Jesuspa Chaquita Catishpa Causashunchi Yachachishunchi tandanajuipi yachajungapaj hojapa referenciacuna
3-9 DE JUNIO
BIBLIAPA VALISHCA YUYAICUNA | GÁLATAS 4-6
“Cai chimbapuraica ñucanchicunatapashmi ayudan”
it-1-S 65 párr. 1
Agar
Apóstol Pabloca, Agar huarmitaca Moisesman cushca Leycunata catij israelitacunahuanmi chimbapurarca. Chai israelitacunaca Sinaí urcupimi Moisesman cushca Leycunataca pactachishpa Jehová Diostalla sirvishunllami ari nirca. Chai punllamandapachami israelitacunaca ‘juchapa gañangunashna’ tucurca. Juchayucuna cashcamandami chai israelitacunaca Moisesman cushca Leyta cabalta pactachitaca na usharca. Moisesman cushca Leyta na pactachi ushashcamandami israelitacunaca huañungacaman gañangunashna o esclavocunashna cashpa catina carca (Jn 8:34; Ro 8:1-3). Apóstol Pablopa causajuj tiempopi Jerusalenmanda israelitacunaca Agar huarmitami ricuchinajurca. Chai israelitacunaca Jerusalén llactapi causajushcamandami Diospa agllashca llacta carca. Tucui israelitacunami esclavocuna shina carca. Shinapash ungido huauquipanicunaca Diospa espirituhuan agllashcacuna cashcamandami ‘jahua pachamanda Jerusalenba’ huahuacuna can. Jahua pachamanda Jerusalenga jahua cielopi Jehovapa organizaciondami ricuchijun. Cai organizacionga Jehovapa huarmigushnami can. Imashinami Sara huarmiguca na esclava carca, shinallatami jahua pachamanda Jerusalenga na esclava can. Shinapash imashinami Isaacta, Ismael runa catiriashpa llaquichirca, shinallatami “jahua pachamanda Jerusalenba” huahuacunataca, Jerusalén llactapi causaj israelitacunaca catiriashpa llaquichirca. (“Jahua pachamanda Jerusalenba” huahuacunaca, Jesús quishpichijpimi quishpirirca). Chaimandami Jehová Diosca israelitacunataca ñana paipa agllashca llactatashna chasquirca. Israelitacunaca Agar huarmi paipa churi Ismaelhuan calpachi tucushca shinami Jehová Diospa ñaupamandaca calpachi tucurca (Gál 4:21-31; Jn 8:31-40tapash liipangui).
Diospa Reino mandanata crishunchi
11 Abrahanhuan Rurashca Pacto pactarijpimi Abrahanba huahuacunaca Canaán alpacunapi causarca. Shinapash Bibliapi nishca shinaca, Abrahanhuan Rurashca Pactomandaca shuj bendiciongunapash tianarami carca (Gál. 4:22-25). Apóstol Pabloca yachachircami, Jesusmi Abrahanba miraipa ashtahuan importante parte can nishpa. Shinallata nircami: ‘Cristopa cashpaca, Abrahanba miraicunami canguichi. Shina cashpami Dios carashapachami nishcataca japigrinapacha canguichi’ nishpa. Shinaca Jesucristopa caimandami 144 mil ungidocunapash Abrahanba mirai can (Gál. 3:16, 29; Apoc. 5:9, 10; 14:1, 4). Cutin, Génesis 3:15 profeciapi huarmica ¿pita can? Jehová Diosta jahua pachapi ali sirvijcunami can. Paicunatami Bibliapica ‘jahua pachamanda Jerusalén’ nin (Gál. 4:26, 31). Abrahanhuan Rurashca Pactopi nishca shinaca, huarmipa miraimandami cai Alpapi llactacunaca bendiciai tucuna carca.
Bibliapa Valishca Yuyaicunata Mascashunchi
Jehová Diospa espíritu santo ayudachun saquishpaca ¿imacunatallata rurai ushapanchi?
Espiritualmente ali cangapaj esforzarishpaca Taita Diospa espirituta chasquishpami ñucanchi yuyaicunata cambiai ushashun. Chaimi Jesús pensashcashna pensai callarishun (1 Cor. 2:16). Shinallata Taita Diospa espíritu santoca ñucanchi shungumanda jariyana munaicunata anchuchichun, ali cualidadcunata charichunmi ayudan (Gál. 5:16, 22, 23). Nali munaicunata charishcata, ashtaca cosascunata charina munaicunata charishcata cuenta japishpaca, cambiangapami esforzarishpa catina capanchi. Chaipaca Jehová Diospa espíritu santota mañapashunchi. Chaimi ali pensamientocunata charichun ayudanga (Luc. 11:13). Apóstol Pedro ima tucushcata ricupashunchi, paica huaquinbica espiritualmente na shinlli cashcatami ricuchirca (Mat. 16:22, 23; Luc. 22:34, 54-62; Gál. 2:11-14). Jehová Dios ayudajpimi apóstol Pedroca Cristopa yuyaita chari callarirca. Paica espiritualmente ali cangapami esforzarishpa catirca. Ñucanchipash shinallata rurapashunchi.
w10-S 1/11 15
¿Yachapashcanguichu?
“Ñuca cuerpopi chugricuna ali tucushcapash, Apunchi Jesusmandami ricuchijun” nishpaca, ¿imamandata apóstol Pabloca parlajurca? (Gálatas 6:17).
▪ Punda siglopi Jesusta catijcunaca, cai textopi apóstol Pablopa shimicunata uyashpaca shuj shuj yuyaicunatami intindishcanga. Por ejemplo, punda tiempocunapica guerracunapi japishca prezocunata, templo huasicunata shuhuajcunata, pacajushpa ringapaj munaj esclavocunataca jirruta rupachishpami paicunapa cuerpopi shuj señaltashna churan carca. Chai señalta apajcunaca shujcunapa ñaupajpica nali, pinganayaipachami ricurin carca.
Shinapash señalcunata charijcunataca na siemprechu nalicachishpa ricun carca. Tauca gentecunaca shuj llactamanda o shuj costumbrecunata charishcata, o shuj religionmanda cashcata ricuchingapami cuerpopica imapash señalcunata churarin carca. Theological Dictionary of the New Testament nishca diccionariopica ninmi: “Siriocunaca Hadad, Atargatis nishca dioscunata sirvingapaj munashcata ricuchingapaca, maquicunapi o cungapimi huaquin señalcunata churarin carca [...]. Dionisio nishca diosta adorajcunaca hiedra nishca fangatami señal cuenda churarin carca” nishpa.
Shinallata Bibliata huaquin investigajcunaca, apóstol Pabloca Jehová Diosta sirvijuimanda, shuj shuj llactacunapi villachijushcamanda macai tucushpa paipa cuerpopi charishca chugricunamandami parlajushcanga nin (2 Corintios 11:23-27). Shinaca apóstol Pablo “ñuca cuerpopi chugricuna ali tucushcapash, Apunchi Jesusmandami ricuchijun” nishpaca paipa cuerpopi charishca chugricunamanda o señalcunamandaca na parlajushcachu. Chaipa randica Taita Diosta, Jesustapash pai imashina sirvishpa causajushcamandami parlajushcanga.
10-16 DE JUNIO
BIBLIAPA VALISHCA YUYAICUNA | EFESIOS 1-3
“Jehová Diosca cielopipash cai Alpapipashmi tucuita shujlla shina cachun tandachijun”
it-2-S 981 párr. 2
Pacalla yarijushca
Jesús Diospa Reinopi mandana. Apóstol Pablo escribishca cartacunapica pacalla yarijushca Cristo Jesusmandami ashtahuan intindichijun. Efesios 1:9manda 11camanga Taita Dios cai pacalla yarijushcata rijsichishcatami ricuchin. Chaipica ninmi: “Shina caramushpami, ali munaita pai charinshnallata, pacalla yarijushcata rijsichirca. Chaita ruranataca, paillatami yarijushca carca. Diosca, pai munashcata rurana huatacuna chayamujpica, jahua pachapi tiajcunahuan, cai pachapi tiajcunahuambashmi, tucuillata tandachishpa, Cristo mandashpa tiajuchun churanga. Paihuan shujlla tucushpami, Dios carajpi japircanchi. Ñucanchi chaita japichunga, Diosmi pundamandapacha munashpa, paillata pactachijun” nishpa. Cai ‘pacalla yarijushcapurapica’ Jesús Diospa Reinopi mandanapashmi can. Apóstol Pablo “jahua pachapi tiajcunahuan” nishpaca Cristohuan mandangapaj cieloman rigrijujcunamandami parlajurca. Cutin ‘cai pachapi tiajcuna’ nishpaca cai Alpapi Jehová Diospa munaita rurajcunamandami parlajurca. Jesusca, pacalla yarijushcapurapica Diospa Reino cashcatapashmi paipa catijcunamanga intindichirca. Chaimi nirca: “Taita Diosca, pai mandajuj llactagumandaca pipash na yachai ushashcatami cangunamanlla yachachin” nishpa (Mr 4:11).
w12-S 15/7 27, 28 párrs. 3, 4
Jehová Diosca paipa familiatami tandachijun
3 Jehová Diosca imata rurashpapash, siempremi paipa munaita pactachingapaj ruran. Chaimandami ‘Taita Diosca, pai munashcata rurana huatacuna chayamujpica, jahua pachapi tiajcunahuan, cai pachapi tiajcunahuambash’ tucuita shujlla shina cachun tandachijunga (Efesios 1:8-10, liingui). Caita pactachingapaca Taita Diosca ishcai cosascunatami rurajun. Callaripica ungido huauquipanicunatami cielopi causai ushachun yachachijun. Jesusmi paicunataca umashna ñaupaman apajun. Caitaca huata 33pi, Pentecostés fiesta punllapimi Jehová Diosca rurai callarirca. Cai huatapimi Jehová Diosca Jesushuan jahua cielopi causangapaj rigrijuj ungidocunataca tandachi callarirca (Hech. 2:1-4). Jesús huañushcamandami ungido huauquipanicunaca alita rurajcuna cai ushashca. Shinallata cielopi para siempre causaitapash chari ushashca. Chaimandami cushijushpa nin: ‘Diospaj huahuacunami canchi’ nishpa (Rom. 3:23, 24; 5:1; 8:15-17).
4 Catipica Diospa Reino mandajujpi, cai Alpapi causai ushachunmi paita sirvijcunata yachachijun. Cai Alpaca shuj paraisomi tucunga. Cai alpapi causagrijuj callari grupoca ‘pipash na cuentai ushanalla, ashtaca gentecunami’ can (Apo. 7:9, 13-17; 21:1-5). Jesús Diospa Reinopi mil huatacunata mandajujpimi tauca millón huañushcacuna causarishpa, cai alpapi “pipash na cuentai ushanalla, ashtaca” gentecunahuan tandanajushpa causanga (Apo. 20:12, 13). ¡Huañushcacuna causarijpimi tucuicuna cushilla, shujllashna causanajushcata ricuchi ushashun! Jesús mil huatacunata mandajushca tucurijujpimi, cai Alpapica shuj jatun prueba tianga. Chai pruebapi Jehovatalla sirvijushcata ricuchijcunaca, “Diospa huahuacuna” tucushpami cai Alpapi causanajunga (Rom. 8:21; Apo. 20:7, 8).
Bibliapa Valishca Yuyaicunata Mascashunchi
w13-S 15/2 28 párr. 15
Taita Diospa ñaupajpi ali ricuringapaca imapash jarcachunga ama saquipaichichu
15 Ñucanchicuna Jehová Diospa munaita rurashpa, aguantashpa sirvijushcamandami shuj gentecunapash Jehová Diospa ñaupajpi ali ricuri ushanga. Apóstol Pabloca Éfeso llactamanda huauquipanicunaman escribishpaca nircami: ‘Cangunamanda cashna jatun llaquicunata ñuca apajujpipash, na shaijunachu canguichi. Canguna ninanda alicachi tucuchunmi, cashna llaquichi tucujuni’ nishpa (Efes. 3:13). Caita escribijushpaca ¿imatata ningapaj munarca? Apóstol Pablopa llaquicunaca ¿imamandata Éfeso llactamanda huauquipanicunataca ayudajurca? Apóstol Pablo llaquicunata aguantajujta ricushpami huauquipanicunaca, Taita Diosta sirvinaca tucuita yali shuj bendición cashcata ricurca. Llaquicunata charimanda yapata desanimarishpaca Jehová Diospa ñaupajpi ali cana, paimanda villachina, imata shuyajushcatapash na valichishcatami ricuchinman carca. Apóstol Pablo llaquicunata aguantashpami Jesusta sirvinaca imatapash yali valishcapacha cashcata ricuchirca. Shinaca Jesusta ali sirvishpa catingapaca imata rurana cajpipash ruranallami capanchi.
cl-S 299 párr. 21
“Cristo chashna ninanda juyana”
21 Jesús shina shujcunata juyashpaca gentecuna imaguta minishtishcata ricushpami ayudanchi, shungumandapash perdonanchi. Shinami Jesús shina ninanda juyashcata ricuchinchi. ‘Cristo chashna ninanda juyajujtaca, pipash na ali yachajpipash’ experienciahuanmi chaitaca yachajupanchi. Jesuspa chaquita ñucanchicunapash catishpaca, ñucanchita ninanda juyaj Jehová Diosmanmi ashtahuan quimirishun.
17-23 DE JUNIO
BIBLIAPA VALISHCA YUYAICUNA | EFESIOS 4-6
“Taita Dios cushca macanajungapaj tucui churajunacunata churajupashunchi”
Jovenguna Diablopa trampacunata mishaichi
APÓSTOL Pabloca nircami, Jesusta ali catijcunaca shinllita macanajuj soldadocunashnami can nishpa. Ñucanchicunaca espiritualmentemi macanajunshna causanchi. Ñucanchipa contracunaca Satanaspash, demoniocunapashmi can. Paicunata na ricui ushashpapash cuidarinami capanchi. Satanaspash, demoniocunapash ashtaca huatacunata gentecunata pandachishpa causaimandami, imashinata pandachinataca alipacha yachan. Chaimi Satanasta mishanaca jovengunapaca shinlli ricurin. Shinaca ¿Satanastapash, demoniocunatapash jovengunaca mishai ushanllu? Ari mishai ushanmi. Jovengunaca Jehovapa ayudahuanmi Satanastaca mishai ushan. Jovengunaca alipacha soldadocunashnami, ‘Taita Dios cushca macanajungapaj tucui churajunacunata churajushcalla’ causanajun (Efesios 6:10-12, liingui).
Jovenguna Diablopa trampacunata mishaichi
4 Shinallatami Diospa Shimimanda yachajunaca panda yachachishcacunahuan ama chapurichun ayudan (Juan 8:31, 32; 1 Juan 4:1). Diospa Shimita tucui shunguhuan alicachinaca alita ‘ruranata jirruta churajunshna’ causachun o Diospa mandashcacunata pactachichunmi ayudan (Sal. 111:7, 8; 1 Juan 5:3). Diospa Shimita ali intindinami pipash ñucanchi crishcacunamanda tapuchijpica na manllashpa parlachun ayudan (1 Ped. 3:15)
7 Diospa mandashcacunaca chai jirru churajuna cuendami ñucanchi shunguta cuidachun ayudan (Prov. 4:23). Soldadocunaca jirruhuan rurashca churajunatallami churajun carca. Shinallata ñucanchipa yuyaita catinapa randica, Taita Diospa mandashcacunatami cazuna capanchi. Ñucanchi yuyaicunata catishpaca pandarishunmi (Prov. 3:5, 6). Chaimi Diospa mandashcacuna ñucanchi shungupi cachun ricuriana capanchi.
10 Romano soldadocunaca chai botascunata churajushpami guerraman rin carca. Cutin Jehovata sirvijcunaca botasta churajunshnami ‘casilla causaita cuj villaicunata’ villachinchi (Is. 52:7; Rom. 10:15). Na manllashpa tucui ladocunapi villachingapami esforzarina capanchi. 20 huatacunata charij Roberto shuti jovenga ninmi: “Ñuca cumbacunaman villachinataca ninandami manllan carcani. Pingaimandami na villachin cashcani. Imamanda shina sintirishcatapash na intindinichu. Cunanga cushijushpami tucui jovengunaman villachini” nishpa.
w18.05 24-26 párrs. 13, 16, 20
Jovenguna Diablopa trampacunata mishaichi
13 Satanasca llullashpami cashna nin, Jehová Diosca gentecunata na llaquinllu, na juyanllu nishpa. Satanaspa llullacunaca ‘flecha pundapi ninata japichishpa shitamushcashnami’ can. 19 huatacunata charij Aida shuti cuitsaguca ninmi: “Jehová Diosca caru carupimi can yanimi. Shinallata Jehová Diosca ñucapa amigo cangapaca na munangachu yanimi” nishpa. Chaita mishachunga ¿imata Aidataca ayudashca? Paica ninmi: “Tandanajuicunaca ñucapa fe shinlliyachunmi ayudan. Tandanajuiman rishpapash na comentanllu carcani. Ñuca comentariocunataca nipi na uyangapaj munanllu nishpami pensarin carcani. Shinapash cunanbica tandanajuicunamanga ali prepararishpami rini. Ishcai o quimsa viajeta comentangapami esforzarini. Shinlli cajpipash tandanajuicunapi comentashpaca cushillami sintirini. Turiñañacunaca ninandami animahuan. Tandanajuicuna tucurishca jipaca Jehová Dios ñucata juyashcatami cuenta japini” nishpa.
16 Soldadocunapa uma imapash ama pasachunmi cascocunaca ayudan carca. Shinallatami ‘quishpirinata yaria’ causanaca chai cascoshna ñucanchi yuyaicunata cuidachun ayudan (1 Tes. 5:8; Prov. 3:21). ‘Quishpirinata yaria’ causanami Jehovapa tucuilla nishcacuna pactarinata crichun ayudan. Shinallata problemacuna ricurijpi ama yapata preocuparichunmi ayudan (Sal. 27:1, 14; Hech. 24:15). Soldadocunaca paicunapa uma ama imapash pasachunga cascotaca churajunapachami carca. Shinallatami ñucanchipash ‘quishpirinataca yaria’ causana capanchi.
20 Apóstol Pabloca nircami, Taita Diospa Shimica shuj espadashnami can nishpa. Chaimi ñucanchipa crishcacunata shujcunaman parlangapaca Diospa Shimita ali utilizana capanchi. Shinallata ñucanchi yuyaicunata cambiangapapashmi Diospa Shimita ali utilizana capanchi (2 Cor. 10:4, 5; 2 Tim. 2:15). Diospa Shimita ali utilizachunga ¿imata ayudanga? Sebastian shuti jovenga 21 huatacunatami charin. Paica ninmi: “Bibliata liijushpaca cada capitulomanda shuj textotami ñuca gushtashca textocunapurapi anotani. Shina ruranami Jehová Dios imashina yuyajta ashtahuan rijsichun ayudahuashca” nishpa. Párrafo 8pi parlashca Daniel jovenga ninmi: “Bibliata liijushpaca villachinapi utilizangapaj textocunataca señalashpami churani. Bibliata alipacha utilizajta ricushpa, paicunata ayudangapaj esforzarijta ricushpaca gentecunaca ashtahuanmi uyangapaj munan” nishpa.
Bibliapa Valishca Yuyaicunata Mascashunchi
it-2-S 938 párr. 5
Santidad
Taita Diospa jucha illaj espíritu. Jehová Diospa jucha illaj espirituta o ushaitaca, paipa munaita siempre pactachingapami Jehová Diosca utilizanlla. Cai espirituca limpio, ima nalitapash na ruraj cajpimi, Jehová Diosca alita rurangapaj siempre utilizan. Chaimandami Jehovapa espiritutaca ‘Diospaj jucha illaj espíritu’ nishpa rijsipanchi (Sl 51:11; Lu 11:13; Ro 1:4; Ef 1:13). Taita Diospa espiritumi gentecunataca alita rurachun, tucuipi limpio causachun ayudan. Cutin pipash imapash nalicunata, mapa ruraicunata rurajushpaca Jehová Diospa jucha illaj espiritutami ‘llaquichita’ ushan (Ef 4:30). Paipa espirituhuanmi Jehová Diosca, pai imashina cashcata ricuchin. Chaimandami Taita Diospa espiritulla cashpapash, Diospa jucha illaj espirituca ‘llaquiyaita’ ushan. Tucui nali ruraicunami ‘Diospaj espíritu imata rurajujtapash jarcai’ ushan (1Te 5:19). Pipash nalitalla rurashpa catijpica Diospa espirituca llaquilla o ‘fiñarishcami’ sintiringa. Chaimi Taita Diosca nalitalla rurajtaca paipa contratashna ricui callaringa (Isa 63:10). Taita Diospa jucha illaj espirituta llaquichijca chai jucha illaj espirituta nali shimicunahuan rimanshnami caita ushan. Cai ruraitaca Jesusca: “Diospaj jucha illaj Espirituta ninanda nalicachishpa rimashcataca, cai causaipipash, jipa causaipipash napacha cungangachu” nircami (Mt 12:31, 32; Mr 3:28-30; ESPÍRITU nishca partetapash ricupangui).
it-1-S 255 párr. 5
Charijyanatalla munashpa causana
Ruraicunapimi ricurin. Yapata charijyanatalla munashpa causajcunataca paicunapa ruraicunapimi rijsirin. Paicunaca yapatami charijyanapilla yuyan. Santiago librota escribij runaguca nircami: “Nali munaita rurajpimi, juchaca ninanda miran” nishpa (Snt 1:14, 15). Charijyanatalla munashpa causaj gentecunamanda parlashpami apóstol Pabloca chai munaita charinaca yanga dioscunata mañajcunashnallatami can nirca (Ef 5:5). Charijyanatalla munaj gentecunaca paicuna imata munanajushcataca shuj diostashnami ricun. Chaimandami Taita Diosta ali sirvinatapash, ali adoranatapash ladoman saquin (Ro 1:24, 25).
24-30 DE JUNIO
BIBLIAPA VALISHCA YUYAICUNA | FILIPENSES 1-4
“Ima illajpipash, na chaitalla yarishpa llaquilla causanachu canguichi”
Taita Dios carashca casilla ali causaitaca pipash na yachai ushanllu
10 Ama preocuparingapaj, shinallata ‘Taita Dios carashca casilla ali causaita’ charingapaca ¿imatata rurana capanchi? Apóstol Pablo nishca shinaca, Jehová Diostami mañana capanchi. Shinaca, imamandapash yapata preocuparijushpaca Jehová Diosta mañapashunchi (1 Pedro 5:6, 7, liingui). Mañajushpaca, Jehová Dios ñucanchimanda preocuparijujta tucui shunguhuan confiashpami mañana capanchi. Bendiciashcamandapash agradicinami capanchi. Jehová Diosca ‘ñucanchi imata mañajujtapash yalita rurangapami ushaita charin’. Chaitaca yariami cana capanchi. Shinami, Jehová Diospi ashtahuan confiashun (Efes. 3:20).
Taita Dios carashca casilla ali causaitaca pipash na yachai ushanllu
7 Pablopa cartata liishpaca ¿imatashi Filipos llactamanda huauquipanicunaca pensashcanga? Paicunaca Pablopash, Silaspash ima pasashcatami yarishcanga. Shinallata, paicuna na yuyashca cosascunata rurashpa Jehová Dios ayudashcatapashmi yarishcanga. Shinaca ¿imatata Pabloca chai huauquipanicunamanga yachachingapaj munarca? Na yapata preocuparinata, shinallata Jehová Diosta mañajpica, paipa casilla ali causaita caranatami, Pabloca yachachingapaj munarca. Filipenses 4:7pica nijunmi, Taita Dios carashca casilla ali causaica “pipash na yachai ushanallami” can nishpa. ¿Imamandata Pabloca shina nirca? Pabloca, Taita Dios carashca casilla ali causaica alipachami can, chaitaca yuyaitallapash na yuyai ushanchichu nishpami shina nirca. Shinaca ¿imatata yachajupanchi? Llaquicunapi cashpa imata ruranata na atinanajujpipash, Jehová Diosca imata ruranataca alimi yachan. Paica ñucanchicuna na yuyashca cosascunatapash ruranllami (2 Pedro 2:9, liingui).
Taita Dios carashca casilla ali causaitaca pipash na yachai ushanllu
16 ‘Pipash na yachai ushanalla, Taita Dios carashca casilla ali causaita’ charishpaca ¿imashinata sintirishun? Bibliapica ninmi: “Taita Dios carashca casilla ali causaimi, cangunapa shungutapash, yuyaicunatapash Cristo Jesusmanda huacaichinga” nishpa (Filip. 4:7, NM ). Bibliata escribishca shimipica, soldadocuna llactata cuidanajujta intindichingapami “huacaichina” nin carca. Soldadocuna cuidanajujta yachashpami, Filipos llactapi gentecunaca tranquilo puñun carca. Ñucanchicunapash, ‘Taita Dios carashca casilla ali causaita’ charishpami, ñucanchi yuyaicunapipash, shungupipash tranquilo sintirinchi. Jehová Dios cuidajujta, ñucanchicuna ali causachun munashcataca seguromi capanchi (1 Ped. 5:10). Chaita yachanami, ama yapata preocuparichun, ama desanimarichun ayudan.
Bibliapa Valishca Yuyaicunata Mascashunchi
it-2-S 525 párr. 9
Ofrendacuna
Taita Diosman carangapaj vino. Ashtahuanbachaca Taita Dios carasha nishca alpacunaman chayashcamandapachami israelitacunaca, Taita Diosman carana ofrendacunapica vinotapash ofrenda shina ca.ran carca (Nú 15:2, 5, 8-10). Israelitacunaca ‘ashtahuan ali vinotami’ altar jahuapi ofrenda shina jichan carca (Nú 28:7, 14; Éx 30:9ta; Nú 15:10tapash liipangui.) Filipos congregacionmanda huauquipanicunamanga apóstol Pabloca nircami: “Ñuca servishpa causajpi canguna crishcamandami, Diosman carashpa rupachinshna ñucataca, yahuarta Ilujchishpa huañuchihuanga. Huañunata yachashpapash, cangunahuanga tucuicunahuanmi, ninandapacha cushijuni” nishpa. Apóstol Pablo “Diosman carashpa rupachinshna ñucataca, yahuarta Ilujchishpa huañuchihuanga” nishpaca, Taita Diosman carangapaj altar jahuapi jichana vinohuanmi chimbapurarirca. Caita nishpaca shuj huauquipanicunamanda imaguta rurana cajpipash rurangapaj listo cashcatami ricuchirca (Flp 2:17). Ña huañunalla cashpami Timoteomanga cashna nishpa escribirca: “Ñucaca, ñami Diosman carashpa huañuchi tucunalla cani. Ñuca rina punllapash, ñami chayamujun” nishpa (2Ti 4:6.)
w07-S 1/1 26 párr. 5
‘Pundata causarinaca’ ñami callarishca
5 Jipaca ‘Taita Dios agllashca Israel’ o ungido huauquipanicunami cielopi ‘Jesushuan causaita causagringapaj’ tandanajunga (Gálatas 6:16; 1 Tesalonicenses 4:17). Caitami ‘[pundata, NM ] causarina’ o “punda causarina” nipanchi (Filipenses 3:10, 11; Apocalipsis 20:6). Tucui ungido huauquipanicuna cielopi causarijpimi, cai Alpa shuj paraíso tucujpi para siempre causana esperanzata charij tauca millón gentecunaca causaringa. Shinaca cai Alpapi causana esperanzata charishpa o cielopi causana esperanzata charishpapash tucuicunallatami “punda causarina” nishca temamandaca yachajushpa catingapaj munapanchi. Punda causarinaca ¿imashinata can? ¿Imahorata pasagrin?