Tucui shunguhuan Jehovata mañapashunchi

1, 2. a) ¿Ima cosascunamandata Jehová Diostaca na aliguta mañanchiman? b) Jehová Diosca ¿imashina mañachunda munan?

¿QUIQUINGA chaitallata chaitallata o jahua jahua Jehová Diosta mañajushcatachu cuenta japipashcangui? Tucuicunatallatami huaquinbica shina pasaita ushan. Talvez yapata ocupado caimandami uchilla oraciongunata rurapanchiman. O na cashpaca ñucanchicuna imashina sintirishcata Jehová Diosman villanata pinganayachimandami talvez Jehová Diostaca na mañapanchiman.

² Jehová Diosca alipacha shimicunata utilizashpami ñucataca mañana canguichi nishpaca na ninllu. Ashtahuangarin Jehová Diosca humildadhuan y tucui shunguhuan paita mañachunmi munan. Jehová Diosca “na jariyashpa causajcuna imatalla mañajtaca” uyanmi (Sal. 10:17). Jehová Diosca ñucanchicunamanda ciertopacha preocuparimandami ñucanchi nishcacunataca tucuita aliguta uyan (Sal. 139:​1-3).

3. Cai temapica ¿ima tapuicunatata contestapashun?

³ Cai temapica cai tapuicunatami contestapashun: ¿Imamandata Jehová Diosmanga ñucanchi imashina sintirishcata, imata yuyashcataca na manllashpa villana capanchi? Jehová Diosta tucui shunguhuan mañangapaca ¿imatata ruraita ushapanchi? Bibliapi tiashca oraciongunaca ¿imashinata ñucanchi oraciongunata mejorachunga ayudan? Preocupado caimanda Jehová Diosman imashina sintirishcata na villai ushashpaca ¿imatata ruraita ushapanchi?

JEHOVATA MAÑANATACA NA MANLLANACHU CAPANCHI

4. Jehová Diosman imashina sintirishcata villaita ushachunga ¿imata ayudanga? (Salmo 119:145).

⁴ Jehová Diosta shuj ali amigotashna ricushpami ñucanchicuna imashina sintirishcata, imata yuyashcataca ashtahuan facillla parlaita ushashun. Salmo 119​ta escribij jariguca, Jehová Dioshuan ali amigo cangapami esforzarirca. Shinapash paipa causaipica ashtaca llaquicunatami charirca. Por ejemplo, huaquingunaca paimandami llullacunata nishcarca (Sal. 119:​23, 69, 78). Shinallata paipa causaipi ashtaca viajecunata pandarishcamandami desanimado sintirirca (Sal. 119:5). Pero salmista jariguca, Jehová Dioshuan ali amigo cangapaj esforzarimandami imashina sintirishcataca tucuita villaita usharca (Salmos 119:145​ta liipangui).

5. Jehová Diosta mañanataca ¿imamandata na saquina capanchi? Shuj ejemplomanda parlapai.

⁵ Jatun juchacunata rurashcacunapash paita mañachunmi Jehová Diosca munan (Is. 55:​6, 7). Shinaca juchata rurashcamanda nali sintirishpapash, Jehová Diosta mañanataca na saquinachu capanchi. Por ejemplo, caipi pensaripai. Na rijsishca llactapi maiman rinata na yachashpaca ¿imatata rurapanguiman? ¿Maiman rinata na yachashpapash pingaimandallachu pitapash na tapupanguiman? Na. Más bien imata ruranata, maiman rinata yachangapaca chai llactapi causaj shuj personatami tapupanguiman. Shina cuendallatami shuj pecadota ruraimanda o imata ruranata na yachaimanda Jehová Diosta mañanataca pinganayachinchiman. Shinapash manllaimanda o pingaimanda Jehová Diosta mañanataca na saquinachu capanchi (Sal. 119:​25, 176).

TUCUI SHUNGUHUAN MAÑAITA USHANGAPACA ¿IMATATA RURAITA USHAPANCHI?

6, 7. ¿Imashinata Jehová Diostaca tucui shunguhuan mañaita ushapanchi? Shuj ejemplomanda parlapai (notatapash ricupangui).

⁶ Imashinapacha sintirishcata, imatapacha yuyajushcata Jehová Diosman tucuita villashpaca paimanmi ashtahuan quimiripashun. Jehová Diosta tucui shunguhuan mañangapaj imata rurai ushashcata ricupashun.

⁷ Jehová Diospa cualidadcunapi pensaripashunchi.a Jehová Diospa cualidadcunapi ashtahuan pensarishpaca, ñucanchicuna imashina sintirishcata, imata yuyashcataca ashtahuan facilllami Jehová Diosmanga villaita ushapashun (Sal. 145:​8, 9, 18). Kristine panigupa ejemplota ricupashun. Paniguca shuj fiñaj taitatami charirca. Paica cashnami nin: “Jehová Diosta shuj juyaj taitatashna ricuna difícil caimandami, ñucapaca Jehovata mañanaca difícil carca. Juchacunata rurashcamandami Jehová Diosca na juyahuangachu yashpa pensarin carcani” ninmi. Panigutaca ¿imata ayudarca? Paica cashnami nin: “Jehová Diospa amor lealpi pensarinami, Jehová Dios ñucata juyashcata segura sintirichunga ayudahuarca. Shinallata Jehová Dios siempre ñucata ayudanataca segurami capani. Jehová Dios juyaj cashcapi pensarinami, imashina sintirishcata, ima llaquicunata charishcatapash tucuita Jehovaman villachun ayudahuan” ninmi.

8, 9. Nara oracionda rurashpallata imata ninata aliguta pensarinaca ¿imamandata ali can? Shuj ejemplomanda parlapai.

⁸ Imata mañanata pensaripashunchi. Oracionda nara rurashpallatami, cashna pensarina capanchi: “Cunanbica ¿ima problemacunahuanda chimbapurajuni? ¿Pitapash perdonanachu cani? ¿Ñuca causaipi cambiocuna tiashcamandachu Jehová Diospa ayudataca minishtijushcani?” (2 Rey. 19:​15-19). Shinallata oracionda nara rurashpallatami Jesuspa ejemplopi pensarita ushapanchi. Jesushnami, Jehová Diospa shuti santificado cachun, paipa Gobierno shamuchun y paipa munai pactarichun mañaita ushapanchi (Mat. 6:​9, 10).

⁹ Alinab panigupa ejemplota ricupashun. Paipa cusagu cáncer cerebral nishca unguita charishcata yachaj chayashpaca, panigupaca Jehová Diosta mañanaca dificilmi carca. Paniguca cashnami nin: “Llaquilla caimandami aliguta pensaritaca na usharcani. Chaimi Jehová Diostaca imata ninatapash na atinarcani” ninmi. Panigutaca ¿imata ayudarca? Paica cashnami nin: “Oracionda nara rurashpallatami, Jehová Diosman imata ninataca aliguta pensarini. Chaita ruranami, ñucapilla y ñuca problemacunapilla ama pensarichun ayudahuashca. Shinallata tranquila sintirishpa shuj shuj cosascunamanda Jehová Diosta mañaita ushachunbashmi ayudahuashca” ninmi.

10. ¿Imamandata unailla oraciongunata ruranaca ali can? (Fotocunatapash ricupangui).

¹⁰ Unailla oraciongunata rurangapaj esforzaripashunchi. Uchilla oraciongunata rurashpapashmi Jehová Diosmanga quimirita ushapanchi. Shinapash imashina sintirishcata, imata yuyashcata shungumanda Jehová Diosman parlaita ushangapaca, unaillatami mañana capanchi.c Alina panigupa cusaguca cashnami nin: “Jehová Diosta punllapi tauca viajecunata mañangapami esforzarini. Unailla oraciongunata rurashpaca, Jehová Diosman ashtahuan quimirishcatami cuenta japipashcani. Jehová Diosca tiempotaca na ricujunllu. Chaita yachanami, paihuan unaita parlachun ayudahuashca” ninmi. Shinaca cai cosascunatami ruraita ushapangui. Unailla oraciongunata rurangapaca shuj tranquilo pushtuguta y shuj tiempotami mascana capangui. Talvez altollagutapashmi parlaita ushapangui. Jipaca cada punlla unailla oraciongunata rurangapapashmi esforzarita ushapangui.

JEHOVAPA PUNDA SIRVIJCUNAPA ORACIONGUNAPI PENSARIPASHUNCHI

11. Jehová Diospa punda sirvijcunapa oracionbi pensarinaca ¿imashinata ayudan? (“¿Quiquinbash paicunashnachu sintiripashcangui?” nishca recuadrotapash ricupangui).

¹¹ Jehová Diosta punda sirvijcunapa oraciongunapi y canciongunapi imata nishcata pensarinami, Jehová Diosman imata ninata yachachunga talvez ayudanga. Shinallata, Jehová Diosta alabangapaj ima shimicunatalla utilizai ushashcatapashmi yachajuita ushapangui. Y quiquinshnallata sintirishca punda Jehová Diosta sirvijcunapa oraciongunatami tarita ushapangui.

12. Bibliapi tarishca oraciongunata liishpaca ¿imapita pensarita ushapanchi?

¹² Bibliapi tarishca oraciongunata liishpaca cashna pensaripai: “Cai shimicunataca ¿pita nirca? ¿Ima situacionbi cashpata cai shimicunataca nirca? ¿Cai oracionbi nishcashnachu ñucapash sintirijuni? Caimandaca ¿imatata yachajupani?”. Cai tapuicunapa respuestata taringapaj investigashpaca quiquinllatami beneficiaripangui. Huaquin ejemplocunata ricupashun.

13. Ana rurashca oracionmandaca ¿imatata yachajupanchi? (1 Samuel 1:​10, 11; callari paginapa dibujotapash ricupangui).

¹³ (1 Samuel 1:​10, 11​ta liipangui). Anaca llaquicunata charimandami 1 Samuel 1:​10, 11​pi shimicunataca nirca. Ana huarmiguca huahuacunatami na chari usharca. Shinallata paipa cusapa chaishuj huarmimi Anataca nali tratan carca (1 Sam 1:​4-7). Ñucanchicuna jatun llaquicunata charishpaca, Ana rurashca oracionmandaca ¿imatata yachajuita ushapanchi? Ana huarmiguca imashina sintirishcata Jehová Diosman tucuita villangapami tiempota llujchirca. Chaita rurashca jipami Ana huarmiguca tranquila, ali sintirirca (1 Sam 1:​12, 18). Ñucanchicunapash “llasha quipishna”, ñucanchi llaquicunata Jehová Diosman saquishpami tranquilo sintiripashun. Pero chaipaca ñucanchi preocupacionguna maijan cashcatami Jehová Diosmanga tucuita villana capanchi (Sal. 55:22).

14. a) Anamandaca ¿imatata ashtahuan yachajuita ushapanchi? b) Bibliata liina y liishcapi pensarinaca ¿imashinata ñucanchi oraciongunata mejorachunga ayudan? (Notatapash ricupangui).

¹⁴ Samuel jatunlla cajpimi, Ana huarmiguca sacerdote Elipaman aparca (1 Sam 1:​24-28). Ana huarmiguca, Jehová Dios paita cazujcunata imashina cuidajta, imashina ayudajtami ricurca. Chaimi shuj oracionda rurashpa Jehová Diostaca agradicirca (1 Sam 2:​1, 8, 9).d Anapa llaquicuna na tucurijpipash, Anaca Jehová Dios imashina bendiciashcapimi concentrarirca. Caimandaca ¿imatata yachajupanchi? Jehová Dios imashina ayudashcapi concentrarishpaca, llaquicunataca facilllami aguantaita ushapashun.

15. Jeremías rurashca oracionmandaca ¿imatata yachajupanchi? (Jeremías 12:1).

¹⁵ (Jeremías 12:1​ta liipangui). Profeta Jeremiasca nali gentecuna ali causajta ricushpa, israelitacuna paimanda burlarijta ricushpami desanimado sintirirca (Jer. 20:​7, 8). Profeta Jeremías imashina sintirishcataca ñucanchicunaca alimi intindipanchi. Porque cunanbi gentecunapash nali cosascunata rurashpami cushilla causan y ñucanchicunamandapash gentecunaca burlarin. Imashinami ricupanchi, nali ruraicunata ricuimanda llaquilla sintirishcata Jehová Diosman villashpapash, Jeremiasca Jehová Dios injusto cashcataca nunca na juchachircachu. Ashtahuangarin israelitacunata Jehová Dios imashina corregijta ricushpami, Jeremiasca Jehová Dios justo cashcata cuenta japirca (Jer. 32:19). Ñucanchicunapashmi nali ruraicunata ricuimanda llaquilla sintirishcataca Jehová Diosman tucuita villana capanchi. Shina rurashpaca Jehová Dios pai agllashca punllapi nali ruraicunata tucuchinata confiashcatami ricuchipashun.

16. Levita runagu rurashca oracionmandaca ¿imatata yachajupanchi? (Salmo 42:​1-4; fotocunatapash ricupangui).

¹⁶ (Salmo 42:​1-4​ta liipangui). Shuj levitaca shuj llactaman apai tucushcamanda, paipa cumbacunahuan Jehová Diosta na adorai ushashcamandami Salmo 42:​1-4​pi shimicunataca escribirca. Quizas ungushca caimanda, ñucanchi huasimanda na llujshi ushaimanda o ñucanchi crishcacunamanda carcelpi churai tucushca caimandami levita runagushna sintirita ushapanchi. Chai situaciongunapi caimandami huaquinbica ali o desanimado sintirita ushapanchi. Chashna sentimientocunata charishpapash imashina sintirishcatami Jehová Diosmanga tucuita villana capanchi. Shina rurashpami ñucanchi sentimientocunata ashtahuan aliguta intindichun y ima cosascuna ashtahuan importante cashcata yaipi charichun ayudanga. Por ejemplo, levita runaguca Jehová Diosta alabangapaj shuj oportunidadcunata charishcatami cuenta japirca (Sal. 42:5). Shinallata Jehová Dios cuidajushcapipashmi pensarirca (Sal. 42:8). Ñucanchicunapash imashina sintirishcatami Jehová Diosman villana capanchi. Shina rurashpami ñucanchi sentimientocunata ashtahuan aliguta intindishun, tranquilo sintirishun y aguantangapaj fuerzatapash charipashun.

17. a) Jonás rurashca oracionmandaca ¿imatata yachajupanchi? (Jonás 2:​1, 2). b) Llaqui tiempocunapi cajpica ¿imashinata Salmos libropa huaquin textocunaca ayudaita ushan? (Notatapash ricupangui).

¹⁷ (Jonás 2:​1, 2​ta liipangui). Profeta Jonasca pescadopa vijsa ucupi cashpami Jonás 2:​1, 2​pi shimicunataca nirca. Jonasca Jehová Diosta na cazushca cashpapash, Jehová Dios paipa mañaita uyanataca seguromi carca. Jonasca Jehová Diosta mañashpaca Salmos libropa ashtaca shimicunatami utilizarca.e Jonastaca chai textocunata yuyarina y chai textocunapi pensarinami Jehová Dios paita ayudanataca seguro cashcanga. Ñucanchicunapash Bibliapa huaquin textocunata de memoria yachajungapami esforzarina capanchi. Shinami Jehová Diosta llaqui tiempocunapi mañajushpaca, ñucanchi yachajushca textocunata yuyarishpa animarita ushapanchi.

JEHOVAMAN ASHTAHUAN QUIMIRINGAPACA MAÑASHPAMI CATINA CAPANCHI

18, 19. Imashina sintirishcata Jehová Diosman na parlai ushashpaca ¿imashinata Romanos 8:​26, 27​pi shimicunaca ayudan? Shuj ejemplomanda parlapai.

¹⁸ (Romanos 8:​26, 27​ta liipangui). Huaquinbica llaquillapacha caimandami, imashinapacha sintirishcata Jehová Diosman parlanaca difícil caita ushan. Jehová Diosman imata ninata na ushajuj ratocunapimi, Jehová Diospa espíritu santoca ñucanchita ayudan y ñucanchimandapash “mañan”. Caita nishpaca ¿imatata ningapaj munan? Jehová Diosca paipa espíritu santota utilizashpami, ashtaca oracionguna Bibliapi escribishpa quidachun saquishca. Shinaca imashina sintirishcata Jehová Diosman na villai ushajpica, Jehová Diosca Bibliapi tiajuj oraciongunata utilizashpami, ñucanchicuna chai oraciongunata rurashcatashna chasquishpa contestan.

¹⁹ Rusia llactamanda Elena panigutaca Romanos 8:​26, 27​pi shimicunata yuyarinami ayudarca. Panigutaca, Taita Diosta mañashcamanda, Bibliata liishcamandami carcelpi churarca. Llaquilla sintirimandami Elena panigupaca Jehová Diosta mañanaca difícil carca. Paniguca cashnami nin: “Llaquilla cashpa Jehová Diosta imata ninata na yachashpaca, Bibliapi tiashca oraciongunata Jehová Dios ñucanchicuna rurashcatashna chasquijtami yuyarini. Chaita yuyarinami ñucataca ninanda consolahuarca” ninmi.

20. Yapata preocupado cashpa Jehová Diosman imata ninata yachangapaca ¿imatata ruraita ushapanchi?

²⁰ Yapata preocupado cashpaca, Jehová Diosta aliguta mañaitaca na usharinllu. Oracionbi Jehová Diosman imata ninata yachangapaca, Salmocunapa huaquin textocunatami liita ushapanchi. O na cashpaca Rey Davidshnami ñucanchicuna imashina sintirishcata escribita ushapanchi (Sal. 18, 34, 142 y encabezamientos). Shinapash oracionda ruragrijushpaca cada cristianomi, oracionda rurangapaca diferenteta prepararita ushapanchi (Sal. 141:2). Quiquinga oracionda ruragrijushpaca ¿imashinata prepararipangui?

21. ¿Imamandata ñucanchicuna imashina sintirishcataca Jehová Diosman villaita ushapanchi?

²¹ Jehová Diosca nara villajpillatami ñucanchicuna imashina sintirishcataca ali yachan. Chaita yachaimandami ninanda cushijupanchi (Sal. 139:4). Shinapash Jehová Diosca ñucanchicuna imashina sintirishcata paiman villachun y paipi confiachunmi munan. Shinaca Jehová Diosta mañanataca nunca na dudanachu capanchi. Bibliapi tiashca oraciongunata utilizashpami Jehová Diostaca mañaita ushapanchi. Shinallata ñucanchicuna imamanda llaquilla cashcata, imamanda cushilla cashcatami Jehová Diosmanga tucuita villana capanchi. Jehová Diosca, shuj ali amigoshnami ñucanchi ladopica siempre capanga.