Jehová ayudanapimi tucui shungu confiani

JEHOVATA RIJSISHPAMI PAIPI CONFIAI CALLARIRCANI

1948 huatapi Nigeria llactamanda shuj uchilla pueblogupimi nacirircani. Chai huatacunapica ñuca tío Moustapha, shinallata ñuca punda huauqui Wahabipash testigo de Jehovacunami tucurca. Ñuca 9 huatacunata charijpimi ñuca papitoca huañurca. Pai huañujpica ninandami llaquiyarcani. Ñuca huauqui Wahabica papito causarijpimi paitaca cutin ricushun nihuarcami. Chai juyailla esperanzapi pensarinami Bibliata yachajui callarichun ayudahuarca. 1963 huatapimi bautizarircani. Y ñuca quimsa caishuj huauquicunapashmi Testigocuna tucurca.

1965 huatapimi Lagos llactaman rircani. Ñuca huauqui Wilsonga ñami chai llactapi causajushcarca. Chai llactapi Igbobi shuti congregacionmanda huaquin precursorcunahuanga cushillami yalin carcanchi. Paicuna cushilla cajta ricushpami enero de 1968​pi ñucapash precursor canata decidircani.

Betelpi sirvij Albert Olugbebi huauquiguca, jovengunahuan shuj reunionda charingapami organizarca. Chaipica Nigeria llactapi precursor especialcuna minishtirijushcatami parlarca. Chai huauquigu cushillapacha parlashcatami yaripani. Paica: “Quiquinguna joven cashcamandami Jehovata sirvingapaca tiempota, fuerzata utilizaita ushapanguichi. Chaipica ashtaca gentecunaman predicanarami canchi” nircami. Profeta Isaías cuenda Jehová Dios maiman cachajpipash rishalla yashpami solicitudtaca jundachircani (Is. 6:8).

Mayo de 1968​pica, Kano nishca pushtumanmi precursor especial shina cachahuarca. Chai pushtuca Nigeria llactamanda norte ladopimi can. Chai tiempopillatami 1967 huatamanda 1970 huatacamanga guerra de Biafra nishca tiarca. Chai llactapi chai guerra tiashcamandami ashtaca gentecunaca llaquichi tucushpa hasta huañuchi tucurca. Shinapash jipamanga chai guerraca Nigeria llactamanda shuj ladomanmi yalirca. Shuj huauquiguca ñucata ayudangapaj munaimandami Kano llactaman ama ripanguichu nihuarca. Shinapash ñucaca: “Ñucamanda preocuparishcamanda pagui huauquigu. Shinapash Jehová Dios chaiman richun munajpica paillata ñucata cuidanataca seguromi cani” nircanimi.

GUERRA TIASHCA PUSHTUPIMI JEHOVAPI CONFIARCANI

Kano llactapi ima pasashcata ricunaca llaquinaimi carca. Chaipi guerra tiashcamandami ashtaca gentecunaca ninanda sufrishcarca. Predicashpa purinajushpaca huaquinbica guerrapi huañuchi tucushca gentecunatami ricun carcanchi. Kano llactapi huaquin congregacionguna tiashca cajpipash mayoría huauquipanicunami chaimanda pacajushpa rishcarca. Menos de 15 publicadorcunami quidashcarca. Paicunaca manllarishca, desanimarishcami carca. 6 precursor especialcuna chayajta ricushpaca huauquipanigucunaca ninandami cushijurca. Ñucanchi paicunata animajpica ashtahuan alimi sintiri callarirca. Reuniongunata cutin charichun, cutin predicachun, informecunata sucursalman cachachun y publicaciongunata sucursalta cutin mañachunmi paicunata ayudarcanchi.

Tucui precursor especialcunallatami hausa nishca shimita yachajui callarircanchi. Paicuna parlaj shimipillata predicajpimi chai llactamanda ashtaca gentecunaca uyarca. Shinapash Kano llactamanda ashtahuan importante religionda ñaupaman pushajcunaca ñucanchi predicachunga na munarcachu. Chaimandami ashtacata cuidarina carcanchi. Shuj punllaca shuj jarica cuchillota maquipi chaririami ñucata y ñuca cumbatapash calpashpa catirca. Shinapash, paimanda yali ashtahuan calpaj cashcamandami ñucanchitaca na japita usharca. Chaipi causana peligroso cajpipash Salmo 4:8​pi nishcashnami, Jehová ñucanchicuna imatapash na manllashpa causachun cuidarca. Chaimandami publicadorcunaca ashtahuan mirashpa catirca. Cunanbica Kano llactapica 11 congregaciongunapi 500 yali publicadorcunami tian.

NÍGER LLACTAPIMI ÑUCANCHITA CATIRIASHPA LLAQUICHIRCA

Agosto de 1968​pi Kano llactaman chayashcamanda huaquin quillacuna jipallami, ñucata y shuj ishcai precursor especialcunatapash Niamey shuti pushtuman cacharca. Chai pushtuca República de Níger llactapa capitalmi can. Ñucanchicunaca Níger llactaca shuj llactacunamanda yali cunu cunu cashcata cuenta japircanchi. Shinallata chaipi gentecunaca francés shimitami parlan. Shinaca cunu cunu pushtucunapi predicana y francés shimita yachajunami tucurcanchi. Shina cajpipash Jehovapi confiashpami chai llactapi tiashca ashalla publicadorcunahuan predicai callarircanchi. Asha tiempo jipallami, Niamey llactamanda liinata yachaj cazi tucui gentecunaca Bibliamanda estudiangapaj librota charirca. Chai tiempopica La verdad que lleva a vida eterna nishca librohuanmi yachachin carcanchi. Huaquingunaca chai librota mañangapami shamun carca.

Chaipi autoridadcuna testigo de Jehovacunata na ricunayachin cashcataca ñapashmi cuenta japircanchi. Julio de 1969​pica Níger llactapi primera asamblea de circuitotami charircanchi. Chaipica 20purallami carcanchi. Ishcai publicadorcuna bautizarigrinajushcamandami cushillapacha carcanchi. Asambleapa primer punllaca policiacuna shamushpami asambleata charichunga ñana saquirca. Paicunaca precursor especial huauquicunata, superintendente de circuito huauquitapashmi paicunapa oficinacunaman aparca. Chaipi cajpica huaquin cosascunata tapushpami caya punllapash chaimanllata tigramuchun mandarca. Autoridadcunahuan problemacunata charinata cuenta japishcamandami bautizarigrijcunapa discursotaca shuj huasipi charircanchi. Chai jipaca bautizarigrijcunaca shuj riopimi pacalla bautizarirca.

Huaquin semanacuna jipaca Ministerio del Interior nishcapi trabajajcunaca ñucata y shuj picha precursor especialcunatapash chai llactamanda llujchishpa cacharca. Chai llactamanda llujshingapaca 48 horastallami charircanchi y uchallami llujshina carcanchi. Chai mandashcata cazushpami Nigeria llactamanda sucursalman rircanchi. Jipaca, chai sucursalmandaca shuj pushtucunamanmi ñucanchitaca cacharca.

Ñucataca Nigeria llactamanda Orisunbare nishca pueblomanmi cachahuarca. Chaipi tiashca ashalla publicadorcunahuanmi cushijushpa predicarcani. Shinallata huaquin gentecunamanmi Bibliamanda yachachi callarircani. Shinapash 6 quillacuna jipaca sucursalmanda huauquicunaca, Níger llactaman ñucalla tigrachunmi invitahuarca. Chaimandami callaripica manllarishca, preocupado carcani. Shina manllajushpapash Níger llactamanda huauquipanigucunataca cutin ricungapaj munarcani.

Niamey llactaman chayashca cayandi punllami, Nigeriamanda negociota charij shuj jarica ñuca Testigo cashcata cuenta japirca. Chaimi Bibliamanda ashtaca cosascunata tapuhuarca. Paica Bibliata estudiashcamandami tabacota chupanata, tragota ufianata saquishca jipa bautizarirca. Chai jipaca Nigeria llactamanda shuj shuj pushtucunapi predicashpa, shinallata gentecuna Bibliapa yachachishcacunata chasquijta ricuna bendiciongunatami charircani. Níger llactaman ñuca chayajpica 31 Testigocunami tiashcarca, pero chai llactamanda ñuca rijuj horaspica 69 Testigocunami tiarca.

“GUINEA LLACTAPI HUAUQUIPANICUNA ALI O NALI CAJTACA NA ALI YACHAPANCHICHU”

Diciembre de 1977​pica, shuj cursota charingapami Nigeria llactaman tigrarcani. Chai cursoca quimsa semanatami pararca. Chai curso tucurijpica Comité de Sucursalpi coordinador Malcolm Vigo shuti huauquiguca Sierra Leona llactamanda chayamushca shuj cartagutami cuhuarca. Chai huauquicunaca ali saludta charij, inglesta y francesta parlaj soltero precursortami mascanajurca. Shinallata chai huauqui Guinea-Conakri llactapi superintendente de circuito shina sirvichunmi munarca. Vigo huauquiguca, chaimandami quiquindaca cai cursoman invitarcanchi nihuarcami. Chai responsabilidadta pactachina na fácil canata nishca jipami huauquiguca “Chai asignacionda nara chasquishpallata aliguta pensaripai” nishpa consejahuarca. Shinapash “Jehová cachashcamandaca rishallami” nishpami ñapash contestarcani.

Sierra Leona llactaman avionbi rishpa sucursalmanda huauquicunahuanmi tandanajurcani. Comité de Sucursalpi sirvij shuj huauquiguca “Guinea llactapi huauquipanicuna ali o na ali cajtaca na ali yachapanchichu” nihuarcami. Sierra Leona llactamanda sucursalpi sirvij huauquicunami Guinea llactapi predicacionda ricuriana carca. Shinapash chai llactapi politicamanda ashtaca problemacuna tiashcamandami publicadorcunahuanga na parlaita usharca. Guinea llactapi huauquipanicunata visitachun shuj huauquiguta tauca viajecunata cachangapaj munashpapash na ushashcarcachu. Chaimandami huauquicunaca Guinea llactamanda Conakri pushtuman rishpa chaipi causangapaj gobiernopa permisota mañangui nihuarca.

Conakri llactaman chayashpaca Nigeria llactamanda embajadaman rishpami embajadorhuan tandanajurcani. Embajadormanga Guinea llactapimi predicangapaj munani nircanimi. Shinapash paica: “Ama caipi quidaichu, carcelmanmi cachai tucungui o imapash ashtahuanmi pasanga” nihuarcami. Shinallata: “Nigeria llactaman tigrashpa chaipi predicai” nihuarcami. Shina nijpica “caipi quidangapaj decididomi cani” nircanimi. Embajador jarica Guinea llactamanda ministro del Interior nishca jarimanga ñucata ayudachunmi shuj cartata cacharca y paimi ñucata ayudahuarca.

Asha tiempo jipaca Sierra Leona llactamanda sucursalman tigrashpami, Guinea llactamanda ministro imata dicidishcataca huauquicunaman parlarcani. Jehovapa ayudahuan Guinea llactamanda Gobierno, chaipi quidangapaj ñucaman permisota cushcata huauquicuna yachaj chayashpaca ninandami cushijurca.

1978​manda 1989​camanga Guinea y Sierra Leona llactacunapica superintendente de circuito shinami sirvircani. Shinallata Liberia llactapica superintendente de circuito sustituto shinami sirvircani. Callaripica seguidomi irquiyan carcani. Huaquinbica caru caru pushtucunapi cashpami irquiyan carcani. Shinapash huauquipanicunaca ñucata hospitalman apangapaca siempremi esforzarin carca.

Shuj viajeca malaria unguita y vijsapi cuicacunata charishcamandami irquiyarcani. Chaimandami huauquipanicunaca ñuca ñana ali tucungachu yashpami huañujpica maipi enterranata parlarinajushca carca. Chaitami ali tucushpaca yachaj chayarcani. Huaquinbica ñuca causai peligropi cajpipash ñuca asignacionda saquinataca nunca na pensarcanichu. Ñucanchicuna huañujpipash Jehová Diosca causachita ushanmi. Chaimandami Jehová Dioslla ñucata ciertopacha cuidai ushashcata seguro capani.

ÑUCA HUARMIGUHUANMI JEHOVÁ DIOSPI CONFIARCANCHI

1988​pica, Dorcas shuti ñuca huarmigutami rijsircani. Paica humilde, Jehovata ali sirvij precursorami carca. Paihuan cazarashca jipaca superintendente de circuito shinami sirvishpa catircani. Ñuca huarmiguca Jehovata sirvingapaca ninandami esforzarishca, ñucatapash ninandami apoyahuashca. Huaquinbica shuj congregacionman ringapaca, ñucanchi maletacunata apashpami chaquilla 25 kilometrocunata rin carcanchi. Caru caru congregaciongunaman chayangapaca carro cajpi o ima ricurishcata japishpami chayagrin carcanchi. Ashtaca horascunatami huagli huagli, turu turu ñangunata rina tucurcanchi.

Ñuca huarmiguca na manllaj huarmigumi capashca. Huaquinbica ashtaca cocodrilocuna tiaj riocunatami yalina tucurcanchi. Shuj viajeca 5 punllacunatami viajana carcanchi. Shinapash yalingapaj chacacuna huaglishca caimandami barcopi riota yalina tucurcanchi. Ñuca huarmiguca barcomanda llujshijushpami yacuman urmashpa pambari callarirca. Ishcandillatami nadanataca na yacharcanchi. Y chai riopica ashtaca cocodrilocunami tiarca. Antsicarin shuj jovenguna ñucanchita ricuimandami ñuca huarmigutaca salvaparca. Chashna pasashcamandaca tutacunaca muspashpami jatarin carianchi. Shinapash ñucanchi asignaciondaca pactachishpami catircanchi.

Huata 1992 callaripica ñuca huarmigu Dorcas vijsandi cashcatami yachaj chayarcanchi. Shinaca precursor especialcuna shina sirvishpa catinata o na catinatami decidina carcanchi. Pero cai huahuaguca Jehovapa shuj regalomi can nishpami pensarircanchi. Chaimandami ñucanchi ushigutaca Jahgift shutita churarcanchi. Cai shutica “Jehovapa regalo” nisha ninmi. Chuscu huata jipami Eric churigutapash chariparcanchi. Ñucanchi ishcandi huahuagucunami Jehovapa shuj regalo capashca. Ñucanchi ushiguca Conakri llactamanda Oficina Remota de Traduccionbimi asha tiempota sirvirca. Cutin ñucanchi churiguca siervo ministerialmi can.

Tiempohuanga ñuca huarmiguca ñana precursora especial shina sirvishpa catita usharcachu. Pero ñucanchi huahuacunata cuidana cashpapashmi precursora regular shina sirvishpa catirca. Cutin ñucaca Jehovapa ayudahuanmi servicio especial de tiempo completopi sirvishpa catita usharcani. Ñucanchi huahuacuna viñajpica ñuca huarmiguca cutinmi precursora especial shina sirvi callarirca. Cunanbica, ishcandimi Conakri llactapi misionerocuna shina sirvinajupanchi.

JEHOVÁ DIOSMI ÑUCANCHITACA CUIDAN

Jehová Dios maiman richun munajpipash ñucaca siempremi rishcani. Ashtaca viajecunatami ñuca huarmigundi Jehová ñucanchita imashina cuidashpa bendiciashcata ricupashcanchi. Ñucanchi charishca cosascunapi confianapa randica Jehovapimi confiapashcanchi. Chaimandami ashtaca problemacunamanda, preocupaciongunamanda jarcaripashcanchi. Ñuca huarmiguhuanga ‘ñucanchita quishpichij Taita Dios’ ciertopacha ñucanchita cuidajushcatami cuenta japipashcanchi (1 Crón. 16:35). Jehovapi tucui shunguhuan confiaj gentecunapa “causaita alipacha cuidajushcataca seguromi” capani (1 Sam 25:​29, TNM).