Jehová Diosca paita sirvingapaj esforzarishcamandami ninanda bendiciahuashca

Ñucaca, ñucapa paya panihuan, punda huauquihuan y ñuca taitamamahuanmi, Reino Unido llactapi, Bicester pueblomanda carupi viñarcani. Chaipica arrendashca shuj uchilla huasigupi causarcanchi. Ña 19 huatacunata charishpaca, ñuca panipa y huauquipa ejemplota catishpami, precursor regular tucurcani. Chai jipaca, Escocia llactapi precursor especial cachunmi cachahuarca. Año 1970pica, Londres Betelpi sirvichunmi invitahuarca. Chai tiempopica 23 huatacunatami charircani. Chaipimi lengua de señasta yachajurcani. Lengua de señasmi ñuca causaita cambiarca. Lengua de señasmandami ashtaca bendiciongunata charishcani.

Lengua de señastami yachajui callarircani

Betelpi cajpica, Mill Hill congregacionbi sirvichunmi cachahuarca. Chaipimi ashtaca testigo de Jehová sordogucunata rijsircani. Aunque na paicunapa idiomata parlashpapash, paicunahuan amigo cangapami munarcani. Chaimi reuniongunapica paicunahuan tiarin carcani.

Chai tiempopica, lengua de señas congregaciongunaca Gran Bretaña llactapica na tiarcachu. Chaimi sordogucunaca inglés idiomapi reuniongunaman rin carca. Huaquin huauquicunaca, sordogucuna intindichun nishpami, reuniongunataca traducin carca. Pero palabra por palabra y seña por señami traducin carca. Sordo huauquicunaca ashtaca pacienciahuanmi señastaca yachachihuarca. Shinami, señas idiomapash gramaticata charishcata y palabracunatapash shuj ordenbi churashpa parlan cashcata yachajurcani. Shinallata, inglés idiomaca paicunaca na rijsishca idioma cashcatami cuenta japircani. Na cabal intindishpapash, reuniongunaman na faltashpa rijta ricushpami, sordocunataca ashtahuan respetashpa juyarcani. Ashtahuangarin lengua de señasta alipacha yachajungapami esforzarircani.

Gran Bretaña llactapica, lengua de señas británica o BSL nishcami gobierno aceptashca lengua de señas can. Interpretacionda ruraj Testigocunaca, reuniongunapi traducingapaca, asha ashami palabra por palabra traducinata saquishpa BSLta yachajurca. Chai idiomaca avanzadopachami can. Reuniongunapi shina traducijpimi, sordogucunaca reuniongunapi imata yachachijta ashtahuan intindishpa, na sordo huauquicunahuanga ashtahuan unidocuna cai callarirca. Chai punllacunamandaca ñami 50 huatacuna yalishca. Sordo huauquicunata ayudangapaj esforzarinajujta ricushpaca Jehová Diosca ashtacatami bendiciamujushca. Jehová Diospa ayudahuanga ñucapashmi ashagutallapash ayudapashcani. Imashina ayudashcata parlapasha.

Lengua de señaspi predicacionga ashtahuanmi mirarca

Año 1973pica, Michael Eagers shuti sordo huauquigumi lengua de señas britanicapi reunionguna tiashpaca alichari canman nihuarca. Chai huatapica más o menos shuj huatagutami ña anciano carcani. Sucursal aprobajpimi, shuj ancianohuanga quillapi shuj viajeguta reunionda Londres, Deptford llactapi rurangapaj tucuita alistai callarircanchi.

Chai reuniongunaca alipachami carca. Londresmanda y Inglaterra sur ladomanda sordo huauquicunami BSL idiomapi primera reunionman shamurca. Por finmi, Testigo y na Testigo sordogucunapash paicunapa idiomapillata Jehová Diosmanda yachajui callarirca. Reunión jipaca, experienciacunata parlangapaj, igual micungapami aprovechan carcanchi. Shinallata huauquipanicunata animangapami pastoreota ruran carcani. Huauquipanicunaca shina ayudachunga ninandami minishtinajushcarca.

Tiempohuanga, Birmingham y Sheffield llactacunapipashmi lengua de señaspi reuniongunataca rurarca. Chaimanga lengua de señasta yachajungapaj munaj ashtaca huauquipanicunami shamurca. Shina yachajushpami ashtaca huauquipanicunaca llacta enteropi lengua de señaspi predicación mirachun ayudarca.

Juyailla cumbagutami tarircani

Año 1974pimi Stella Barker shuti juyailla paniguta rijsircani. Paica Betel ladolla congregacionbimi sirvijurca, precursora especialmi carca. Enamorarishpami año 1976pica cazararcanchi. Londres llactapa norte ladoman Hackney llacta congregacionbimi sirvi callarircanchi. Ishcandillatami precursor especialcuna carcanchi. Ñuca huarmigupashmi sordocunaman ñucahuan igual predicai callarirca. Ishcandillata precursorcuna cashpa, Jehová Diosta chashna sirvinami ñucanchi matrimoniopaca alipacha carca.

Ashaguta jipamanga, ñuca huarmigu Stellata y ñucataca Betelpi voluntario externocuna cachunmi invitarca. Shinallata, superintendente de circuito sustituto y Escuela del Ministerio del Reinopi instructormi carcani. Tiempohuanga inglespi asamblea regionalcunata lengua de señasman interpretana programata organizashpami ayudai callarircani. Ocupado ocupadomi can carcanchi, huaquinbica shaijushcami carcanchi. Pero shina ocupado canataca gushtanmi carcanchi y cushijushcacunami can carcanchi (Mateo 11:28-30).

Año 1979pimi ñucanchi primer churi Simon naciriparca. Cutin año 1982pica ñucanchi cati churi Markmi naciriparca. ¿Imashinata imatapash na descuidashpa ñaupaman catita ushaparcanchi? Stella y ñucaca, imapash asignacionda charimanda maimanbash rina tucushpaca, huahuacunandi igualmi rishun, imagutapash pugllangapaca tiempotaca llujchishunmi nishpami parlarircanchi. Jehová Diosta sirvijcunaca cushilla cajta ñucanchi huahuacuna ricuchun munashpami shina parlarircanchi. Shina rurashcamandami, huahuacuna viñashpaca lengua de señasta yachajushpa precursorcuna tucurca. Ñucanchi taitamamapa vaquillaguta Betelpi “sirvichun invitashcamanda” 40 huatacuna jipami, ñuca churicunataca, ishcandita Betelpi sirvichun invitaparca. Ñucanchica cushijushcapachami carcanchi.

Sordo gentegucunaca ashtahuan ayudacunatami charirca

Año 1990cunacamanga ni shuj sordo ancianollapash na Gran Bretaña llactapica tiarcachu. Pero siervo ministerialcunaca taucallami tiarca. Chaimi, maijan sordo huauquicuna ‘aliguta yachachingapaj’, superintendentecuna cangapaj ali cajtaca ali uyanajuj ancianocuna ricun carca (1 Timoteo 3:2). Inglés congregacionbica, Bernard Austin shuti siervo ministerial sordo huauquigumi tiarca. Paitaca tucuicunami respetan carca. Jehová Diospa llamagucunatapash juyashpami cuidan carca. Paita anciano cachun nombrashcata yachashpaca ninandami cushijurcani. Paimi Gran Bretaña llactapica primer anciano sordo carca.

Año 1996ca especialpachami carca. Sucursalca Gran Bretaña llactapi lengua de señaspi shuj congregación tiachunmi aprobacionda curca. Chai congregacionga Londres llactapa oeste ladoman Ealing shuti sectorpimi carca. Chai jipaca shuj shuj congregaciongunami tiai callarirca.

Por finmi reuniongunata y asambleacunatapash intindirca

Año 1980cunapi y 1990cunapica, Betelpi Departamento de Serviciopami ñuca huasimanda trabajai callarircani. Lengua de señaspi predicacionmanda tapuicunatami contestashpami trabajan carcani. Huaquin huauquicunaca, inglés reuniongunapi y asambleacunapi discursocunata sordogucuna intindichun imata rurana cashcatami tapun carca. Callaripica, traducishpa interpretangapaj aliguta organizashca grupoca na tiarcachu, ni publicaciongunapash na tiarcachu. Chaimi sordo huauquicunata y ali uyanajuj huauquicunatapash Jehová Dios agllashca tiempopi ayudachunmi pacienciahuan shuyana canchi nishpa animan carcani.

Pacienciahuan shuyanaca alipachami carca. Porque jipallami sucursalca, inglés reuniongunapi y asambleacunapi interpretecuna tiachun encargarirca. Sordo huauquipanicunaca primero filacunapimi tiarirca. Shinami paicunaca discursota cujuj huauquitapash, traducishpa interpretacionda rurajuj huauquitapash ashtahuan ali ricuita usharca. Shinami chai huauquicunaca Jehová Dios paicunata ciertopacha juyajta, Jehová Diosta sirvij shuj jatun familiata charishcata seguro carca.

1 de abril de 1995pica, lengua de señaspi shuj punlla asamblea especialtami charircanchi. Chai asambleataca West Midlands, Dudley pushtupi Salón de Asambleaspimi charircanchi. Superintendente de circuito cashca David Merry huauquitami asambleata organizashpa ayudarcani. Huaquingunaca caru caru pushtucunamandami asambleamanga shamurca. Más de mil personacuna chai asamblea especialman shamushcata ricushpaca ninandapachami cushijurcanchi.

Año 2001pimi sucursalca, huauqui Merryta y ñucataca caya huatapaca lengua de señas britanicapi shuj asamblea regionalta organizanguichi nirca. Ashtaca ruranacunami tiagrijurca. Ashtaca huauquicunaca voluntariocuna cangapami ofrecirirca. Paicuna ashtacata ayudashcamandaca Jehová Diosca bendiciarcami. Asambleaca alipachami carca. Chai punllamandami, tauca huatacunata, ñucaca lengua de señaspi asambleacunata supervisajushcani. Pero cunanbica, ashtahuan joven huauquicuna lengua de señaspi asambleacunata supervisajushcata ricushpami tucui shunguhuan agradecido capani.

Sordocunapa videocuna

Año 1998pimi, Jehová Diospa organizacionga ¿Qué exige Dios de nosotros? folletopa videocintata lengua de señas britanicapi llujchirca. Chai videocintahuanmi ashtaca gentecunamanga Bibliata yachachi callarircanchi. Jipamanga shuj shuj publicaciongunapashmi llujshirca.

Año 2002pi asamblea regionalpimi, Diospa Reinomanda canticocunataca por primera vez lengua de señas britanicaman interpretacionda rurarca. Chaimi sordo huauquipanigucunaca, interpreteta catishpa, musicatapash sintishpa Diospa Reinomanda juyailla canticocunataca “candai” usharca. Shujcunahuan nunca na igual “candashca” ancianoca cushijuimandami huacarca. Chaita ricushpami, ñucapash cushijuimandaca huacangapaj munarcani.

Chai asambleapica, shuj ali noticiacunapashmi tiarca. Londres llactapi lengua de señas congregaciondami, asambleapa shuj videodramata rurachun invitarca. Pero na imapash experienciata charishpaca ¿imashinashi ruranchiman carca? Jehová Diosca como siempremi ñucanchitaca ayudarca. Jehová ayudajpimi, videota grabanata y editanata yachaj huauquicunata tarircanchi. Alipacha videodramami quidarca. Chaipi yachajushcacunaca ninandami ñucanchitaca ayudarca. Porque año 2003manda hasta 2008camanmi, asamblea regionalcunapi llujshina videodramacunata Betelpi supervisajuna bendicionda charipashcani.

Betelpi ñucanchi churicunahuan cashpaca, ñuca huarmigu y ñucapash ninandami cushijun carcanchi. Pero shinllitami trabajan carcanchi. Tauca semanacunata repasashpa y grabashca jipaca, actorcuna y equipo de produccionbi trabajajcunaca ninanda shaijushcacunami carca. Pero shina esforzarinaca alipachami carca. Sordo huauquigucunaca, Bibliapi ima pasashcacunataca aligutami intindinajurca. Taucacunaca cushijuimandami huacanajurca.

Año 2015pimi lengua de señas britanicapi Villajun revista de estudioca, videopi llujshi callarirca. Cutin año 2019pica, Mateo libromi videopi llujshirca. Cunanbica Escrituras Griegas Cristianas tucuilla librocunatami charinchi. Escrituras Hebreasca asha ashami llujshishpa catijun. Sordo huauquicunaca, ashtaca espiritual cosascunata carajushcamandami Jehová Diostaca tucui shunguhuan agradicin.

Jehová Diosta sirvijcunaca, ñucanchi huauquipanicunahuanga shuj jatun familiashnami capanchi. Ñucanchi Taita Jehová Diospa ejemplota catishpa tucui gentecunata juyangapami esforzaripanchi (Hechos 10:34, 35). Sordo, ciego gentegucunata y shuj gentecunatapash ayudangapami, Jehová Diospa organizacionga ashta tiempota, fuerzacunata y tucui ima charishcacunatapash ocupanajushca. Chaita ricushpami ñuca familiahuanga ninanda cushijunchi.a

Ashtaca esforzarishcamandami, Gran Bretañapica ashtaca congregacionguna lengua de señaspi tian. Lengua de señas mirachun callarimandapacha ayudai ushashcamandaca ninandami cushijupani (Zacarías 4:10). Jehová Dios ayudajujpillami shinapacha mirashca. Paimi organizaciondaca ñaupaman pushajun. Paimi paita sirvijcunatapash ali villaicunata predicachun yachachijun y ali gentecunapa shungupipash ali villaicunataca shuj muyuguta cuenda viñachijun.