KAU 5
Mo te ŋaruhoa o te ꞌAtua te henua nehe-nehe
Te henua nehe-nehe e ko tuꞌu pahe henua nei o aŋanirā. Taꞌe o te ꞌAtua i haŋa mo ai, te mamāe, te ꞌati, ꞌe te taŋi-taŋi i te ao taꞌatoꞌa. Mā Iehoha e haꞌariro te henua pahe kona nehe-nehe e tahi pē muꞌa ka oho ena. ¿Pe hē rā kona? Ki uꞌi te meꞌe kī e te Puka o te ꞌAtua:
Taŋata riva. Te kona nehe-nehe e tau nei, he riro he hare o te ŋaruhoa o te ꞌAtua. He riva nō te meꞌe ka aŋa ena ki a rāua ꞌā. Peira ꞌā he ora he oho rō ꞌai a roto i te ara tītika o Iehoha (Proverbios 2:21).
Rahi ꞌe rauhuru o te kai. I ruŋa i te kona tau nei e ko maruaki haka ꞌou te taŋata. I ruŋa i te vānaŋa o te ꞌAtua e kī era: “He ai te rahi o te tumu kai i ruŋa i te henua” (Salmo 72:16).
Hare ꞌe aŋa riva-riva. I ruŋa i nei henua he haka tuꞌu tahi te huaꞌai i te rāua hare. E te taŋata taꞌatoꞌa he ai te aŋa riva-riva haka koa i a rāua (Isaías 65:21-23).
E ko tamaꞌi haka ꞌou i ruŋa i te ao. E ko moto e ko mate haka ꞌou te nuꞌu i te tamaꞌi. I ruŋa i te vānaŋa o Iehoha e haꞌaki era: “[Mo te ꞌAtua] e haka kore te tamaꞌi” (Salmo 46:8, 9).
Kore te maiūi. I ruŋa i te Puka o te ꞌAtua e kī rō ꞌā: “ꞌIna e tahi taŋata noho [i ruŋa i te henua nehe-nehe] mo kī: ‘Ko maiūi a au’” (Isaías 33:24). E takoꞌa te nuꞌu koke he haꞌere riva-riva, te nuꞌu matakeva, he tikeꞌa, te tariŋa pō, he ŋaroꞌa, te nuꞌu reꞌo kore, he vānaŋa (Isaías 35:5, 6).
He kore te mamāe, te taŋi-taŋi, te mate. Meꞌe kī e te vānaŋa o te ꞌAtua: “Te mate ꞌina toe, ꞌina he taŋi-taŋi, ꞌina he mamāe, te meꞌe o tuꞌa ꞌā ko mao ꞌā” (Revelación [Apocalipsis] 21:4).
He haka kore te taŋata taparahi taꞌata. Ko kī ꞌā e Iehoha: “Te taŋata rake-rake he kokoti mai ruŋa i te henua, ꞌe te taŋata taꞌe moꞌa i te rāua vānaŋa he kume [haka kore], mai ruŋa i a īa” (Proverbios 2:22).
He here he haꞌatura te taŋata ki a rāua ꞌā. He kore te aŋa rake-rake, pahe aŋa tītika kore, taparahi, nou-nou [he rahi o te pohe taꞌe tano ki te meꞌe kē], e te taŋata here kore. Ki kore tahi te ŋā meꞌe nei, te taŋata he haka piri i a rāua, ꞌe he ora he oho rō ai a roto i te ara tītika o te ꞌAtua (Isaías 26:9).