JOVENGUNAPA TAPUICUNA
Pimanbash mensajecunata cachagrijushpaca ¿imatata yaipi cana capanchi?
:-) Mensajecunaca amigocunahuan escribirishpa parlangapami ayudan.
:-( Mensajecunaca ali amigocunatapashmi contrachita ushan. Nalicachishpapashmi ñucanchitaca ricunman.
Cai cati yuyaicunapica, mensajecunata nara cachashpallata aliguta yuyana minishtirishca cashcatami ricupangui.
Caicunatapashmi ricuita ushapangui:
¿Pimanda escribingui?
Ashtaca jovengunami mensajecunata escribishpa cachanataca ninandapacha gushtan. Talvez canbashmi mensajecunata cachanataca ninandapacha gushtangui. Canba celularpica ashtaca numerocunatami alichishca charingui. Chai tucuicunahuan escribirichunmi mensajecunaca ayudan. Shinapash taitamamacuna escribirichun saquijpillami escribirina capangui.
“Ñuca taitaca ñucapash, ñuca ñañapash huambracunahuan parlachunga na munanllu. Huambracunahuan parlana tucujpica huasimanda telefonopi, pipash uyajujpillami parlai ushanchi.” (Lenore)
Caitami yachana capangui: Celular numerota yangata pimanbash cushpaca problemacunapimi urmanguiman.
“Celular numerota yangata pimanbash cushpaca, na munashca mensajecunata, fotocunatapashmi chasquingui.” (Scott)
“Pihuanbash cutin cutin escribirishpaca juyai callaringuimi.” (Steven)
Bibliapica ninmi: “Ali yuyaita charij runaca, ima llaqui japinata ricushpaca pacajunmi” nishpa (Proverbios 22:3). Yapata escribirinamanda jarcarishpaca na llaquicunapi urmanguichu.
Shuj jovenga ninmi: “Shuj amigohuanga cada ratomi mensajearin carcanchi. Ñucaca, alipacha amigocunami canchi yarcanimi. Shinapash shuj punllaca candami munani nihuarcami. Na yapata paihuan yalina cashcata, na yapata escribirina cashcatapash chairami cuenta urmani” nishpa (Melinda).
Caita yuyapai: ¿Chai paniguca paita munajta yachashpaca ali llevarishpa catircacha?
Imata rurashpashi ali canman carca: Paipa amigo ama munashpa ricui callarichun, paipa amiga cashpa catingapaca ¿imatashi Melindaca rurashpa ali canman carca?
¿Imatata escribingui?
Pipash mensajecunata escribimujpica cushijunchimi, shinallata mensajecunataca ñapash cachanchillami. Shinapash shujcunaca ñapash imatapash yuyai callarinllami.
Caitami yachana capangui: Huaquinbica mensajecunata na intindirijta escribishcamandami shujcunaca imapash pandata pensai callaringa.
“Mensajecunapi imapash dibujocunata cachajpipash imata sintijujta o imasha cashcatapash na ali cuenta japi usharinllu. Chaimandami huaquinbica imatapash pandata intindirin.” (Briana)
“Huaquin cuitsacunaca huambracunaman mensajecunata cachanajuimandami nalipi quedashca.” (Laura)
Bibliapica ninmi: “Imatapash cashcatapacha ruraj runaca, imata tigrachingapajpash, shungupi aliguta yarinrami” nishpa (Proverbios 15:28). Caimandaca ¿imatata yachajunchi? Shuj mensajeta nara cachashpallatami escribishcataca ali ali ricuna capangui.
¿Ima horascunapita escribingui?
Mensajecunata imahora cachanata, imahora liinata ali ricushpami respetota ricuchi ushangui. Mensajecunata cachangapaj o liijungapaj imahoracuna nali cashcataca canllatami ali yuyashpa decidi ushangui.
Caitami yachana capangui: Mensajecunata imahora cajpipash yangata liijujpica shujcunaca na respetahuanllu yuyangami. Chaimi canmandaca caruyanga.
“Respetota ricuchinataca huaquinbica cunganchillami. Ñucallatami huaquinbica shujcunahuan micujushpa, o pihuanbash parlajushpaca ñapash mensajecunataca escribi callarishcani.” (Allison)
“Mensajecunata escribishpahuan manejanaca peligrosomi can. Celularta utilizashpahuan manejajushpaca chocashpa llaquichiringami.” (Anne)
Bibliapica ninmi: ‵Tucui imapajpash, chai punllacunami chayamun, [...]Upalla cangapajpash, rimangapajpash, chai punllacunami chayamun’ nishpa (Eclesiastés 3:1, 7). Shinallata liingapaj, mensajecunata escribingapapashmi shuj tiempo tian.
Alipacha consejocuna
¿Pimanda escribingui?
;-) Taitamamacuna mandashcata cazupangui (Colosenses 3:20).
;-) Canba numerotaca ama pimanbash yangata cunguichu. Cunanbillata na yangata canba numerota pimanbash cunata, canmanda imatapash na yangata pimanbash villanata yachajunaca, can jatunyajpipashmi ayudanga.
;-) Shuj jariman o shuj huarmiman escribijushpaca, juyai juyai shimicunataca ama escribinguichu. Nara cazarangapaj munashpata shina shimicunahuan escribijushpaca shujcunatami llaquichingui.
“Ñuca taitacunaca paicuna munashcashna telefonota utilizajtami ricuhuashca. Ñucapi confiaimandami pipa numerocunatalla ñuca charijtaca na yapata ricuriahuanajun.” (Briana)
¿Imatata escribingui?
;-) Nara escribishpallatami: “¿Mensajepilla caita ninaca alicha canman?”. Cayashparapash, o paihuanbacha parlashpachu alicanman nishpami aliguta pensarina canchi.
;-) Ñavi ñavi parlajushpa na ninalla cosascunataca escribitapash na escribinachu capangui. 23 huatacunata charij Sarah huarmiguca “ñavi ñavi na imatapash ni ushashpaca ama mensajepipash escribinguichu” ninmi.
“Pipash pinganayailla fotocunata cachamujpica canba taitacunaman villangui. Shina villashpaca llaquicunamanda jarcaringuimi, canba taitacunapash ashtahuanmi confianga.” (Sirvan)
¿Imahorascunapita escribingui?
;-) Ima horascunapilla telefonota utilizanata canllata dicidi. Oliviaca ninmi: “Micungapaj tiarijushpa, Bibliamanda yachajugrijushpa, debercunata ruragrijushpapash na celulartaca charijunichu. Tandanajuicunapi cashpaca ama cada rato ricujungapami apagaitapacha apagani” nishpa.
;-) Respetohuan tratai (Filipenses 2:4). Pihuanbash parlajushpaca ama mensajecunata escribijuichu.
“Amigocunahuan parlajushpaca ama mensajecunata cachajungapami dicidirishcani. Minishtirishcapacha cajpillami contestani. Na yapa rijsishca gentecunamanga ñuca numerotaca na cunichu.” (Janelly)