Balaam runapa burrogumi parlarca

Israelitacuna casi 40 huatacunata desiertopi cashpaca, ashtaca ashtaca shinlli llactacunatami macanajushpa mishashca carca. Chai jipaca ‘Moab llactapimi, Jordán yacu ladopi carpacunata shayachishpa’ causanajurca. Israelitacuna Canaán llactaman yaicuchunga ña ashallami faltajurca. Chaipica Moab llactata mandaj Balac shuti reyca israelitacuna alpacunata quichunga yashpami ninanda manllajurca. Chaimi ‘Balaam shuti runata cayashpa’ israelitacunata ima llaquipash japishpachari ali canman nigri nishpa cacharca.

Shinapash Jehová Diosca Balaamdaca: ‘Chai gentecunata, ima llaquipash japishpami ali canman ningapaca ama ringuichu’ nircami. Chaimi Balaamga Moab llactamanga ñana ringapaj munarca. Cutinmi Balac reyca, Balaamdaca Moab llactaman shamui, “can imata mañajpipash, cupashallami” nirca. Shinapash Balaam runaca Balac reypamanga na rircachu. Chaimandami Jehová Diosca Balaamdaca: “Canda pushangapaj shamushca cajpica, jatarishpa paicunahuan rilla. Shina cajpipash ñuca imata rurai nishcatalla rurana cangui” nirca.

Chaimi ‘Balaamga paipa burrogupi tiarishpa Moab llactata mandajcunahuan rirca’. Balaamga Jehová Dios israelitacunata ama shina nigringuichu nishca cajpipash, israelitacunata ima llaquipash japishpachari ali canman nina yuyaihuanmi rijurca. Shina rijujpimi Jehová Diospa shuj angelca ñanbi quimsa viajeta ricurirca. Balaamba ñavipica chai angelca na ricurircachu. Shinapash paipa burroguca angelta ricujurcami. Pundapica “chaita ricushpami burroguca, ñanmanda Ilujshishpa pambata rirca”. Jipamanga ‘burroguca, Diospa angelta ricushpami, pirca ladoman quimirishpa, Balaamba chaquita pircapi llapirca’. Chai jipaca burroguca, chaupi ñanbimi siririshpa quidarca. Chai quimsa viajecunatami Balaamga shuj caspihuan burroguta macarca.

Jipamanga Jehová Dios, burroguta parlachijpimi burroguca Balaamda: ¿Imamandata ñucataca macahuangui? nishpa tapurca. Chaimi Balaamga cashna nishpa tigrachirca: ‘¿Imashpata ñucata na cazuhuangui? Espadata ñuca maquipi charijushpaca cunanllatami candaca huañuchiman’ carcani. Shina nijpimi burroguca: ‘Canga, ñucata charishca punllamandami maimanbash ñucapi tiarishpa purijushcangui. Ashtahuangarin candaca ¿nachu siempre cazujushcani?’ nircami.

Chai jipami Jehová Diosca Balaamdaca angelta ricuchun saquirca. Chai angelca: Nachu Jehová Diosca israelitacunataca ima llaquipash japishpami ali canman nishpaca ama nigringuichu nirca. Shina nijpimi Balaamga: Pandarishcanimi ‘chaiman rina nali cajpica, tigrapashallami’ nirca. Chaimi angelca: “Chai runacunahuan rilla. Shina cajpipash, ñuca ima nishcatallami rimana cangui” nirca.

Balaamga ¿Taita Diosta cazurcacha? Na, na cazurcachu. Jipamanga quimsa viajetami israelitacunata ima llaquipash japishpachari ali canman ningapaj munarca. Shinapash chai quimsa viajecunatami Jehová Diosca ‘nalicachishpa rimagrijujtaca bendiciana shimicunaman’ tigrachirca. Shinami israelitacunaca Moab llactata llaquichirca, chaipimi Balaamga huañurca. Balaam runa callarimanda Jehová Diosta cazushpaca ¿nachu ali canman carca?