LECCIÓN 10
Testigo de Jehovacunapa tandanajuicunaman rinaca ¿imamandata ali can?
¿Quiquindaca Testigo de Jehovacunapa tandanajuicunamanga pipash invitashcachu? Primera vez tandanajuicunaman rigrijushpaca ashata pingaihuanbashchari sintiripangui. Chaimi tal vez cashna tapuripashcangui: “Testigo de Jehovacunaca ¿imatashi chai tandanajuicunapica ruran? Paicunapaca ¿imashpashi chai tandanajuicunaca importante can? Chai tandanajuicunamanga ñucapash ¿rinachu cani?”. Cai leccionbimi chai tandanajuicunaman rina imashina Taita Diosman ashtahuan quimirichun ayudajta yachajupangui.
1. Testigo de Jehovacunaca ¿imashpata tandanajupanchi?
Bibliata escribij shuj runaguca tandanajuna importante cashcata ricuchishpami, “tandanajuicunapimi, Mandaj Diostaca” alabajusha nirca (Salmo 26:12). Cunanbipashmi Testigocunaca shinallata tandanajushpaca ninanda cushijupanchi. Mundo enteropi Testigocunami cada semana Taita Diosta alabangapaj, Taita Diosman candangapaj, paita mañangapaj tandanajun. Shinallata cada huatami Jatun Tandanajuicunapipash tandanajupanchi.
2. Ñucanchi Tandanajuicunapica ¿imatata yachajui ushapangui?
Ñucanchi tandanajuicunapica Diospa Shimi Bibliata utilizashpami yachachin. Chai tandanajuicunapimi Biblia imata yachachijtaca ‘aliguta intindichin’ (Nehemías 8:8, liipangui). Quiquin chai tandanajuicunaman rishpaca, Jehová Diosmanda, pai imashina cajtapashmi yachajupangui. Jehová Dios quiquinda ninanda juyajta yachajushpaca paipaman ashtahuan quimiringapami munapangui. Shinallata cushilla causachun Jehová Dios ayudajtapashmi yachajupangui (Isaías 48:17, 18).
3. Testigo de Jehovacunapa tandanajuicunapi rijsishca gentecunaca ¿imashinata quiquindaca ayudaita ushan?
Jehová Diosca ñucanchitaca ‘shujcunata juyangapaj y ali cosascunata rurashpa ayudaringapaca, cada unomi caishujmanda chaishujmanda pendiente cana capanguichi. Tandanajunatapash na saquinachu capanguichi’ ninmi (Hebreos 10:24, 25). Ñucanchi tandanajuicunapica tucui shunguhuan juyaj gentecunatami rijsipangui. Paicunapashmi quiquinshnallata Taita Diosmanda ashtahuan yachajungapaj munan. Tandanajuipi cashpaca tucuicunallata Bibliamanda alipacha yuyaicunata parlajtami uyapangui (Romanos 1:11, 12, liipangui). Llaquicunata charishpapash aguantashpa catij gentecunatami rijsipangui. Jehová Diosca siempre tandanajuicunaman richunmi munan.
ASHTAHUAN YACHAJUPASHUNCHI
Cunanga Testigo de Jehovacunapa tandanajuicuna imashina cajta, chai tandanajuicunaman ringapaj esforzarina imamanda ali cashcatapashmi ricugripanchi.
4. Testigo de Jehovacunapa tandanajuicuna
Apostolcunapa punllacunapica Jehová Diosta adorangapami tandanajun carca (Romanos 16:3-5). Colosenses 3:16ta liishpa, cai tapuita contestapangui:
Jesuspa punda catijcunaca ¿imashinata Jehová Diostaca adoran carca?
Cunan punllacunapipashmi testigo de Jehovacunaca paicunapa tandanajui huasicunapi tandanajun. Ñucanchi tandanajuicuna imashina cashcata yachangapaca, cai VIDEOTA ricupai. Chai jipaca jahua dibujota ricushpa cai tapuicunata contestapangui:
¿Testigo de Jehovacunapa tandanajuicunaca Colosenses 3:16pi nishcashnachu can?
Videomandaca ¿imatata ashtahuan gushtaparcangui?
2 Corintios 9:7ta liishpa, cai tapuita contestapangui:
¿Imamandata testigo de Jehovacunapa tandanajuicunapica na culquita mañan?
Cai semanapa tandanajuipi imata yachajugrijushcata ricupaichi.
Cai semanapa yachajungapaj yuyaicunamandaca ¿maijandata ashtahuan yachajungapaj munapanguiman?
¿Yachaparcanguichu?
Internetpi jw.org paginapimi ñucanchi tandanajuicuna maipi, imahora tiajta mascai ushapangui.
Ñucanchi tandanajuicunapica discursocunata cushpa, videocunata ricuchishpami yachachin. Tandanajuicunata callaringapaj, tucuchingapapash siempremi candashpa, mañashpa tucuchinchi.
Tandanajuicunapa huaquin partecunapica tucuicunallatami comentariocunahuan participai ushan.
Ñucanchi tandanajuicunapica tucuicunatallatami ninanda cushijushpa chasquipanchi.
Testigo de Jehovacunapa tandanajuicunaman yaicungapaca na paganachu capangui.
5. Tandanajuicunaman ringapaca esforzarinami minishtirin
Jesuspa familiapi pensaripashunchi. Paicunaca Nazaret llactapimi causan carca. Paicunaca cada huatami Nazaretmanda llujshishpa Jerusalenbi Diospa templo huasiman chayangapaca quimsa punllacunata chaquilla rin carca. Lucas 2:39manda 42caman liishpa, cai tapuicunata contestapangui:
¿Jesuspa, paipa familiapapash Jerusalenman rinaca facilcha carca?
Tandanajuicunaman ringapaca quiquinga ¿ima jarcaicunatata charipangui?
Jarcaicunata charishpapash tandanajuicunaman ringapaj esforzarinaca ¿imamandata ali can? ¿Imamandata shina pensapangui?
Bibliapica Jehová Diosta adorangapaca tandanajuna importante cashcatami ricuchin. Hebreos 10:24 y 25ta liishpa, cai tapuita contestapangui:
Tandanajuicunamanga ¿imamandata na faltashpa rina capanchi?
HUAQUINGUNACA, “Tandanajuicunaman rinaca na minishtirinllu, Bibliamandaca huasipillata yachajurinllami” ninmi.
¿Bibliamanda maijan textohuan o maijan ejemplota utilizashpata Jehová Dios ñucanchicuna imata rurachun munashcataca ricuchipanguiman?
YARINGAPAJ
Tandanajuicunaman rinami Jehová Diosmanda ashtahuan yachajuchun, paipa alipacha amigo tucuchun, shujcunahuan tandanajushpa Jehovata adorachun ayudanga.
¿Imatata yachajupashcanchi?
Jehová Diosca ¿imamandata ñucanchicuna tandanajuicunaman richun munan?
Testigo de Jehovacunapa tandanajuicunapica ¿imatata yachajui ushapangui?
Tandanajuicunaman rinaca ¿imashinata quiquindaca ayudaita ushan?
CAITAPASH RICUPAI
¿Tandanajuicunaman rinataca tal vez manllapanguichu? Shuj jarigu tandanajuicunaman rinata imashpa gushtai callarishcata ricupai.
Shuj joven tandanajuicunaman rinata ninanda gushtaimanda, tandanajuicunaman siempre ringapaj imata rurashcata ricupai.
Tandanajuicunaman rinamanda imata shuj gentecuna yuyajta yachajupai.
“Salón del Reinopi tandanajuicunaman rinaca ¿imamandata ali can?” (jw.org paginapi ricupangui)
Pandillero canata saquichun testigo de Jehovacunapa tandanajuiman rina imashina shuj jariguta ayudashcata ricupai.