Llaqui apashca huauquipanicunamanmi minishtirishca cosascunata carashpa ayudan

Huata 2020pica shuj shuj llaquicunami tiarca. Shinallata COVID-19 unguipashmi mundo enteropi tiai callarirca. Llaqui apashca huauquipanicunataca ¿imashinata testigo de Jehovacunaca ayudashca?

Huata 2020pica,a Comité de Coordinadores del Cuerpo Gobernantepi sirvij huauquicunaca llaqui apashca huauquipanicunata ayudachunmi 28 millones de dolarcunata gashtachun aprobarca. Chaimandami shuj shuj llaqui apashca huauquipanicunataca ayudai usharca. Por ejemplo, COVID-19 unguimanda llaqui apashcacunata, yapata huairahuan tamiajpi llaqui apashcacunata, África, Venezuela, Zimbabue llactapi llaqui apashca huauquipanicunata ayudaitapashmi ushashca. Contribución culquihuanga yacumanda, arriendomandami pagaita usharirca. Shinallata micunata, ropacunata, jambicunata randita usharirca. Shuj shuj cosascunatapashmi contribución culquihuanga ruraita usharirca. Llaqui apashca huauquicunata ayudaj huauquicuna imashina ayudashcata ricupashun.

COVID-19 unguimanda. COVID-19 unguimandami mundo enteropi huauquipanicunaca llaqui apashca. Chaimi mundo enteropica, 800 yali Comité de Socorroca tiai callarirca. Comité de Socorropi sirvij huauquicunaca llaqui apashca huauquipanicuna imatalla minishtijujtami Comité de Coordinadorpi sirvij huauquicunamanga villan carca. Shinami paicunapash imashina ashtahuan ayudanata ricun carca.

Comité de Socorropi sirvij huauquicunaca huata enterotami micunata, yacuta, jambita, shujta minishtirishca cosascunata carashpa ayudarca. Shuj llactacunapica Comité de Socorropi sirvij huauquicunaca chai llactapi ancianocunahuanmi huauquipanicuna gobiernopa ayudata chasquichun ayudarca.

Na testigo gentecunapashmi llaqui apashca huauquipanicunata imashina ayudajtaca cuenta japirca. Distrito de Nakondepi trabajaj Field Simwinga jarica, ñucanchi huauquipanicunataca cashnami nirca: “Llaqui apashca familiacunata ayudashcamandaca ninandami agradicinchi”.

Angola llactapica micunaca na tiarcachu. COVID-19 unguimandami Angola llactapica micunaca na tiarca. Micuna tiashpapash yapatami valirca. Chaimandami huauquipanicunaca micunata fácil randitaca na usharca.

Angola llactapi huauquipanicunaman micunata cachashpa ayudachunmi Brasil llactapa Beteltaca mañarca. Contribución culquiguta aliguta utilizangapaj nishpami Comité de Socorropi sirvij huauquicunaca micunata cachangapaj, micunata randingapaj aliguta ricuna carca. Chashna ricushca jipami micunataca randirca. Carangapaj fundapica arroz, poroto, aceitemi carca. Totalca cada fundami, cachanandica 22 dólar llujshirca. Cunangamanga 33 mil 544 funda micunacunatami cachashca. Cachashca micunacunahuan, huauquipanicuna charishca micunacunahuanga 50 mil yali huauquipanicunami micunataca chari ushashca.

Micunata cachashpa ayudashcamandaca huauquipanicunaca ¿imashinata sintirishca? Angola llactamanda carupi causaj Alexandre huauquica ninmi: “Jehová Diospa organización ayudajpimi Jehová Dios juyaj, ñucata na sololla saquishcata cuenta japishcani”. Mariza paniguca madre solterami can. Paica ninmi: “Ñuca mañashcataca Jehová Diosca uyahuashcami. Chaimi Jehovatapash, paipa organizaciondapash ninanda agradicini”.

Zimbabue llactapi na tamiashcamandami micuna illaj carca. 2020 huatapica Zimbabue llactapica na tamiarcachu. Chaimandami ashtaca ashtaca gentecunaca llaqui apanajurca. Shinallata chaipi causaj huauquipanicunapashmi micunata na charimanda llaqui apanajurca.

Llaqui apashca huauquipanicunata ayudangapami cinco Comité de Socorro tiai callarirca. Shinallata ashtaca huauquipanicunami paicunapa carrota mañachishpa, micunata cartonbi churashpa, micunata aparishpa ayudarca.b Huata 2020pica 22 mil 700 yali huauquipanicunata micunahuan ayudangapami, 691 mil 561 dolarcuna gashtarirca.

Huaquin huauquicuna micuna illaj quedashca horaspipachami Comité de Socorropi sirvij huauquicunaca micunata cachashcarca. Chashna ayudashcamandami huauquipanicunaca Jehová Diosta agradicirca. Huaquingunacarin candaitapashmi candarca.

Shuj llactapica, gobiernocunahuan imatapash na ricunata charij shuj organizacionmi llaqui apashca gentecunata ayudangapaj nishpa shuj tandanajuita ruranajurca. Chai tandanajuimanmi ishcai viuda panigucunaca rishcarca. Chai tandanajuipica politicamandarami parlai callarirca. Chaimandami chai panigucunaca politicapi na chapuringapaj munaimanda chai tandanajuimandaca llujshishpa rirca. Chashna llujshishpa rijta ricushpami gentecunaca burlarishpami, pactarallapash ñucanchita micunata mañangapaj shamunguichiman nishpa rimarca. Chai llactamanda gentecunaman nara ayudata cujpillatami chai ishcai panigucunamanga Comité de Socorropi sirvij huauquicunaca micunahuan ayudarca.

Zimbabue llactapipash llaqui apashca huauquicunata ayudaj huauquicuna ayudashcata ricushpami shujta gentecunapash Jehová Diostaca jatunyachishca. Prisca paniguca shuj uchilla comunidadpimi causan. Paita imashina Jehová Dios ayudashcata ricupashunchi. Prisca paniguca na tamiajpi llaqui apashca cashpapash siempremi paica miercolescunata, viernescunata villachingapaj llujshin carca. Chaita ricushpami gentecunaca burlarishpa cashna ninajurca: “Chashna villachishpa purijuimandami canbash, canba familiapash yarjaimanda huañunguichimi” nirca. Chashna ninajujpimi Prisca paniguca cashna nirca: “Jehová Diosca paita sirvijcunataca nunca na saquinllu”. Chashna nishcamanda huaquin punllacuna jipallami huauquicunaca micunata Prisca panimanga micunataca saquingapa rishcarca. Chaita ricushpami Prisca panigumanga vecinocunaca cashna nirca: “Canba nishcaca ciertomi cashca, Taita Diosca candaca na saquishcachu”. Ñucanchipashmi Taita Diosmanda yachajungapaj munanchi. Cunanga Prisca panigupa siete vecinocunami tandanajuicunataca radiopi uyan.

Tucurimui punllacunapi causajushcamandami shuj shuj llaquicunata charishpa catishun (Mateo 24:37). Donate.jw.org nishca paginaman yaicushpa contribución culquiguta carashcamandami ninanda agradicipanchi. Cai contribución culquigutaca llaqui apashca huauquipanicuna minishtijuj horas ayudangapami utilizapanchi.