Jesusca ashtaca milagrocunatami rurarca

Jesusca Diospa Reinomanda ali villaicunata villachingapami cai Alpaman shamurca. Jehová Diosca Jesús milagrocunata rurachunbashmi espíritu santota curca. Shinami Jesusca cai Alpapi pai rey cashpa imatalla rurana cashcata ricuchigrijurca. Por ejemplo, Jesusca imapash unguicunata jambinllami carca. Jesús maiman rishpapash ungushcacuna jambihuai nijpica, Jesusca tucuicunatami jambinlla carca. Shinallata na ricui ushajcunata, na uyai ushajcunata, paraliticocunatapashmi jambirca. Jesuspa jahualla churajunata tacarishpami gentecunaca jambirita ushanalla carca. Shinallata Jesusca gentecunamandaca demoniocunatapashmi llujchirca. Gentecunaca Jesustaca tucui ladocunamanmi catinajurca. Jesusca pailla cangapaj munashpapash tucuicunata ayudangapami munarca.

Shuj viajeca shuj paralítico runagutami Jesuspaman aparca. “Shinapash ashtaca gentecuna chai huasipi cajpimi, Jesuspaman apaitaca na ushanajurca. Chaimi paicunaca Jesús shayajuj pushtupipacha, huasi jahuata utujushpa chai runagutaca camillapi uriajuchinajurca”. Chaimi Jesusca chai paralítico runagutaca: “Jatari, canba camillata japishpa canba huasiman rilla” nirca. ‘Chaita ricushpami tucuicuna ninanda manllarinajurca’.

Shuj punllaca Jesús shuj puebloman chayajujpimi, lepra unguita charij 10 runagucunaca: “Yachachij Jesús, ñucanchitaca llaquihuayari” nishpa caparinajurca. Chai tiempopica lepra unguita charijcunaca shuj gentecunamanga na quimirita ushanllu carca. Ashtahuanbash Diospa Leypica lepra unguita charijcunaca jambirishca jipaca templo huasiman rinami can nijurcami. Chaimi Jesusca paicunataca templo huasiman richi nirca. Templo huasiman rinajushpallatami chai ungushca runacunaca ali tucurca. Chai 10 runagucunamanda shujca, ña ali tucushcata cuenta japishpami Jesuspaman Taita Diosta alabangapaj tigrarca.Chai 10 runacunamandaca shujllami Jesusta agradicingapaj tigrarca.

Shuj huarmica 12 huatacunatami ungushca carca. Ñana ushashpami uchalla jambiringapaj munajurca. Chaimi chai huarmiguca huashata shamushpa Jesuspa jahualla churajushca ropa pundapi tacarirca. Shinami chai rato jambirirca. Shina tacarijpimi, Jesusca: “¿Pita tacarihuarcanguichi?” nishpa tapurca. Chaimi chai huarmica ninanda manllarishpa Jesuspaman quimirishpa, ima pasajushcata parlarca. Jesusca chai huarmitaca: “Ñuca huahualla. Tucui shunguhuan crishcamandami ali tucushcangui. Ripailla, ama pinarijuichu” nirca.

Sinagoga huasipi mandaj Jairo runa shamushpami Jesusta cashna nishpa mañarca: “Ñuca ushiguca huañujupanmari. Ñuca huasiman ripashun” nirca. Shinapash Jesús Jairopa huasiman nara chayajpillatami chai cuitsaguca ña huañushca carca. Ña chayashpaca, tucuicuna ninanda llaquirishpa huacanajujta ricushpami Jesusca: “¿Imashpata cangunaca cashnapacha caparishpa ninanda huacanajunguichi? Cuitsaguca na huañushcachu, puñuitallami puñujun” nirca. Chai jipallami chai cuitsagupa maquita japishpa: ‘Cuitsagu jatari’ nirca. Shina nijhuanmi chai cuitsaguca jatarirca. Chaimi Jesusca cuitsagupa taitamamataca nirca, micunaguta carapaichi nishpa. Yuyapai ¿chai cuitsagupa taitamamaca imashinashi sintirirca?