Diospac Mandanaca ¿imatac can?

BIBLIAPICA CAITAMI NIN

“Cai allpa pacha llactacunaca, ñucanchic Diospac, shinallatac pai cachashca Quishpichic Cristopac mandanami tucushca. Paimi huiñai huiñaita mandanga.” (Apocalipsis 11:15, Biblia en Quichua Cañar.)

“Shuc churitami ñucanchicman cushca. Mandanaca paipac maquipimi.” (Isaías 9:6.)

CAI JAHUA YACHACUNACA ¿IMAMANTATAC ALLI CAN?

• Cashcata ruhuac Mandacmi cada shucta ayudanga (Isaías 48:17, 18).

• Ñallami cai allpapica unguicuna illac, cushilla causashun (Apocalipsis 21:3, 4).

BIBLIAPI NISHCATACA ¿CRINACHU CANCHIC?

Ari. Caipica ishcai yuyaicunatami ricushun:

• Jesús mandacushpa ima ruhuanatami ña ricuchirca. Jesusca paipac caticcunataca Diospac Mandana shamuchun, Taita Diospac munai cai allpapi ruhuarichun mañanatami yachachirca (Mateo 6:9, 10). Shinallatac cai mañashcacuna ima shina pactana cashcatami ricuchirca.

  Jesús cai allpapi cashpaca yarcaihuan caccunamanmi cararca, ungushcacunatapish jambirca, huañushcacunatapish causachirca (Mateo 15:29-38; Juan 11:38-44). Shamuc punzhapi Diospac Mandanapi mandacushpa ima allicunata gentecunaman ruhuanatapishmi ricuchirca (Apocalipsis 11:15).

• Cai mundopi llaquicunami Diospac Mandana ñalla shamuna cashcata ricuchin. Jesusca Diospac Mandana manarac mandacpimi cai allpapica achca macanacuicuna, yarcaicuna, allpa chucchuicuna tiyanga nirca (Mateo 24:3, 7).

  Tucui chaicunatami cunan punzhacunapica ricucunchic. Chaimantami Diospac Mandana ñalla tucui llaquicunata tucuchina cashcata tucui shunguhuan crinchic.