Comunidadpi causaj huauquipanicuna Jehovata tranquilo sirvichunmi ayudashcanchi

Latinoamericapica ashtaca runa gentecunami tian. Paicunaca paicunapa propio costumbreta, paicunapa propio parlaj shimitami charin. Ashtaca runa gentepuracunapica ñucanchi huauquipanicunapashmi causan. Latinoamericamanda runa gentecuna Bibliamanda yachachunga Testigo de Jehovacunaca runa gentecunapa 130 yali shimipimi publicaciongunataca traducinchi.a Ashtaca huauquipanicunaca runa cashcamanda cushilla sintirishpapash Jehová Diosta sirvingapaj munaimanda paicunapa costumbrecunata saquishcamandami llaquichi tucushca. Paicunata ayudangapaca imashinata ¿contribución culquiguta utilizashcanchi?

Paicunapa propio llactaman tigrachunmi ayudanchi

México llactapi Huichol nishca comunidadpi causaj huauquipanicunaca chai llactapi tiashca costumbrecunata imamanda na participan cashcatami respetohuan nirca.b Huauquipanicuna shina nijta uyashpami chai llactapi causaj huaquin gentecunaca ninanda culirarca. Chaimi 4 de diciembre de 2017​taca, huauquipanicunata llaquichirca. Chai gentecunaca ninandapacha culirashca caimandami huauquipanicunapa charishca cosascunatapash tucuchishpa paicunataca comunidadmanda llujchishpa cacharca. Cutin caiman tigramujpica huañuchishunmi nishpapashmi amenazarca.

Ladolla llactapi causaj huauquipanicunami calpachi tucushca huauquipanicunataca ayudarca. Shinapash paicunapa huasiman tigrachunga ¿imashinata ayudarca? Huauqui Agustinga cashnami nin: “Abogadota mascangapaca culquita na charircanchichu, shinallata papelcunata rurangapa maiman rinatapash na yacharcanchichu”.

Chai llactamanda huauquipanicunaca paicunapa crishcacunamanda llaquipi cajpimi Centroamérica sucursalmanda huauquicuna ñapash ayudarca. Primeroca imapacha pasajushcata yachangapami chai llactapa autoridadcunata ayudachun mañarca. Jipaca Comité de Coordinadores del Cuerpo Gobernantepi sirvij huauquicunami Departamento de Asuntos Legalhuan México llactapa sucursalhuan igual trabajachun aprobarca. Paicunami huicholes llactamanda huauquicunata ayudangapa papelcunata rurarca. Tiempohuanga México llactapi ashtahuan autoridadta chari tribunal Suprema Corte de Justicia de la Nación nishcamanmi chai juicioca chayarca.

Tucui llactacunamanda abogadocuna tandanajushpaca cashnami ninajurca, imashina shuj gentecuna runa gentecunata respetana derecho tian chashnallatami runapuracunaca tucuicuna respetarina cana can nirca.

8 de julio de 2020​tami, Suprema Corte de Justiciaca Testigo de Jehovacunapa favor tucurca. Chaimi huicholes comunidadmanda huauquipanicuna paicunapa huasiman tigrachun saquirca. Punda parlashca huauqui Agustinga tucui huauquipanicunapa shutipimi cashna nirca: “Ñucanchi huauquipanicuna tucuita ñucanchimanda rurashcamandaca ninandami agradicinchi. Huauquicuna na ayudajpica ñucanchimandaca imata ruranatapash na atinanchimanllu carcanchi” nircami.

“Jehovallami paipa organizacionda utilizashpa ashallagucuna cajpipash ninanda ayudan”

Ecuador llactapipashmi San Juan de Ilumanbi causaj huauquipanicunataca chashnallata pasarca. Huata 2014​pimi tandanajui huasita rurangapaj ña permisota llujshishca carca. Tandanajui huasita ña ruranajujpimi shuj sacerdoteca chai comunidadmanda 100 gentecunata tandachishpa huauquipanicuna tandanajui huasita ama rurachun jarcarca. Shinallata chai comunidadpi causajcunaca huauquipanicuna tandanajunata saquichunbashmi obligarca.

Huauquipanicunapa crishcacunata difindingapami Ecuador llactapa sucursalpa Departamento de Asuntos Legalhuan, Estados Unidospa sucursalpa Departamento de Asuntos Legalhuanmi huauquicunata ayudangapaca igual trabajarca. Tribunalcunaman apajpi chaipi arreglocunata rurashpami comunidadmanda gentecunaca huauquipanicuna cutin tandanajuchun shinallata Salón del Reinota rurai ushachun casilla saquirca. Shinallata ñucanchi huauquipanicunata ama jipa punllacunapi cutin llaquichichunmi ñucanchi abogadocunaca jatun tribunalcunataca comunidadpi runa gentecuna derechos humanos nishcata respetana cashcata intindichichunmi mañarca.

16 de julio de 2020​tami, Ecuador llactapa jatun tribunalpa Corte Constitucionalca ñucanchi huauquipanicunapa juiciota ricushpa ayudarca. Ilumán congregacionda ayudangapaca Ecuador llactamanda abogado huauquicunallami carca. Chai huauquicunahuanga shuj llactamanda chuscu abogado huauquicunapashmi carca. COVID-19 unguimandami shuj llactamanda ñucanchi abogado huauquicunaca internetta utilizashpa tandanajuita charirca. Primera vezmi testigo de Jehovacuna shuj juiciota chimbapurangapaj internetta utilizachunga shuj tribunalca saquishca.c Ñucanchi abogado huauquicunaca shuj shuj llactamanda abogadocunahuan tandanajushpami cashna nirca “comunidadpi causaj tucui runa gentecunami derechos humanostaca charita ushan” nircami.

Cunangamanmi Ilumán llactamanda huauquipanicunaca Corte Constitucional ima ninata shuyanajun. Shinallata paicunata ayudashcamandami ninanda agradicin. Quichua congregación Ilumanmanda huauqui Césarca cashnami nin: “Jehovallami paipa organizacionda utilizashpa ashallagucuna cajpipash ninanda ayudan”.

Ilumán congregacionda ayudashca abogadocunaca tucuicunami Testigo de Jehovacuna carca. Paicunaca imatapash na cobrashpallami ayudarca. Huauquicunapa juiciota tribunalcunapi difindingapaca aliguta prepararina tiempota llujchina culquita charinapashmi minishtirirca. México llactamanda huauquipanicunapa juiciota difindingapaca ñucanchi huauqui abogadocunaca 380 yali horascunatami aliguta prepararirca. Shinallata papelcunata traducingapaca 240 horascunatami pararca. Cutin Ecuador llactamanda huauquipanicunata ayudangapaca tucui llactacunamanda casi 40 abogadocunami ayudarca. Huauquipanicunata juiciopi ayudangapaca ¿ima culquihuanda ayudashcanchi? Mundo enteromanda huauquipanicuna donate.jw.org paginapi contribuciongunata carashpa ayudashcamandami huauquipanicunataca ayudaita ushashcanchi. Tucui shunguhuan caranata yachashcamandami ninanda agradicinchi.