¿Pita Taita Diostaca rurarca?

Shuj taitaca paipa churigutaca ninmi: “Ashtaca huatacuna huashamanga Taita Diosmi cai Alpata, sisagucunata, animalgucunata, Indita, Lunata, estrellacunatapash rurarca” nishpa. Shina nijpimi huahuaguca pensarishpa nin: “Papito ¿pita Taita Diostaca rurarca?” nishpa.

Shina nijpimi taitaca nin: “Taita Diostaca pipash na rurarcachu. Taita Diosca siempremi tiashca” nishpa. Taita shina nijpimi huahuaguca ari nishpa quedanlla. Shinapash, chai huahuagu viñashpaca pensarinmi: “¿Imashinashi Taita Diosca siempre tiashca? Indita, Lunata, shuj cosascunatapash Taita Dios rurashca cajpica ¿pishi Taita Diostaca rurarca? nishpa.

Bibliapica ninmi, Taita Diostaca na pipash rurarcachu, Taita Diosca siempremi tiashca nishpa. Moisespash cashnami nirca: ‘Urcucunata nara rurashpallata, cai pacha llactacunata nara churashpallatami canga ña tiashcangui. Na tucurina causaita causaicamanbash canmi Taita Dios cangui’ nishpa (Salmo 90:1, 2). Profeta Isaiaspash cashnami nirca: ‘Causaita causajuj Taita Dios, Mandaj Dios cajtaca ¿nachu yachashcanguichi, nachu uyashcanguichi? Paimi tucui cai pachata rurarca’ nishpa (Isaías 40:28). Judas escribishca cartapipash ninmi, Taita Diosca ‘causaita causaimandami’ tiashca nishpa (Judas 25).

Apóstol Pablo shinami, cai textocunapash ricuchinajun, Taita Diosca ‘causaita causaicaman Jatun Mandaj’ Taita Dios cashcata (1 Timoteo 1:17). Paica siempremi tiashca. Siempremi tiashpa catinga (Apocalipsis 1:8). Taita Diostaca pipash na rurarcachu, ima horapash na tucuringachu. Paishnallaca pipash na tianllu.

Shinapash Taita Dios siempre tiashcata crinaca shinllimi can. ¿Imamanda shinlli can? Ñucanchicunaca asha huatacunatallami causanchi. Chaimandami Jehová Dios cuenda tiempota cuentaitaca na ushanchi. Shuj ejemplota ricupashun. Taita Diosca siempre causaimandami huaranga huatacunataca shuj punllatashna cuentan (2 Pedro 3:8). Chaita aliguta intindingapaca saltamonte nishca animalgupi pensarishun. Chai animalguca 50 punllacunatallami causai ushan. Paica gentecuna imamanda 70 ó 80 huatacunata causajtaca na intindi ushanmanllu. Ñucanchicunapash Taita Dioshuan ricujpica saltamonte animalgu cuendami canchi. Taita Dios siempre tiashcata intinditaca na ushanchichu (Isaías 40:22; 55:8, 9). Shinaca, Taita Diosmanda tucuita intindingapaj munashpapash gentecunaca na tucuita intindi ushanchichu.

Taita Dios siempre tiashcata, siempre tianata crinaca alimi can. ¿Imamandata ali can? Pensaripai, Taita Diosta pipash rurashca cajpica, Taita Diosca Tucuita Ruraj Taita Dios caitaca na ushanmanllu. Shinapash Bibliapica ninmi, Taita Diosca Tucuita Ruraj Taita Diosmi can nishpa (Apocalipsis 4:11). Shinallata Bibliapi nishca shinaca, callaripica cai Alpapash, Indipash, Lunapash, shuj cosascunapash na tiarcachu (Génesis 1:1, 2). Callaripica Taita Diosllami tiarca. Chai jipami paipa Churi Jesusta, angelcunatapash rurarca (Job 38:4, 7; Colosenses 1:15). Taita Diostaca na pipash rurarcachu.

Aliguta pensarijpica unai unai huatacunatami cai Alpapi causai tiashca. Ñucanchi causanajunchi Alpapash, jahua pachapash aliguta rurashca cajpimi unai unai huatacunata parashca, na tucurishca. Chaicunami Taita Dios siempre tiashcata ricuchin. Taita Dios causaita cujpillami ima cashpapash causai ushan (Job 33:4).