejemplomandaca ¿ima ishcai cosascunatata yachajupanchi? Imaguta ali rurai ushashpapash o ima autoridadta charishpapash humilde cana cashcatami yachajupanchi. “Tucuitami yachani, pipash consejachunga na minishtinichu” nishpaca na pensanachu capanchi. Shinallata jari cajpi o huarmi cajpi ali consejocunata cujpi uyangapaj dispuesto cana cashcatapashmi yachajupanchi (Eclesiastés 4:13​ta liipangui). Shujcunapa ali consejocunata uyashpami, ni shujcunatapash na llaquichishun, ni ñucanchillatapash na llaquipi urmashun.

¿PICUNATA ALI CONSEJOCUNATA CUITA USHAN?

8. Davidca Jonatanba consejota mascashpaca ¿imamandata alita rurarca?

⁸ Davidpa ejemplomanda imata ashtahuan yachajui ushashcata ricupashun. Davidca Jehová Diospa ali amigocunapa consejota y paipa situacionda ali rijsicunapa consejotami uyan carca. Por ejemplo, rey Saulhuan ali tucungapaj munashpaca rey Saulpa churi Jonatanba consejotami mascarca. Jonatanga Jehová Diospa ali amigomi carca y rey Saultapash ali alimi rijsirca. Chaimandami Davidca Jonatanba consejota mascashpaca alita rurarca (1 Sam 20:​9-13). Shinaca, Davidpa ejemplota ñucanchi causaipi imashina pactachi ushashcata ricupashun.

9. Shuj consejota minishtijushpaca ¿picunapa consejotata mascana capanchi? Shuj ejemplomanda parlapai (Proverbios 13:20).

⁹ Shuj consejota minishtijushpaca, Jehová Diospa ali amigocunapa consejotami mascana capanchi. Shinallata experienciata charij huauquipanicunapa consejotami mascana capanchi (Proverbios 13:20​ta liipangui).b Por ejemplo, shuj joven huauquigu cazarangapaj munajushpaca Bibliahuan consejaj soltero huauquicunapa consejotami mascaita ushan. Shinapash paita ali rijsij y Jehovata ali sirvinajuj cazado huauquipanicunapa consejomi paitaca ashtahuan ayudaita ushan. Porque paicunami cazado caimandaca Bibliapa consejocunata imashina pactachi ushanataca experienciahuan consejaita ushan.

10. ¿Imatata ashtahuan yachajushpa catipashun?

¹⁰ Caicamanga, shujcuna cushca consejocunamanda beneficiaringapaj humilde cana cashcatami yachajupashcanchi. Shinallata picuna ali consejocunata cui ushashcatapashmi yachajupashcanchi. Cunanga, consejota ciertopacha minishtijushcataca ¿imashinata ricuchita ushapanchi? y ¿imamandata shujcuna ñucamanda decidichunga na saquina capani? nishca tapuicunatami yachajupashun.

CONSEJOTA CIERTOPACHA MINISHTIJUSHCATACA ¿IMASHINATA RICUCHITA USHAPANCHI?

11, 12. a) ¿Imatata na rurana capanchi? b) Rehoboamga shuj importante decisionda japigrijushpaca ¿imatata rurarca?

¹¹ Huaquingunaca imatapash ña decidishca cashpatami shujcunapa consejota mañan. Shina rurashpaca paicunaman razonda cuchun munaimandallami consejotaca mañanajun. Chashna rurajcunaca consejota ciertopacha minishtinajushcataca na ricuchinajunllu. Chashna actitudta charijcunaca rey Rehoboamhuan ima pasashcatami yuyarina can.

¹² Rehoboamga paipa taita Salomón huañujpimi Israel llactapa rey tucurca. Rehoboam rey tucushca tiempopica israelitacunaca ashtaca ali cosascunatami charirca. Pero israelitacunaca Salomón paicunata yapata trabajachishcatami pensanajurca. Chaimi Rehoboamdaca, ñucanchitaca ama yapata trabajachichu nishpa mañarca. Israelitacuna shina nijpimi Rehoboamga pensaringapaj tiempota cuhuaichi nirca. Callaripica Salomonda consejashca ancianocunapa consejotami mascarca. Ancianocunapa consejota mascashpaca Rehoboamga alitami rurarca (1 Rey. 12:​2-7). Shinapash jipamanga ancianocuna cushca consejotami rechazarca. ¿Imamandashi rechazashcanga? Rehoboamga imata ruranata decidishca cashpapash talvez ancianocuna paiman razonda cuchun munaimandallami consejotaca mascajushcanga. Chaimi ancianocunata tapushca jipaca, paipa joven amigocunapa consejota mascagririanga. Chai amigocuna pai uyangapaj munashcata nijpimi Rehoboamga paicunapa consejota uyarca (1 Rey. 12:​8-14). Joven amigocunapa consejocunata chasquijpimi ashtaca israelitacunaca Rehoboamdaca ñana cazurca. Chai punllamandapachami Rehoboam mandajushca punllacunapica ashtaca problemacuna tiarca (1 Rey. 12:​16-19).

13. Shujcunapa consejota uyangapaj dispuesto cashcata yachangapaca ¿ima tapuipita pensarina capanchi?

¹³ Rehoboammandaca ¿imatata yachajupanchi? Shujcunata consejota mañajushpaca, paicunapa consejota uyangapami dispuesto cana capanchi. Ñucanchi shungu ucupica na shuj decisionda agllashcallachu cana capanchi. Chaimandami “ñuca na uyangapaj munashca consejocunataca ¿ñapashchu rechazani o imashinata chasquini?” nishpa pensarina capanchi.

14. ¿Imatata na cungana capanchi? Shuj ejemplomanda parlapai (Dibujotapash ricupangui).

¹⁴ Shuj ejemplota ricupashun. Shuj huauquigumanga shuj ali trabajota ofrecishcanman. Chai trabajota aceptashpaca chai huauquiguca tauca semanacunatami paipa familiamanda carupi cana can. Trabajota nara aceptashpallatami chai huauquiguca shuj anciano huauquipa consejota mascan. Chaimi anciano huauquiguca, primeroca canba familiami ashtahuan importante can nishpa Bibliahuan consejan (Efes. 6:4; 1 Tim. 5:8). Shinapash chai huauquiguca, anciano huauquipa consejohuan na de acuerdo caimandami shuj huauquicunapa consejota mascai callarin. Shinapimi shuj huauquica trabajota aceptailla nin. Chai huauquiguca ¿ciertopachachu shuj consejota mascajurca o pipash pai munashcata nichunllachu munajurca? Ñucanchi shungu umachijlla cashcataca na cunganachu capanchi (Jer. 17:9). Huaquinbica na gushtashca consejocunami ñucanchitaca ayudaita ushan.

¿IMAMANDATA SHUJCUNA ÑUCAMANDA DECIDICHUNGA NA SAQUINA CAPANI?

15. ¿Imatata na rurana capanchi y imamandata na shina rurana capanchi?

¹⁵ Jehová Diosca cada cristiano decidichunmi munan (Gál. 6:​4, 5). Imashinami ricupashcanchi, nara decidishpallatami Biblia imata nijujta y tauca huatacunata Jehová Diosta ali sirvinajuj huauquipanicunapa consejota mascana capanchi. Shinapash chai huauquipanicuna ñucanchipa randi decidichunga na shuyanachu capanchi. Shinaca, de confianza huauquipanicunataca “ñuca casopi cashpaca ¿imatata rurapanguiman?” nishpaca na tapujunachu capanchi. Shinallata, shujcuna decidishcamandallaca na imatapash decidinachu capanchi. Imagutapash ali pensashparami decidina capanchi.

16. Corinto llactamanda cristianocunaca ¿imatata decidina carca? (1 Corintios 8:7; 10:​25, 26).

¹⁶ Corinto llactapa congregacionbi ima pasashcata ricupashunchi. Santocunaman ofrecishca aichata micunata o na micunatami cristianocunaca decidina carca. Apóstol Pabloca “yanga dioscuna na sirvijtaca yachapanchimi. Shinallata shujlla Taita Dios tiajtapash yachapanchimi” nircami (1 Cor. 8:4). Apóstol Pablo shina nijpimi, huaquin cristianocunaca santocunaman ofrecishca aichata randishpa micunata decidirca. Cutin shujcunaca paicunapa concienciapi nali sintirimandami aichata na micunata decidirca (1 Corintios 8:7; 10:​25, 26​ta liipangui). Aichata micunata o na micunataca cada unomi decidina carca. Apóstol Pabloca Corinto llactamanda cristianocuna shujcunamanda decidina cashcata o shujcuna imata rurajta catishpa decidina cashcataca na nijurcachu. Cada unomi Jehová Diospa ñaupapica juzgai tucuna carca (Rom. 14:​10-12).

17. Shujcuna imata rurashcatalla catijpica ¿imata pasaita ushan? Shuj ejemplomanda parlapai (Fotocunatapash ricupangui).

¹⁷ Cunan punllacunapipash cada cristianomi yahuarpa fracciongunata chasquinata o na chasquinataca decidina capanchi.c Huaquinbica imata ruranata decidinaca dificilmi caita ushan. Shinapash yahuarpa fracciongunata chasquinata o na chasquinataca cada unomi decidina responsabilidadta charipanchi (Rom. 14:4). Shujcuna imata rurashcatalla catishpaca, aliguta pensarishpa deciditaca na ushashunllu. Biblia imata nijujta catishpallami aliguta pensarishpa deciditaca ushapashun (Heb. 5:14). Shinaca, yahuarpa fracciongunamanda shuj decisionda japingapaj munashpaca, primeroca ñucanchimi aliguta investigana capanchi. Shinami ñucanchi casopi Bibliapa maijan consejocunata pactachi ushashcataca ricuita ushapanchi. Chai jipapash na intindishpaca, ali yachaita charij huauquipanicunapa consejotami mascaita ushapanchi.

CONSEJOTA MAÑASHPAMI CATINA CAPANCHI

18. Jehová Diosca ¿ima ayudacunatata ñucanchimanga carashca?

¹⁸ Jehová Diosca ñucanchipi confiaimandami ñucanchillata decidichun saquishca. Ali decisiongunata japichunmi Jehová Diosca paipa Shimi Bibliata ñucanchimanga cushca. Shinallata, Bibliapa consejocunata imashina pactachinata ñucanchiman intindichichunmi ali yachaita charij amigocunata cushca. Shina ayudacunata carashpami Jehová Diosca shuj ali Taita cashcata ricuchishca (Prov. 3:​21-23). Shinaca ¿imashinata Jehová Diosta agradicishcataca ricuchita ushapanchi?

19. Ñucanchi Taita Jehová Dios cushijuchunga ¿imatata rurai ushapanchi?

¹⁹ Taitamamacunaca paicunapa huahuacuna viñajpi, ali yachaita charijpi y shujcunata ayudajpica ninandami cushijun. Ñucanchi Taita Jehová Diospash ñucanchicuna ashtahuan ali cristianocuna tucujpi, shujcunata consejota mañajpi y paita juyaimanda ali decisiongunata japijpica ninandami cushijun.