¿Imamandata Taita Dios tiajta yachanaca importante can?

Porque Taita Dios tiajta yachashpami Bibliagupash Taita Diosmanda shamujta o na shamujta yachangapaj munashpa chaitapash investigai ushapangui. Shinallata Biblia cabalta yachachijta yachajushpami ashtacata beneficiaripangui.

Shuj ali causaitami charipangui

HECHOS 14:17PICA CASHNAMI NIN: Taita Diosca “tamiachishpa granocunatapash fucuchishpa, ñucanchiman ima aligutapash carashpa cushichijun”.

CAI SHIMICUNACA ¿IMATATA NISHA NIN? Taita Diosmi cai alpapi tiashca tucui juyailla cosascunata rurarca. Shinallata Bibliata yachajushpami Taita Dios quiquindapash ninanda juyashcata yachashpa quiquinbash cushilla causapangui.

Alipacha consejocuna

PROVERBIOS 2:9PICA CASHNAMI NIN: “Shina cuidajpimi, imatapash cashcatapacha ruranata, ali yuyaita charinata, tucuipaj ali cachun ruranata, tucuipi ali causanatapash yachangui”.

CAI SHIMICUNACA ¿IMATATA NISHA NIN? Taita Dios ñucanchi creador caimandami, ñucanchi cushilla causangapaj imata minishtijtaca yachan. Si quiquin Bibliamanda ashtahuan yachajushpaca Bibliapi ashtaca ali consejocunatami taripangui.

Bibliaca quiquin charishca tucui tapuicunatami contestan

PROVERBIOS 2:5PICA CASHNAMI NIN: “Shina rurashpami, Mandaj Diosta manllanataca yachajungui. Taita Diospaj ali yachaitapashmi taringui”.

CAI SHIMICUNACA ¿IMATATA NISHA NIN? Shuj Creador tiajta yachanami imamanda gentecuna causashcata, imamanda ashtaca llaquicuna, sufrimientocuna tiashcata y shinallata huañushca gentecunahuanbash ima pasajta yachachun ayudan. Chai tapuicunapa respuestacunataca Bibliapimi yachajuita ushapangui.

Ali causaigu tianata yachashpami cushilla causapangui

JEREMÍAS 29:11PICA CASHNAMI NIN: “Cangunaman ñuca imatalla ruranata yarijushcataca, ñucami yachani. Casilla ali causaita caranatami yarijuni, llaquicunataca na cachashachu. Canguna shuyanajushcatami caragrini ninmi Mandaj Diosca”.

CAI SHIMICUNACA ¿IMATATA NISHA NIN? Taita Diosca tucui llaquicunata, tucui sufrimientocunata, shinallata huañuitapash tucuchisha nishpami prometishca. Si Taita Diospa promesacunapi tucui shunguhuan confianchica, ima llaquicuna o problemacuna ricurijpipash aguantashpami ñaupaman catipashun.

Taita Dios tiajta yachanami paicunataca ninanda ayudarca

Estados Unidosmanda Cyndi jovencitaca cashnami nin: “Taita Dios tucui cosascunapi ayudaita ushashcata yachashpaca ninandami cushijuni. Taita Diosca ñuca causaipi imata rurana yachachun, shinallata imapash problemacunata aliguta arreglachun y paitapash shuj amigo cuenda ricuchunmi ayudahuan”.

Francia llactamanda Elise shuti jovencitaca cashnami nin: “Taita Dios tiajta yachashpaca ninandami cushijuni. Porque siempremi paimandaca imagutapash yachajunaca tian. Shinallata pai rurashca tucui cosascunamanda y paipa shimimandapash yachajunaca tian”.

Países Bajosmanda Peter shuti runaguca cashnami nin: “Taita Dios Bibliagupi consejocunata churashcamandaca ninandami cushijupani. Cunanga tucuicunatami respetashpa ricuni. Shinallata shujcunamanda preocuparishpami paicunatapash ayudani. Chaimi cunanga cushillapacha sintirishpa ñucapash ashtahuan ali taita cai ushashcani”.

Estonia llactamanda Liz shuti jovencitaca cashnami nin: “Ñucaca micushpalla, puñushpalla, trabajopi yalishpallami causan carcani. Shinapash cushillaca na causanllu carcani. Pero cunanga cushillami causani”.

Francia llactamanda Adrien shuti jovenga cashnami nin: “Ñucaca siempremi imagumandapash preocupadolla causan carcani. Shinapash tucui llaquicuna, injusticiacuna, tucui sufrimientocuna tucurinata yachashpami cunanga tranquilolla causani”.