FAMILIACUNATA AYUDANGAPAJ
Culirata yalichingapaca ¿imatata rurai ushapangui?
Huaquinbica quiquinba cusa o huarmi imatapash rurajpi o imatapash nijpichari culira sintiriparcangui. Culirashcata na sintichingapaj munashpapash talvez na ushaparianguichu. Shinapira, imata pasan nijpicarin, talvez ashtahuanmi culirapariangui. Chashna pasajpica, ¿imatata rurai ushapangui ama ashtahuan culirangapaca?
Caitami yachana capangui
Yapata culirashpaca saludtami afectapangui. Huaquin investigaciongunata rurashpami, yapata culirajcunaca presión altata, shungu nanai unguicunata, depresionda y vijsa ucupi imapash unguicunatami charin ninmi. Shinallata culiramandami, puñuitapash na ushan, ansiedadta y derrame cerebralcunatapash charin. Chaimi Bibliapica “ninanda fiñarinata saquishpa, chai fiñarinataca shitai. Nalita ruranataca, ama ninanda munajuichu” nin (Salmo 37:8).
Culiralla catinapash saludtaca afectanmi. Culirata na yalichijcunapaca, imapash ungui ucumanda canllaman atacajuj cuendami can. Por ejemplo, yapata criticajunata o uyachishpa parlanatami yachajun. Chashna personahuan causanaca dificilmi can y matrimoniopipash ashtaca problemacunami tianga.
Caitami rurai ushangui
Cusapa o huarmipa ali cualidadcunatami ricuna capangui. Quiquinba cusapi o huarmipi alicachishca quimsa cualidadcunata escribipai. Quiquinba cusa o huarmi cutinbi imatapash rurashcamanda culirashpaca, chai escribishca cualidadcunapi pensaripai. Shina rurashpami yapata culiranamandaca controlarita ushangui.
Bibliapica ninmi: “Siempremi agradicina capanguichi” (Colosenses 3:15).
Perdonanatami yachajuna capangui. Primeroca quiquinba cusa o huarmica, imamandashi shina nirca o rurarca nishpami pensarina capangui. Shinami shujcuna imashina ‘llaquirishcataca’ intindi ushapangui (1 Pedro 3:8). Chai jipaca “¿Ciertopachachu ñucata ninanda llaquichishca cajpi na perdonaita ushani?” nishpami tapurina capangui.
Bibliapica ninmi: “Fiñachijpipash upalla yalij runami, alicachi tucun” (Proverbios 19:11).
Quiquin imata sintishcataca aliguta pensarishpa y aligumanmi nina capangui. Por ejemplo, “imashpata maipi cashcata villangapaca na cayanata yachangui” ninapa randica “na uchalla shamujpica, imapash pasashcangami yashpami ninanda pinarini” nishpami parlaita ushapangui. Aliguman parlashpaca culirata controlaita ushapanguimi.
Bibliapica ninmi: “Siempremi cachihuan mishquiyachishcashna, juyaillaguta parlana capanguichi” (Colosenses 4:6).
Aligutami uyana capangui. Imatapash ña nishca jipaca, cusa o huarmi imata nijtami aliguta uyana capangui. Parlajujpica, parlashpa catichun saquinami capangui. Ña parlai tucuchijpica, cabal intindishcata o na cabal intindishcata yachangapami, cashnachu nijungui nishpa imata intindishcataca ashalla shimicunapi nina capangui. Uyajushpallatami huaquinbica culirataca yalichita usharin.
Bibliapica ninmi: “Uyangapaca listomi cana capanguichi. Uyangapaj listo cashpapash na ñapash imatapash ninajunachu capanguichi” (Santiago 1:19).