Culiranamandaca Bibliapica ¿imatata yachachin?

Bibliapica caitami yachachin

Bibliapica yapata culirana o fiñarinaca ñucanchitapash y shujcunatapashmi llaquichita ushan ninmi (Proverbios 29:22). Huaquinbica razonbimi culiranchi. Shinapash Bibliapica, seguido ‘yapata culirajcunaca’ na salvaringachu ninmi (Gálatas 5:19-21). Bibliapi consejocunami ama yapata culirashpa controlarichun ayudaita ushan.

• ¿Culiranaca siemprechu nali can?

• Ama yapata culiraringapaj controlarina capanchi

• Ama yapata culirangapaca ¿imatata ruraita ushapanchi?

• Ama yapata culirangapaj Bibliapa textocuna

¿Culiranaca siemprechu nali can?

Na, huaquinbica razonbimi culiranchi. Por ejemplo, Taita Diosta sirvij Nehemías runaguca, Taita Diosta sirvinajuj shuj gentecunata maltratanajujta yachaj chayashpami ninanda fiñarirca (Nehemías 5:6).

Huaquinbica Jehová Diospashmi culirashca. Por ejemplo, punda tiempopica Jehová Diospa sirvijcunaca paitallami adorashun nishpami, shuj promesata rurarca. Shinapash shuj dioscunatarami adorai callarirca. Chaimi “Jehová Diosca Israelitacunahuanga ninanda culirarca” (Jueces 2:13, 14). Shinapash culirashpaca siempremi controlarinatami yachan (Éxodo 34:6; Isaías 48:9).

Ama yapata culiraringapaj controlarina capanchi

Yangamanda culirana o culirashpapash na controlarinata yachashpaca nalimi can. Shinapash juchayucuna caimandami yangamanda culiraita ushanchi. Cunanga ishcai ejemplocunatami ricugripanchi.

• Cainga Taita Dios paipa sacrificiocunata na chasquijpica ninandami culirarca. Culirashca caimandami paipa huauquitapash huañuchirca (Génesis 4:3-8).

• Profeta Jonasta Taita Dios Nínive llactamanda gentecunata perdonajpica ninandami culirarca. Jonás runagu yangamanda ‘ninanda fiñarishcamandami’ Jehová Diosca paitaca corregirca. Nínive llactamanda gentecuna arripintirishcamandaca, Jonasca cushijunami carca (Jonás 3:10-4:1, 4, 11).a

Cai ejemplocunata ricushpaca culirashpaca “Taita Diospa ñaupapi ima ali cashcata ruraitaca gentecunaca na ushashcatami” yachajupanchi (Santiago 1:20).

Ama yapata culirangapaca ¿imatata ruraita ushapanchi?

• Yapata culirana na ali cashcatami intindina capanchi. Huaquingunaca yapata culirashpaca shinlli cashcatami yuyan. Pero ciertota nishpaca yapata culiranaca nalimi can. Bibliapica “ñapash fiñarina yuyaita na jarcari runaca muyundi pirca urmashca jatun pirca illaj puebloshnami can” ninmi. (Proverbios 25:28; 29:11). Ashtahuangarin culiranata controlarishpaca ali yuyaita, ali yachaita charishcatami ricuchin (Proverbios 14:29). Bibliapi nishcashnaca “ninan shinlli runapa randica, na ñapash fiñarij runami ashtahuan ali can” nin (Proverbios 16:32).

• Culirashca cashpaca na imatapash ninalla o ruranallachu capanchi. Salmo 37:8​pica “Ninanda fiñarinata saquishpa, chai fiñarinataca shitai. Nalita ruranataca, ama ninanda munajuichu” ninmi. Chai textopi nishcashnaca, culirashca caimanda imatapash nalita nara rurashpallatami, controlarina capanchi. Efesios 4:26​pica, “Culira cashpaca, na pecadota ruranachu capanguichi” ninmi.

• Imapash nara pasajpillatami anchurina capanchi. Bibliapica: “Fiñanajuita callarichij runaca, jatun yacuta cacharinshnami. Narapash fiñanajushpa rimari callarijpillata anchuringuilla” ninmi (Proverbios 17:14). Problemacunata arreglanaca alimi can. Shinapash culiralla cashpaca, na chai problemacunataca arreglanachu capanguichi.

• Tucuitami ali yachana capangui. Proverbios 19:11​pica “Aliguta yarishpa causaj runaca, ñapash fiñarishpapash jarcarinmi” nin. Ima pasashcata ali yachana capangui, yachashca jipaca ima pasashcatami ali uyana capangui. Shinami na yangamanda culirapangui (Santiago 1:19).

• Jehová Diostami tranquilo cangapaj ayudahuai nishpami mañana capanchi. Oracionda ruranaca “tranquilo, ali cachunmi ayudan” (Filipenses 4:7). Jehová Diosta mañanami paipa espíritu santota chasquichunmi ayudan. Chaimi tranquilo, ali cachun, pacienciata charichun, controlarinata yachachun ayudan (Lucas 11:13; Gálatas 5:22, 23).

• Amigocunataca ali alimi agllana capangui. Pihuanbash yapata tiempota yalishpaca, chai personashnallatami comportarinchi (Proverbios 13:20; 1 Corintios 15:33). Chaimandami Bibliapica: “Ñapash fiñarijlla runahuanga, ama tandanajunguichu. Fiñarijlla runahuanga, ama cumba tucunguichu. Pactarallapash paicunashna yachajushpara, cambaj almapajllata lazuta churarinshna tucunguiman” nishpami advirtin (Proverbios 22:24, 25).