Oficina de traducción tiaimandami ashtacacunaca beneficiarin

Traducishpa ayudaj ashtaca huauquipanicunaca Betelpica na traducinllu. Oficina de Traduccionbimi traducishpa ayudan. ¿Imamandata oficina de Traduccionmanda traducishpa ayudanaca ali cashca? Oficina de Traduccionmanda traducishpa ayudangapaca ¿imacunatallata minishtirin? Oficina de traducción maijan pushtupi cashcamandaca ¿imashinata traducinapica ayudan?

Oficina de traduccionga traducishpa ayudaj huauquipanicunapa shimita parlaj pushtupimi can. Bajo Alemán shimiman traducishpa ayudaj Karin paniguca ninmi: “Oficina de traducción de Cuauhtemocman rishcamandapachami traductor huauquipanicunahuanga Bajo Alemán shimitalla siempre parlanchi. Shinallata villachinaman rishpa, imagutapash randingapaj rishpapashmi Bajo Alemán shimita parlanchi. Siempremi ñucanchi shimita parlaj gentecunahuan canchi. Chaimi cunanbi imashina paicuna parlajta siempre uyanajunchi”.

Ghana llactapi Fraga shimiman traducishpa ayudaj James huauquica, Betelmanda huauquipanicunahuan na caita ushaimandami ninanda llaquirini nin. Shinapash paica ninmi: “Oficina de traduccionbi canataca ninandami gushtani. Villachinapi paicunapa shimipi villachijpi, gentecuna cushilla cajta ricushpami ñucapash ninanda cushijuni”.

Oficina de traducción maipi canataca ¿imashinata huauquicunaca aliguta ricun? Warwik llactapa Departamento Mundial de Diseño y Construccionbi sirvij huauqui Josephca ninmi: “Huaquin pushtucunapica michata, yacuta, internetta na fácil churaita usharinllu. Michata internetta na charimandami traducinaca na fácil can. Oficina de traducción maipi ali canata nara ricushpallatami, maijan pushtupi ali canata aliguta ricuna can”.

Oficina de traduccionga Tandanajui Huasipi, Jatun Tandanajui Huasipi canami ashtahuan ali can. Shinami traductor huauquipanicunaca oficina de traduccionman cada punlla rita ushan. Tandanajui Huasi, Jatun Tandanajui Huasi na lugarlla cajpimi, Cuerpo Gobernantepi sirvij huauquicunaca traductor huauquipanicuna traducishpa ayudaita ushachunmi, departamentocunata, huasicunata randichun aprobacionda cun. Shinapash imapash cambiocuna tiajpica chai departamentocunata, huasicunataca jatuita usharinllami. Chai jatushca culquitaca ashtahuan minishtirishca cosascunapimi utilizan.

Traducingapaj tucui minishtirishcacuna

Huata 2020pica traductorcuna oficina de traduccionbi minishtirishcacunata charichunga 13 millones de dolarcunami gashtarirca. Traducishpa ayudaj huauquipanicunaca computadoracunata, grabacionda rurangapaj equipocunata, internetta, traducingapaj shuj programacunatapashmi minishtin. Cada traductor huauquipanicunapami shuj computadora, computadorapa shuj shuj cosascuna, computadorapa programacunandica 750 dolarcuna valita ushan. Chai computadoracunapica shuj shuj programacunami tian. Shinallata traductor huauquipanicuna ashtahuan aliguta trabajaita ushachunmi Watchtower Translation System nishca programapash tian.

Traductor huauquipanicunaca oficinapi grabaita ushangapami microfonocunata, grabangapaj minishtishca cosascunatapash chasquirca. Chaimi traductor huauquipanicunaca COVID-19 ungui callarijpica grabangapaj minishtirishca cosascunataca paicunapa huasiman apaita usharca. Shinami traducishca publicaciongunata, traducishca videocunata grabashpa catita usharca.

Huaquin huauquipanicunaca traducishca publicaciongunata ricushpami ayudan. Shinallata shujcunaca oficina de traduccionda limpiashpa, arreglashpa, shuj shuj cosascunata rurashpapashmi ayudan. Sudáfrica llactapa Afrikáans shimiman traducishpa sirvij huauqui Cristinga ninmi: “Oficina de traduccionbica ashtaca publicador huauquipanicuna, precursor huauquipanicunami sirvita ushan”.

Oficina de traduccionbi ayudaj huauquipanicunaca ninandami cushijun. Shuj paniguca oficina de traduccionbi ayudaimandaca ninandami cushijuni ninmi. Shinallata chai llactamanda shimita parlaj huauquipanicunapa ayudatami grabaciongunata rurangapaca mañan. Totonac llactamanda traductora Juana paniguca ninmi: “Cunanga ñucanchi shimita parlaj huauquipanicunapa ladolla causaimandami, paicuna ayudajpi publicaciongunata, videocunata grabanaca ashtahuan fácil can”.

Oficina de traduccionguna tiashcamandami ñucanchi publicaciongunata liij ashtaca gentecunaca, ñucanchi publicacionguna ashtahuan ali traducishcata ricushca. República Democrática del Congo llactapa Kongo shimipi traducij Cédric huauquica ninmi: “Pundaca, huaquin huauquipanicunaca publicaciongunataca Kongo shimita parlaj gentecunaca na traducishcachu can ninmi carca. Paicuna parlanshna na traducishca cashcamandami shina nin carca. Pero cunanga, Kongo shimipi publicaciongunaca cunanbi gentecuna parlanshna traducishca cashcatami nin”.

Xhosa shimipi traducij Andile huauquipash chashnallatami nin: “Ashtaca huauquipanicunaca cunan traducishca publicaciongunaca ashtahuan intindirinallami can nishca. Pundaca, huahuacunaca Villajun revistataca inglés shimipimi liin carca. Pero cunanga Xhosa shimipimi liin. Shinallata Traducción del Nuevo Mundo Biblia paicunapa propio shimipi intindirinalla cajpimi huahuacunaca liinata gushtan”.

Obra mundialpa cushca contribuciongunahuan, shinallata donate.jw.org paginaman yaicushpa cushca contribuciongunahuanmi oficina de traduccionba gastocunataca pagaita usharin.