¿Imamandata Jehová Dios paipa Churi Jesuspa causaita cuchun minishtiparcanchi?

1, 2. ¿Imamandata pipash ñucanchita salvachun minishtipanchi? (Romanos 7:​22-24; dibujotapash ricupangui).

SHUJ situacionbi pensaripashunchi. Shuj jatun edificio urmajpi, ñucanchica chai edificiopa escombrocuna ucupi quidashcanchiman. Chaimi chaimanda pipash llujchichun ninanda minishtipanchiman. Shinapash maita llujshitapash na ushaimandami ayudahuai nishpa caparitalla caparinchiman. Ayudangapaj shamungacamanga shuyaitallami shuyana tucunchiman.

² Ñucanchicunapash cada unomi escombrocuna ucupishna capanchi. ¿Imamandata shina nipanchi? Adanga Jehová Diosta na cazushpami, pecador tucurca. Tucuicunami Adanba huahuacuna capanchi. Chaimandami tucuicunallata pecadorcuna capanchi. Ñucanchicunaca escombrocunamanda na llujshi ushashnami pecadomanda salvaritapash na ushapanchi. Chaimandami pipash salvachun minishtipashcanchi. Apóstol Pabloca pecadorcuna imashina sintirijtaca romano huauquipanicunaman cartata escribishpami aliguta explicarca (Romanos 7:​22-24​ta liipangui). Chaimandami apóstol Pabloca “¿pishi ñucataca, huañuiman apajuj cai cuerpomandaca salvahuanga?” nirca. Apóstol Pabloca Adanba pecadota chasquishcamandami ima hora cashpapash huañunataca seguro carca (Rom. 6:23). Chashna jatun llaquipillatami capanchi. Pipash pecadomanda, huañuimanda salvachunmi minishtipanchi.

3. Jehová Dios paipa Churipa causaita cushcamandaca ¿ima quimsa beneficiocunatata charita ushapanchi?

³ Apóstol Pabloca “¿pishi ñucataca, huañuiman apajuj cai cuerpomandaca salvahuanga?” nishca jipami cashna nirca: “Ñucaca Taita Diostami agradicipani. Paimi ñucataca ñucanchi Señor Jesucristota cachamushpa salvahuarca” nirca (Rom. 7:25). Shina nishpaca, Jehová Dios paipa Churipa causaita cushcatami apóstol Pabloca shina nijurca. Jehová Dios paipa Churipa causaita cushcamandami quimsa beneficiocunata charita ushapanchi: 1) Ñucanchi pecadocunamanda perdonda chasqui ushapanchi, 2) shamuj punllacunapi perfecto cana esperanzatapash chari ushapanchi y 3) Jehová Dioshuan ali amigocuna caitapash ushapanchi. Cai quimsa beneficiocunata yachajushpami ‘shuyachun ayudaj Taita Diostaca’ ashtahuan juyapashun. Shinallata Jesustapash ‘shuj preciota pagashna ñucanchita libre saquishcamandami’ ashtahuan agradicipashun (Rom. 15:13; Col. 1:14).

PECADOCUNAMANDA PERDONDA CHASQUI USHAPANCHI

4, 5. ¿Imamandata tucuicunallata Jehová Dios paipa Churipa causaita cushpa salvachun minishtipashcanchi? (Eclesiastés 7:20).

⁴ Ñucanchi pecadocunamanda perdonai tucungapaca Jehová Dios paipa Churipa causaita cushpa salvachunmi minishtipashcanchi. Tucuicunallatami imperfectocuna caimandaca imatapash nishpa o rurashpa pecadota rurapanchi (Eclesiastés 7:20​ta liipangui). Huaquin pecadocunaca gravemi can. Por ejemplo, Moisesman Cushca Leypi nishcashnaca, shuj israelita huainayana juchapi urmashpa o pitapash huañuchishpaca huañuchi tucunami carca (Lev. 20:10; Núm. 35:​30, 31). Shinapash shuj pecadocunaca, na grave cashpapash pecadollatami can. Por ejemplo, rey Davidca “ñuca jalluhuan ama juchata rurangapaca, ñuca causaipica aligutami yarisha” nircami (Sal. 39:1). Imashinami ricupanchi ñucanchi parlocunahuanbashmi pecadota ruraita ushapanchi (Sant. 3:2).

⁵ Punda imata nishcapi, imata rurashcapi pensaripashunchi. Tucuicunallatami chaitaca ¿imamandashi shina nircani? o chaitaca ¿imamandashi shina rurarcani? nishpa arripintiripashcanchi. Bibliapica cashnami nin: “‘Ñucanchica na pecadorcunachu canchi’ nishpaca, ñucanchillatami umachirinajunchi y cabal yachachishcacunatapash na crinajunchichu” ninmi (1 Juan 1:8).

6, 7. Ñucanchi pecadocunata perdonangapaca ¿ima razondata Jehová Diosca charin? (Dibujotapash ricupangui).

⁶ Jehová Dios justo Dios caimandami ñucanchicunata perdonangapaca shuj razonda charina carca. Chaimi ñucanchi pecadocunata perdonangapaca, Jehová Diosca paipa Churi Jesusta ñucanchicunamanda huañuchun cachamurca (Efes. 1:7). Shinapash ñucanchi pecadocunata paipa Churipa causaita cushcamanda perdonashpapash, Jehová Diosca ñucanchi pecadocunata ricuna cashcamandallaca na ricunllu (Is. 59:2).

⁷ Moisesman Cushca Leypi mandashcashnaca, israelitacuna paicunapa juchacunamanda perdonai tucungapaca animalcunatami shuj sacrificiotashna cuna carca (Lev. 4:​27-31; 17:11). Israelitacuna rurashca sacrificiocunaca, Jesús paipa causaita cushpa huañunata y chaimanda ashtaca bendicionguna tiana cashcatami ricuchijurca. Jesús paipa causaita cushpa huañushcamandami Jehová Diosca ñucanchi pecadocunata perdonangapaj shuj razonda charirca. Apóstol Pablo Corinto llactamanda cristianocunaman shuj cartata escribishpaca, Jesuspa sacrificio ninan valishcapacha cashcatami nirca. Chai cristianocunapa nali ruraicunamanda parlashca jipami apóstol Pabloca cashna nirca: “Ñucanchi Señor Jesucristopa shutimanda y ñucanchi Taita Diospa espíritu santomandami cunanga maillashcashna capanguichi, Taita Diospa separashcacuna capanguichi, sin culpa justocunapash capanguichi” nirca (1 Cor. 6:​9-11).

8. Conmemoración nara chayamujpillata ¿imapita pensarita ushapanchi?

⁸ Cai huata Conmemoración nara chayamujpillatami, Jehová Dios ñucanchita perdonashcamanda ashtahuan aliguta causai ushashcapi pensarina capanchi. Por ejemplo, Jehová Dios paipa Churi Jesuspa causaita cushcamandami punda rurashca pecadocunamandaca arripintirishcanchi y chai pecadocunamandaca ñana yapata llaquiripanchi. Shinapash huaquinbica aunque Jehová Dios perdonashca cajpipash, ñucallata perdonaritaca na ushanichu yashpami pensarinchi. Shinaca punda rurashca pecadocunamanda perdonai tucushcata crina difícil cajpica ¿imatata ruraita ushapanchi? Jehová Dioslla perdonai ushashcata y ñucanchita juzgana autoridadtaca paipa Churiman cushcatami yuyarina capanchi. Ñucanchicunaca pi perdonai tucunata o pi na perdonai tucunata nina derechotaca na charipanchichu. Porque Jehová Diosca chai derechotaca na ñucanchimanga cushcachu. Bibliapica ninmi: ‘Taita Diospa michagupi purijushpaca paipa Churi Jesuspa yahuarmandami tucui pecadocunamanda perdonai tucunguichi’ nishpa (1 Juan 1:​6, 7). Bibliapica tauca yachachishcacunami tian. Imashinami chai yachachishcacunapi crinchi, shinallatami 1 Juan 1:​6, 7​pi nijuj shimicunapipash crina capanchi. Jehová Diosca paipa Churi Jesuspa causaita cushpami ñucanchicunata perdonangapaj razonda charin. Shinallata Bibliapica Jehová Diosca ‘nalita rurashcatapash cungangapaj’ o perdonangapaca listomi can nishpami yachachin (Sal. 86:5).

JEHOVÁ DIOS PAIPA CHURIPA CAUSAITA CUSHCAMANDAMI PERFECTO CAITA USHAPASHUN

9. Bibliapica ¿imatallata pecado nin? (Salmo 51:5).

⁹ Bibliapica ¿imatata pecado nin? Nalita ruranata, shinallata imperfecto nacirishcatami pecado nin (Salmo 51:5​ta liipangui). Imperfectocuna nacirimandami huaquinbica nali pensamientocunata charinchi y nali cosascunatapash ruranchi. Shinallata imperfectocuna caimandami ñucanchi cuerpoca Jehová Dios munashcashnaca na perfecto can. Chaimandami ungunchi, mayorianchi y huañunchi. Imperfectocuna nacirimandami llullu huahuagucunapash aunque ima malota na rurashca cashpapash ungun y huañun. Ashtahuanbash imperfectocuna caimandami ali gentecuna cashpa o nali gentecuna cashpapash sufrin y huañun. Imashinami ricupanchi Adanba huahuacuna caimandami tucuicunallata shuj jatun llaquipi capanchi.

10. Pecadota ruraimanda imperfectocuna tucushpaca ¿imashinata Adan y Evaca sintirirca?

¹⁰ Pecadota rurashpa imperfectocuna tucuimanda Adán y Eva imashina sintirishcapi pensaripashunchi. Adán y Evaca pecadota rurashcandimi Jehová Diospa leyta na cazushcamandaca paicunapa concienciapica nali sintiri callarirca (Rom. 2:15). Paicunaca ñana lo mismo cashcatami cuenta japirca. Chaimandami lluchulla cashcata cuenta japishpa taparirca y Jehová Dios ama ricuchunbashmi pacajurca (Gén. 3:​7, 8). Shinami Adán y Evaca por primera vez pingai tucurca, ninanda preocuparirca y culpablepash sintirirca. Paicunaca huañungacamanmi chashna sintirina carca (Gén. 3:​16-19).

11. Imperfectocuna caimandaca ¿imashinata causapanchi?

¹¹ Ñucanchicunapash imperfectocuna caimandami Adán y Evashna sintiripanchi. Nanaicunata, preocupaciongunataca imperfectocuna caimandami charipanchi. Ali causangapaj y problemacunata ama charingapaj esforzarishpapash problemacunata ñucanchillata tucuchitaca nunca na ushapashunllu. Bibliapica tucui gentecunallatami imapapash na sirvij causaitami charin nin (Rom. 8:20). Chaimandami gentecunaca, cai alpapi contaminación ama tiachun, shuacuna ama tiachun, pobreza y guerracuna ama tiachun esforzarishpapash, chai problemacunata tucuchitaca na ushashca. Shinapash Jehová Dios paipa Churi Jesuspa causaita cushcamandami shuj ali esperanzata charipanchi.

12. Jehová Dios Jesuspa causaita cushcamandaca ¿ima esperanzatata charipanchi?

¹² Jehová Dios paipa Churipa causaita cushcamandami, ‘Jehová Diospa rurashcacunaca ñana pecadopa y huañuipa esclavocuna capashun’ (Rom. 8:21). Shinaca paraíso alpagupi perfecto cashpaca, ñana imapash nanaicunata charishunllu, ni llaquiritallapash na llaquiripashunllu, culpablepash y preocupadopash nunca más ñana sintiripashunllu. Jesusca paipa causaitami ñucanchimanda curca. Chaimandami ‘casilla ali causaita caraj’ Jesús cai alpata mandajpica, cai alpataca aliguta cuidaita ushashun y tranquilo ali causaitapash ushapashun (Is. 9:​6, 7).

13. Conmemoracionman nara rishpallata ¿imatata pensarina capanchi?

¹³ Caipi pensaripashunchi. Jucha illaj causaita charishpa, perfectocuna cashpaca cada punllami ali jataripashun. Shinallata ñucanchicunapash o ñucanchi familiacunapash micuna faltanamandaca nunca más ñana preocuparishunllu. Nanaicunamanda o huañuimandapash nunca más ñana preocuparishunllu. Shinapash “imata shuyanajushcataca imapipash charirinshna shuyashpa” catijushcamandami, cunan punllapillata tranquilo, ali causaita charita ushapanchi. Porque “imashinami shuj ancla gancho jirruca barcota shinllita charijun, shinallatami ñucanchi shuyanajushca esperanzapash ñucanchi causaitaca shinllita charijun. Chai esperanzaca pactaringapachami” (Heb. 6:​18, 19). Imashinami ricupashcanchi shuj ancla gancho jirruca barcotami shinllita charishpa ayudan. Shina cuendallatami shamuj punllacunapi ali causaigu tianata pensarinaca shinlli feta charichun y llaquicunatapash aguantachun ayudan. Ñucanchicunaca Jehová Dios ‘paita tucui shunguhuan sirvingapaj munajcunata bendiciajtaca’ seguropachami capanchi (Heb. 11:6). Jehová Dios Jesuspa causaita cushcamandami cunanbillata tranquilo, ali causaita ushapanchi. Shamuj punllacunapacarin shuj ali esperanzatami charipanchi.

JEHOVÁ DIOS JESUSPA CAUSAITA CUSHCAMANDAMI JEHOVAHUAN CUTIN ALI AMIGOCUNA CAITA USHAPANCHI

14. a) Adán y Eva pecado rurashcamandaca ¿imata gentecunahuanga pasarca? b) ¿Imamandata gentecunaca Taita Diospa contrami can nipanchi?

¹⁴ Adán y Eva pecadota rurashca punllamandapachami gentecunaca Taita Diosmandaca carupi quidapashcanchi (Col. 1:21). Bibliapica gentecunaca Taita Diospa contrami tucushca ninmi (Rom. 8:​7, 8). ¿Imamandata shina nin? Porque Jehová Diosca perfectomi can. Y pecadotaca na ricunayachinllu. Bibliapica Jehová Diosmanda parlashpaca cashnami nin: “Canga, jucha illajpacha cashpami, nalitaca napacha ricunayachingui. Ima nalitapash, napacha ricui ushanguichu” ninmi (Hab. 1:13). Pecadoca tucui gentecunatami Jehová Diosmanda caruyachishca. Pecadorcuna caimandami Jehová Dioshuan cutin ali amigocuna caita ushangapaca shuj ayudata minishtipanchi. Chai ayudaca ¿maijanda can? Jehová Dios Jesusta huañuchun cachamushcamandami Jehová Dioshuan cutin ali amigocuna caita ushapanchi.

15. ¿Imamandata Jesús huañushcamandaca Jehová Dioshuan cutin ali amigocuna caita ushapashcanchi?

¹⁵ Bibliapi nishcashnaca Jesusmi ñucanchicuna ‘Taita Dioshuan cutin ali tucuchun, ñucanchi pecadocunamandaca huañurca’ (1 Juan 2:2). Shinapash ¿imamandata Jesús huañushcamandaca Jehová Dioshuan cutin ali amigocuna caita ushapashcanchi? Jesús paipa causaita cushcamandami, Jehová Diosca gentecuna paihuan cutin ali amigocuna tucuchun razonda charirca (Rom. 3:​23-26). Shinallata Jesús paipa causaita nara cujpillatami, Jehová Diosca punda tiempopi paita ali sirvinajushcacunatapash justocuna cashcata ricurca (Gén. 15:​1, 6). Jehová Diosca shamuj punllacunapi Jesús paipa causaita cushpa huañunata seguropacha cashpami chai gentecunataca justocuna cashcata ricurca (Is. 46:10). Imashinami ricupashcanchi, Jehová Dios Jesuspa causaita cushcamandami gentecunaca cutin Jehová Diospa ali amigo caita ushapashcanchi.

16. Conmemoración punlla nara chayajpillata ¿imatata ashtahuan pensarina capanchi? (Dibujotapash ricupangui).

¹⁶ Jehová Dioshuan ali amigocuna caimanda, ima beneficiocunata charishcapi pensaripashunchi. Por ejemplo, Jesús yachachishcashnami Jehová Diostaca “Taita” nita ushapanchi (Mat. 6:9). Shinallata cutin cutinmi Jehová Diostaca ñucanchi amigo nishca capashun. Shinapash Jehová Diosta ñucanchi Taita, ñucanchi amigo nishpaca siempremi humildadhuan y respetohuan nina capanchi. ¿Imamandata shina nina capanchi? Pecadorcunami capanchi. Y ñucanchi munailla Jehová Diospa ali amigo caitaca na ushapanchichu. Sino Jehová Dios paipa Churi Jesuspa causaita cushcamandallami Jehová Dioshuan ali amigocuna caitaca ushapanchi. Jehová Diosca Jesús shuj ‘jatun racu caspipi yahuarta jichashcamandami tucui cosascunahuan ali tucurca’ (Col. 1:​19, 20). Chaimandami juchayucuna cashpapash Jehová Dioshuanga ali amigocuna caita ushapashcanchi.

JEHOVÁ DIOSCA JESUSPA CAUSAITA CUSHPAMI LLAQUIJ TAITA DIOS CASHCATA RICUCHIN

17. Jehová Dios ninandapacha llaquishpa juyaj cashcataca ¿imamandata seguropacha capanchi? (Efesios 2:​4, 5).

¹⁷ Jehová Diosca paipa Churi Jesuspa causaita cushpami ninandapacha llaquishpa juyaj cashcata ricuchin. Ñucanchicunaca “ñucanchi pecadocunamandaca huañushcashnami carcanchi. Shina cajpipashmi Taita Diosca ñucanchiman causaita curca” (Efesios 2:​4, 5​ta liipangui). ‘Para siempre causaita cuj yachachishcacunata paicunapa shungupi chasquina munaita charij’ gentecunaca, pecadopa culpamanda escombrocuna ucupishna cashcataca alimi intindin. Shinallata chai situacionmanda pipash salvachun minishtishcatapash alimi intindin (Hech. 13:48). Gentecuna ayudachun minishtijujta yachashpami, Jehová Diosca ali villaigucunahuan gentecunataca ayudan. Shinami gentecunaca Jehová Diosmandapash y Jesusmandapash yachajuita ushashca (Juan 17:3). Diabloca Adán y Evapa pecadomandami Taita Diosca paipa munaitaca ñana pactachita ushangachu yarca. Shinapash Diablo yuyashcashnaca na pasarcachu.

18. Jehová Dios Jesusta cachamushcapi pensarishpaca ¿imatata na cungana capanchi?

¹⁸ Jehová Dios paipa Churipa causaita cushcamandami cada uno ashtaca beneficiocunata charipanchi. Shinapash Jehová Dios ima razonmanda Jesusta cachamushcapimi ashtahuanbachaca pensarina capanchi. Jehová Diosca ñucanchita salvangapallaca na Jesuspa causaitaca curcachu. Ashtahuanbachaca jardín de Edenbi Diablopa nishcacuna llulla cashcata ricuchingapami Jesustaca cachamurca (Gén. 3:​1-5, 15). Jesús huañushcamandami Jehová Diosca Diablopa nishcacuna llulla cashcata ricuchita ushashca. Shinallata pecadomanda y huañuimandapashmi salvaita ushan. Shinami Jehová Diosca juyaj Taita Dios cashcata ricuchishca. Shinallata, Jehová Diosca llaquij Taita Dios cashcamandami ñucanchicunata aunque pecadorcuna cajpipash, Diablo llullajushcata ricuchichun saquishca (Prov. 27:11). Shinaca, Jehová Dios paipa Churi Jesuspa causaita cushcamandaca ¿imashinata agradicishcataca ricuchita ushapanchi? Chai tapuitaca cati temapimi yachajupashun.