Huauquipanicunamanda mañapashunchi

1. Ñucanchi oracionguna Jehová Diospa importante cashcataca ¿imashinata yachapanchi?

ORACIONGA Jehová Dios carashca shuj jatun regalomi can. Caipi pensaripashunchi. Jehová Diosca angelcunamanga huaquin responsabilidadcunata pactachichunmi mingashca. Shinallata paipa churi Jesusmanbash ashtaca autoridadtami cushca (Sal. 91:11; Mat. 28:18). Shinapash Jehová Diosca ‘mañajcunapa’ oracionda uyana responsabilidadtaca pimanbash na mingashcachu. Ashtahuangarin paipachami ñucanchi oraciongunataca uyangapaj munan (Sal. 65:2).

2. Apóstol Pablomandaca ¿imatata yachajupanchi?

² Jehová Diosman ñucanchi preocupaciongunata tucuilla villai ushashpapash, shujcunamandapashmi mañana capanchi. Apóstol Pablo imata rurashcata ricupashun. Por ejemplo, Éfeso congregacionmanda cristianocunamanga “quiquingunamandaca Taita Diostami mañashpa catipani” nircami (Efes. 1:16). Shinallata apóstol Pabloca cada unomandami mañarca. Chaimandami Timoteomanga cashna escribirca: “Taita Diostaca ninandami agradicipani. Tuta y punlla paita rogashpa mañajushpaca, siempremi quiquindaca yarini” nircami (2 Tim. 1:3). Apóstol Pabloca paipa propio preocupaciongunamanda Jehová Diosta mañangapaj randica, shujcunamanda Jehová Diosta mañangapami tiempota llujchin carca (2 Cor. 11:23; 12:​7, 8).

3. Shujcunamanda mañanataca ¿imamandata cungapanchiman?

³ ¿Imamandata huaquinbica shujcunamanda mañanataca cungapanchiman? Sabrinaa panigu ima nijta ricupashun. Paica cashnami nin: “Cunan tiempopica ocupado ocupadomi yalipanchi. Ñucanchi problemacunapilla yapata concentrarishpaca, ñucanchi minishtishca cosascunamandallami Jehová Diostaca mañapanchiman” ninmi. Quiquindapash shina pasajujpica, cai temapa yuyaicunami ayudanga. Cai temapica shujcunamanda mañana imamanda importante cashcata shinallata shujcunamanda mañangapaj imata rurai ushashcatapashmi yachajupashun.

SHUJCUNAMANDA MAÑANACA ¿IMAMANDATA IMPORTANTE CAN?

4, 5. Shujcunamanda mañana “ashtaca poderta charijtaca” ¿imamandata seguro capanchi? (Santiago 5:16).

⁴ Shujcunamanda mañanaca “ashtaca podertami charin” (Santiago 5:16​ta liipangui). ¿Shujcunamanda mañashpaca ciertopachachu paicunapa causaipica ayudaita ushapanchi? Ari, ayudaita ushapanchimi. Jesusca, apóstol Pedro paita rijsinimi nishpa neganata yachashpami cashna nirca: “Taita Diospi tucui shunguhuan crinata can ama saquichunmi ñucaca canmanda Taita Diosta mañashcani” nircami (Luc. 22:32). Apóstol Pablopash shujcunamanda oracionda rurana ashtaca poderta charijtaca alimi yacharca. Chaimandami Roma llactapi yangamanda paipa huasipillata carcelpi churajpica, Filemonmanga cashna nishpami escribirca: “Quiquinguna Taita Diosta mañashcamanda ñuca quidashpaca, quiquingunataca visitagrishami” nircami (Filem. 22). Apóstol Pabloca shujcunapa rurashca oracionmandami carcelmanda llujshita usharca y predicashpapash catita usharca.

⁵ Shinapash Jehová Diostaca ñucanchi oracionbi mañashcata rurachunga na obliganachu capanchi. Jehová Diosca ñucanchicuna ima preocupaciongunata charimanda paita mañajtaca alimi yachan. Chaimi huaquinbica ayudanata decidin. Jehová Dios ayudanata yachanami ima llaquicunata charishpapash, paiman tucuita villachun ayudan. Shinallata ñucanchicunapa ima ali cajta ricushpa Jehová Dios ayudanata confiachunbashmi ayudan (Sal. 37:5; 2 Corintios 1:11 y Biblia de estudiopa notacunatapash ricupangui).

6. Shujcunamanda mañanaca ¿imashinata ayudan? (1 Pedro 3:8).

⁶ Shujcunamanda mañanaca ‘tucui shunguhuan llaquinata’ yachajuchunmi ayudan (1 Pedro 3:8​ta liipangui). Tucui shunguhuan llaquinata yachaj personaca, shujcuna llaquicunata charijta ricushpami paicunata ayudangapaj munan (Mar. 1:​40, 41). Michael anciano huauquica cashnami nin: “Huauquipanicunapa minishtirishca cosascunamanda mañanaca, paicunapa situacionda ashtahuan aliguta intindichunmi ayudahuashca. Shinami huauquipanicunataca ashtahuan juyai ushapashcani” ninmi. Richard anciano huauquigupash cashnami nin: “Shuj huauquimanda o shuj panimanda mañashpaca paicunata ashtahuan ayudana munaitami charipanchi. Shinallata Jehová Diosta mañashca huauquimanda o panimanda imagutapash rurashpaca ñucanchi propio oracionguna contestai tucuchun ayudanajunshnami ayudanajupanchi” ninmi.

7. Ama ñucanchi problemacunapilla pensarichunga ¿imashinata shujcunamanda mañanaca ayudan? (Filipenses 2:​3, 4; fotocunatapash ricupangui).

⁷ Shujcunamanda mañanaca na ñucanchi problemacunapilla pensarichunmi ayudan (Filipenses 2:​3, 4​ta liipangui). Cai mundota Diablo mandajushcamandami, tucuicunallata problemacunata charipanchi (1 Juan 5:19; Apoc. 12:12). Huauquipanicunamanda mañana costumbreta charinaca ‘mundo enteropi huauquipanicunapash ñucanchicunashnallata sufrinajujta’ yaipi charichunmi ayudan (1 Ped. 5:9). Katherine precursora paniguca cashnami nin: “Shujcunamanda mañanaca, problemacunata na ñucalla charishcata yaipi charichunmi ayudahuan. Shinami na ñuca problemacunapilla concentrarini” ninmi.

¿PICUNAMANDALLATA MAÑAITA USHAPANCHI?

8. ¿Picunamandata mañaita ushapanchi?

⁸ ¿Picunamandata mañaita ushapanchi? Por ejemplo, shuj unguita charij huauquipanicunamanda, escuelapi jarcaicunata charij jovengunamanda o mayoriajuj huauquipanicunamandami mañaita ushapanchi. Shinallata familiacuna y gobiernocuna llaquichijuj huauquipanicunamandami mañaita ushapanchi (Mat. 10:​18, 36; Hech. 12:5). Huaquingunaca paicunapa causajuj llactacunapi macanajuicuna tiaimandami shuj llactacunapi causangapaj rishca. Cutin shujcunaca terremoto tiashcamanda y shuj shuj llaquicuna tiashcamandami paicuna causanajuj pushtumanda rina tucushca. Shina llaquicunata charij huauquipanicunamandapashmi mañaita ushapanchi. Cai huauquipanicunata na rijsishpapash, paicunamanda Jehová Diosta mañashpaca Jesús nishca mandamientotami cazunajupanchi. Jesusca caishuj chaishuj juyarinami canguichi nircami (Juan 13:34).

9. Responsabilidadcunata charij huauquicunamanda y paicunapa huarmigucunamandaca ¿imamandata mañana capanchi?

⁹ Shinallata Jehová Diospa organizacionbi responsabilidadcunata charij huauquicunamandapashmi Jehová Diostaca mañaita ushapanchi. Por ejemplo, Cuerpo Gobernantepi sirvij huauquicunamanda, paita ayudaj huauquicunamanda, Comité de Sucursalpi sirvij huauquicunamanda, Betelpa shuj shuj departamentocunapi sirvij huauquicunamanda, shinallata superintendentes de circuitopi sirvij huauquicunamanda, ancianocunamanda y siervo ministerial huauquicunamandapashmi mañaita ushapanchi. Cai huauquicunaca paicunapa propio preocupaciongunata charishpapash, huauquipanicunata ayudangapami shinllita trabajan (2 Cor. 12:15). Por ejemplo, Mark shuti superintendente huauquiguca cashnami nin: “Ñuca taitamamamanda carupi canami ñucapaca ashtahuan difícil can. Panigucunaca ña mayorllami can. Ishcandimi paicunapa saludhuanga nali can. Ñuca pani y paipa cusagu ñuca taitamamata cuidanajujta yachashpapash, ñuca taitamamata ayudangapaj na ashtaca cosascunata rurai ushaimandami ninanda llaquirini” ninmi. Responsabilidadta charij huauquicuna ima llaquicunatalla charishcata na tucuita yachashpapash, paicunamandami mañaita ushapanchi (1 Tes. 5:​12, 13). Shinallata cai huauquicunapa huarmigucunamandapashmi mañaita ushapanchi. Panigucunaca paicunapa cusagucuna huauquipanicunata ayudachunmi ninanda apoyan.

10, 11. ¿Tucuilla huauquipanicunamanda rurashca oraciongunataca Jehová Diosca uyanllu?

¹⁰ Imashinami ricupashcanchi ashtaca viajecunataca ñucanchi tucuilla huauquipanicunamandami Jehová Diostaca mañapanchi. Huaquinbica carcelpi caj huauquipanicunata ayudachun o huañushca familiacunata charij huauquipanicunata consolachunmi Jehová Diostaca mañapanchi. Donald anciano huauquiguca cashnami nin: “Ashtaca huauquipanicunaca shuj shuj llaquicunatami charin. Chaimandami tucuilla sufrinajuj huauquipanicunamanda Jehová Diostaca mañapanchi” ninmi.

¹¹ Jehová Diostaca tucuilla huauquipanicunamanda rurashca oraciongunata uyanataca ninandami gushtan. Cada huauquipanicuna imacunatalla minishtinajujtaca na yachapanchichu. Chaimandami tucuilla huauquipanicunamanda Jehová Diosta mañashpaca alita ruranajupanchi (Juan 17:20; Efes. 6:18). Tucuilla huauquipanicunamanda rurashca oraciongunaca huauquipanicunata juyashcatami ricuchin (1 Ped. 2:17).

HUAUQUIPANICUNAMANDA MAÑANGAPACA ¿IMATATA RURAITA USHAPANCHI?

12. Ñucanchi oraciongunapi específico cachunga ¿imata ayudaita ushan?

¹² Huauquipanicunamandami ashtahuan pendiente cana capanchi. Tucui huauquipanicunamanda mañashpapash, shuj huauquigumanda o shuj panigumandami especificamente mañaita ushapanchi. Chaipaca cai tapuicunapi pensaripashun: Congregacionbica ¿pita shuj grave unguihuan luchajun? Congregacionbica ¿maijan jovenguta compañerocuna nalita rurachun atichinajujpi desanimado sintirijun? Congregacionbica ¿pita paipa huahuacunataca ‘Jehová Dios nishcashna consejashpa shinallata yachachishpa’ sololla viñachijun? (Efes. 6:4). Huauquipanicuna ima llaquicunatalla charishcata yachashpaca, paicunamandami ashtahuan preocuparipashun. Shinami paicunamandapash mañaita ushapashun (Rom. 12:15).b

13. ¿Na rijsishca huauquipanicunamandapashchu mañaita ushapanchi?

¹³ Huauquipanicunapa shutipimi mañana capanchi. Na rijsishca huauquipanicunamandapashmi mañaita ushapanchi. Por ejemplo, caipi pensaripashunchi: Crimea, Eritrea, Rusia y Singapur llactapica ashtaca huauquipanicunami carcelpi churai tucushca. Paicunapa shutita yachangapaca jw.org paginamanmi yaicuita ushapanchi.c Brian shuti superintendente huauquiguca cashnami nin: “Carcelpi churai tucushca huauquipanicunapa shutita yuyaringapaca, paicunapa shutita escribina y paicunapa shutita liinami ayudahuashca. Shinami Jehová Diosta mañajushpaca paicunapa shutitaca facillla yuyarita ushashcani” ninmi.

14, 15. Huauquipanicuna imatapacha minishtinajujta yachai ushachunga ¿imata ayudaita ushan?

¹⁴ Huauquipanicuna imatapacha minishtinajujtami mañana capanchi. Párrafo 6​pi parlashca Michael huauquiguca cashnami nin: “Carcelpi churai tucushca huauquipanicunapa experienciata jw.org paginapi liishpaca, carcelpi cashpaca ñucaca imashinata sintiriniman yashpami, pensaringapaj esforzarini. Carcelpi ñuca cashpaca, ñuca huarmigumandami preocupado capaiman. Shinallata pai ali cashcata yachangapami munapaiman yashpami pensarini. Shina pensarinami Jehová Diosta mañajushpaca carcelpi caj huauquipanicunapa cusata o huarmita cuidapangui nishpa Jehová Diosta mañachun ayudahuashca” (Heb. 13:3).

¹⁵ Carcelpi caj huauquipanicunapa situacionbi ashtahuan pensarinami, paicunamanda ashtahuan mañai ushachun ayudan. Por ejemplo, guardiacuna carcelpi caj huauquipanicunata ali tratachun o carcelpi caj huauquipanicunata Jehová Diosta adoraita ushachun autoridadcuna saquichunmi mañaita ushapanchi (1 Tim. 2:​1, 2). Shinallata carcelpi caj huauquipanicunapa ejemplo, chai llactapi causaj huauquipanicunatapash animachunmi mañaita ushapanchi. O carcelpi caj huauquipanicunapa ejemplota ricushpa na testigo gentecunapash ali villaigucunata uyangapaj munachunmi mañana capanchi (1 Ped. 2:12). Shinallata shuj huauquipanicunamanda mañangapapash, cai yuyaicunatami siempre yaipi charina capanchi. Huauquipanicunamandami pendiente cana capanchi, paicunapa shutipimi mañana capanchi shinallata paicuna imatapacha minishtinajujtami mañana capanchi. Shinami caishujmanda chaishujmanda juyarishcata ricuchipanchi (1 Tes. 3:12).

HUMILDEMI CANA CAPANCHI

16. Huauquipanicunamanda mañagrijushpaca ¿imatata yaipi charina capanchi? (Mateo 6:8).

¹⁶ Imashinami ricupashcanchi, ñucanchi oraciongunaca ashtaca podertami charin. Shujcunapa causaipimi ayudaita ushan. Shinapash humildemi cana capanchi. Jehová Diosta mañajushpaca, pai imatapash na yachashcataca na villanajupanchichu. Shinallata caita o chaitami rurana capangui nishpapash na Jehová Diosmanga nijunachu capanchi. Paipa sirvijcuna imatapash nara nijpillata o huauquipanicuna imata minishtinajushcata ñucanchicuna nara cuenta japijpillatami Jehová Diosca paipa sirvijcuna imata minishtijtaca tucuita ali yachan (Mateo 6:8​ta liipangui). Shinaca ¿imamandata huauquipanicunamandaca mañapanchi? Cai temapi yachajushcashnaca huaquin razongunamandami huauquipanicunamandaca mañapanchi. Shinallata huauquipanicunata juyaimandami paicunamandaca mañapanchi. Paipa catijcuna paishna juyaj cangapaj esforzarijta ricushpaca Jehová Diosca ninandami cushijun.

17, 18. Jehová Dios ñucanchi mañaicunata yaipi charijtaca ¿imamandata seguro capanchi? Shuj ejemplomanda parlapai.

¹⁷ Ñucanchi mañaicuna huauquipanicunapa causaipi na ayudajunshnalla ricurijpipash, ñucanchi mañaicunaca huauquipanicunata juyashcatami ricuchin. Y Jehová Diosca chaitaca yaipimi charin. Shuj taita, shuj jari huahuaguta y shuj huarmi huahuaguta charishcapi pensaripashunchi. Jari huahuagu nanashca camapi sirijujpimi, huarmi huahuaguca “ñuca turiguca nanashcami can. Paita ayudapai” nishpami taitataca cutin cutin mañan. Taitaca imata ruranataca alimi yachan. Paica paipa churigutaca ninandami juyan. Chaimi aliguta cuidan. Taitaca paipa huarmi huahuagu paipa turita ninanda juyaimanda, paita cuidapangui nishpa mañajta uyashpaca ninandami cushijun.

¹⁸ Shina cuendallatami, Jehová Diospash huauquipanicunamanda preocuparichun paicunamanda mañachun munan. Huauquipanicunamanda mañashpaca na ñucanchicunapilla preocuparishcatami ricuchipashun y chaitaca Jehová Diosca yaipimi charin (2 Tes. 1:3; Heb. 6:10). Imashinami ricupashcanchi ñucanchi oraciongunaca huauquipanicunapa causaipimi ayudaita ushan. Shinaca Jehová Diosta mañajushpaca, siempremi ñucanchi huauquipanicunamandapash mañana capanchi.