CALLARI TEMA | ¿IMATASHI BIBLIACA YACHACHIN?

Mundo enteropi gentecunami Bibliata yachajui ushan

Gentecunaca villachishpa purijpimi testigo de Jehovacunataca rijsin. Shinapash yachaparcanguichu, ñucanchicunaca mundo enteropi gentecunamanmi Bibliata yachachipanchi.

Trabajo pushtupimi Bibliamanda yachajujun

2014 huatapica 8 millón yali testigo de Jehovacunami casi 9 millón 500 mil gentecunaman cada quilla 240 llactacunapi Bibliata yachachinajurcanchi.a Mundo enteropica ashtaca gentecunami Bibliata yachajunajun.

Gentecunaman yachachingapaca cada huatami casi mil 500 millón publicaciongunata, librocunata cashpa, revistacunata cashpa, folletocunata cashpapash casi 700 shimicunapi llujchinchi. Chaimandami gentecunaca maijan shimipi munashpapash Bibliataca yachajunalla can.

“Bibliata yachajunataca na gushtanllu carcani. Shinapash Bibliata yachajushpami ashtaca cosascunata yachajurcani.” (Katlego, Sudáfrica)

“Tucui imata yachangapaj munashcata, shuj cosascunatapashmi Bibliapi yachajurcani.” (Berta, México)

“Ñuca huasipi, ñuca ushashca horasmi Bibliata yachajurcani, alipachami carca.” (Eziquiel, Brasil)

“Ñucami nin carcani 15 minutocunata o media horata cashpapash yachachihuai nishpa. Huaquinbicarin ashtahuan tiempota yachachihuailla ninmi carcani.” (Viniana, Australia)

“Bibliata yachachishcamanda na cobrajtaca na cri usharcanichu.” (Aimé, Benín)

“Ñucaman Bibliata yachachijca cushillami carca, na ñapash culiranllu carca... Ali amigacunami tucurcanchi.” (Karen, Irlanda del Norte)

“Ashtacacunaca Bibliata yachajushpapash na testigo de Jehovacuna tucunllu.” (Denton, Inglaterra)

ÑUCANCHICUNA BIBLIATA IMASHINA YACHACHIJTAMI GENTECUNACA YACHANGAPAJ MUNAN

¿Imashinata Bibliataca yachachin?

Maijan temata yachajungapaj munashpapash yachajunallami can. Taita Dios pi cajta, imashina cajta, ima shuti cajta, maipi cajta, ali rijsishpa Taita Diosman imashina quimirinatapash Bibliapi textocunata ricuchishpami yachachinchi. Shuj tapuicunata charijpipash Bibliapillata ricuchishpami yachachinchi.

Bibliata yachachingapaca ¿Imatata Bibliaca yachachin?b nishca librotapash shuj ayudacunatapashmi charinchi. ¿Imatata Bibliaca yachachin? libroca Taita Diosmanda, Jesusmandami yachachin. Shinallata, imamanda ashtaca llaquicuna tiajta, imamanda huañui tiajta, Taita Diosta imashina mañanata, shuj shuj temacunamandapashmi yachachin.

¿Maipi, ima horata yachajunalla can?

Quiquin maipi munashcapi, ima horas ushashcapimi yachachipanchi.

¿Mashna tiempotata yachajunalla can?

Quiquin ushashca tiempogutami yachachinchi. Ashtacacunaca cada semana casi shuj horasgutami yachajun. Cutin shujcunaca 10 ó 15 minutogutallami yachajun.

¿Mashnatata pagana can?

Nimata na paganachu can. Gratismi yachachipanchi. Jesusca nircami: “Pagahuaichi nishpaca, na purinachu canguichi” nishpa (Mateo 10:8, Mushuj Testamento Quichua Imbabura).

¿Ima horacamanda yachajuna can?

Quiquinmi ricuna capangui. ¿Imatata Bibliaca yachachin? libroca 19 temacunatami charin. Quiquin munashca temacunatami, quiquin munashca tiempopi yachajuita ushapangui.

¿Testigo de Jehová tucunachu can?

Na. Ima religionda catingapaj munashpapash cada unomi ricuna, agllana can. Shinapash Bibliata yachajushpami maijan religionda catina ali cashcata yachapangui.

¿Maipita ashtahuan informacionda tarinalla can?

Ñucanchi crishcacunamanda, rurashcacunamanda ashtahuan yachangapaj munashpaca Internetpi jw.org direccionbi mascapangui.

Yachajungapaj munashpaca ¿imatata rurana can?

Bibliamanda yachajungapaj munashpaca Internetpi escribishpa, cartata cachashpa o telefonopi cayashpa mañanallami can

Internetpi www.pr418.com/qvi direccionman yaicushpa ¿Bibliamanda yachajungapaj munapanguimanllu? nishcapi ricushpa datocunata jundachipangui.
Cai revistapa página 2pi direccionda mascashpapash escribinallami capangui.
Quiquinba llactapi testigo de Jehovacunata mascashpa paicunahuanbash parlanallami capangui.

a Huaquinbica tauca gentecunata tandachishpami yachachin.

b Cai librotaca testigo de Jehovacunami llujchishca. 224 paginacunatami charin. 230 millón yali librocunatami 260 yali shimicunapi llujchishca.

Bibliaca Familiacuna Ali Causachunmi Ayudan

Eziquielca ninmi: “Ñuca huarmi Bibliata yachajui callarishpa cambiajpica tucuillami huasipica ashtahuan ali causai callarircanchi. Chaimandami, imatashi yachajun nishpa ñucapash Bibliata yachajui callarircani, alipami cambiarcani. Bibliata yachajuimandami ñuca familiaca ashtahuan ali causarca” nishpa.

Karenga ninmi: “Bibliata yachajushpami drogata ufianata, machanatapash saquircani. Culirashpapash jarcarinatami yachajurcani. Cunanbica huasitapash ashtahuan limpio, arreglashcallami charini. Ñuca familiata juyanimi, paicunata ayudanatami gushtani. Cunanbimi ashtahuan cushilla causani” nishpa.

Vinianaca ninmi: “Bibliata yachajui callarijpica ashtacacunami rimahuarca. Shinapash ñuca cusaca ninmi carca: ‘Gentecunaca imatapash nichunlla. Can ali cachunmi munani. Yachajushpa catilla’ nishpa. Cunanbimi tucuilla familia ali causanajunchi” ninmi.