¿Imanuypam Bibliata estudianayqui?

Ichaćh Bibliata liguita munalanqui, pero achca liguina caśhanta licalcul illanaculanqui. Chaynü cal’a ama llaquicuychu ashllap-ashllap liguita allaycul’a puydinquim. Cay yaćhachicuycäćhumi yaćhanqui mana pishipallal Bibliata liguinayquipä, chaymi yanapaśhunqui Bibliata liguita, estudiayta masta munanayquipä.

1. ¿Imapïmi puydin cada muyun Bibliata liguinanchic?

Bibliata cada muyun liguiy nunaca cushisham cawsacun’a ima lulaśhampis allinmi can’a (liguicuy Salmo 1:1-3). Bibliata mana pishipallal liguinayquipä ashllap-ashllapmi liguinqui. Entindïta allayculuptiqui, masta liguitam munanqui.

2. ¿Imactam lulanayqui Bibliaćhu liguiśhayqui cawsayniquićhu yanapäśhunayquipä?

Bibliapa nishan yanapaśhunayquipä manam liguillachu liguinqui aśhwanpa liguiśhayquitam “tantiapäcunayqui” (Josué 1:8, TNM). Bibliata liguil cay tapuycunamanmi tantianqui: “¿Imactam Jehovapi yaćhalü? ¿Imanuypam cawsaynïćhu yanapamanman? ¿Imanuypaćh cay textuwan juccunacta yanapaycüman?”.

3. ¿Imanuypam tiempunchacunquiman Bibliata liguinayquipä?

Alli lulayninchic captin manam tiempunchacuchwanchu Bibliata liguinanchicpä. Chaymi callpanchacunanchic Biblia nishannü “tiempunchicta mana usuchinanchicpä” (Efesios 5:16, TNM). Bibliata liguinanchicpä tiempunchacuśhunmi cada muyun, waquinnin Bibliata liguipäcun wala-tutap, waquincunañatacmi imay horapis jamaycuśhanćhu, juccunañatacmi manalapis puñul. ¿Imay horatam ampä allin canman Bibliata liguinayquipä?

MASTA YAĆHAYCUŚHUN

4. ¿Imactam lulanquiman Bibliata liguita gustaśhunayquipä?

Imanuymi ima micuypis allipi-allipi gustamanchic chaynümi Bibliata allipi-allipi liguiptinchic gustamäśhun. Liguiśhun 1 Pedro 2:2 ñatac limaśhun caypi:

• Bibliata cada muyun liguinayquipä callpanchacuptiqui’a, ¿gustaśhunquimanchun masta Bibliata liguita?

Licaśhun VIDEUCTA achca wamla-walaśhcuna Bibliata cada muyun cushisha liguiśhancunacta yaćhaycunanchicpä. Chaypi’a limaśhun caypi:

VIDEO: Jóvenes que han aprendido a amar la Palabra de Dios (5:33)

• Wamla-walaśhcunapä, ¿imapïmi sasa Bibliata liguinanpä?

• ¿Imacunactam lulapäcula Bibliata liguinanpä?

• ¿Imam paycunacta yanapala liguil allinta entindinanpä?

Yanapaycuna Bibliata liguinapä:

• Ashiy juc Bibliacta facil entindinayquipä ñatac confianayquipä. Liguiy Traducción del Nuevo Mundo.

• Gustaśhayquita puntacta liguiluy. Liguiy “Yanapaycuna Bibliata liguita allaycunapä”, nishanćhu.

• Mana un’anayquipä mayćhu quedaśhayquita señalay. “Bibliata liguil señalanayquipä”, cay librupa camacayninćhu cayan.

• JW Library^® nishanwan yanapachicuy. JW Library tablenïquićhu o celularnïquićhu captin, puydinquim Bibliata liguita ñatac uyalita.

• Bibliata entindinayquipä yanapachicuy Traducción del Nuevo Mundo nishanwan. Cayćhumi talinqui mapacunacta, dibujucunacta ñatac juc yanapaycunacta.

5. Yaćhachicünïquiwan estudianayquipä allinta preparacuy

Liguiśhun Salmo 119:34 ñatac limaśhun caypi:

• ¿Imapïmi Bibliata manala liguil o cay libruta manala preparacul Jehovata mañacunayqui?

¿Imam yanapaśhunquiman yaćhachinïquiwan estudianayquipä Biblia nishanta allinta entindinayquipä? Chaypä atïninta liguiy:

1. Yaćhachicuycäpa allaycuyllantam parrafucunata liguinqui.

2. Bibliapi textuncunata ashicul liguiy, chaypi’a tantiaycuy imanuypa cay libruta liguiśhayquiwan tincuśhanta.

3. Llapa tapuycunapa cutichininta marcaycuy. Chayta lulalmi yaćhachinïquiwan estudiaptiqui mastam yanapaśhunqui.

Yaćhaycunayquipä

Jehovapa testiguncuna achca Bibliactam apaycachapäcula. Canan’a apaycachapäcu Traducción del Nuevo Mundo nishan Bibliatam, chaymi exactulla, clarulla, ñatac Diospa śhutinpis cayan (jw.org internetćhu: “¿Tienen los testigos de Jehová su propia Biblia?” niśhanta liguiy).

IMACTAM YAĆHALUNCHIC

Yaćhalanquiñam Bibliaca allinta yanapaśhunayquipä, chaypämi Bibliata liguinayquipä tiempunchacunqui. Ñatac liguiśhayquita entindinayquipä Diosta mañacuy, estudianayquipä allinta preparacuy.

Yalpaśhun

• ¿Imacunam yanapaśhunqui allinta estudianayquipä?

• Ampä, ¿imay horam allin canman Bibliayquita liguinayquipä ñatac estudianayquipä?

• ¿Imapïmi yaćhachinïquiwan estudianayquipä preparacunayqui?

MASTA YAĆHANAYQUIPÄ

Bibliayquita liguinayquipä imacunam yanapaśhunquiman, yaćhanayquipä cay yaćhachicuycäta liguiy.

“Disfrute leyendo la Biblia” (La Atalaya, núm. 1 2017)

Quimsa yanapaycuna Bibliata liguinayquipä, liguiy.

“¿Cómo puede ayudarme la Biblia? Primera parte: Busca tesoros en la Biblia” (Artículo de jw.org)

Bibliata liguita gustaśhunayquipä, cay yaćhachicuycäta liguiy.

“¿Cómo puede ayudarme la Biblia? Segunda parte: Aprende a disfrutar la lectura de la Biblia” (Artículo de jw.org)

Waquin hermanunchiccuna Biblianta imanuypa liguiśhancunacta, yaćhanayquipä licay cay videuta.

Cómo estudiar la Biblia y sacarle provecho (2:06)