Camba congregacionda yanapai

Mundu intiruibi, huaranga huaranga congregacionguna tianaun. Chi congregaciongunaibi manacailla ashca runaguna Jehovata cushiyasha adoranaun. Cai Jesusta caticcunaga, paigunata yachachishcata ashcatami balichinaun. Chasnallata, paiguna congregacionda tucui shunguhuan imatas rasha yanapanaun. Canga, chasnachu camba congregacionbi sintiringui.

1. Imashinata camba congregacionbi camba timpuhuan ursahuan yanapanata ushangui

Huingunami ñucanchi congregacionbi ñucanchi ushashca tuputa yanapanata ushanchi. Camba congregacionbi rucu huauquiguna o ungushca huauquiguna tianzhu. Paigunata yanapana ushanguichu. Tandarinama apanata ushangui o randisha cugrinata o paiguna huasita alichisha pichasha yanapanata ushangui (Santiago 1:27​ta leipai). Chimandas, huingunami ñucanchi tandarina huasita pichangahua, alichingahua yanapanata ushanchi. Caita ranataga mana pihuas mandaitucunchichu. Jehova Diosta, ñucanchi huauquigunata llaquishcamandami shungumanda yanapanchi (Salmo 110:3).

Bautisarishca huauquipanigunaga, congregacionbi masta yanapanata ushanaun. Biblia nishcata pactachic huauquigunaga, siervo ministerial tucusha sirvinata ushanaun. Huashaga, anciano tucunata ushanaunmi. Chasnallata, tucui huauqui paniguna precursor tucusha, mas timputa predicanata ushanaun. Astahuanbas, maican huauqui paniguna tandarina huasigunata shayachisha yanapanaun. Shuccuna randiga, yanapaita minishtic congregacionbi sirvingahua shuc pistuma rinaun.

2. Imashinata ñucanchi cullquihuan ñucanchi charishcagunahuan congregacionda yanapanata ushanchi

Bibliaga nin: “Camba balishca cosascunahuan Jehovata atunyachi” (Proverbios 3:9). Ñucanchi congregacionda, mundu intiruibi Bibliamanda predicanata, cullquihuan ñucanchi charishcagunahuan yanapashaga cushimi sintirinchi (2 Corintios 9:7​ta leipai). Shungumanda cullquita cumbirashaga, turmintuibi auc huauquigunatami yanapanchi. Maicangunaga cumbirasha yanapangahua, “cullquita tandachisha huacaichinaun” (1 Corintios 16:2​ta leipai). Chi cullquitaga, ñucanchi tandarina huasibi tiac cajunbi churanata ushanchi o donate.jw.org internet pistuibi cachanata ushanchi. Ñucanchi charishcagunata cusha yanapashaga, Jehovata llaquishcatami ricuchinchi.

CAIMANDA MASTA YACHAI

3. Can charishcagunahuan yanapai

Jehova y Jesusca, cushiyasha cuc runata llaquinaun. Shuc huaccha huarmiga, pugri ashahuas, pai charishca cullquita shungumanda cumbirara. Jesusca pai rashcata ashcata balichira. Lucas 21:1-4​ta leichi, huasha cai tapuigunamanda cuintanacuichi:

• Jehovata cushiyachingahua, ashca cullquitachu cuna anchi.

• Ñucanchi corazonmanda cucpiga, Jehova y Jesusca imasata sintirinaun.

Can cumbirashca cullquita imaibi gastashcata yachangahua, VIDEOTA ricuichi. Huasha, cai tapuimanda cuintanacuichi:

VIDEO: Jehovaraicu shungumanda cumbirac ashunchi (4:47)

• Ñucanchi shungumanda cumbirashca cullquiga, mundu intiruibi congregaciongunata imasata yanapan.

4. Cambas yanapana ushangui

Callari timpuibi Jehovata adoraccunaga mana cullquillahuanzhu yanapanaura. Diosta adorana huasita alichingahua cushilla sinzhita tarabanaura. 2 Cronicas 34:9-11​ta leichi, huasha cai tapuimanda cuintanacuichi:

• Huin israelitagunaga “Jehovata adorana huasita” cuirangahua imatata ranaura.

Cunan punzhagunaibihuas, testigo de Jehovagunaga israelitaguna rashca shina, paiguna tandarina huasigunata alichisha tarabanaun. Caita yachangahua, VIDEOTA ricuichi. Huasha, cai tapuigunamanda cuintanacuichi:

VIDEO: Ñucanchi tandarina huasigunata cuirashunchi (3:31)

• Imahuata ñucanchi tandarina huasita pichasha cuiranaga balishca an.

• Canga, imashinata yanapanata ushangui.

5. Huauquigunaga congregacionbi mas tarabanata ushanaunmi

Bibliaga bautisarishca huauquigunata congregacionbi masta sirvingahua sinzhita tarabaichi nin. Shuc huauqui caita rashcata yachangahua, VIDEOTA ricuichi. Huasha, cai tapuimanda cuintanacuichi:

VIDEO: Huauquiguna, congregacionbi masta sirvisha catichi (5:19)

• Congregacionbi masta yanapangahua, cai huauqui imatata rara.

Bibliaga, siervo ministerial o anciano tucuna munaccunata, imagunata pactachina ashcata yachachin. 1 Timoteo 3:1-13​ta leichi, huasha cai tapuigunamanda cuintanacuichi:

• Siervo ministerial o anciano tucunata munac huauquigunaga imatata rana anaun.

• Paiguna aillugunahuas imatata rana anaun (Versiculo 4 y 11​ta ricuichi).

• Cai huauquiguna Biblia nishcata pactachishaga, imashinata congregacionda yanapanaun.

IMATA YACHASHCANGUI

Congregacionbi ñucanchi timpuhuan, ñucanchi ursahuan, ñucanchi cumbirashca cullquihuan yanapacpiga, Jehovaga ashcatami balichitucunchi.

Yachashcata cuintai

• Imasata ñucanchi timpuhuan, ñucanchi ursahuan, congregacionda yanapanata ushanchi.

• Imashinata congregacionda ñucanchi cullquihuan, ñucanchi charishcagunahuan yanapanata ushanchi.

• Canga, imata rashallata congregacionda yanapanata munangui.

CANLLATA MASTA YACHAI

Diosca paita adoraccuna diezmota cuchun mana munanzhu. Caimanda yachai.

“Bibliaga diezmota cunamanda imatata nin” (jw.org internet pistuibi)

Bibliaga bautisarishca huauquiguna congregacionbi pushana anaun nin. Pero bautisarishca paniguna chasna rana chanaun.

“Congregacionda pushangahua, Dios pigunatata saquishca” (La Atalaya, febrero 2021)

Caru llactaibi causac huauquiguna publicaciongunata charinauchun nisha, shuc huauquiguna imasa sinzhita tarabashcata ricui.

Congo llactaibi Bibliamanda publicaciongunata cugrinaun (4:25)

Mundu intiruibi predicanata yanapangahua, Testigo de Jehovagunallatami cullquita shungumanda cumbiranchi.

“Mundu intiruibi predicanata yanapangahua, Testigo de Jehovagunaga maimandata cullquita charinaun” (jw.org internet pistuibi)