Jehová Dios parlajtami Samuelca uyarca

Elí shuti sumo sacerdoteca ishcai churicunatami charirca, paicunaca Hofní y Finehás shuticunami carca. Paicunaca tabernáculo nishcapimi sacerdotecuna shina sirvinajurca. Paicunaca Jehovapa mandashcacunataca na cazunajurcachu. Shinallata israelitacunatapash nalimi tratan carca. Jehovaman sacrificiota rurachun israelitacuna apashca animalcunamandaca Hofní y Finehás runacunaca ashtahuan ali aichatami japin carca. Elí ‘runaca paipa churicuna, imatalla rurajtaca tucuitami yacharca’. Shinapash nimata na rurarcachu. Chaita ricushpaca ¿imatashi Jehová Diosca ruragrijurca?

Samuel runagu Hofní y Finehás runacunapa jipa cashpapash na paicunashnaca carcachu. Chaimandami Jehová Diosca Samuelhuanga cushijushca carca. Shuj tutaca, ña puñujushpami Samuelca paita cayajujta uyarca. Chaimi calpashpa Elipamanga: “Ñuca amolla ¿ñucata cayahuarcanguichu? Caipimi capani” nirca. Chaimi Elica: “Ñucaca na cayamurcanichu, puñungapaj tigrailla” nircami. Shina nijpimi Samuelca puñungapaj tigrarca. Chai jipaca Samuelca quimsa viajecamanmi paita cayajta uyarca. Jehová Dios Samuelta cayajushcata cuenda japishpami Elica: ‘Cutin puñungapaj rilla’. Cutin cayajpica “‘Jehová Dios ñucaca quiquinba sirvijmi capani. Ñucaca uyajupanimi parlapailla’ ningui” nirca.

Samuel cutin puñungapaj rishca jipallami “Samuel, Samuel” nishpa cayajta uyarca. Shina cayajpimi Samuelca: ‘ñucaca canda sirvijmi capani, ñucaca uyajupanimi parlapailla’ nirca. Chaimi Jehová Diosca Samueltaca cashna nirca, Eliman cashna ningui, canba churicuna tabernáculo huasipi pecadota ruranajujta yachashpapash na imatapash rurashcamandaca candapash, canba familiatapash juzgasha nircami. Cayandi punllaca Samuelca tabernáculo nishca huasi pungucunatami pascarca. Jehová nishcata Eliman villanataca ninandami manllarca. Shinapash Elica: “Taita Diosca ¿imatata nirca? Por favor tucuita villahuai” nishpami tapurca. ‘Shina nijpimi Samuelca tucuita villarca’.

Samuel ña jatun cajpipash Jehová Diosca paitaca na saquircachu, paipa amigo cashpami catirca. Jehová Diosmi Samueltaca profeta, juez cachunbash agllarca. Chaitaca tucui israelitacunami ali yacharca.