¿Imata shuj juyailla rumigutapash yali valishca can?

Haykanush shuti huarmiguca paipa cusahuanmi Armenia llactapi causan. Paicunaca nara bautizarishca cashpapash Bibliamanda villachishpami purin. Shuj punllaca shuj pasaportetami paipa huasi ladopi tarirca. Chai ucupica banco tarjetacuna, ashtaca culquipashmi tiajurca. Imata tarishcataca paipa cusamanbashmi villarca.

Paicunaca culqui faltajlla, ashtaca dibicunatapashmi charirca. Culquita japishpa quedanapa randica tarishca pasaportepi tiajun direccionman rishpami tucuita tigrachirca. Chaimandami pasaporte dueñopash paipa familiapash manllarirca. Haykanushpash paipa cusapash nircami, Bibliatami yachajunajunchi, chaipica honrado canatami yachajushcanchi nishpa. Chai oportunidadta aprovechashpami paicunaca testigo de Jehovacunamanda parlashpa Bibliamanda parlaj huaquin publicaciongunatapash saquirca.

Pasaporte dueñopa familiaca culquitami Haykanushman cungapaj munarca. Shinapash paica na japircachu. Chaimandami cayandi punllaca, pasaporte dueñopa huarmica Haykanushta paipa cusatapash visitangapaj rirca. Agradicishcata ricuchingapaj munashpami juyailla rumigucunahuan anillota cararca.

Haykanushpash paipa cusapash honrado cashcata ricushpaca shuj gentecunapashmi manllarinman carca. Shinapash Jehová Diosca paicuna honrado cashcataca ¿manllarishpachu ricun? Paicuna honrado cashcamandaca ¿imatashi Jehová Diosca yuyan? ¿Honrado canaca alichu carca?

CHARISHCA COSASCUNAMANDAPASH ASHTAHUAN ALICA ¿IMATA CAN?

Jahua parrafopi tapuicunata yachanaca jahuallami can. ¿Imamandata jahualla can? Jehovata sirvijcunaca alimi yachan, Jehová Diospa ejemplota catinaca juyailla rumicunatapash yali, orotapash yali ashtahuan valishca cashcata. Jehová Diosca na gentecunashnachu yuyan. Gentecuna nalicachishca cosascunataca paica alicachinmi (Isaías 55:8, 9). Chaimandami, paipa ejemplota catingapaj esforzarijcunataca Jehová Diosca ninanda alicachin.

Ali yuyaita charinamanda, ali yachaita tarinamanda parlashpaca Bibliapica ninmi: ‘Ali yachaita tarishpa, ali yuyaita charij runaca ninandami cushijun. Ali yachaica culquita tarishcatapash, orotapash yali alimi. Juyailla ninan valishca rumicunatapash ashtahuan yali ninan valishcami, tucui ima munashcahuanbash na chimbapuranallami’ can nishpa (Proverbios 3:13-15). Imashinami ricupanchi, Jehová Diosca ali yuyaita, ali yachaitaca juyailla rumigucunatapash yalimi ninanda alicachin.

Honrado canamandaca ¿imatata Bibliaca nin?

Jehová Diosca honradomi can. Bibliapica ninmi, Taita Diosca “na llullaj Taita Diosmi” can nishpa (Tito 1:2). Apóstol Pablopash punda tiempopi Jesusta catijcunataca nircami: ‘Ñucanchimandapash Diosta mañapanguichi. Ñucanchipash ali yuyaihuan, tucuita aliguta rurangapaj [honrado cangapaj] munashpami chaita ruranata yariajlla causanajunchi’ nishpa (Hebreos 13:18).

Jesuspash tucuipimi honrado carca. Shuj punllaca judiocunapa ashtahuan importante sacerdotemi Jesustaca nirca: ‘Causajuj Taita Diospash ricujunmi. Ama llullashpa, juramentushpa villailla. Canga ¿Taita Diospaj Churi, Quishpichij Cristochu cangui?’ nishpa. Shina nijpimi Jesusca tucuipi honrado cashcata ricuchishpa ari, ñucami Quishipichij Cristo cani nirca. Shina nishcamandaca judiocunata mandaj sacerdotecunaca Taita Diostami pingaichijungui nishpa huañuchichun mandanallami carca. Shinapash Jesusca ima pasanatapash na manllashpami cabalta parlarca (Mateo 26:63-67).

Cutin ñucanchicunaca ¿imatashi rurashun? Na cabalta parlaimanda o imatapash ashaguta pacashpa parlaimanda beneficiarina cashpaca ¿honrado cashpa catishunllu?

¿IMAMANDA HONRADO CANACA SHINLLI CAN?

Cai tucurimui punllacunapica honrado canaca shinllimi can. Ashtaca gentecunami, paicunapilla pensarishpa ashtahuan culquita charingapaj munan (2 Timoteo 3:2). Culqui faltajuj llactacunapi causashpaca trabajota tarinaca shinllimi can. Ashtacacunaca shuhuanlla, llullanlla o imapash na honrado cosascunata ruranllami. Chaimandami ashtaca gentecunaca yuyan, imapash na honrado cosascunata rurashpallami imatapash chari ushasha nishpa. Huaquinbica Jesusta catijcunapashmi na honrado cosascunata rurashpa congregacionbica nali ricurishca (1 Timoteo 3:8; Tito 1:7).

Shinapash Jehovata ashtaca sirvijcunaca Jesuspa ejemplota catishpami honradocuna can. Paicunaca Jehovapa ejemplota catingapaj esforzarina minishtirishcapacha cashcataca alimi yachan. Chaimandami Jesusta catij jovengunaca, ali notacunata llujchinamandallaca na trampacunata escuelapi ruran (Proverbios 20:23). Huaquinbica na siemprechu Haykanush cuenda honrado cashcamandaca imatapash chasquishun. Shinapash Jehová Diosca tucuipi honrado canami ashtahuan ali can ninmi. Honrado cashpami ñucanchi concienciapipash limpio ali sintirishun. Shina sintirinaca ninan valishcapachami can.

Gagik shuti huauquipash honrado canami ashtahuan ali can ninmi. Pai nara Testigo cashpaca shuj jatun fabricapimi trabajan carca. Impuestocunata ama pagangapami fábrica dueñoca ashtacata ganashpapash asha ganashcatalla villan carca. Gagikca chai fabricapi tucuita ricujujmi carca. Chaimandami paica, inspector shamujpica culquita maqui ucuchin carca, fabricaca ashagutallami ganajun nishpa villachun. Gagiktaca tucuicunami na honrado cashcamanda rijsin carca. Shinapash Bibliata yachajui callarishpaca, ali sueldota ganajushpapash umachishpa catingapaca ñana munarcachu. Chaimandami Gagikca chai trabajomanda llujshishpa paipa propio negociota churarca. Paipa negociota churashpaca, callari punllamandallatami paipa negociota registrashpa, ley mandashca shina tucui impuestocunata pagarca (2 Corintios 8:21).

Gagikca ninmi, fabricapi ganajushca sueldomanda chaupitalla ganajushcamandaca familiata mantininaca shinllimi carca. Shinapash cunanbimi paica ashtahuan cushilla sintirin. Jehovapa ñaupapipash shuj limpio concienciatami charin. Paipa ishcai huahuacunamanbash shuj ali ejemplotami ricuchin. Congregacionbipash privilegiocunata charinmi. Inspectorcunapash, Gagikhuan trabajajcunapash Gagikca honradomi can nishpami rijsin.

JEHOVÁ DIOSMI AYUDAN

Paipa ejemplota catishpa honrado caj gentecunataca Jehová Diosca ninanda alicachishpami ayudasha nin (Tito 2:10). Chaimandami rey Davidtaca escribichirca, rucuyajpipash Jehová Diosca paita sirvijcunataca na saquinllu, paipa sirvijcunapa huahuacuna yarjai pasachunga na saquinllu nishpa (Salmo 37:25).

Jehovata ali sirvij Rut shuti huarmiguta Jehová Dios imashina na saquishcata ricupashun. Rutca paipa suedra ña mayorllagu cajpipash na saquircachu. Ashtahuangarin, paipa suedrahuan Israel llactapi causangapaj rishpami Jehovata adorarca (Rut 1:16, 17). Paica tucuipi honrada huarmigumi carca. Moisesman cushca Leypi mandashca shinami, pobrecunaman puchuchishca granogucunata tandachishpa shinllita trabajan carca. Chaimandami Jehová Diosca imashinami rey Davidta cuidarca, shinallata Ruttapash paipa suedratapash cuidarca (Rut 2:2-18). Shinapash Jehová Diosca na cuidaitalla cuidajurcachu, paicuna imata minishtishcatami curca. Rey Davidpash, shamuna nishca Mesiaspash Rutpa familiamandami shamurca (Rut 4:13-17; Mateo 1:5, 16).

Cunan punllacunapi Jehovata sirvijcunapaca minishtirishca cosasgucunata charingapaj trabajota tarinaca shinllimi can. Shinapash imapash trabajocunaman yaicushpa, na honrado cosascunata ruranapa randica ali trabajangapami esforzarin. Shinami paicunaca, Jehovapa ejemplota catishpa honrado cana ashtahuan valishca cashcata ricuchin (Proverbios 12:24; Efesios 4:28).

Mundo enteropi Jesusta catijcunaca Rutpa ali ejemplota catishpami Jehová Dios paicunata cuidanataca tucui shunguhuan confiashcata ricuchin. Paicunaca Jehová Dios “candaca na jichushachu, na saquishachu” nishcataca tucui shunguhuanmi crin (Hebreos 13:5). Honrado cajcunataca Jehová Diosca cutin cutin ayudajushcatami ricuchishca. Paipa shimicunata pactachishpami Jehová Diosca paipa sirvijcuna imata minishtijujtaca siempre cushca (Mateo 6:33).

Gentecunaca juyailla rumigucunata o imapash cosascunatami ninanda alicachin. Shinapash jahua pachapi tiajuj ñucanchi Taita Diosca honrado canata, shuj cualidadcunatapashmi juyailla rumigucunatapash yali alicachin.