Bibliapa consejocunaca alipachami can

SHUJ museopi punda tiempo cosascunata ricujushcanguiman. Shinapash casi tucuillami faquirishca, asha pedazo illaj o huaglishca can. Shinapash shujca, casi nima na huaglishcachu can. Chaimi quiquinga tapungui: “¿Caica na punda tiempo cosaschuyarin?” nishpa. Shina nijpimi museota rijsichijuj runaguca nin: “Caica ashtahuan punda tiempomandami can, imahorapash na arreglashcanchichu” nishpa. Chaimi quiquinga cutin tapunguiman: “¿Nachu shuj ladopi alichishca tiajurca?” nishpa. Shina nijpimi chai runaguca nin: “Na, tamiapipash, huairapipash na huaglishcachu, taucacunami tucuchingapaj munashpapash na ushashca” nishpa. Shina nijpica tal vez pensaripanguipashchari “¿imamandata na huaglishca?” nishpa.

Museopi punda tiempo cosascunashnallatami tauca librocunapi escribishcacunaca huaglishca. Shinapash Bibliaca na huaglishcachu. Punda tiempo tauca librocunapica mushuj descubrimiento nishcacunami escribishca tiajurca. Shinapash cunanbi ricujpica, ñana mushujchu can. Ungüicunamanda parlashpapash, cunanbi ricujpica ali tucuchunga na ayudanllu cashca. Ashtahuangarin punda tiempopi escribishca cosascunaca pedazocunapash illaj, faquirishcacuna o huaglishcacunami can.

Bibliaca ñami 3 mil 500 yali huatacunata tiashca. Shinapash na huaglishcachu. Bibliaca na alichu can nijpipash, rupachijpipash, Bibliata ama rurachun, ama liichun jarcajpipash, Bibliaca na tucurishcachu. Mushuj descubrimiento nishcacuna llujshijpipash, Bibliapica siempremi cabalta villajushca. Bibliata escribishca punllacunapi, huaquin cosascunata gentecuna nara yachajpipash, Bibliapica ñami chai cosascunaca escribishca tiajurca (“Bibliaca ¿punda tiempo librollachu can?” nishca recuadrotapash ricupangui).

¿IMA CONSEJOCUNATA CUNANBIPASH ALI CAN?

Tapuripashcanguichu: “¿Bibliapi consejocunaca ciertopachachu cunanbipash ali can?” nishpa. Chaipaca pensaripai ¿nachu guerracunamanda, cai Alpata huaglichishcamanda o nali gentecuna mirashcamanda cunanbica ashtaca jatun llaquicuna tian? nishpa. Shinaca Bibliapa huaquin consejocunata ricupashun. Chaicunata ricujushpaca pensaripai: Bibliapi nijujta pactachishpaca ¿nachu gentecunaca ashtahuan ali causaita ushanman? nishpa.

TRANQUILO, ALI CAUSANATA MASCANA

Mateo 5:9​pica ninmi: “Fiñanajushpa causajcunata alichijcunaca, ninandami cushijun” nishpa. Romanos 12:18​pica ninmi: “Canguna rurai ushanalla cajpica, tucuicunahuan casilla aligutami causana canguichi” nishpa.

LLAQUINA, PERDONANA

Mateo 5:7​pica ninmi: “Shujcunata llaquishpa juyajcunaca, ninandami cushijun. Paicunami, Dios llaquinata japinajunga” nishpa. Traducción del Nuevo Mundo Bibliapica Colosenses 3:13​pica ninmi: “Caishujmanda chaishujmanda aguantarishpa, llaquichirishca cashpapash randimandami perdonarina canguichi. Imashinami Jehováa Dios cangunata perdonarca, shinallatami cangunapurapash perdonarina capanguichi nishpa.

TUCUI GENTECUNAMI IGUAL CAN

Hechos 17:26​pica ninmi: “Shujlla runamandami cai pachapica, maipipash shuj shuj gentecuna mirashpa causanajuchun Diosca rurashca” nishpa. Hechos 10:34, 35​pica ninmi: “Taita Diosca, na pitapash ñavita ricushpalla chasquinllu. [...] Maijan llactapi cashpapash, paita manllashpa, [alita] rurajtami, Diosca alicachin” nishpa.

CAI ALPATACA CUIDANAMI CAN

Génesis 2:15​pica ninmi: “Mandaj Taita Diosca, Edén huertapi imatapash rurashpa cuidachunmi, runataca apashpa churarca” nishpa. Apocalipsis o Revelación 11:18​pica ninmi: ‘Cai pachata tucuchijcunataca’ Taita Diosca tucuchingami nishpa.

NA ASHTAHUAN MUNANA, NA JATUN JUCHACUNAPI URMANA

Lucas 12:15​pica ninmi: “Charij tucunatalla na munashpami, aliguta yarishpa causana canguichi. Imata ninanda maijan runa charishpapash, chaihuan unaita causajuitaca, na ushangachu” nishpa. Efesios 5:3​pica ninmi: ‘Huainayashpami causanajun, tucui mapatami ruranajun, charijyanatalla munashpami causanajun nishca shimicunaca, uyaritallapash ama uyarichun. Diospalla causajcunami’ canguichi nishpa.

HONRADO CANA, TRABAJANA

Hebreos 13:18​pica ninmi: “Tucuita aliguta rurangapaj [o tucuipi honrado cangapaj] munashpami chaita ruranata yariajlla causanajunchi” nishpa. Efesios 4:28​pica ninmi: “Shuhuashpa causashca cashpapash, na ashtahuan shuhuanachu” nishpa.

LLAQUI APANAJUJCUNATA AYUDANA

1 Tesalonicenses 5:14​pica ninmi: ‘Na catinayanllu nijcunatapash ayudapanguichi. Pitapash ama ñapash fiñashpa yachachipanguichi’ nishpa. Santiago 1:27​pica ninmi: “Taita mama illaj huahuagucuna, sapalla huarmigucuna jatun llaquipi cajpica ricugrinami” can nishpa.

Bibliapica consejocunata cushpallaca na saquirinllu. Ashtahuangarin, chai consejocunata tucui shunguhuan alicachishpa, pactachichunmi yachachin. Shinaca ¿nachu jatun llaquicuna ama tiachunga, Bibliapi nijujta gentecuna ashtahuan pactachishpaca ali canman? Cunan punllacunapimi Bibliapi consejocunaca ashtahuan minishtirijun. Shinapash ¿imashinata Bibliapi consejocunaca quiquindapash ayudaita ushan?

¿IMASHINATA BIBLIACA CUNANBIPASH AYUDAN?

Ashtahuan alipacha yachajushca runaguca nircami: ‘Diospa ali yachaitaca [ali] rurashcacunahuanmi ricuchin’ nishpa (Mateo 11:19). Shinaca, shuj consejo ali cashcata yachangapaca, chai consejota pactachishpami ali cashcataca ricunalla cashca. Chaimandami tapurina capangui: “Bibliapi consejocuna ciertopacha ali cashpaca ¿ñachu ñuca ali causachun ayudana can? ¿Bibliaca ciertopachachu ñuca problemacunata arreglachun ayudai ushan?” nishpa. Shuj ejemplota ricupashun.

Dianacab cushilla, alimi causarca. Shinapash cungashcapimi, paipa ushica shuj accidentepi huañurca, cusahuan separarirca, shuj llaquicunatapash charirca. Dianaca ninmi: “Ñucaca ratomi ushi illaj, cusa illaj, huasi illaj quedarcani. Causana munaitapash na charircanichu, llaqui llaquimi carcani” nishpa.

Dianaca cai shimicuna cierto cashcatami cuenta japirca: ‘Ñucanchi causana punllacunaca, [70] huatacamanllami. Ashtahuangarin ninan shinllicunallami, [80] huatata causanga. Ninan shinlli cashpapash llaquinayaita causangapallami. Huatacunaca ñapash yalijpimi, calpanshna rinchi’ (Salmo 90:10).

Chai llaquicunata aguantangapaca, Bibliapa consejocunatami Dianaca mascarca. Bibliapi consejocunaca ashtacatami Dianataca ayudarca. Imashinami cati quimsa temacunapi ricupashun, ashtaca gentecunami Bibliapa consejocunaca ali causachun ayudajta cuenta japishca. Shinallata cuenta japishcami Bibliaca punda tiempo libro cashpapash cunangaman alipacha cashcata. Chaishuj librocunashna huatacuna yalijpi na sirvijca na cashcachu. Shinaca ¿imamandata Bibliaca na chaishuj librocunashna can? Bibliaca ¿gentecunalla escribishca libro o Taita Dios escribichishca librochu can? (1 Tesalonicenses 2:13).

Huaquinbica quiquinbash pensaringuipashchari, asha huatagucunatalla causashpapash ashtaca problemacunahuanmi causanchi nishpa. Shinaca, problemacunapi cashpaca ¿maipita ayudata mascaita ushapanchi?

Bibliapi. Biblia imashina ayudajtaca quimsa yuyaicunapi ricupashun:

1. Llaquicunapi ama urmangapaj.

2. Problemacunata arreglangapaj.

3. Na cambiai ushana cosascunata aguantangapaj.

Cati temacunapimi chai quimsa yuyaicunamanda yachajupashun.