¿Ima punzhaca llaquicuna illac causashunchu?

BIBLIAPICA CAITAMI NIN

“Diosca...tucui huiquitami ñahuicunamantaca pichanga. Huañuipish, llaquilla canapish, huacaicunapish, nanaicunapish ña mana tiyangachu.” (Apocalipsis 21:3, 4, Biblia en Quichua Cañar.)

CAI JAHUA YACHACUNACA ¿IMAMANTATAC ALLI CAN?

Taita Dios ñucanchicman llaquicunata mana cuc cashcatami alli entendishun (Santiago 1:13).

Ñucanchic llaquihuan cacpica Diospish llaquiric cashcata yachashpami cushicunchic (Zacarías 2:8).

Quipa punzhacuna ima llaquicuna ña mana tiyana cashcatapish yachashunmi (Salmo 37:9-11).

BIBLIAPI NISHCATACA ¿CRINACHU CANCHIC?

Ari. Caipica ishcai yuyaicunamanta ricushun:

• Shuccunata llaquichictaca Diosca piñanmi. Ñaupa tiempopi, shuctac llactacuna pai acllashca llactata ‘llaquichicucta’ ricushpaca, Jehová Diosca llaquillami sintirirca (Jueces 2:18).

  Taita Diosca shuctac gentecunata llaquichictaca piñashpami ricun. Bibliapica ninmi, “mana faltayuc runata huañuchishpa yahuarta jichactaca” Diosca yallitami millanayachin nishpa (Proverbios 6:16, 17).

• Diosca cada shuctami llaquin. Canca, ñuca llaquicunataca mana pi yachanchu ninguichari. Shina cacpipish, Bibliapica ninmi, Jehová Diosca cada shucpac “mai llaquita apashcatapish” yachanmi nishpa (Éxodo 3:7).

  Diosca paipac Mandanahuanmi, cada shucpac llaquicunataca ñalla tucuchinga (Mateo 6:9, 10). Chaicamanca, maijanpish mana nic tucushpalla paita mashcaccunataca, cuyaihuan cushichishpami Diosca ayudacun (Hechos 17:27; 2 Corintios 1:3, 4).