Huata 2021​pica llaqui apashca huauquipanicunatami ayudaparcanchi

Huata 2021​picaa COVID-19 pandemiamandami mundo enteropi gentecunaca sufrishpa catishca. “COVID-19 ungui tiajpi ayudashcacuna” nishca informacionbi nishcashnami ñucanchicunaca ashtaca millón dolarcunatab shujcunata ayudangapaca gashtashcanchi. Shinallata más de 950 Comité de Socorro grupocunatapashmi organizashcanchi.

Pandemiamanda contagiarishcacunaca ashtahuan ashtahuanmi mirashpa catinajurca y chai jahuapash shuj shuj llaquicunami ñucanchi huauquipanicunataca afectajurca. Chaimandami Cuerpo Gobernantemanda Comité de Coordinadoresca pandemiamanda llaqui apanajushca huauquipanicunata ayudashca jahuapash, 200 yali shuj shuj llaquicuna tiashcamanda 8 millón dolarcunahuan paicunata ayudachun mandarca. Cai culquica COVID-19 unguimanda ayudajushca culquimandaca apartemi carca. Quiquinguna donashca culquihuan imashina chairalla llaqui apashcacunata ayudanajushcata ricupashunchi.

Nyiragongo volcanmi tujyan

22 de Mayo de 2021​pica Nyiragongo shuti volcanmi tujyai callarirca. Cai volcanga República Democrática del Congopimi can. Volcán tujyajpimi ashtaca lava llujshishpa huasicunata, escuelacunata, yacu tanquecunatapash quilpashpa rirca. Pero chai jahuapash chai volcán tujyajushpaca huaquin punllacunatami gentecunapa saludta afectaj cenizatapash shitajurca. Cai cenizaca Goma shuti llactapi gentecunatami afectajurca. Y huaquin temblorcunapashmi tiarca. Chaimandami chai llactamanda la mayoría gentecunaca shuj llactacunaman uchalla rina tucurca. Tauca taucacunami Ruanda ladolla llactamanbash rirca.

Chai llactacunamanda pacajushpa rishca puracunapica más de 5 mil testigo de Jehovacunami carca. Chai urcu tujyashcamandami taucacunaca huasi illa quidarca. Y shujcunapa huasicunataca pacajushpa rishcamandami huasicunata shuangapaj yaicushcarca. Ruanda y República Democrática del Congomanda comité de socorrocunami huauquipanicunata ayudangapaca maquipurarishpa shinllita trabajarca. Congo Sucursalmanda shuj comité de socorropi sirvij shuj huauquica nircami: “Chai llactamanda gentecuna imata ruranata na atinanajujpipash y chai llactamanda llujshina ordenda autoridadcuna nara cujllapitami comité de socorromandaca chaipi gentecunamanga micunata, yacuta, ropata, colchongunatapash llaqui apashcacunamanga ña cushca carcanchi” nircami. Más de 2 mil huauquipanicuna rishca shuj llactagupica comité de socorroca ama COVID-19 unguihuan o cólera unguihuanbash contagiarichunmi mascarillacunata cushpa huaquin instrucciongunatapash curca. Y huaquin carpacunatapashmi shayachirca.

Quimsa quillacunapillami ñucanchi huauquipanicunaca 60 yali quintal arrozta, 60 yali quintal sara jacuta, 3 mil litro aceiteta y 3 mil litro yacutapash llaqui apashcacunata ayudangapaca cachashca carca. Ama yapa culquita gashtangapami Comité de Sucursalca chai llactapillata tiashca productocunata por mayor randinata decidirca.

Shuj paniguca paipa mushuj huasita volcán tujyashpa huaglichishcamandaca “llaquillapachami carcanchi” nircami. Pero paicunataca huauquipanicunami ima minishtishcaguta cushpa ayudarca y espiritualmentepash shinllichirca. Paniguca ninmi: “Cunangamanga Jehová Dios ayudashcamandami minishtishca cosascunata charishcanchi. Ñucanchipachami llaquicunata aguantashpa ñaupaman catichunga Jehová Dios ayudajushcata ricupashcanchi” nircami.

Venezuela llactapica pobrezami mirarca

Cai último huatacunapica Venezuela llactapica culqui faltallami gentecunaca causanajushca. Ñucanchi huauquipanicunapashmi culqui faltalla, micunagupash illa causanajushca. Y chaipi causanapash ashtahuan peligrosomi tucushca. Shinapash Jehovapa organizacionga na paicunatalla saquishcachu. Huauquipanicunataca ayudashpami catijushca.

Caina huataca 1 millón y medio yali dolarcunatami micunata, jabonda y shuj minishtirishca cosascunata randingapaj ocuparcanchi. Caicunahuanga ciertopacha minishtinajuj huauquipanicunatami ayudarcanchi. Venezuela sucursalmanda huauquicunaca: “Cada quilla 1.300 quintal micunata Venezuela enteropi huauquipanicunaman repartinaca na facilchu can” nircami. Y cai micunacuna ama dañarishpa desperdiciarichunmi huauquicunaca ashtahuan tiempota paraj micunacunata randishca. Shinallata sucursalmanda huauquicunaca nishcami: “Cazi mayoría micunacunatami ashata baratoyajpi y de temporada cajpi randishpa aprovechanchi. Shinami cai micunacunataca ñucanchi huauquipanicunaman chayachingapaca baratolla transportai ushanchi” nin.

Venezuela llactapa shuj Comité de Socorropi sirvij huauqui Leonelca, cai Comitepi sirvinataca ninandami gushtan. Paica: “Caipi huauquipanicunata ayudashpa trabajanataca ninandami gushtapani” ninmi. “Caipi trabajanami ñuca huarmigu COVID-19 unguihuan huañujpica shinlli tucuchun, aguantachunga ninanda ayudahuarca. Porque caipi sirvijuimandami ayudata minishtinajuj huauquipanicunata ayudashpaca ocupado yalini. Y Jehová Dios paita sirvijcunata nunca na jichushachu nishca promesata pactachijtapashmi ñucapacha ricupashcani” ninmi.

Pundacuna shuj comité de socorropi sirvishca shuj huauquica ninmi: “Cunanga ñucami ayudata minishtijurcani y huauquicunaca ñucanchicuna minishtinajuj cosascunata cushca jahuapash, ñuca huarmiguta y ñucatapash ama yapata preocuparichunmi ali shimigucunata nishpa animashpa, consolarca” ninmi.

Imapash llaquicunaca na yashcapimi sucedinlla. Shinapash Jehovapa organizacionga obra mundialpa cushca contribución culquiguhuanmi llaqui apashca huauquipanicunataca ñapash ayudan. Quiquinbash donaciongunata cungapaj munashpaca donate.jw.org direccionda ricupangui. Quiquingunapa contribuciongunamandaca ninandami agradicipanchi.