FAMILIACUNATA AYUDANGAPAJ | TAITAMAMACUNA
Redes socialescuna | Segunda parte: Quiquinba joven huahuacunataca redes socialesta aliguta utilizachun yachachipaichi
Ashtaca taitamamacunaca redes socialescunapi peligrocuna tiajpimi paicunapa joven huahuacunata redes socialescunata charichunga na saquin. Cutin quiquinga ¿quiquinba huahuacuna redes socialescunata charichun saquipashcanguichu? Charichun saquishca cashpaca, quiquinba huahuacuna ama peligropi urmachunga ¿imatata rurai ushapangui? Quiquinba huahuacunataca ¿imashinata aliguta pensarishpa internetta utilizachun ayudaita ushapanguiman?
Cai temapica caitami yachajupashun:
¿Imata quiquinba churigupaca ashtahuan importante cana can?
¿Imatata yachana capangui? Redes socialescunaca shuj vicio cuendami can. Chaimandami quiquinba churigutaca internetpi ama yapa tiempota yalingapaj controlarichun ayudana capangui.
Bibliapica ninmi: ‘Ima ashtahuan importante cashcataca cuenta japinami’ canguichi (Filipenses 1:10).
Pensaripai: ¿Ñuca churiguca ali horata puñujunllu, debercunata rurai ushajunllu o familiahuan cangapaj tiempota llujchijunllu o redes socialescuna paita afectajunllu? nishpa. Ashtaca doctorcunaca ninmi, huahuacunaca cada tutami 9 horasta puñunata minishtin nishpa. Pero huaquingunaca talvez punllapi tauca horascunata redes socialescunapi caimandami tutaca menos de 7 horasta puñun.
¿Imatata rurana capangui? Quiquinba churihuanga ima ashtahuan importante cashcata y imamanda redes socialescunapi na ashtaca tiempota yalina cashcatami parlana capangui. Quiquinba churigutapash considerashpami pai imatalla na rurana cashcataca nina capangui. Por ejemplo, puñugrijushpaca cuartopi celularcunata ñana utilizana cashcatami nilla capangui. Jatunyashpa controlarinata yachachunmi quiquinba churigutaca ñamanda controlarinata yachachina capangui (1 Corintios 9:25).
¿Imashinashi paica emocionalmente afectaringa?
¿Imatata yachana capangui? Huaquin jovengunaca paicunallata fotocunata tomarishpami selfis nishcacunata ruran. Chai selfiscunapi ali llujshingapami imacunatapash acomodan. Maicunapilla purishcacunatami videopimi churan. Chashnacunata ricushpami huaquin jovengunaca paicunapash shina cangapaj o shina puringapaj munan o huaquingunaca sololla, llaquilla o deprimido sintirin.
Bibliapica ninmi: ‘Envidianataca saquinami canguichi’ (1 Pedro 2:1).
Pensaripai: Redes socialescunata ricushpaca ¿imashinata quiquinba churiguca sintirijun? ¿Shujcunahuan compararishpa mal sintirijunllu? ¿Na shujcunashna ali cuerpota charini nishpa llaquirijunllu? ¿Shujcunaca maicunamanbash rishpami cushilla causanajun cutin ñucaca aburridomi causani nishpa pensajunllu?
¿Imatata rurana capangui? Shujcunahuan compararijuna na ali cashcatami quiquinba churihuanga parlana capangui. Huarmi huahuacunami jari huahuacunata yali ashtahuan afectarinata yachan. Porque huarmi huahuagucunapaca amistadcunata charina, juyaillagu ricurijunaca ashtahuan importantemi can. Quiquinba churita o ushitaca ninallami capangui, shuj tiempogutaca redes socialescunata utilizanata saquinallami cangui nishpa. Jacob shuti jovenguca ninmi: “Ñucaca shuj tiempogutami redes socialescunata borrashpa saquircani. Shinami ashtahuan importante cosascunata en primer lugar churai usharcani. Y shina ruraimandami shujcunamanda peor o mejor cani nishpapash na pensajuni”.
¿Imashinashi redes socialescunapica portaringa?
¿Imatata yachana capangui? Ashtaca gentecunaca ninmi, redes socialescunapi cashpaca, canba causaita ashtaca gentecunaman parlajui cuendami can nishpa. Como ñucanchicuna imata rurashcataca picunapash ricunlla, facilmi imapash problemacunapi yaicuita ushanchi. O facilmi shujcunaca ñucanchimanda pandacunata pensaita ushan.
Bibliapica ninmi: ‘Ima resintirinacunatapash, culiranatapash, caparishpa rimajunatapash, groserota rimanatapash saquinami capanguichi. Ashtahuangarin, caishujhuan chaishujhuanmi ali shungu cana capanguichi’ (Efesios 4:31, 32).
Pensaripai: ¿Redes socialescunamandachu quiquinba churica chismecunapi yaicurca o discutirijurca o ashata groserolla comentariocunata nijurca?
¿Imatata rurana capangui? Quiquinba churitaca internetpi cashpaca respetohuan escribinata, tratanatami yachachina capangui. Niños conectados nishca libropica ninmi: “Huahuacunamanga tanto internetpi tanto frente a frente parlajushpapash sin respeto groserota parlajunaca na ali cashcatami taitamamacunaca yachachina capanchi” ninmi (Martin Kutscher escribishca y José Pérez Escobar traducishca libro).
Yaripangui redes socialespi canaca na minishtirishcapachachu can. Y na tucui taitamamacunachu paicunapa churicunataca redes socialescunata charichun saquin. Si quiquinba churita redes socialescunata charichun saquinguica, quiquinba churigu tiempo aliguta ricushpa controlari ushanata, ali amigocunata chari ushanata y na ali paginacunaman na yaicunataca seguromi cana capangui.