¿Imashinata ali consejocunata cuita ushapanchi?

1. ¿Picunata consejota cuna can? ¿Imamandata Jesús nishcashnaca consejanaca ali can?

HUAQUINGUNAPACA shujcunaman consejota cunaca facilmi can. Cutin shujcunapaca dificilmi can. Fácil cajpi o difícil cajpipash huaquinbica tucuicunallatami shujcunata consejana tucupanchi. ¿Imamandata shujcunata consejana tucupanchi? Ñucanchi huauquipanicunata consejashpami paicunata juyashcataca ricuchipanchi. Jesusca, ñucapa discipulocuna tucungapaj munashpaca randimandami juyarina capanguichi nircami (Juan 13:35). Bibliapica ninbashmi ‘ali yuyaita cushpa’ consejashpami ‘ashtahuan ali cumbagucuna’ tucunguichi (Prov. 27:9).

2. a) ¿Imatata ancianocunaca ruranata yachana can? b) Ancianocunaca ¿imamandata aliguta consejanata yachana can? (“Chaupi semana tandanajuipica ¿imashinata consejana can?” nishca recuadrota ricupangui).

² Ashtahuanbachaca ancianocunami imashina aliguta consejanataca yachana can. Jehová Diospash y Jesuspash ancianocunamanmi congregacionbi huauquipanicunata cuidana responsabilidadtaca cushca (1 Ped. 5:​2, 3). Ancianocunaca ¿imashinata chai responsabilidadtaca pactachin? Ancianocunaca discursocunapi Bibliapa consejocunata yachachishpami chai responsabilidadtaca pactachin. Shinallata cada unota consejashpa y Jehová Diosmanda caruyashcacunata congregacionman tigramuchun ayudashpapashmi, chai responsabilidadtaca pactachin. ¿Imashinata ancianocunapash y ñucanchicunapash ali consejocunata shujcunaman cuita ushapanchi?

3. a) Ali consejocunata cui ushangapaca ¿imatata rurana capanchi? (Isaías 9:6; “Pitapash consejagrijushpaca Jesuspa ejemplota catipashunchi” nishca recuadrotapash ricupangui). b) Cai temapica ¿imatata yachajugripanchi?

³ Ali consejocunata cuita ushangapaca, Bibliapi parlajuj gentecunamandami yachajuita ushapanchi. Por ejemplo, Jesusca alipacha ejemplomi can. Jesustami Bibliapica “Ali Yuyaita Cuj” Consejero nin (Isaías 9:6​ta liipangui). Cai temapica pipash shuj consejota mañajpi imata rurana cashcatami yachajupashun. Shinallata consejota na mañajpipash imashina consejanatami yachajupashun. Ashtahuanbash ima ratopi, imashina aliguta consejana cashcatapashmi yachajupashun.

PIPASH SHUJ CONSEJOTA MAÑAJPICA ¿IMATATA RURANA CAPANCHI?

4, 5. Pipash shuj consejota mañajpica ¿imapita primeroca pensarina capanchi? Shuj ejemplomanda parlapai.

⁴ Pipash shuj consejota mañajpica, “paica ñucapi confiashcami” yashpami talvez cushilla sintiripangui. Shina sintirishpami paitaca talvez chai rato consejangapaj munapangui. Shinapash nara imatapash nishpallatami primeroca “paiman shuj ali consejota cungapaca, pai tapujuj asuntomandaca alichu yachani” nishpa pensarina capangui. Chai asuntomanda na ali yachashpaca, chai asuntomanda ashtahuan yachaj personapa consejota mascachun ayudashparapashmi ali capanguiman.

⁵ Shuj ejemplopi pensaripashunchi. Shuj ali amigoca shuj grave unguita charishcanman. Paica “shuj shuj tratamientocunatami investigashcani, maijanda ali capan” nishpa quiquindaca tapushcanman. Quiquinga imata ruranataca talvez alimi yachapangui. Aunque quiquin imata ruranata yachashpapash quiquinga na doctor capanguichu. Shinallata chai grave unguita imashina tratanatapash na yachapanguichu. Chaimandami chai grave unguita imashina tratanata yachaj personapa ayudata mascachun, quiquinba amigotaca ayudaita ushapangui.

6. Nara shuj consejota cushpallata ¿imatata rurana capanchi?

⁶ Cutin huaquinbica “chai asuntomandaca alimi yachani” yashpami pitapash consejangapaca listo capanchi. Shinapash nara consejota cushpallatami ashaguta shuyanara capanchi. ¿Imamandata shuyanara capanchi? Proverbios 15:28​pica ‘alita ruraj runaca, imata tigrachingapapash, shungupi aliguta yarinrami o pensarinrami’ ninmi. Chaimandami imata ninata ñami yachani yashpapash primeroca investigangapaj, Jehová Diosta mañangapaj y pensaringapapash tiempota llujchina capanchi. Shinami Jehová Dios munashcashna consejaita ushapashun. Cunanga profeta Natanda ima pasashcata ricupashun.

7. Natanba ejemplomandaca ¿imatata yachajupanchi?

⁷ Shuj punllaca, profeta Natanmanmi rey Davidca, Jehová Diosmanmi shuj templo huasita rurangapaj munani nirca. Shina nijpimi Natanga, can imata pensashcataca rurailla nishpa ñapash contestarca. Pero Jehová Diosca, rey David paipa templo huasita rurachunga na munarcachu. Natanga nara imatapash nishpallatami primeroca Jehová Diosta tapuna carca (1 Crón. 17:​1-4). Imashinami yachajupashcanchi, pipash shuj consejota mañajpica ‘na ñapash imatapash ninachu capanchi’ (Sant. 1:19).

8. Pitapash consejagrijushpaca ¿imatata yaipi charina capanchi?

⁸ Pitapash consejagrijushpaca cai yuyaitapashmi yaipi charina capanchi: Ñucanchicuna pandata consejashcamanda, nali decisiongunata japishpa imapash pasajpica ñucanchipashmi culpable capashun. Chaimandami pitapash consejagrijushpaca aliguta pensarishpara consejana capanchi.

CONSEJOTA NA MAÑAJPIPASH ¿IMASHINATA CONSEJANA CAPANCHI?

9. Shuj huauquita o shuj panita nara consejashpallata ¿imatata ancianocunaca asegurarina can? (Gálatas 6:1).

⁹ Huaquinbica shuj huauqui o shuj pani ‘nali ñanda catijujta’ ricushpami ancianocunaca consejana tucun (Gálatas 6:1​ta liipangui). Español Bibliapa nota de estudiopi nishcashnaca, Gálatas 6:1​pica, nara shuj grave pecadopi urmaj personatami nali ñanda catijun nin. Ancianocunami nali ñanbi purij personataca para siempre causaiman apaj ñanbi purishpa catichun ayudana can (Sant. 5:​19, 20). Shinapash primeroca nara shuj consejota cushpallatami ancianocunaca, paicunapa yuyaicunata ladoman saquishpa, shuj huauqui o shuj pani ciertopacha nali ñanbi purijushcataca asegurarina can. Ancianocuna asegurarinajushpaca, Jehová Dios tucui gentecunaman paicunapa propio decisiongunata agllana libertadta cushcatami, yaipi charina can (Rom. 14:​1-4). Nali ñanbi purijushcata ña seguro cashpaca ¿imashinata ancianocunaca chai personataca consejana can?

10-12. Consejota na mañajpita consejangapaca ¿imatata ancianocunaca rurana can? Shuj ejemplomanda parlapai (Fotocunatapash ricupangui).

¹⁰ Ancianocunapaca, consejota na mañajpita consejanaca dificilmi can. ¿Imamandata difícil can? Apóstol Pablo nishcashnaca, huaquingunaca nali ñanda catijushcamandami shuj consejota minishtinajushcataca na cuenta japin. Chaimandami chai personacuna consejota facillla chasquichunga, ancianocunaca nara consejashpallata huaquin cosascunata rurana can.

¹¹ Shuj ejemplopi pensaripashunchi. Shuj agricultorca tarpungapami primeroca alpata amujyachishpa preparan. Chai jipami muyutaca tarpun. Y ultimopica yacutami churan. Chai agricultor cuendami ancianocunapash nara consejota cushpallata “alpata preparajuj” cuenda huaquin cosascunata rurana can. Por ejemplo, anciano huauquiguca juyaihuan y aliguman tratana costumbretami charina can. Chai costumbreta charijta ricushpami, huauquipanicunaca pai cushca consejotaca ashtahuan facillla chasquinga. Shinami ancianoca ima horas parlana ali cashcata ricushpa, chai huauquigumanga “quiquinmanda preocupado caimandami shuj cosasguta ningapaj munapani” nita ushan.

¹² Chai huauquiguhuan parlajushpaca, “alpata preparajuj” cuendami anciano huauquica nita ushan “tucuicunami pandarinchi y tucuicunami huaquinbica pipash consejachun minishtinchi” (Rom. 3:23). Chai huauquigu imapi pandarijushcataca Bibliahuanmi aliguman y respetohuan ricuchina can. Chai huauquigu imapi pandarishcata cuenta japijpimi, ancianoca “shuj muyuguta tarpunshna” imapi mejorana cashcata explicana can. Ultimopica “yacuguta reganshnami” chai huauquitaca ali cosascunata rurajushcamanda felicitana can y paihuan Jehová Diosta mañana can (Sant. 5:15).

13. Consejai tucuj huauqui aliguta intindijushcata yachangapaca ¿imatata ancianocunaca ruraita ushan?

¹³ Huaquinbica anciano huauqui imagutapash nijpimi chaishuj huauquica pandata intindita ushan. Shina pasajpica ¿imatata ancianocunaca ruraita ushan? Huauquigu imata intindishcata yachangapaj y imata rurana cashcata claro intindishcata yachangapaca, aligumanmi ancianocunaca tapuicunata rurana can (Ecl. 12:11).

IMA RATOPI, IMASHINA ALIGUTA CONSEJANATAMI RICUNA CAPANCHI

14. Culira cashpaca ¿imamandata shujcunataca na consejana capanchi?

¹⁴ Juchayucuna caimandami imacunatapash nishpa o rurashpa shujcunataca llaquichita ushanchi (Col. 3:13). Bibliapi nishcashnaca tucuicunami huaquinbica caishujhuan chaishujhuan culirarinchi (Efes. 4:26). Shinapash culira cashpaca na shujcunataca consejanachu capanchi. Bibliapica, culirashpaca “Taita Diospa ñaupapi ima ali cashcata ruraitaca gentecunaca na ushanllu” ninmi (Sant. 1:20). Culira consejashpaca, chai situacionda arreglanapa randica ashtahuanmi empeorachita ushanchiman. Shinapash ñucanchihuan culirashca personamanga ñucanchi imashina sintirishcataca huaquinbica parlanami capanchi. Pero parlangapaca tranquilomi cana capanchi. Cunanga Job runaguta Elihú imashina aliguta consejashcata ricupashunchi.

15. Elihupa ejemplomandaca ¿imatata yachajupanchi? (Dibujotapash ricupangui).

¹⁵ Tauca punllacunatami Jobca paipa cumbacuna llullacunata nijpica difindirijurca. Elihuca Job imata nijujtaca alimi uyajurca. Jobta llaquishpapash Jehovamanda na cierto cosascunata nishpa difindirijujta uyashpami, Elihuca Jobhuanga ninanda culirarca. Culirashca cashpapash paipa parlana turno chayangacamanmi Elihuca pacienciahuan shuyarca. Shinami Jobtaca tranquilamente y respetohuan parlarca (Job 32:2; 33:​1-7). Elihupa ejemplomandaca ¿imatata yachajupanchi? Pitapash consejagrijushpaca, tranquilomi cana capanchi y juyaihuan, respetohuanmi consejana capanchi (Ecl. 3:​1, 7).

ALI CONSEJOCUNATA CUSHPA Y ALI CONSEJOCUNATA CHASQUISHPAMI CATINA CAPANCHI

16. Salmo 32:8​mandaca ¿imatata yachajupangui?

¹⁶ Cai temapa callari textopica, Jehová Diosca ‘candaca ñuca ñavihuanmi ricuriashpa’ consejasha nijunmi (Salmo 32:8​ta liipangui). Shina nishpaca, Jehová Dios ñucanchiman shuj consejota cushca jipaca, chai consejota pactachichun ayudangapaj pendiente cashcatami nijun. Shinaca, Jehová Diospa ejemplota catishpami pimanbash consejota cushca jipaca, chai consejota pactachichun ayudangapaj pendiente cana capanchi.

17. Ancianocuna Bibliahuan consejocunata cujpica ¿imashinata sintiripanchi? (Isaías 32:​1, 2).

¹⁷ Cunan tiempocunapimi ali consejocunata cunata y ali consejocunata chasquinata ashtahuanbachaca minishtipanchi (2 Tim. 3:1). Minishtijuj horaspipacha Bibliapa textocunahuan consejocunata cushpami ancianocunaca ñucanchita ayudan. Paicunapa consejocunaca ‘chaquishca pambapi yacu Ilujshishpa rijunshnami can’ (Isaías 32:​1, 2​ta liipangui). Ñucanchi imata uyangapaj munajujta yachashpapash ñucanchi minishtijuj consejocunata cuj amigocunataca ninandami agradicipanchi. Paicunapa ‘rimashca shimicunaca, oro manzanata’ adorno de platapi churashcashna valishcami can (Prov. 25:11). Ali consejocunata cungapaj y ali consejocunata chasquingapami, sabiduriata charingapaj esforzarishpa catina capanchi.